Te riri, o te hoê ïa huru aau puai mau e turai ra i te hoê taata ia au ore roa i te tahi atu taata aore ra pǔpǔ taata. E tamau te taata riri i te faatupu i tera huru aau e mea fifi no ˈna ia haapae roa i te reira.

E rave rahi tumu e haamata ˈi te taata i te riri. E riri ratou i te feia atoa o te tahi pǔpǔ taata, noa ˈtu aita te taata tataitahi o tera pǔpǔ i rave i te mea ino. E hiˈo-ino-hia ratou no te mea e manaˈohia e mea ino ratou pauroa e eita ratou e taui i to ratou huru. E manaˈo-atoa-hia e mau taata riirii ratou, eita e nehenehe e tiaturi ia ratou aore ra o ratou te tumu o te mau fifi atoa. I te tahi taime, e faaite te taata i te riri no te mea ua faaruru ratou i te ino, te parau-tia ore aore ra te tahi tupuraa tei faatupu i te inoino i roto i to ratou aau.

I te tahi taime, e riri te hoê taata i te tahi atu noa ˈtu aita raua i farerei roa ˈtu. Ei hiˈoraa, e pee te taata i te huru feruriraa o te feia ta ˈna e faatura ra mai te mau mero o to ˈna utuafare aore ra to ˈna mau hoa. No reira, mea riri anaˈe na te hoê mero o te tahi utuafare aore ra pǔpǔ taata i te tahi atu, e oioi te mau mero atoa o tera utuafare aore ra pǔpǔ i te faaite i te hoê â huru aau.

E nehenehe te riri e uˈana ohie mai. A taa ˈi i te reira, e taa atoa ia tatou te tumu e riri ai e rave rahi taata. E mea tia atoa ia haapii mea nafea te riri i te haamataraa. Na te Bibilia ïa e faaite mai.

AITA TE RIRI I HAAMATA NA ROTO MAI I TE TAATA. Ua haamata te riri i te raˈi. Ua orure hau te hoê melahi i te Atua e ua piihia o ˈna Satani te Diabolo. “E taparahi taata [te Diabolo] i to ˈna haamataraa” i te orure hau. Ei “haavare e te metua no te haavare,” ua tamau o ˈna i te faatupu i te riri e te hamani-ino-raa. (Ioane 8:44; Ioane 1, 3:11, 12) Te parau ra te Bibilia e mea haavarevare o ˈna e e riri rahi to ˈna.​—Ioba 2:7; Apokalupo 12:9, 12, 17.

MEA OHIE NO TE TAATA TIA ORE IA FAATUPU I TE RIRI. Ua pee te taata matamua ra, o Adamu, i te haerea tano ore o Satani. Ei faahopearaa, o tatou paatoa tei riro ei taata hara e te tia ore. (Roma 5:12) Ua taparahi pohe o Kaina, te tamaiti matamua a Adamu, i to ˈna iho taeae, o Abela. (Ioane 1, 3:12) Papu, mea rahi te taata o te faaite ra i te here e te aumihi. No te mea râ e taata hara tatou, e rave rahi atoa o te faaite ra i te miimii, te feii e te teoteo. E mau huru tera o te turai ra ia faatupu i te riri.​—Timoteo 2, 3:1-5.

E FAAITE TE TAATA E AU ORE RA IA VETAHI Ê I TE RIRI. Te ora ra tatou i roto i te hoê ao mea rahi te tumu e riri ai tatou, mai te aroha ore e te haamauiuiraa ia vetahi ê. Te uˈana ra te au-ore-raa i te taata ê, te faainoraa, te hamani-ino-raa e te eiâ no te mea te vai nei “to te ao atoa i raro aˈe i te mana o te varua ino,” oia hoi te mana o Satani te Diabolo.​—Ioane 1, 5:19.

Tera râ, aita te Bibilia e faaite noa eaha te tumu o te riri. E horoa atoa râ i te mau ravea no te upootia i nia i te riri.