1-2. Eaha te mau haamaitairaa i muri aˈe i te bapetizoraa?

 AUÊ te oaoa i to tatou bapetizoraahia e riroraa ei mero o to Iehova utuafare! Mea fanaˈo ïa tatou e hoê â to tatou manaˈo e to Davida, tei parau: “E oaoa te taata ta oe [Iehova] e maiti e ta oe e haafatata no te parahi i roto i to mau aua.”​—Sal. 65:4.

² Eita Iehova e farii i te taata atoa i roto i to ˈna mau aua. Mai tei faataahia i roto i te tumu parau na mua ˈtu, e faafatata mai o ˈna i te feia tei faaite papu i to ratou hinaaro e faatupu i te auhoaraa piri e o ˈna. (Iak. 4:8) Ia pûpû oe ia oe ia Iehova e ia bapetizohia, e piri atu â oe ia ˈna. Mea papu e i muri aˈe i to oe bapetizoraa, e ninii mai oia i te haamaitairaa a ore roa ˈtu ai oe e ere i te tahi noa ˈˈe mea.​—Mal. 3:10; Ier. 17:7, 8.

3. Eaha te hopoia a te mau Kerisetiano tei pûpû ia ratou e tei bapetizohia? (Koheleta 5:4, 5)

³ E haamataraa noa te bapetizoraa. Ua oti anaˈe oe i te bapetizohia, e faaitoito oe i te tapea i ta oe euhe e tavini ia Iehova e i te ore e taiva ia ˈna noa ˈtu te mau faahemaraa aore ra tamataraa. (A taio i te Koheleta 5:4, 5.) Ei pǐpǐ na Iesu, e pee maite oe i to ˈna hiˈoraa e ta ˈna mau faaueraa. (Mat. 28:19, 20; Pet. 1, 2:21) E tauturu teie tumu parau ia oe ia na reira.

 “A PEE NOA” IA IESU NOA ˈTU TE MAU TAMATARAA E FAAHEMARAA

4. Eaha te auraa e amo ta Iesu mau pǐpǐ i te “pou haamauiuiraa”? (Luka 9:23)

⁴ Eiaha e manaˈo e eita oe e û i te fifi ua oti anaˈe oe i te bapetizohia. Ua parau maitai Iesu e e amo ta ˈna mau pǐpǐ i te “pou haamauiuiraa.” E na reira ratou i “te mau mahana atoa.” (A taio i te Luka 9:23.) Te auraa anei ïa e mauiui noa ta ˈna mau pǐpǐ? E ere roa ˈtu. Te faataa maitai ra oia e hau atu i te mau haamaitairaa ta ratou e fanaˈo, e faaruru atoa ratou i te fifi, e mea mauiui vetahi.​—Tim. 2, 3:12.

5. Eaha te mau haamaitairaa ta Iesu i fafau i te feia e rave i te mau haapaeraa?

⁵ Ua faaruru aˈena paha oe i te patoiraa a te fetii, aore ra ua rave i te mau haapaeraa no te haapao na mua roa i te mau ohipa tei taaihia i te Faatereraa arii. (Mat. 6:33) Ia papu ia oe e ua ite Iehova i to oe taiva ore. (Heb. 6:10) Eita e ore e ua taa ia oe mea papu ta Iesu i parau: “Te taata atoa tei haapae i to ˈna fare, to ˈna taeae, tuahine, metua vahine, metua tane, tamarii aore ra fenua no ˈu nei e no te parau apî oaoa, e hamani-ino-hia ïa. E fanaˈo râ oia tataihanere i teie nei â, te fare, te taeae, te tuahine, te metua vahine, te tamarii e te fenua, e i roto i te ao no a muri aˈe, te ora mure ore ïa.” (Mar. 10:29, 30) Ua hau aˈe ïa te mau haamaitairaa ta oe i fanaˈo i te mau haapaeraa ta oe i rave.​—Sal. 37:4.

6. No te aha e titauhia ˈi ia haavî noa i “te hinaaro tia ore o te tino” i muri aˈe i te bapetizoraa?

⁶ I muri aˈe i te bapetizoraa, e titauhia ia haavî noa i “te hinaaro tia ore o te tino.” (Ioa. 1, 2:16) Inaha, e taata hara noa â oe. I te tahi taime, e manaˈo atoa oe mai te aposetolo Paulo tei papai: “Mea au roa na ˈu te ture a te Atua i roto i to ˈu aau, i roto râ i to ˈu tino, te ite nei au i te tahi atu ture o te aro ra i te ture o to ˈu feruriraa e o te faatîtî nei ia ˈu i raro aˈe i te ture o te hara e vai ra i roto i to ˈu nei tino.” (Roma 7:22, 23) E nehenehe oe e toaruaru no te mau hinaaro tia ore. Teie râ, a haamanaˈo i ta oe i fafau ia Iehova i to oe pûpûraa ia oe ia ˈna. E itoitohia ïa oe ia ore e fati i mua i te faahemaraa. Inaha, e tauturu mai ta oe euhe ia oe. E nafea ïa?

7. E nafea te pûpûraa ia oe ia Iehova e tauturu mai ai ia ore ia taiva ia ˈna?

⁷ Ia pûpû oe ia oe ia Iehova, e haapae oe ia oe. Te auraa, e haapae i to oe iho mau hinaaro e ta oe iho mau fa mea au ore na Iehova. (Mat. 16:24) No reira, ia û oe i te tahi tamataraa, eita ïa oe e uiui e nahea oe. Ua faaoti ê na hoi oe eaha ta oe e rave, oia hoi e tapea i te taiva ore ia Iehova. E tapea noa ïa oe i ta oe faaotiraa papu e faaoaoa ia Iehova, mai ia Ioba. I roto i to ˈna mau ati mauiui mau, ua parau roa oia: “E ore au e faarue i to ˈu hapa ore.”​—Ioba 27:5.

8. E nafea te feruriraa i ta oe i euhe ia Iehova e tauturu mai ai ia ore ia hema?

⁸ Ia feruri oe i ta oe i euhe ia Iehova, e itoitohia oe ia mau papu i mua i te faahemaraa. Ei hiˈoraa, e faahinaaro anei oe i te tahi taata faaipoipo? Eita ïa. Ua fafau ê na oe ia Iehova eita oe e na reira. No te mea ua haavî noa oe i te mau huru aau tano ore, eita ïa oe e ohipa rahi i muri mai i te tinairaa i te reira. E “fariu ê atu” oe i “te eˈa o te feia ino.”​—Mas. 4:14, 15.

9. E nafea te feruriraa i ta oe i euhe ia Iehova e tauturu atoa ˈi ia oe ia rave noa i te mau ohipa pae varua na mua roa?

 ⁹ E ia pûpûhia mai te tahi ohipa o te haamairi ia oe i te mau putuputuraa a te amuiraa? Ua ite oe e nahea oe. Inaha, na mua roa ˈˈe i teie tupuraa, ua faaoti ê na oe eiaha e farii i tera huru ohipa. Eita ïa oe e farii i tera ohipa a feruri atu e nafea ia tuu ia Iehova na mua roa. E tauturu mai te feruriruriraa i to Iesu hiˈoraa. Ua faaoti papu oia e faaoaoa i to ˈna Metua. E oioi roa ïa oe, tei pûpûhia ia Iehova, i te patoi i te mau mea atoa ua ite oe eita o ˈna e au.​—Mat. 4:10; Ioa. 8:29.

10. E nafea Iehova e tauturu ai ia oe ia “pee noa” ia Iesu i muri aˈe i te bapetizoraa?

¹⁰ Ta oe e rave i mua i te fifi aore ra te faahemaraa, e haapapu ïa e te hinaaro ra oe e “pee noa” ia Iesu. Mea papu e tauturu Iehova ia oe ia pee noa ia Iesu. Te na ô ra te Bibilia: “Eita . . . te Atua haapao maitai e vaiiho ia tamatahia outou hau aˈe i ta outou e nehenehe e faaruru. Tera râ, a tamata-noa-hia ˈi outou, te faaineine atoa ra oia i te faaoraraa ia nehenehe outou ia faaoromai maite.”​—Kor. 1, 10:13.

E NAFEA IA PEE NOA IA IESU?

11. Eaha te tahi ravea maitai roa no te pee noa ia Iesu? (A hiˈo atoa i te hohoˈa.)

¹¹ Ua tavini Iesu ia Iehova ma to ˈna aau atoa, e ua faafatata noa ˈtu oia ia ˈna ma te pure. (Luka 6:12) Hoê o te mau ravea maitai roa no te pee noa ia Iesu i muri aˈe i te bapetizoraa, o te rave-noa-raa ïa i te mau mea e piri roa ˈtu â oe ia Iehova. Te parau ra te Bibilia: “I te mea e ua nuu ê na tatou i mua, e haere maite  noa anaˈe ïa ma te tapea i taua aveia ra.” (Phil. 3:16) I te tahi taime, e faaroo oe e ua faaoti te tahi mau taeae e tuahine e rave hau atu â i roto i ta ratou taviniraa moˈa. Ua apiti paha ratou i te Haapiiraa no te feia poro i te parau apî oaoa o te Basileia, ua haere atoa paha i te vahi i hinaaro-rahi-hia te tauturu. Mai te peu e nehenehe atoa ta oe, e fa maitai roa te reira no oe. E hinaaro iho â te nunaa o Iehova e tavini hau atu â ia ˈna. (Ohi. 16:9) Eita anaˈe ta oe e nehenehe, e nahea ïa? Eiaha e manaˈo e mea faufaa ore oe. E titauhia te faaoromai tamau i roto i te hororaa Kerisetiano. (Mat. 10:22) Eiaha e haamoˈe e oaoa roa Iehova ia rave oe i tei maraa ia oe. E ravea faufaa teie no te pee noa ia Iesu i muri aˈe i te bapetizoraa.​—Sal. 26:1.

12-13. Eaha ta oe e rave ia iti mai to oe itoito? (Korinetia 1, 9:16, 17) (A hiˈo atoa i te tumu parau tarenihia “ A tamau noa i roto i te hororaa.”)

¹² Eaha ta oe e rave ia ite oe e mea tahana ta oe mau pure, aore ra aita oe e anaanatae faahou ra i te poro e i te taio i te Bibilia? Ia tupu te reira i muri aˈe i te bapetizoraa, eiaha e manaˈo e ua ere oe i te varua o Iehova. No to tatou huru tia ore, e taui hanoa to tatou mau huru aau. Ia iti mai to oe itoito, a feruri i te hiˈoraa o te aposetolo Paulo. Ua tutava iho â oia i te pee ia Iesu. Ua ite râ oia i te tahi taime e iti mai to ˈna itoito no te rave i tei titauhia. (A taio i te Korinetia 1, 9:16, 17.) Ua parau oia: “Ia faaite noa ˈtu vau i te reira, aita râ to ˈu aau i tae, e hopoia noa iho â tera tei horoahia mai ia ˈu.” Te auraa, ua faaoti papu Paulo e rave i ta ˈna taviniraa noa ˈtu eaha to ˈna huru aau.

 ¹³ Eiaha atoa e rave i te mau faaotiraa ia au i to oe mau huru aau. A faaoti e rave i te mea maitai noa ˈtu aita oe e hinaaro roa ra. Ia tamau oe i te rave i te mea maitai, e taui to oe mau huru aau i muri aˈe. Noa ˈtu eaha te tupuraa, a tamau i te rave i ta oe iho haapiiraa Bibilia, i te pure, i te haere i te mau putuputuraa e i te poro. E tauturu te reira ia oe ia pee noa ia Iesu i muri aˈe i te bapetizoraa. E riro atoa oe ei faaitoitoraa no to oe mau taeae e tuahine.​—Tes. 1, 5:11.

“A TAMAU I TE HIˈOPOA . . . E I TE TAMATA IA OUTOU”

14. Eaha ta oe e hiˈopoa tamau, e no te aha? (Korinetia 2, 13:5)

¹⁴ Mea faufaa atoa ia hiˈopoa tamau ia oe i muri aˈe i te bapetizoraa. (A taio i te Korinetia 2, 13:5.) A hiˈopoa i to oe oraraa no te ite e te pure ra anei oe i te mahana tataitahi, te taio ra e te haapii ra i te Bibilia, te haere ra i te mau putuputuraa e te poro ra oe. A imi i te mau ravea ia au atu â oe i teie mau ohipa pae varua e ia faufaahia ˈtu â i te reira. A uiui na ia oe: ‘E nehenehe anei ta ˈu e faataa i te mau haapiiraa tumu Bibilia? Te vai ra anei te tahi mau ravea e au roa ˈtu â ˈi au i ta ˈu taviniraa? Mea papu anei ta ˈu mau pure, e te faaite ra anei te reira i to ˈu tiaturi taatoa ia Iehova? Mea haere tamau anei au i te mau putuputuraa? Eaha ˈtu â ta ˈu e nehenehe e rave ia faaroo maitai e ia apiti au i te mau putuputuraa?’

15-16. Eaha te haapii mai i ta Robert i farerei no nia i te patoiraa i te faahemaraa?

¹⁵ Mea faufaa atoa ia ite oe eaha to oe mau paruparu. Te faatia ra taeae Robert i te tahi tupuraa ta ˈna i farerei. “I te 20raa o to ˈu matahiti, ua titau mai te tahi hoa ohipa ia ˈu i to ˈna fare i muri aˈe i te ohipa. O mâua anaˈe ta ˈna i parau mai. Taa ihora ia ˈu e te hinaaro ra tera vahine e taoto ia ˈu. Imi atura ïa vau i te otoheraa. I muri iho roa râ to ˈu parauraa ‘eita,’ a faataa ˈtu ai no te aha.” Aita Robert i hema, e mea maitai roa ïa. Feruri ihora râ oia i tei tupu, e taa ihora ia ˈna ahani iho â o ˈna i patoi oioi. Ua parau roa oia: “Aita vau i patoi oioi atu mai ia Iosepha tei horo ê i te vahine a Potiphara. (Gen. 39:7-9) I tera taime, mea fifi mau â no ˈu ia mau papu. Ua tauturu mai teie tupuraa ia ˈu ia ite e  mea titauhia ia haapuai i to ˈu auhoaraa e o Iehova.”

¹⁶ E faufaa-atoa-hia oe ia hiˈopoa oe ia oe iho, mai ta Robert i rave. Noa ˈtu e aita oe i hema, a ui ia oe: “Oioi anei au i te parauraa ‘eita’?” Ia ite oe e mea titauhia ia rave i te mau faatanoraa, eiaha e toaruaru. A oaoa râ e ua ite oe i teie nei i taua paruparu ra. A pure ia Iehova no te reira, e a rave i te mau taahiraa no te faaoti papu e pee i ta ˈna mau ture aveia.​—Sal. 139:23, 24.

17. Mea nafea to Robert faahanahanaraa i te iˈoa o Iehova?

¹⁷ E haapiiraa ê atu te huti mai i ta Robert i farerei. Te na ô ra oia: “I muri iho i to ˈu patoiraa i ta ˈna titauraa, ua parau mai o ˈna: ‘Ua tapea iho â oe!’ Ui atura ïa vau eaha ta ˈna e hinaaro ra e parau. Faatia mai nei oia e na te hoê o to ˈna mau hoa, e Ite no Iehova na mua ˈˈe, i parau ia ˈna e pauroa te feia apî Ite no Iehova te rave huna i te ohipa ino. Manaˈo ihora oia e tamata ia ˈu no te ite e parau mau anei. Oaoa roa vau e ua faahanahana vau i te iˈoa o Iehova.”

18. Eaha ta oe i faaoti papu e rave i muri aˈe i te bapetizoraa? (A hiˈo atoa i te tumu parau tarenihia “ Piti tumu parau ta oe e au roa.”)

¹⁸ Ia pûpû oe ia oe ia Iehova, a bapetizohia ˈtu ai, te faaite ra ïa oe e te hinaaro ra oe ia moˈa to ˈna iˈoa noa ˈtu eaha te tupu mai. E nehenehe oe e tiaturi e ua ite Iehova eaha te mau tamataraa ta oe e faaruru ra e te mau faahemaraa ta oe e patoi ra. E haamaitai oia i ta oe mau tutavaraa e tapea i to oe taiva ore. Ia papu ia oe e maoti to ˈna varua moˈa, e horoa mai oia i te puai. (Luka 11:11-13) Maoti ta Iehova tauturu, e haere ia oe ia pee noa ia Iesu i muri aˈe i te bapetizoraa.