Ia roohia hoê hoa to tatou i te maˈi manava, e nehenehe tatou e manaˈo e aita ta tatou e ravea. E nehenehe râ tatou e haapapu atu e ua ineine tatou i te tauturu ia ˈna ia faaruru i teie maˈi. E nafea râ?

“Ia ineine te taata atoa i te faaroo e tia ˈi.”​—IAKOBO 1:19.

Hoê ravea maitai roa no te tauturu i to outou hoa, o te faaroo-maite-raa ïa ia ˈna ia hinaaro o ˈna e paraparau. Eita e titauhia ia pahono outou i ta ˈna mau parau atoa. A faaite atu e te faaroo maite ra e te tâuˈa mau ra outou ia ˈna. A tamata i te taa i to ˈna mau huru aau e eiaha e faahapa ia ˈna. A haamanaˈo e e nehenehe o ˈna e faahiti i te tahi mau parau ta ˈna e ore e manaˈo aore ra ta ˈna e tatarahapa i muri iho.​—Ioba 6:2, 3.

“Ei parau mahanahana ta outou.”​—TESALONIA 1, 5:14.

E ahoaho paha to outou hoa aore ra e manaˈo o ˈna e mea faufaa ore o ˈna. Ma te haapapu ia ˈna e te tâuˈa mau ra outou ia ˈna, e tamahanahana e e faaitoito outou ia ˈna, noa ˈtu aita outou i ite eaha te parau.

“E faaite te hoê hoa mau i te here i te mau taime atoa.”​—MASELI 17:17.

A horoa i te rima tauturu. Aita anaˈe outou i ite e nafea, a ani atu eaha ta outou e nehenehe  e rave no te tauturu atu. Mai te peu eita ta ˈna parau e matara, a horoa ˈtu i te tahi mau manaˈo, mai te haereraa e ori haere na muri ia outou. A tauturu ia ˈna no te haere i te fare toa, te tamâ i to ˈna fare aore ra te tahi atu ohipa.​—Galatia 6:2.

“E faaoromai.”​—TESALONIA 1, 5:14.

Aita paha to outou hoa i ineine i te paraparau. A haapapu ia ˈna e ua ineine noa outou i te faaroo ia ˈna. No to ˈna maˈi, e haamauiui paha to outou hoa ia outou na roto i ta ˈna mau parau e ohipa. E faaore paha o ˈna i te hoê faaauraa ta orua aore ra e iria mai o ˈna. A faaoromai, a tamata i te taa i to ˈna huru e a horoa i te tauturu ta ˈna e hinaaro mau.​—Maseli 18:24.

“E faaite au i to ˈu hoa e nehenehe o ˈna e tiaturi mai. Noa ˈtu aita ta ˈu e ravea, e faaroo noa vau ia ˈna ia hinaaro o ˈna e paraparau. Pinepine, e hinaaro noa o ˈna i te tariˈa faaroo, e maitai mai iho â o ˈna.”​—Farrah, a ua roohia to ˈna hoa i te hoê maˈi manava e faahuru ê ai i ta ˈna huru tamaaraa, e ahoaho e e toaruaru ai o ˈna.

“E hoa maitai roa to ˈu e te faaitoito mau. Ua titau o ˈna ia ˈu i to ˈna fare no te tamaa. No to ˈna maitai i nia ia ˈu, ua nehenehe au e haamahora ˈtu i to ˈu aau. Ua faaitoito mau te reira ia ˈu!”​—Ha-eun, tei roohia i te maˈi faatoaruaru.

“Mea faufaa roa te faaoromai. Ia rave ta ˈu vahine i te ohipa e haraooo ai au, e haamanaˈo vau e e maˈi to ˈna, e ere tera to ˈna huru mau. E tauturu te reira ia ˈu ia ore e riri e ia taa i to ˈna huru.”​—Jacob, ua roohia ta ˈna vahine i te maˈi faatoaruaru.

“E tauturu e e faaitoito rahi ta ˈu vahine ia ˈu. Ua rahi roa anaˈe te ahoaho, eita o ˈna e faahepo ia ˈu ia rave i te tahi mea ta ˈu e ore e hinaaro. I te tahi taime, e tuu o ˈna i to ˈna mau hinaaro i te hiti. Te mauruuru ra vau i to ˈna feruriraa haapae e to ˈna aau horoa noa.”​—Enrico, tei roohia i te maˈi ahoaho.