Mea faufaa no te Atua to tatou huru feruriraa. (Ieremia 17:10) E titauhia ia tatou ia ore e parau aore ra e rave i te mea ino. Aita râ e navai. E haamata te riri i roto i te feruriraa e te aau. No reira, e mea tia ia iriti ê i te tahi noa ˈˈe mea i roto i to tatou feruriraa o te turai ra ia tatou ia riri. I reira noa tatou e “taui” papu ai e e upootia ˈi i nia i te riri.

A hiˈopoa maite i to outou mau manaˈo e huru aau no vetahi ê, no te feia iho â râ o te fenua ê. A ui ia outou iho: “Eaha to ˈu manaˈo no nia ia ratou? Ua niuhia anei to ˈu manaˈo i nia i ta ˈu e ite no nia ia ratou? Aore ra ua niuhia i nia i te hoê manaˈo oti noa?” I nia i te natirara, i roto i te hohoˈa teata aore ra faaanaanataeraa, e itehia ra te mau mea o te faauˈana i te riri. A faaea i te taio e i te mataitai i te reira.

E ere i te mea ohie ia hiˈopoa ia tatou iho ma te tano. E nehenehe râ te Parau a te Atua e “faaite mai . . . i te mau manaˈo e opuaraa o te aau.” (Hebera 4:12) A tamau ïa i te hiˈopoa i te Bibilia. A faaau i ta outou i haapii i to outou huru feruriraa. A tutava i te pee i ta te Bibilia e haapii mai ra. E nehenehe te Parau a te Atua e tauturu mai ia upootia i nia i te riri noa ˈtu e au te reira “i te pare” i roto i to tatou feruriraa e aau.​—Korinetia 2, 10:4, 5.