Ua fanauhia vau i Paddington, te tahi tuhaa oire taata roa i Lonedona, Beretane. E ora na vau na muri i to ˈu mama e to ˈu na tuahine paari e toru. Eita papa e mou na i te fare no ta ˈna mau peu taero ava.

I to ˈu tamariiraa, ua haapii mai mama ia pure i te mau po atoa. Mea nainai roa ta ˈu Bibilia, o te mau Salamo anaˈe to roto. Ua imi au i te mau nota no te himene i te reira. Te haamanaˈo ra vau, ua taio vau i te tahi parau i roto i te hoê buka a te haapiiraa o tei faahuru ê roa ia ˈu. Teie tei papaihia: “Aita to tatou e ananahi!” E ara pinepine au i te maororaa po no tera mau parau. Ua na ô noa vau, ‘Eaha ïa, aita e tumu to te oraraa? No te aha vau i hamanihia ˈi?’ Aita vau i hinaaro e pohe!

Mea au roa na ˈu te mau ohipa maere. Ua tamata i te paraparau e te feia pohe, ua haere e mataitai i te mau vahi hunaraa maˈi e te mau hoa haapiiraa e ua navenave roa i te mau hohoˈa teata riaria. No matou, e ohipa hauti e te riaria atoa râ.

Ua haamata vau i te faaite i te haerea orure hau i te ahuru-noa-raa o to ˈu matahiti. Ua puhipuhi i te avaava e ua riro oioi ei peu na ˈu. I muri aˈe, ua huti i te raau taero. I te 11raa o to ˈu matahiti, ua inu i te ava. E ere te reira ta ˈu i au, o te huru râ ta ˈna e faatupu i muri aˈe, ua taero anaˈe oe. Mea au roa na ˈu te upaupa e te ori. Ia nehenehe ta ˈu, e tia noa vau i te mau vahi inuraa e te mau fare oriraa. Ua matau vau i te taie i te fare i te po e te hoˈi atu i te aahiata. No te rohirohi i te poipoi aˈe, pinepine au i te ore e haere i te haapiiraa. E ua haere anaˈe vau, e inu ïa na mua ˈˈe a haere ai i te tahi atu piha haapiiraa.

E ere ta ˈu mau nota i te mea faahiahia i te matahiti hopea o ta ˈu haapiiraa. Ua ite mama e tamahine orure hau vau, ua inoino atu â râ e ua riri i to ˈna iteraa i te reira. Ua tatamaˈi mâua e ua faarue au i te fare. I muri aˈe, ua faaea vau i to ˈu hoa o Tony, e taata eiâ, hoo i te raau taero e te  ino roa. Aita i maoro, ua hapû vau e i te 16raa o to ˈu matahiti, ua fanau i ta mâua tamaiti matahiapo.

Ua farerei au i te taime matamua i te mau Ite no Iehova i te tahi pu no te mau metua vahine anaˈe e ta ratou aiû. Ua fariihia ia fanaˈo vau i te hoê piha i reira. E piti vahine Ite no Iehova o te haere tamau mai e farerei i te tahi mau metua vahine apî. I te hoê mahana, ua apiti atu vau i ta ratou aparauraa. Ua hinaaro vau e faaite te hape ra te mau Ite. Tera râ, ua pahono ratou i ta ˈu mau uiraa atoa ma te mǎrû e te papu maoti te Bibilia. E feia maitai e te mǎrû e ua au roa vau ia ratou. Ua farii aˈera vau i te hoê haapiiraa Bibilia.

Aita i maoro, ua haapii au i te tahi mea i roto i te Bibilia o tei taui i to ˈu oraraa. Mai to ˈu apîraa, aita vau i hinaaro e pohe. I teie nei râ, ua ite au i ta Iesu haapiiraa no nia i te tia-faahou-raa e te tâuˈa atoa ra te Atua ia ˈu. (Ioane 5:28, 29; Petero 1, 5:7) Ua putapû roa vau i te mau parau o te Ieremia 29:11 o te na ô ra e: “Ua ite hoi au i te opua ta ˈu i opua ia outou nei, te parau maira Iehova. E opuaraa hau ïa, e ere i to te ino; ia horoa ˈtu vau i ta outou i tiaturi ra, i to outou hopea.” Ua tiaturi ihora vau e nehenehe au e fanaˈo i te ora mure ore i roto i te paradaiso i nia i te fenua.—Salamo 37:29.

Ua faaite mai te mau Ite no Iehova i te here mau. Mea mahanahana e te anaanatae te putuputuraa matamua ta ˈu i haere, e mata oaoa to te taata atoa. (Ioane 13:34, 35) E ere roa ˈtu tera ta ˈu i ite i te tahi atu fare pure! Ua farii maitai te mau Ite ia ˈu noa ˈtu to ˈu tupuraa. Ua horoa mai hoi i te taime, ua tâuˈa ia ˈu, ua faaroo e ua tauturu mai. Mai te huru ra tei roto vau i te hoê utuafare rahi î i te here.

I roto i ta ˈu haapiiraa Bibilia, ua ite au e titauhia ia ˈu ia rave i te mau tauiraa no te haapao i te mau titauraa a te Atua. E ere roa ˈtu i te mea ohie ia faaea i te puhipuhi i te avaava. I te hoê â taime, ua taa ia ˈu e rahi mai to ˈu hinaaro e huti i te raau taero no te tahi mau himene ta ˈu i faaroo na. Ua taui ihora vau ta ˈu mau pehe. No te ore e tapea faahou i te ava, ua faaea vau i te haere i te vahi arearearaa e te mau fare oriraa. Ua imi au i te mau hoa o te turu mai ia ˈu i roto i to ˈu oraraa apî.—Maseli 13:20.

Ua haapii atoa Tony i te Bibilia e te mau Ite no Iehova i muri aˈe. Ua pahono ratou i ta ˈna mau uiraa maoti te Bibilia e ua papu ia ˈna o te parau mau ta ˈna e haapii ra. Mea rahi te mau tauiraa ta ˈna i rave. Ua faaea i te amuimui i to ˈna mau hoa tahito, i te rave i ta ˈna mau ohipa iino e te huti i te raau taero. No te faaoaoa ˈtu â ia Iehova, e tia atoa ia faaafaro i to mâua oraraa ia paari ta mâua tamaiti i roto i te tahi utuafare hoê. Faaipoipo atura mâua i 1982.

Ua imi au i roto i Te Pare Tiairaa, oia atoa te A ara mai na! a (na roto i te reo Farani) i te aamu o te mau taata hoê â tupuraa e to ˈu, ua tia râ ia ratou ia taui. Ua faaitoito to ratou mau hiˈoraa ia ˈu ia tutava noa, ia ore e taora i te tauera. Ua tamau vau i te pure ia Iehova eiaha ia faarue ia ˈu. Ua bapetizohia mâua Tony ei Ite no Iehova i Tiurai 1982.

Ua pohe paha vau ahani aita to ˈu auhoaraa e te Atua ra o Iehova. Ua ite atoa mâua Tony i to ˈna rima i roto i te fifi. Ua haapii atoa i te tiaturi noa i te Atua i tera mau taime e ua ite roa i ta ˈna tauturu e aupuru tamau i to matou utuafare.—Salamo 55:22.

Oaoa roa vau i te tautururaa i ta mâua tamaiti e tamahine ia haapii atoa o vai o Iehova mai ia ˈu. Mai tera atoa to ˈu huru ia ite au ia raua ia na reira atoa i nia i ta ˈu mau mootua.

Eita vau e ara faahou i te po no to ˈu riaria i te tupu a muri aˈe aore ra i te pohe. Te haa rahi nei mâua Tony ma te haere i tera e tera amuiraa a te mau Ite no Iehova i te mau hebedoma atoa no te faaitoito atu. E apiti atoa mâua na muri ia ratou no te haapii ia vetahi ê ia faatupu i te faaroo ia Iesu ia nehenehe atoa ratou e fanaˈo i te ora mure ore.