I ROTO i te Bibilia, e rave rahi taata “mai ia tatou te huru” tei faahiti i te mau parau putapû mau. (Iak. 5:17) O te aposetolo Paulo hoê o ratou. Teie ta ˈna i faˈi i roto i te Roma 7:21-24: “Ia hinaaro vau e rave i te mea maitai, te ite ra vau i roto ia ˈu te hinaaro e rave i te mea ino. . . . Auê hoi au te taata ati rahi e!” E ere anei i te mea mahanahana ia ite ua hepohepo atoa te hoê tavini haapao maitai mai ia Paulo no to ˈna mau paruparu?

Ua faahiti atoa râ Paulo i te tahi atu manaˈo putapû mau. I roto i te Galatia 2:20, ua haapapu oia ua “here” Iesu ia ˈna e ua “horoa” atoa i to ˈna ora no ˈna. E ere paha tera to tatou manaˈo i te tahi taime!

Ia faahapahapa tatou no te mau hara ravehia na mua ˈˈe, e ere i te mea ohie ia farii te here mai ra Iehova e e faaore o ˈna i ta tatou mau hara. Eita paha tatou e farii e ô te tusia o Iesu tei horoahia no tatou tataitahi. E mauruuru anei Iesu ia manaˈo tatou mai tera? Eaha te tauturu mai ia haafaufaa i tera ô faahiahia mau? E hiˈopoa anaˈe i te pahonoraa.

Te hinaaro mau ra Iesu ia farii tatou e ô te hoo no te taata tataitahi. Eaha te haapapuraa? A feruri na i tei faatiahia i roto i te Luka 23:39-43. Ua faˈi hoê o na taata i patitihia i nia i te pou i pihai iho ia Iesu ua hara oia. Eita e ore e ohipa ino mau ta ˈna i rave. No to ˈna hepohepo rahi, na ô aˈera taua taata ra ia Iesu: “Haamanaˈo mai oe ia ˈu ia tae oe i roto i ta oe Faatereraa arii.”

Ua nafea Iesu? A feruri na ia ˈna ia fariu i to ˈna upoo no te hiˈo i tera taata. Noa ˈtu te mauiui, ua haapapu te hohoˈa mata o Iesu i to ˈna aroha i tera taata ia ˈna i na ô: “Oia mau ta ˈu e parau atu ia oe i teie mahana: Ei te paradaiso oe e o vau atoa.” Ua parau roa ˈtu Iesu i tera taata e nehenehe mau oia e fanaˈo i te tiaturiraa e ora e a muri noa ˈtu i roto i te paradaiso i nia i te fenua! Eita e ore ua haamanaˈo Iesu, “ua haere atoa mai te Tamaiti a te taata nei . . . no te horoa i to ˈna ora ei hoo no te taata e rave rahi.”—Mat. 20:28.

Ua hinaaro Iesu ia farii te taata ino i pihai iho ia ˈna i te ô ta ˈna i fatata i te horoa. Mai te peu tera te hinaaro o Iesu no taua taata ino tei ore i tavini i te Atua, eaha ˈtu â ïa no te hoê Kerisetiano bapetizohia o te tavini nei ia Iehova! E nafea tatou ia faufaahia i te tusia o te Mesia noa ˈtu ua hara tatou na mua ˈˈe?

Ua tauturu te ohipa pororaa ia Paulo ia farii ua pohe Iesu no ˈna. Ua faataa oia:  “Te mauruuru nei au i te Mesia ra o Iesu to tatou Fatu tei haapuai ia ˈu no te mea ua ite mai oia i to ˈu haapao maitai ma te faatoroa ia ˈu no te hoê taviniraa, noa ˈtu e na mua ˈˈe e taata faaino vau i te Atua e te hamani ino i te taata e te faateitei.” (Tim. 1, 1:12-14) Noa ˈtu te mau ohipa ino ta ˈna i rave na mua ˈˈe, ua aroha, ua here e ua tiaturi Iesu ia Paulo. Ua horoa atoa mai Iesu ia tatou i te haamaitairaa ia poro i te taata. (Mat. 28:19, 20) E nafea te reira e tauturu mai ai ia farii ua pohe Iesu no tatou tataitahi?

Ua tiavaruhia Albert e ua fatata 34 matahiti i muri aˈe, ua hoˈi mai oia ia Iehova. Teie ta ˈna e faataa ra: “Eita e moˈe ia ˈu te mau ohipa ino ta ˈu i rave. Tera râ, mai te aposetolo Paulo, ua horoa roa mai Iesu i te hoê taviniraa na ˈu. Na te reira e faaitoito e e tauturu mai ia tapea i te hoê feruriraa maitai no nia ia ˈu, to ˈu oraraa i teie nei e no a muri aˈe.”—Sal. 51:3.

Hou a ite ai i te parau mau, e taata ohipa ino e te haavî o Allan. Te parau ra oia: “Te tatarahapa noa nei â vau ua mauiui te taata no ta ˈu i rave. I te tahi taime, e hepohepo roa vau. Tera râ, te haamauruuru nei au ia Iehova i te maitiraa ia ˈu no te faaite i te parau apî oaoa ia vetahi ê. E haamanaˈo noa vau i te maitai e te here rahi o Iehova! Ua maiti oia ia ˈu no te tauturu i te feia hoê â to ratou huru e to ˈu na mua ˈˈe.”

E tauturu mai ta tatou taviniraa ia rave i te ohipa maitai e ia tapea i te hoê feruriraa tano. E haapapu atoa mai te reira ua aroha, ua here e ua tiaturi Iesu ia tatou tataitahi.

A ora noa ˈi i roto i te ao ino a Satani, e tamau paha to tatou aau i te faahapa mai no te mau hara ta tatou i rave na mua ˈˈe. E nafea tatou i tera mau taime?

Te na ô ra Jean o te faahapa pinepine ia ˈna no to ˈna huru haavarevare i te apîraa: “E haamanaˈo vau ia parauhia, ‘Mea rahi aˈe te Atua i to tatou aau.’” (Ioa. 1, 3:19, 20) Te haamanaˈo ra Iehova e Iesu e taata hara tatou. Ma te here, ua horoa raua i te hoo no te feia hara, eiaha râ no te feia tia roa!—Tim. 1, 1:15.

Na roto i te pure, e feruri maite anaˈe i to Iesu huru i nia i te feia tia ore. Hau atu â, e rave anaˈe i te maraa ia tatou no te faahope roa i te taviniraa ta ˈna i horoa mai. E papu roa ïa ia tatou, no tatou tataitahi te hoo! E mai ia Paulo, e na ô anaˈe, o Iesu “tei here ia ˈu e tei horoa ia ˈna iho no ˈu!”