Noa ˈtu e ere te Bibilia i te buka rapaauraa, e horoa te Bibilia i te aˈoraa e te aratairaa papu e maitai ai te oraraa o te hoê taata e maˈi manava to ˈna. Teie te tahi mau hiˈoraa.

“E ere te taote no te feia oraora maitai, no te feia maˈi râ.”​—MATAIO 9:12.

Te faaitoito ra te Bibilia ia ani i te tauturu a te taote. Ua nehenehe ïa te taata e maˈi manava to ratou e haamaramaramahia no nia i te huru o to ratou maˈi.

“E faufaa to te mau ohipa faaetaetaraa tino.”​—TIMOTEO 1, 4:8, Te Faufaa Apî.

E nehenehe te ahoaho e te toaruaru e iti mai ia haapao maitai tatou i to tatou ea. E tia ïa ia faataa i te taime no te faaetaeta i te tino, no te tamaa au noa e no te taoto maitai.

“E raau rapaau maitai te aau oaoa, e ere roa râ te taata i to ˈna puai i te aau hepohepo.”​—MASELI 17:22.

Ia taio tatou i te mau irava Bibilia faaitoito mau e ia haamau tatou i te fa e raeahia ia tatou, e oaoa tatou. Ia tiatonu noa tatou i nia i  te mau manaˈo maitatai a tiaturi atu ai e maitai mai te huru o te oraraa a muri aˈe, e nehenehe tatou e faaoromai tamau i teie mau maˈi.

“Te paari, tei te feia aau faahaihai ïa.”​—MASELI 11:2.

Eita paha e haere ia outou ia rave i te mau mea atoa ta outou e hinaaro ra e rave, a farii ïa i te tauturu a vetahi ê. Te hinaaro nei to outou mau hoa e fetii e tauturu ia outou, eita râ ratou e ite e nafea. Eiaha ïa e taiâ i te faaite roa ia ratou i ta outou e hinaaro mau ra. Eiaha râ e titau rahi roa e a faaite i to outou mauruuru no te tauturu ta ratou e hopoi mai.

“Ua haere au e hiˈo i te taote no te mea e ere au i te mea maitai roa. Parau mai nei o ˈna eaha mau na to ˈu. Na te reira i tauturu ia ˈu ia farii e maˈi to ˈu. Ua ineine ïa vau i te rapaau ia ˈu maoti te mau ravea e vai ra.”​—Nicole, a tei roohia i te maˈi e tauiui noa ˈi to ˈna huru.

“Mea au na ˈu ia haamata i te mahana ma te taio i te Bibilia e ta ˈu vahine. E itehia mai ïa ia mâua te tahi mau manaˈo faaitoito mau. I te mau mahana e tupu mai te ahoaho, e putapû iho â to ˈu aau i te hoê irava taa maitai.”​—Peter, tei roohia i te maˈi faatoaruaru.

“Mea fifi roa no ˈu ia paraparau ia vetahi ê no nia i to ˈu maˈi. Te vai ra râ to ˈu hoê hoa tei faaroo maite ia ˈu e ua tamata o ˈna i te taa i to ˈu huru. Ua tauturu o ˈna ia ˈu ia maitai mai e ia ore e moˈemoˈe faahou.”​—Ji-yoo, tei roohia i te hoê maˈi o tei faahuru ê i ta ˈna huru tamaaraa.

“Ua tauturu te Bibilia ia ˈu ia vai aifaito i nia i te ohipa e ia taoto maitai. Maoti te reira i noaa ˈi ia ˈu ia haavî i to ˈu mau huru aau.”​—Timothy, tei roohia i te maˈi parauhia “trouble obsessionnel compulsif.”