1. Eaha te fifi ta e rave rahi o tatou e farerei nei?

 UA HAAMAU aˈena anei oe i te hoê fa pae varua mea fifi no oe ia naea? b Mai te peu e e, e ere o oe anaˈe. Ei hiˈoraa, ua hinaaro Philip e haamaitai atu â i ta ˈna mau pure, aita râ i noaa ia ˈna ia faataa i te taime no te pure. Ua haamau Erika i te fa e tae oioi i te mau putuputuraa no te pororaa, ua mairi noa râ te hora ia ˈna i tae i te putuputuraa. E rave rahi taime to Tomáš tamataraa i te taio i te taatoaraa o te Bibilia. Te na ô ra oia: “Aita vau e au ra i te taio i te Bibilia. E toru taime to ˈu tamataraa, e ua tae anaˈe au i te buka Levitiko, e mau roa ta ˈu taioraa.”

2. No te aha eiaha tatou e toaruaru mai te peu aita te hoê fa i naeahia ia tatou?

² Mai te peu aita te hoê fa i naeahia ia oe, eiaha e toaruaru. E titauhia te taime e te tutavaraa rahi ia naeahia ia tatou te mau fa atoa ta tatou e haamau. Ma te tamau i te tutava ia naeahia ia oe ta oe fa, te faaite ra oe e mea faufaa no oe to oe auhoaraa e o Iehova e te hinaaro ra oe e horoa i te mea maitai roa ˈˈe no ˈna. Te haafaufaa ra Iehova i ta oe mau tutavaraa atoa. Aita o ˈna e titau ra i te ore e maraa ia oe. (Sal. 103:14; Mika 6:8) E haamau anaˈe ïa i te mau fa e maraa ia tatou. Eaha râ te titauhia ia naeahia ia tatou te hoê fa? E hiˈopoa anaˈe i te tahi mau manaˈo tauturu.

3. No te aha mea faufaa roa ia anaanatae noa outou?

³ A haamau ai i te fa pae varua, mea faufaa roa ia anaanatae tatou i te tapi i te reira. E titau-atoa-hia râ te tutavaraa rahi. E au to tatou anaanatae e tapi i te hoê fa i te mataˈi e turai ra i te hoê poti taie e tae roa ˈtu i te vahi tapaeraa. Mea puai anaˈe te mataˈi, e tae oioi ïa te poti taie. Hoê â huru no tatou. Ua rahi anaˈe to tatou anaanatae ia naeahia te hoê fa, e tapi atu â tatou i te reira. Te na ô ra taeae David no Salvador: “Ia hinaaro mau oe, e tamau oe i te tutava. Eita ïa oe e vaiiho i te tahi noa ˈˈe mea e tapea ia oe ia naea i tera fa.” Eaha ïa te rave ia rahi atu â to oe anaanatae?

4. Eaha ta tatou e nehenehe e ani i roto i tatou mau pure? (Philipi 2:13) (A hiˈo atoa i te hohoˈa.)

⁴ A pure ia rahi atu â to oe anaanatae. Maoti to ˈna varua, e nehenehe Iehova e horoa mai i te hinaaro no te tapi i te hoê fa. (A taio i te Philipi 2:13.) I te tahi taime, e haamau tatou i te hoê fa no te mea ua ite tatou e e maraa ia tatou e mea au ia na reira. Tera râ, aita paha tatou e anaanatae ra e tapi i te reira. Tera te tupuraa ta tuahine Norina no Ouganda i farerei. Ua haamau o ˈna i te fa e faatere i te hoê haapiiraa Bibilia, no to ˈna râ manaˈo e ere o ˈna i te taata haapii aravihi, aita o ˈna i tamau i te tapi i tera fa. Eaha tei tauturu ia ˈna? Te na ô ra o ˈna: “I te mau mahana atoa, e ani au ia Iehova ia tuu i roto ia ˈu i te hinaaro e faatere i te hoê haapiiraa Bibilia. Ua ohipa vau ia au i ta ˈu mau pure e ua tutava atoa vau i te haamaitai i ta ˈu huru haapiiraa. Tau avaˈe i muri iho, ua rahi atu â to ˈu anaanatae e faatere i te hoê haapiiraa Bibilia. I tera iho â matahiti, haamata ˈtura vau e piti haapiiraa Bibilia.”

5. Ia puai atu â to tatou hinaaro e tapi i ta tatou fa, eaha te mau mea ta tatou e nehenehe e feruri?

⁵ A feruri i te mau mea atoa ta Iehova i rave no oe. (Sal. 143:5) Ua feruri te aposetolo Paulo i to Iehova hamani maitai rahi e ua hinaaro o ˈna e tutava atu â i roto i ta ˈna taviniraa. (Kor. 1, 15:9, 10; Tim. 1, 1:12-14) Ia feruri atoa tatou i te mau mea atoa ta Iehova i rave no tatou, e hinaaro atu â tatou e tapi i ta tatou fa. (Sal. 116:12) E hiˈo anaˈe eaha tei tauturu i te hoê tuahine i Honduras ia naea ia ˈna ta ˈna fa e riro ei pionie tamau. Te na ô ra o ˈna: “Ua feruri au i te here rahi o Iehova ia ˈu. Ua aratai o ˈna ia ˈu i to ˈna nunaa. Te haapao e te paruru ra o ˈna ia ˈu. Ma te feruri i nia i te reira, ua puai atu â to ˈu here ia ˈna e to ˈu hinaaro e riro ei pionie tamau.”

6. Eaha te tauturu mai ia hinaaro atu â tatou e tapi i ta tatou fa?

⁶ A feruri i te mau haamaitairaa ta oe e  fanaˈo ia tapi i ta oe fa. Eaha tei tauturu ia Erika ia naea i ta ˈna fa e tae oioi i te putuputuraa no te pororaa? Te na ô ra o ˈna: “Ua mairi anaˈe te hora, ua ere atoa ïa vau i te tahi tuhaa. Ia tae oioi râ vau, e nehenehe ta ˈu e aroha i te mau taeae e tuahine e e tauaparau rii. E fanaˈo atoa vau i te mau manaˈo tauturu no te haamaitai atu â i ta ˈu taviniraa.” Ua tiatonu Erika i nia i te mau haamaitairaa ia tae oioi i te putuputuraa no te pororaa e ua naea ia ˈna ta ˈna fa. Ia haamau outou i te fa e taio i te Bibilia aore ra e haamaitai atu â i ta outou mau pure, e nehenehe outou e feruri i te auhoaraa piri ta outou e fanaˈo e o Iehova. (Sal. 145:18, 19) Mai te peu ua haamau outou i te fa e faatupu atu â i te hoê huru maitai Kerisetiano, a feruri i te auhoaraa piri ta outou e fanaˈo e o vetahi ê. (Kol. 3:14) I nia i te hoê tapura, e nehenehe outou e tapao i te mau tumu i haamau ai outou i te hoê fa e e hiˈopoa tamau i tera tapura. Te na ô ra Tomáš: “Mea rahi anaˈe te tumu e haamau ai au i te hoê fa, rahi atu â vau i te tutava ia naeahia te reira ia ˈu.”

7. Eaha tei tauturu ia Julio e ta ˈna vahine ia naea i ta raua fa?

⁷ A amuimui e te mau Kerisetiano o te faaitoito ia oe ia tapi i ta oe fa. (Mas. 13:20) A tapao na eaha tei tauturu ia Julio e ta ˈna vahine ia naeahia ta raua fa e rave hau atu â i roto i te taviniraa. Te na ô ra Julio: “Ua maiti mâua i te mau hoa o te faaitoito ia mâua ia tapi i ta mâua fa. E tauaparau ïa matou i nia i ta mâua fa pae varua. Pinepine, hoê â fa atoa ta ratou i haamau aˈena e ua naea ia ratou te reira. E ani to mâua mau hoa eaha ˈtura no ta mâua fa e e faaitoito noa mai ratou.”

8. Ia tapi tatou i te hoê fa i te taime noa e anaanatae ai tatou, eaha te nehenehe e tupu? (A hiˈo atoa i te hohoˈa.)

⁸ I te tahi taime, aita tatou e anaanatae ra i te rave i te tahi noa ˈˈe mea. Te auraa anei ïa eita ta tatou e nehenehe e tutava ia naeahia ia tatou ta tatou fa? E ere. Ei hiˈoraa, e nehenehe te mataˈi e turai i te hoê poti taie e tae roa ˈtu i te vahi tapaeraa. E tauiui noa râ te mataˈi, i te tahi taime mea puai e i te tahi mau mahana, aita ïa e mataˈi. Te auraa anei râ eita te poti taie e nehenehe e tere? E ere. E matini aore ra e hôe to te tahi mau poti taie, e nehenehe ïa te ihitai e faaohipa i te reira no te faatere i te poti e tae roa ˈi i te vahi tapaeraa. E nehenehe to tatou anaanatae e faaauhia i te mataˈi, e tauiui noa hoi te reira. I te tahi mahana, e anaanatae tatou, i te tahi atu râ mahana, aita ïa. No reira, mai te peu e tapi tatou i te hoê fa i te taime noa e anaanatae ai tatou, eita paha ta tatou mau fa e naeahia. Mai  te ihitai o te faaohipa i te tahi atu ravea no te tapae i te vahi tapaeraa, e tamau atoa tatou i te tutava ia naea iho â ia tatou ta tatou fa. Parau mau, e ere i te mea ohie, e oaoa râ tatou. Hou a hiˈo ai eaha ta tatou e nehenehe e rave, e hiˈopoa anaˈe i te tahi mau uiraa.

9. Mea tano anei ia tapi i te hoê fa ua iti anaˈe to tatou anaanatae? A faataa.

⁹ Te hinaaro ra Iehova ia tavini tatou ia ˈna ma te oaoa e te aau tae. (Sal. 100:2; Kor. 2, 9:7) E tamau anei ïa tatou i te tapi i te hoê fa ua iti anaˈe to tatou anaanatae? Teie te hiˈoraa o te aposetolo Paulo. Ua parau o ˈna: “Te haavî nei au i to ˈu iho tino, o ta ˈu e faariro ei tîtî na ˈu.” (Kor. 1, 9:25-27, nota o te irava 27) Ua haavî Paulo ia ˈna iho no te rave i te mea tano, noa ˈtu aita o ˈna i hinaaro. Ua oaoa anei Iehova no ta Paulo i rave? Papu roa ïa e! Ua haamaitai atoa Iehova ia ˈna no ta ˈna mau tutavaraa.​—Tim. 2, 4:7, 8.

10. Ia tamau tatou i te tapi i te hoê fa noa ˈtu aita tatou e anaanatae roa ra, eaha te mau haamaitairaa ta tatou e fanaˈo?

¹⁰ Te oaoa nei Iehova a ite ai e te tamau nei tatou i te tapi i te hoê fa noa ˈtu aita tatou e anaanatae roa ra. Te oaoa nei oia no te mea noa ˈtu aita paha tatou e au roa ra i te hoê tuhaa ohipa, ua faaoti tatou i te rave i te reira no to tatou here ia ˈna. Mai ia ˈna i haamaitai ia Paulo no ta ˈna mau tutavaraa, e na reira atoa Iehova no tatou. (Sal. 126:5) A ite ai i te mau haamaitairaa no ǒ mai ia Iehova, e hinaaro atu â tatou e tapi i ta tatou fa. Te na ô ra te tuahine Lucyna no Poronia: “I te tahi taime, aita vau e hinaaro ra e haere e poro, i te mau taime iho â râ ua rohirohi roa vau. E tutava noa râ vau i te haere, e a hoˈi mai ai na te pororaa e oaoa roa vau.” E hiˈo tatou eaha te nehenehe e rave aita anaˈe tatou e anaanatae roa ra.

11. E nafea Iehova e tauturu mai ai ia haavî atu â ia tatou iho?

¹¹ A pure no te haavî ia outou iho. Te haavîraa ia tatou iho, o te mea ïa “e tapea ia tatou i te rave i te mea ino.” E titau-atoa-hia te haavîraa ia tatou iho no te rave i te mea maitai, i te taime iho â râ mea fifi ia na reira aore ra aita tatou e hinaaro ra. A haamanaˈo e tuhaa te haavîraa ia tatou iho o te hotu ta te varua moˈa e faatupu. E ani anaˈe ïa ia Iehova i to ˈna varua moˈa no te tauturu ia tatou ia faatupu i teie huru maitai faufaa mau. (Luka 11:13; Gal. 5:22, 23) Te faatia ra David mea nafea te pure i te tautururaa ia ˈna. Ua hinaaro o ˈna e rave tamau i ta ˈna iho haapiiraa Bibilia. Te na ô ra o ˈna: “Ua ani au ia Iehova ia tauturu mai ia haavî ia ˈu iho. Maoti ta ˈna tauturu, ua nehenehe au e haamau i te hoê porotarama no ta ˈu iho haapiiraa Bibilia e e rave tamau i te reira.”

12. E nafea te Koheleta 11:4 e tauturu mai ai ia naea i ta tatou mau fa?

¹² Eiaha e tiai i te taime tano roa. I roto i teie ao aita e taime tano roa. Ia tiai tatou i te taime tano, eita roa ˈtu e naea ia tatou ta tatou mau fa. (A taio i te Koheleta 11:4.) Te na ô ra te taeae Dayniel: “Aita e taime tano, na tatou e faaoti eaha te taime tatou e haamata ˈi.” Te faataa atoa ra te taeae Paul no Ouganda no te aha e ere ai i te mea tano ia faanuu noa i te hoê opuaraa: “Ia haamau tatou i te hoê fa noa ˈtu te mau haafifiraa, e haamaitai Iehova i ta tatou mau tutavaraa.”​—Mal. 3:10.

13. No te aha mea maitai ia haamau i te fa e maraa ia outou?

 ¹³ A haamata mǎrû noa. No te mea e mea fifi ia naea i te hoê fa, e iti mai paha to tatou anaanatae. E nehenehe ïa tatou e haamau i te fa e maraa ia tatou. Ei hiˈoraa, ia haamau oe i te fa e faatupu i te hoê huru maitai, e nehenehe oe e imi i te tahi mau ravea rii e faatupu ai oe i te reira. Mai te peu ua haamau oe i te fa e taio i te taatoaraa o te Bibilia, e nehenehe oe e faanaho i te hoê porotarama taioraa e maraa ia oe. No Tomáš, faahitihia i te omuaraa, hoê matahiti to ˈna tutavaraa i te taio i te Bibilia. Te na ô ra oia: “I to ˈu taaraa e aita tera porotarama taioraa e tano ra no ˈu, faaoti atura vau e faanaho i ta ˈu iho porotarama. I te mahana tataitahi, eita e hope ia ˈu i te taio hoê pene e e feruriruri au i nia i te reira. A na reira ˈi, ua au roa vau i ta ˈu taioraa.” No to ˈna anaanatae i ta ˈna taioraa, hinaaro atura Tomáš e faaroa ˈtu â i ta ˈna taioraa a hope roa ˈtu ai ia ˈna i te taio i te Bibilia. c

14. Eaha te tahi fifi te nehenehe e tupu a ore atu ai ta tatou fa e naeahia?

¹⁴ I te tahi taime, te hinaaro mau ra tatou ia naeahia ta tatou fa, e fifi râ te nehenehe e tupu. Ei hiˈoraa, no “te tupuraa manaˈo-ore-hia” e iti roa mai to tatou taime no ta tatou fa. (Koh. 9:11) E fifi paha o te nehenehe e faatoaruaru e e haaparuparu ia tatou. (Mas. 24:10) No to tatou tiaraa taata hara, e hape iho â tatou a haafifi roa ˈtu ai i ta tatou mau tutavaraa. (Roma 7:23) Aore ra e fiu atoa paha tatou. (Mat. 26:43) Eaha te tauturu mai ia faaoromai tamau i mua i te fifi?

15. E fifi anaˈe te tupu, te auraa anei e eita ta tatou fa e naeahia? A faataa. (Salamo 145:14)

¹⁵ E fifi anaˈe te tupu, e ere te auraa eita ta tatou fa e naeahia. Te na ô ra te Bibilia  e farerei iho â tatou i te fifi. Noa ˈtu râ, e nehenehe ta tatou mau fa e naeahia maoti te tauturu a Iehova. (A taio i te Salamo 145:14.) Te na ô ra taeae Philip: “Eita vau e faaea noa i nia i te mau taime aita i naea ia ˈu ta ˈu fa, e tiatonu râ vau i nia i te mau taime atoa i tutava ˈi au ia naeahia tera fa.” Te na ô atoa ra David: “Eita vau e otohe i mua i te fifi, e ravea râ teie no ˈu no te faaite i to ˈu here rahi ia Iehova.” Ia tamau tatou i te tapi i te hoê fa noa ˈtu te fifi, te faaite papu ra ïa tatou i to tatou here ia Iehova. Auê paha Iehova i te oaoa a ite ai e te tamau ra tatou i te tapi i ta tatou mau fa!

16. Eaha te haapiiraa e huti mai i te mau fifi ta tatou e farerei?

¹⁶ A huti i te haapiiraa i te fifi ta outou e farerei. A feruri i nia i te tupuraa e a ui ia oe iho, ‘E titauhia anei ia ˈu ia taui i te hoê mea no te arai i te tahi atu fifi?’ (Mas. 27:12) I te tahi taime, na te fifi e faaite mai eita te tahi fa e maraa ia tatou. Ua farerei aˈena paha oe i tera tupuraa. A hiˈopoa faahou ïa i ta oe fa e a faatano ia au i te maraa ia oe. d Eita Iehova e haafaufaa ore ia oe mai te peu aita i naeahia ia oe ta oe fa.​—Kor. 2, 8:12.

17. No te aha mea faufaa ia haamanaˈo i te mau fa atoa i naeahia ia tatou?

¹⁷ A haamanaˈo i te mau fa atoa i naeahia ia outou. Te parau ra te Bibilia: “E ere hoi te Atua i te Atua parau-tia ore a moˈe ai ia ˈna ta outou ohipa.” (Heb. 6:10) Eiaha atoa ïa e moˈehia ia outou. A haamanaˈo mea nafea outou i te haapuairaa i to outou auhoaraa e o Iehova, to outou faaiteraa ia vetahi ê o vai Iehova aore ra to outou bapetizoraahia. Mai ta outou i tamau i te tapi i ta outou mau fa na mua ˈtu, a tamau atoa i te na reira no te mau fa ta outou i haamau i teie nei.​—Phil. 3:16.

18. Eaha ta tatou e haamanaˈo a tapi noa ˈi i ta tatou fa? (A hiˈo atoa i te hohoˈa.)

¹⁸ Mai te hoê ihitai tei tapae i te vahi ta ˈna i opua e haere, e nehenehe ta tatou fa e naeahia maoti noa te tauturu a Iehova. A haamanaˈo, e rave rahi ihitai o te oaoa ra i to ratou tere. A tamau ai tatou i te tutava ia naeahia ta tatou fa, e oaoa atoa tatou a ite ai e te tauturu e te haamaitai ra Iehova i te reira. (Kor. 2, 4:7) Ia tamau tatou i te tutava, e haamaitairaa rahi ta tatou e fanaˈo.​—Gal. 6:9.