E NAFEA IA HAAPAE ROA I TE RIRI?
2 | Eiaha e tahoo
Te parau ra te Bibilia:
“Eiaha te ino ia tahoohia ˈtu i te ino i te taata atoa. . . . A tutava i te rave i te mea e tia ia outou tataitahi no te parahi hau noa e te taata atoa. . . . Eiaha outou e tahoo atu . . . Ua papaihia hoi: ‘ “Na ˈu te tahoo. Na ˈu e faautua,” te na reira mai ra Iehova.’”—ROMA 12:17-19.
Te auraa:
E riri iho â tatou ia haamauiuihia tatou. Aita râ te Atua e farii ia tahoo tatou i te ino ia vetahi ê. Te faaitoito nei o ˈna ia tatou ia faaoromai no te mea fatata roa o ˈna i te faaore i te mau tupuraa parau-tia ore atoa.—Salamo 37:7, 10.
Te faaohiparaa:
Ia tahoo te hoê taata tia ore, e uˈana te riri. No reira, ia haamauiui te tahi ia outou, eiaha e tahoo atu. A tutava râ i te haavî i to outou mau manaˈo tano ore e i te faatupu i te hau. I roto i te tahi mau tupuraa, mea au aˈe ia ore e manaˈo faahou i tei tupu. (Maseli 19:11) I te tahi râ mau taime, mea faufaa ia faaite eaha tei tupu. Ei hiˈoraa, ia ravehia te tahi ohipa ino mau i nia ia outou, e faaoti paha outou i te faaite i te reira i te mau mutoi aore ra te tahi atu taata mana.
Aita e faufaa ia tahoo atu
Eaha râ te rave mai te peu no oe, aita e ravea no te faaafaro i te fifi ma te hau? E mai te peu ua rave oe i te mau mea atoa no te faaafaro i te fifi na roto i te hau, eaha te rave? Eiaha e tahoo atu. E ino roa ˈtu â hoi te tupuraa. Ma te ore e tahoo, e upootia oe i nia i te riri. E nehenehe oe e tiaturi e faaafaro te Atua i te fifi. “A turui i nia ia ˈna e na ˈna e tauturu ia oe.”—Salamo 37:3-5.
E au atoa outou . . .
UA TAUI TE BIBILIA I TO ˈU ORARAA
Ua hinaaro vau e aro i te parau-tia ore
Ua faaô o Rafika i roto i te hoê pǔpǔ poritita faahuehue o tei aro i te parau-tia ore. Ia ˈna râ i haapii i te Bibilia, i reira to ˈna iteraa e tupu te hau e te parau-tia mau i raro aˈe i te Faatereraa arii a te Atua.
UA TAUI TE BIBILIA I TO ˈU ORARAA
Puai aˈe anei te here i te riri?
E ere i te mea ohie ia faaea i te inoino. A hiˈo na râ mea nafea te hoê ati Iuda e te hoê Paretetina i te upootiaraa i nia i te reira.
TE PAHONO RA TE BIBILIA
Eaha ta te Bibilia e parau ra no nia i te tahoo?
Ua tauturu te aˈoraa no ǒ mai i te Bibilia e rave rahi ia haapae i te hinaaro e tahoo.
