Eaha te manaˈo o te taata no nia i te pure?
“Ia pure au, mai te huru ra e tei pihai iho noa te Atua ia ˈu, e te tapea ra oia i to ˈu rima a aratai ai ia ˈu i te taime a moˈemoˈe ai au.”—MARÍA.
“Ua pohe ta ˈu vahine i muri aˈe i to ˈna faaoromairaa i te maˈi mariri ai taata e 13 matahiti i te maoro. Ua pure au i te Atua pauroa te mahana e no ˈu, ua tâuˈa iho â oia i to ˈu mauiui. Ua vai hau noa vau.”—RAÚL.
“E ô faahiahia roa te pure ta te Atua e horoa ra i te mau taata.”—ARNE.
No te taata e rave rahi, mai ia María, Raúl e Arne, e ô taa ê roa te pure. No ratou, maoti te pure, e nehenehe ratou e paraparau i te Atua, e haamauruuru ia ˈna e e ani i ta ˈna tauturu. Ua papu maitai ia ratou i ta te Bibilia e parau mai ra no nia i te pureraa i te Atua: “Teie ta tatou e tiaturi ra i te Atua, noa ˈtu eaha ta tatou e ani ia au i to ˈna hinaaro, e faaroo mai o ˈna.”—Ioane 1, 5:14.
I te tahi atu pae, no e rave rahi taata, mea fifi ia farii i ta te Bibilia e parau ra no nia i te pure. Teie ta Steve i parau no nia i to ˈna mau huru aau a pure ai oia: “I te 17raa o to ˈu matahiti, ua pohe e toru o to ˈu mau hoa i roto e piti ati. Hoê ua pohe ïa i roto i te ati purumu, e na toopiti e toe, ua paremo ïa i roto i te miti.” Eaha ta Steve i rave? “Ua pure au i te Atua no te taa e no te aha tera mau ati i tupu ai, aita râ oia i pahono mai. Ua na ô vau: ‘Eaha pai ïa te faufaaraa ia pure?’” No to ratou manaˈo e aita te Atua i pahono i ta ratou mau pure, ua ani vetahi mea faufaa anei ia pure.
Te vai ra te tahi atu mau tumu e tiaturi ai vetahi e aita te pure e tauturu ia ratou. No te tahi mau taata, inaha te ite ra te Atua i te mau mea atoa, ua ite aˈena ïa oia i to tatou mau hinaaro aore ra i to tatou mau fifi. E ere ïa i te mea faufaa ia faaite ia ˈna i te reira na roto i te pure.
No te tahi atu, aita te Atua e hinaaro e faaroo i ta ratou mau pure, no te mau hara ta ratou i rave i na mua aˈe. Teie ta Jenny i parau: “Teie to ˈu fifi rahi roa ˈˈe: No ˈu, mea faufaa ore roa vau. Ua rave au i te tahi mau ohipa ta ˈu e tatarahapa i teie nei, mea papu ia ˈu e aita e tia ia ˈu ia faaroohia e te Atua.”
Eaha to oe manaˈo no nia i te pure? Mai te peu e te feaa atoa ra oe no nia i te pure, e oaoa oe i te ite e te pahono ra te Bibilia ma te papu i ta oe mau uiraa. E nehenehe tatou e tiaturi i ta te Bibilia e parau ra no nia i te pure, a e ite oe eaha te pahonoraa a te Bibilia i teie mau uiraa:
-
Te faaroo mau ra anei te Atua i ta tatou mau pure?
-
No te aha e ere pauroa te mau pure tei pahonohia?
-
Eaha ta oe e rave ia faaroohia ta oe pure?
-
E nafea te pure e nehenehe ai e tauturu ia oe?
a Te faahiti ra te Bibilia i te mau pure ta te tavini a te Atua e rave rahi i faaoti, oia atoa te mau pure a Iesu Mesia. I roto i te mau Papai Hebera, parau-atoa-hia te Faufaa Tahito, te vai ra hau atu i te 150 pure.
E au atoa outou . . .
TE PAHONO RA TE BIBILIA
E faaroo anei te Atua i ta ˈu mau pure?
Ia hinaaro oe ia faaroo te Atua i ta oe mau pure, e pee ïa oe i ta ˈna mau titauraa.
TA TE FEIA APÎ E UIUI NEI
No te aha ia pure au?
Ua riro anei te pure ei ravea no te maitai mai aore ra mai te tahi mea faufaa ˈtu â?
