1. O vai ma tei haa no te haamau i te amuiraa i Philipi?

 I TE taeraa ˈtu Paulo, Sila, Luka e Timoteo i Philipi, e rave rahi taata o tera tuhaa fenua Roma tei anaanatae i te poroi o te Faatereraa arii. Ua haa na taeae e maha ma te itoito no te haamau i te hoê amuiraa e putuputu aˈera tera mau Kerisetiano apî i te fare o te tahi vahine farii maitai o Ludia te iˈoa.—Ohi. 16:40.

2. Eaha te fifi ta te amuiraa no Philipi i faaruru?

² Ua faaruru râ tera amuiraa apî i te riri o Satani, ua turai hoi oia i te mau enemi o te parau mau ia patoi uˈana i te pororaa a teie mau Kerisetiano taiva ore. Ua haruhia Paulo e Sila, ua tairihia i te raau e hurihia ˈtura i roto i te fare tapearaa. I te matararaa mai raua i rapae, ua farerei e ua faaitoito raua i te mau pǐpǐ apî a te Mesia. I muri iho, faarue aˈera Paulo, Sila e Timoteo i te oire. E au ra e o Luka tei faaea noa i ǒ. Eaha te huru o te amuiraa apî no Philipi? Maoti te varua moˈa o Iehova, ua tutava ˈtu â tera mau taeae e tuahine i roto i te taviniraa. (Phil. 2:12) Eita e ore ua haapeu roa Paulo ia ratou!

3. Ia au i te Philipi 1:9-11, eaha ta Paulo i ani i roto i ta ˈna mau pure?

³ Hau atu i te ahuru matahiti i muri aˈe, ua papai Paulo i te hoê rata i te amuiraa no Philipi. E taa-maitai-hia to Paulo here i te mau taeae e tuahine no ǒ. Ua parau hoi oia: “Te hinaaro roa nei au e ite ia outou paatoa no to ˈu here rahi ia outou mai to te Mesia ra o Iesu.”  (Phil. 1:8) Na roto i te pure, ua ani Paulo ia Iehova ia rahi noa ˈtu â to te amuiraa here e ia taa maitai ia ratou eaha te mea faufaa roa ˈˈe. Ua pure atoa ia riro ratou ei feia viivii ore e te faaturori ore ia vetahi ê e ia tamau ratou i te rave i ta te parau-tia e faatupu. (A taio i te Philipi 1:9-11.) I roto i teie haapiiraa, e hiˈopoa tatou i te mau aˈoraa ta Paulo i horoa i to Philipi e e nafea atoa tatou ia haapao i te reira i teie mahana.

4. (a) Ia au i te Ioane 1, 4:9, 10, mea nafea Iehova i te haapapuraa i to ˈna here ia tatou? (b) E nafea tatou ia here i te Atua?

⁴ Ua faaite Iehova i to ˈna here rahi ia tatou ma te tono mai i ta ˈna Tamaiti i nia i te fenua no ta tatou mau hara. (A taio i te Ioane 1, 4:9, 10.) Auê tatou i te mauruuru ia Iehova! (Roma 5:8) No reira, e hinaaro tatou e rave mai ta Iesu i pahono i te hoê Pharisea: “Ia here oe ia Iehova to Atua ma to aau atoa e ma to ora atoa e ma to manaˈo atoa.” (Mat. 22:36, 37) Ia taatoa ïa to tatou aau no te Atua e tia ˈi! E hinaaro râ tatou ia rahi noa ˈtu â to tatou here ia ˈna i tera e tera mahana. No reira Paulo i parau ai i to Philipi ia “rahi noa ˈtu â” to ratou here. E nafea tatou ia haapao i tera aˈoraa?

5. E nafea ia rahi noa ˈtu â to tatou here?

⁵ Te na ô ra te Bibilia: “Tei ore e here ra, aita ïa i ite o vai te Atua, no te mea e here te Atua.” (Ioa. 1, 4:8) E titauhia ia ite o vai te Atua no te here ia ˈna. Ua faaite te aposetolo Paulo e rahi noa ˈtu â to tatou here i te Atua ia noaa ia tatou “te ite mau e te haroˈaroˈa” no nia ia ˈNa. (Phil. 1:9) A haapii ai tatou i te Bibilia, ua haamata tatou i te here i te Atua no to ˈna mau huru maitatai. A rahi noa ˈi to tatou ite no nia ia ˈNa, ua here atu â tatou ia Iehova. Ua riro ïa te haapiiraa e te feruri-maite-raa i te Bibilia hoê o te mau mea faufaa roa ˈˈe.—Phil. 2:16.

6. Ia au i te Ioane 1, 4:11, 20, 21, na te aha atoa e tauturu mai ia rahi noa ˈtu â to tatou here?

⁶ E turai mai to te Atua here ia tatou ia here atoa i to tatou mau taeae e tuahine. (A taio i te Ioane 1, 4:11, 20, 21.) E manaˈo paha tatou mea ohie ia na reira no te mea te haamori ra ratou ia Iehova e te tutava atoa ra i te faaite i to ˈna mau huru maitatai. Mai ia Iesu, ua ineine paha tatou i te horoa i to tatou ora no ratou. I te tahi râ taime, mea fifi ia here te tahi i te tahi. E hiˈo mai tatou i te tahi tupuraa i roto i te amuiraa no Philipi.

7. Eaha te haapiiraa e huti mai i ta Paulo aˈoraa ia Euodia raua Sunetuhe?

⁷ Ua rohi amui Euodia e Sunetuhe e te aposetolo Paulo. Ua tupu râ te tahi peapea i roto ia raua. I roto i ta ˈna rata i te amuiraa no Philipi, ua faahiti roa ˈtu Paulo i te iˈoa o na tuahine a aˈo ai ia raua ia faatupu i te “manaˈo hoê.” (Phil. 4:2, 3) Ua titau-atoa-hia ia faaue Paulo i te amuiraa atoa ia “rave i te mau mea atoa ma te amuamu ore e te aimârô ore.” (Phil. 2:14) Eita e ore ua tauturu ta ˈna mau aˈoraa i na tuahine taiva ore, oia atoa râ i te toea o te amuiraa, ia here atu â i te tahi e te tahi.

8. Eaha te faaiti i to tatou here i te mau taeae e tuahine e eaha te tauturu mai?

⁸ Mai ia Euodia raua Sunetuhe, e  nehenehe to tatou here i te tahi e te tahi e iti mai ia haapao noa tatou i te mau hapa a to tatou mau taeae e tuahine. E hape tatou paatoa i te mau mahana atoa. Ia faaea noa tatou i nia i te mau hapa a vetahi ê, mea fifi ia here ia ratou. A hiˈo na, e riri paha tatou ia ore te tahi taeae e tauturu mai ia tamâ i te Piha a te Basileia. Ia feruri tatou i te mau hapa atoa ta ˈna i rave, e ere te here te rahi mai, o te riri râ! Eaha ïa te titauhia ia rave i tera mau taime? A haamanaˈo te ite ra Iehova i te mau hapa a tera taeae, oia atoa râ i ta tatou. Noa ˈtu râ, te here noa ra Iehova ia ˈna e ia tatou atoa. No reira, e here anaˈe ia vetahi ê mai ta Iehova e rave ra e e tapea anaˈe i te hoê feruriraa maitai no nia i to tatou mau taeae. E tutava anaˈe i te here te tahi i te tahi no te tahoê maite atu â!—Phil. 2:1, 2.

9. A papai ai i to Philipi, eaha te tahi o te mau “mea faufaa roa ˈˈe” ta Paulo i manaˈo?

⁹ Ua aratai te varua moˈa ia Paulo ia faaue i to Philipi e i te mau Kerisetiano atoa râ, ia “taa maitai . . . eaha te mea faufaa roa ˈˈe.” (Phil. 1:10) Eaha te tahi o te mau mea faufaa roa ˈˈe? O te haamoˈaraa i te iˈoa o Iehova, te faatupuraa i ta ˈna mau opuaraa, te hau e te auhoêraa o te amuiraa. (Mat. 6:9, 10; Ioa. 13:35) Ia haapao tatou i te reira i te mau mahana atoa, te here mau ra ïa tatou ia Iehova.

10. Eaha te titauhia ia tatou ia rave no te riro ei feia viivii ore?

¹⁰ Ua parau atoa Paulo e titauhia i te mau Kerisetiano ia riro “ei feia viivii ore.” Eita tatou e nehenehe e riro roa mai te Atua moˈa ra o Iehova! Ia imi râ tatou i te mau ravea atoa ia rahi atu â to tatou here e ia haapao atu â tatou i te mau mea faufaa roa ˈˈe, e riro tatou ei feia viivii ore i te aro o Iehova. Te tahi ravea no te faaite i to tatou here, o te oreraa ïa e faaturori ia vetahi ê.

11. No te aha e titauhia ia haapae i te faaturori ia vetahi ê?

¹¹ E faaararaa faufaa roa te faaueraa ia riro ei feia “faaturori ore ia vetahi ê.” E nafea tatou e faaturori ai i te tahi taata? Na roto i ta tatou faaanaanataeraa, to tatou faaahuraa e te toroa aore ra ohipa ta tatou e maiti. E ere paha te reira i te mea ino, mea faufaa roa râ ia tâuˈa eita anei to te tahi atu manaˈo haava e hauti aore ra e turori. Ua parau Iesu mea maitai aˈe ia taamuhia i nia i to tatou aˈî te hoê ofai rahi a hurihia ˈtu ai i raro i te moana, i te faaturoriraa i te hoê o ta ˈna mau mamoe!—Mat. 18:6.

12. Eaha ta te hiˈoraa o na pionie e haapii mai ra?

¹² Ua haapao maite te tahi na pionie faaipoipohia i ta Iesu faaararaa. I roto i ta raua amuiraa, ua paari te hoê taeae e ta ˈna vahine bapetizo-apî-hia i roto i te hoê utuafare etaeta roa. Ua tiaturi na hoa faaipoipo eita e tia i te mau Kerisetiano ia haere i te fare teata noa ˈtu e ere te hohoˈa teata i te mea ino. Ua hitimahuta roa raua a na reira ˈi na hoa faaipoipo pionie. I muri mai, ua haapae roa na pionie i te haere i te fare teata e tae roa ˈtu i te taime e paari mai ai te manaˈo haava o na hoa faaipoipo bapetizo-apî-hia. (Heb. 5:14) Na roto i te  haapaeraa ta raua i rave, ua haapapu na pionie i to raua here i na taeae e tuahine apî.—Roma 14:19-21; Ioa. 1, 3:18.

13. E nafea paha tatou e nehenehe ai e turai ia vetahi ê ia hara?

¹³ Te tahi atu ohipa o te faaturori, o te turairaa ia vetahi ê ia hara. A feruri na e ua tutava maoro te hoê piahi i te faarue i te peu inu ava. Ua taa ia ˈna e titauhia ia haapae roa oia i te reira. Rave aˈera oia i te mau tauiraa e bapetizohia ˈtura. I muri mai, ua titau manihini te hoê taeae ia ˈna e turaihia ˈtura to tatou taeae apî ia inu i te ava na roto i teie mau parau: “E Kerisetiano oe i teie nei, e paruru te varua moˈa ia oe! Hoê tuhaa o te hotu o te varua, o te haavîraa ia oe iho. Ia haavî oe ia oe, e inu tano noa ïa oe!” A feruri na i te nehenehe e tupu ia faaroo to tatou taeae apî i tera huru paraparau!

14. E nafea te mau putuputuraa e tauturu mai ai ia haapao i te mau faaueraa atoa i roto i te Philipi 1:10?

¹⁴ E tauturu mai ta tatou mau putuputuraa ia haapao i te mau faaueraa atoa i roto i te Philipi 1:10. Na mua, te haamanaˈo mai ra te maa pae varua i te mau putuputuraa eaha te mea faufaa roa ˈˈe no Iehova. A piti, e faataahia mai e nafea ia faaohipa i ta tatou i haapii ia riro noa tatou ei feia viivii ore. A toru, e turaihia tatou “ia faaite i te here e ia rave i te mau ohipa maitai roa.”  (Heb. 10:24, 25) Rahi atu â tatou i te faaitoitohia e to tatou mau taeae, rahi atu â tatou i te here ia Iehova e ia ratou. Ia tupu maite na here e piti i roto i to tatou aau, eita roa tatou e faaturori i to tatou mau hoa Kerisetiano!

15. Eaha te auraa ia rave atu â i “ta te parau-tia e faatupu”?

¹⁵ Ua pure Paulo ia rave atu â to Philipi i te mau ohipa “ta te parau-tia e faatupu.” Oia hoi, te hereraa ia Iehova e i ta ˈna mau tavini atoa e te faaiteraa ia vetahi ê i to ratou faaroo ia Iesu e to ratou tiaturiraa no a muri aˈe. (Phil. 1:11) I roto i te Philipi 2:15, te parau-atoa-hia ra e anaana te mau Kerisetiano “ei tiarama i roto i teie nei ao.” Mea tano roa tera faahohoˈaraa, ua parau hoi Iesu o ta ˈna mau pǐpǐ “te maramarama o teie nei ao.” (Mat. 5:14-16) Ua faaue atoa oia ia ratou ia “faariro i te taata” ei pǐpǐ na ˈna e ia riro ei ite no ˈna e “tae noa ˈtu i te hopea o te fenua.” (Mat. 28:18-20; Ohi. 1:8) E rave tatou i “ta te parau-tia e faatupu” ma te apiti tamau i tera ohipa faufaa roa!

16. Mea nafea te Philipi 1:12-14 e haapapu ai e nehenehe tatou e anaana ei tiarama noa ˈtu te tupuraa fifi? (A hiˈo i te hohoˈa i te api matamua.)

¹⁶ E nehenehe tatou e anaana ei tiarama noa ˈtu eaha te tupuraa. I te tahi taime, e nehenehe te hoê tupuraa fifi e horoa mai i te ravea no te poro i te taata. A papai ai te aposetolo Paulo i ta ˈna rata i to Philipi, ua tapeahia oia i roto i te hoê fare i Roma. Ua faaea anei râ Paulo i te anaana ei tiarama? Aita, ua poro hoi oia i te mau tiai e te feia atoa o tei haere atu e farerei ia ˈna. Ua poro  noa Paulo ma te itoito e ua tauturu to ˈna hiˈoraa i te mau taeae ia tiaturi e ia faaitoito i te faaite i “te parau a te Atua ma te mǎtaˈu ore.”—A taio i te Philipi 1:12-14; 4:22.

17. Mea nafea te tahi mau taeae e tuahine i te tamauraa i te poro noa ˈtu te fifi? A horoa i te hiˈoraa.

¹⁷ E rave rahi taeae e tuahine te pee nei i te itoito o Paulo. I te mau fenua ua opanihia te ohipa pororaa, ua imi ratou i te tahi atu mau ravea no te faaite i te parau apî oaoa. (Mat. 10:16-20) I te hoê o tera mau fenua, ua faaitoito te tahi tiaau haaati i te feia poro ia rave faahope roa i ta ratou tuhaa fenua, oia hoi ia poro i to ratou fetii, feia tapiri, hoa haapiiraa, hoa ohipa e te mau taata ta ratou i matau. E piti matahiti i muri iho, ua maraa roa te numera o te mau amuiraa i roto i tera tuhaa haaati. E haapiiraa faufaa mau te huti mai i to ratou hiˈoraa. Noa ˈtu aita te ohipa pororaa i opanihia i ǒ nei, e imi anaˈe i te mau ravea atoa no te poro i te taata. Ua papu ia tatou e horoa mai iho â Iehova i te puai e titauhia no te tamau i te poro noa ˈtu te fifi!—Phil. 2:13.

18. Eaha ta outou i faaoti papu i te rave?

¹⁸ I teie nei â, e faaoti papu anaˈe i te faaohipa i te mau aˈoraa ta Paulo i horoa i te mau Kerisetiano no Philipi. E haapao anaˈe i te mau mea faufaa roa ˈˈe, e riro anaˈe ei feia viivii ore e te faaturori ore ia vetahi ê e e rave anaˈe i te mau ohipa ta te parau-tia e faatupu. E rahi atu â ïa to tatou here e e faahanahana tatou i to tatou Metua î i te here ra o Iehova!