1. Eaha te mau haamaitairaa ia vai i roto i ta Iehova faanahonahoraa?

 E HAAMAITAIRAA rahi ia vai i roto i ta Iehova faanahonahoraa i te roaraa o teie mau mahana hopea. A ino noa ˈi teie nei ao, te fanaˈo ra tatou i te fetii taeae pae varua maoti Iehova. (Sal. 133:1) Te tauturu atoa ra o ˈna ia oaoa to tatou utuafare. (Eph. 5:33–6:1) E te horoa ra oia i te paari e te haroˈaroˈa ia fanaˈo tatou i te hau.

2. Ia tutava tatou i te aha, e no te aha?

² E titauhia râ ia tutava tatou i te tavini ia Iehova ma te taiva ore. No te aha? E nehenehe tatou e mauiui no ta vetahi mau parau e to ratou huru. E nehenehe atoa tatou e toaruaru roa no ta tatou mau hapa, mai te peu iho â râ pinepine tatou i te rave i taua noa hapa ra. E titauhia ia vai taiva ore tatou ia Iehova (1) ia haamauiui mai te hoê Kerisetiano, (2) ia haamauiui mai te hoa faaipoipo, e (3) ua hara anaˈe tatou. I roto i teie tumu parau, e hiˈopoa tatou i na tupuraa tataitahi e e huti tatou i te haapiiraa o te hiˈoraa o vetahi mau tavini taiva ore a Iehova.

A VAI TAIVA ORE IA HAAMAUIUI TE HOÊ KERISETIANO IA OUTOU

3. Eaha ta te mau tavini a Iehova e faaruru nei?

³ Te fifi. Mea riri paha na tatou te huru o te tahi mau taeae e tuahine. E nehenehe atoa vetahi e haamauiui ia  tatou. E hape atoa te mau matahiapo. No teie mau tupuraa, e feaa paha vetahi no nia i te faanahonahoraa a te Atua. Eita ˈtura ratou e hinaaro e tavini ia Iehova “ma te tahoê” e to ratou mau taeae e tuahine. Eita ratou e amui faahou i tei haamauiui ia ratou a faaea roa ˈtu ai i te haere i te putuputuraa. (Zeph. 3:9) E faaotiraa tano anei râ? E hiˈopoa anaˈe eaha te haapii mai i te hoê tavini i roto i te Bibilia tei faaruru i te hoê â tupuraa.

4. Eaha ta te aposetolo Paulo i faaruru?

⁴ Te aamu Bibilia. Ua ite te aposetolo Paulo e mea tia ore to ˈna mau taeae e tuahine. Ei hiˈoraa, ua mǎtaˈu vetahi o te amuiraa ia ˈna. (Ohi. 9:26) Ua faainohia o ˈna e ua ino roa to ˈna roo. (Kor. 2, 10:10) Ua ite atoa Paulo i te hoê matahiapo i te raveraa i te faaotiraa tei faaturori ia vetahi ê. (Gal. 2:11, 12) Ua faarue Mareko hoê o to ˈna mau hoa piri ia ˈna. (Ohi. 15:37, 38) Ua nehenehe teie mau tupuraa e turai ia Paulo ia ore e amui faahou i teie mau Kerisetiano. Aita râ! Ua hiˈo noa oia i te maitai o te mau taeae e tuahine e ua vai taiva ore ia Iehova. Eaha tei tauturu ia ˈna?

5. Eaha tei tauturu ia Paulo ia faaore i te hapa a to ˈna mau taeae e tuahine? (Kolosa 3:13, 14) (A hiˈo atoa i te hohoˈa.)

⁵ Mea here na Paulo i to ˈna mau taeae e tuahine. No to ˈna here i tiatonu ai oia i to ratou mau huru maitatai, eiaha râ i ta ratou mau hapa. Ua faaohipa o ˈna i ta ˈna iho i papai i te Kolosa 3:13, 14. (A taio.) A hiˈo na ua aha Paulo i nia ia Mareko. Aita o ˈna i tapea i te inoino noa ˈtu ua vaiiho Mareko ia ˈna i te roaraa o to ˈna tere mitionare matamua. I roto i ta ˈna rata i to Kolosa, ua faahiti o ˈna ia Mareko to ˈna hoa ohipa tei “tamahanahana rahi” ia ˈna. (Kol. 4:10, 11) A tapeahia ˈi oia i Roma, o Mareko ta ˈna i ani no te haere e tauturu ia ˈna. (Tim. 2, 4:11) Ua faaore iho â Paulo i te mau hapa a to ˈna mau taeae e ua vai piri noa oia ia ratou. Eaha ïa te haapiiraa?

6-7. E nafea ia tamau noa i te here i to tatou mau taeae e tuahine noa ˈtu ta ratou mau hapa? (Ioane 1, 4:7)

⁶ Te haapiiraa. Te hinaaro ra Iehova ia here noa tatou i to tatou mau taeae e tuahine. (A taio i te Ioane 1, 4:7.) Ia ore te hoê Kerisetiano e faaite mai i te here, e nehenehe tatou e tiaturi e te  hinaaro ra oia e pee i te mau faaueraa tumu Bibilia e ua na reira oia ma te feruri ore. (Mas. 12:18) Mea here mau na te Atua i ta ˈna mau tavini taiva ore noa ˈtu ta ratou mau hapa. Ia hape noa ˈtu tatou, eita oia e faarue aore ra e inoino ia tatou. (Sal. 103:9) Eaha paha tatou i te oaoa i te pee i to Iehova huru faaoreraa i te hapa!​—Eph. 4:32–5:1.

⁷ A haamanaˈo atoa e a fatata mai ai te hopea, mea faufaa ia vai piri noa tatou i te mau taeae e tuahine. E uˈana ˈtu â te hamani-ino-raa e e nehenehe tatou e tapeahia no to tatou faaroo. Ia tupu noa ˈtu te reira, e hinaaro iho â tatou i to tatou mau taeae e tuahine. (Mas. 17:17) Teie te hiˈoraa o Josep, a te hoê matahiapo no Paniora. Ua tapeahia o ˈna e te tahi mau taeae no to ratou tiaraa amui ore. Te na ô ra oia: “I te fare tapearaa, e nehenehe matou e riri hanoa no te mea hoê â piha tapearaa to matou. Ua titauhia ïa ia faaoromai e ia faaore noa i te hapa te tahi i te tahi. Ua paruruhia e ua vai hoê noa matou inaha, te vai atoa ra vetahi mau auri e ere i te Ite no Iehova. I te hoê mahana, ua pepe to ˈu rima e aita vau i nehenehe e raverave rii i te tahi ohipa. Na te hoê râ taeae i puˈa i to ˈu ahu e i tauturu mai. Ua ite au i te here i te taime i hinaaro roa ˈi au i te reira.” No reira, mea faufaa ia faaafaro tatou i te fifi te tahi i te tahi, i teie nei â!

A VAI TAIVA ORE IA HAAMAUIUI TO OUTOU HOA FAAIPOIPO IA OUTOU

8. Eaha ta te feia faaipoipo e faaruru ra?

⁸ Te fifi. E fifi to te mau faaipoiporaa atoa. Te faaite ra te Bibilia e fifihia te feia faaipoipo. (Kor. 1, 7:28) Mea tia ore na taata faaipoipo e piti, mea taa ê ïa to raua huru, ta raua e au e e ore e au, to raua taˈere e huru oraraa na mua ˈˈe. E faaite paha raua i te tahi peu tei ore i itehia hou te faaipoiporaa. No teie mau tumu e tupu roa ˈi te peapea. E faahapa noa paha raua te tahi i te tahi, a ore atu ai e tutava amui i te faaafaro i te fifi. E tae roa paha i te manaˈo e mea maitai aˈe ia faataa ê. Tera anei râ te ravea? b E hiˈo anaˈe i te aamu Bibilia o te hoê vahine tei vai taiva ore ia Iehova noa ˈtu te ino o ta ˈna tane.

9. Eaha ta Abigaila i faaruru?

⁹ Te aamu Bibilia. Ua faaipoipo Abigaila ia Nabala. Ia au i te Bibilia, e taata ino e te etaeta Nabala. (Sam. 1, 25:3) E ere i te mea ohie no Abigaila ia ora e te hoê tane mai tera. E ravea anei râ ta ˈna? E, i to Davida, te arii maitihia no Iseraela, opuaraa e haapohe ia Nabala no to ˈna faainoraa ia ˈna e to ˈna mau taata. (Sam. 1, 25:9-13) Ua nehenehe Abigaila e horo ê, a vaiiho atu ai ia Davida ia rave faahope roa i ta ˈna opuaraa. Aita râ! Ua farerei o ˈna ia Davida e ua taparu oia eiaha e haapohe i ta ˈna tane. (Sam. 1, 25:23-27) Eaha tei turai ia ˈna ia na reira?

10. Na te aha i turai ia Abigaila ia vai taiva ore noa ˈtu te ino o ta ˈna tane?

¹⁰ Mea here na Abigaila ia Iehova e mea faatura oia i ta ˈna mau ture aveia no te faaipoiporaa. Ua ite atoa paha  Abigaila eaha ta te Atua i parau ia Adamu raua Eva i to ˈna faaipoiporaa ia raua. (Gen. 2:24) Ua taa ïa ia ˈna e mea moˈa te faaipoiporaa no Iehova. Ua hinaaro oia e faaoaoa i te Atua e no reira o ˈna i faaora ˈi i to ˈna utuafare, oia atoa ta ˈna tane. Oioi o ˈna i te farerei ia Davida, ia ore o ˈna e haapohe ia Nabala. Ua ineine atoa Abigaila i te tatarahapa no te hoê hara ta ˈna i ore i rave. Mea here mau na Iehova i teie vahine itoito inaha, aita o ˈna i haapao noa ia ˈna. Eaha ïa ta te feia faaipoipo e haapii mai i te hiˈoraa o Abigaila?

11. (1) Eaha ta Iehova e titau ra i te feia faaipoipo? (Ephesia 5:33) (2) Eaha ta outou i haapii mai i te hiˈoraa o Carmen? (A hiˈo atoa i te hohoˈa.)

¹¹ Te haapiiraa. Te hinaaro ra Iehova ia faatura te feia faaipoipo i to ratou apiti noa ˈtu to ˈna huru. E oaoa roa te Atua a ite ai ia ratou ia tutava i te faaafaro i to ratou mau fifi, i te here e i te faatura mau te tahi i te tahi. (A taio i te Ephesia 5:33.) Teie te hiˈoraa o Carmen. E ono matahiti i muri aˈe i to ˈna faaipoiporaa, ua haapii o ˈna i te Bibilia e te mau Ite no Iehova e bapetizohia ˈtura oia. Te faatia ra oia: “Aita ta ˈu tane i mauruuru. Ua pohehae o ˈna ia Iehova. E tuhi noa mai o ˈna a parau roa mai ai e faarue o ˈna ia ˈu.” Ua vai taiva ore noa râ Carmen. I te roaraa e 50 matahiti to ˈna faaite-noa-raa i te here e te faatura. Te na ô faahou ra o ˈna: “A mairi ai te mau matahiti, ua haapii au i te taa maitai i to ˈna huru e i te paraparau atu ma te mǎrû. Ua taa ia ˈu e mea moˈa te faaipoiporaa no Iehova, ua rave ïa vau i tei maraa ia ˈu no te tapea i ta ˈu euhe. Aita vau i faarue i ta ˈu tane no to ˈu here ia Iehova.” c Ia fifi noa ˈtu to outou faaipoiporaa, a tiaturi e nehenehe Iehova e tauturu ia outou ia vai taiva ore.

A VAI TAIVA ORE UA HARA ANAˈE OUTOU

12. Mai te aha to tatou huru ua hara anaˈe tatou?

¹² Te fifi. E toaruaru roa paha tatou ua hara anaˈe tatou. Te faataa ra te Bibilia e no te hara e “tatarahapa” roa tatou. (Sal. 51:17) E rave rahi matahiti to taeae Robert taviniraa ia Iehova ei tavini tauturu. Tera râ, ua hara oia. Taa ihora ia ˈna e ua haamauiui o ˈna ia Iehova. Te na ô ra o ˈna: “Ua faahapa noa mai to ˈu manaˈo haava e ua ino roa vau. Ua taˈi  au e ua taparuparu vau ia Iehova. Ua manaˈo vau e eita te Atua e hinaaro e faaroo i ta ˈu mau pure no te mea ua taiva vau ia ˈna.” Ua hara anaˈe tatou, e toaruaru roa paha tatou no te mea e manaˈo tatou ua faarue mai Iehova. (Sal. 38:4) Ua faaruru anaˈe outou i te reira, a hiˈo i te aamu Bibilia o te hoê tavini tei vai taiva ore ia Iehova noa ˈtu ua hara o ˈna.

13. Eaha te hara e te mau hapa ta Petero i rave?

¹³ Te aamu Bibilia. Te po hou a haapohehia ˈi Iesu, e rave rahi hapa ta te aposetolo Petero i rave. Ua hara atoa o ˈna i muri iho. A tahi, ua tiaturi rahi roa Petero ia ˈna iho ma te faatietie e noa ˈtu e faarue te tahi atu mau aposetolo ia Iesu, eita o ˈna e na reira. (Mar. 14:27-29) A piti, i te ô i Getesemane, aita o ˈna i vai ara, ua taoto râ. (Mar. 14:32, 37-41) A toru, ua faarue Petero ia Iesu i to te nahoa haereraa mai e haru ia ˈna. (Mar. 14:50) I te pae hopea, ua haavare o ˈna e toru taime e aita o ˈna i ite ia Iesu a horeo roa ˈtu ai i te reira. (Mar. 14:66-71) Eaha to ˈna huru i muri mai? Peapea roa ihora oia e taˈi atura no ta ˈna hara. (Mar. 14:72) A feruri na i te mauiui o Petero a haapohehia ˈi to ˈna hoa Iesu tau hora i muri iho. Papu, ua haafaufaa ore roa Petero ia ˈna!

14. Eaha tei tauturu ia Petero ia vai taiva ore ia Iehova? (A hiˈo i te hohoˈa i te )

¹⁴ E rave rahi tumu i vai taiva ore ai Petero ia Iehova. Aita o ˈna i faaatea ê ia ˈna, ua apiti noa râ i to ˈna mau taeae e ua tamahanahana ratou ia ˈna. (Luka 24:33) Hau atu, ua fa ˈtu Iesu ia Petero i muri iho i to ˈna tia-faahou-raa no to ˈna hinaaro e faaitoito ia ˈna. (Luka 24:34; Kor. 1, 15:5) Aita atoa Iesu i faahapa noa ˈˈe i to ˈna hoa, ua horoa ˈtu râ i te tahi mau hopoia faufaa. (Ioa. 21:15-17) Ua ite Petero e mea ino ta ˈna i rave, aita râ o ˈna i tiatonu i te reira. No te aha? No te mea ua papu ia ˈna e aita to ˈna Fatu ra o Iesu i faarue ia ˈna. Ua tauturu noa atoa to ˈna mau taeae ia ˈna. Eaha te haapii mai i te hiˈoraa o Petero?

15. Te hinaaro ra Iehova ia papu ia tatou te aha? (Salamo 86:5; Roma 8:38, 39) (A hiˈo atoa i te hohoˈa.)

¹⁵ Te haapiiraa. Te hinaaro ra Iehova ia papu ia tatou e mea here na ˈna ia tatou e ua ineine atoa i te faaore i te hara. (A taio i te Salamo 86:5; Roma 8:38, 39.) Ua hara anaˈe tatou, e toaruaru roa  tatou. Mea tano iho â tera huru aau. Eiaha râ tatou e manaˈo eita Iehova e here faahou mai aore ra e faaore i ta tatou hara. E imi oioi anaˈe ïa i te tauturu. Te na ô ra Robert, faahitihia na mua ˈtu: “Ua hara vau no te mea ua tiaturi rahi roa vau ia ˈu iho.” Taa ˈtura ia ˈna e titauhia ia farerei oia i te mau matahiapo. Te na ô faahou ra oia: “Na roto ia ratou, ua ite roa vau i te here o Iehova. Ua ite au e mea here atoa na te mau matahiapo ia ˈu. Ua tauturu mai ratou ia papu ia ˈu e aita Iehova i faarue mai.” Ia papu atoa ia tatou to Iehova here e to ˈna ineine i te faaore i te hara ia tatarahapa tatou, ia imi i te tauturu e ia tutava i te ore e tapiti. (Ioa. 1, 1:8, 9) A na reira ˈi, e tamau tatou i te tavini ia Iehova noa ˈtu ua hara tatou.

16. No te aha tatou e faaoti ai i te tavini noa ia Iehova?

¹⁶ E oaoa roa Iehova a ite ai te tutava nei tatou i te tavini ia ˈna i te roaraa o teie mau mahana hopea fifi. Maoti ta ˈna tauturu, e noaa ia tatou ia vai taiva ore noa ˈtu te mau haafifiraa. E here noa anaˈe i to tatou mau taeae e tuahine e e faaore anaˈe i ta ratou mau hapa ia haamauiui mai ratou. E faaite anaˈe i to tatou here rahi i te Atua e to tatou faatura i te faaipoiporaa ma te faaafaro i te fifi. Ua hara anaˈe tatou, e imi tatou i ta Iehova tauturu, e farii atoa i to ˈna here e to ˈna ineine i te faaore i te hara e e tamau tatou i te tavini ia ˈna. Ma te na reira, e haamaitai rahi mai Iehova ia ore tatou “e faaea i te rave i te mea maitai.”​—Gal. 6:9.