E TIA ia faaite i te mauruuru ia horoahia mai te tahi ô faahiahia mau. Ta Iesu ïa i hinaaro e haapii i muri aˈe oia a faaora ˈi ahuru taata o tei roohia i te hoê maˈi haaparuparu, aore e ravea rapaauraa. I rotopu ia ratou, hoê anaˈe tei “hoˈi maira ma te pii hua i te haamaitairaa i te Atua.” Ua ani atura Iesu: “E ere anei tino ahuru atoa i tamâhia nei? teihea iho nei râ e tooiva?” (Luka 17:12-17) Eaha te haapiiraa e huti mai? E moˈe oioi ia tatou ta vetahi ê i rave no tatou!

E ere te hoo mai te tahi atu mau ô. Tera hoi te ô rahi roa ˈˈe o tei horoahia. Eaha ïa te tia ia rave no ta te Atua i horoa no tatou?

• A haapii no nia i tei horoa i te ô. Eita e navai ia horoa i te hoo ia fanaˈo te taata atoa i te ora mure ore. Ua faaite Iesu i roto i ta ˈna pure i te Atua eaha te tia ia rave: “Teie hoi te ora mure ore, ia ite ratou ia oe i te Atua mau ra, e ia Iesu i te Mesia i ta oe i tono mai.” (Ioane 17:3) Ia parauhia ˈtu ua faaora te tahi taata ia oe i te tamariiraa, eita anei oe e hinaaro e ite atu â no nia ia ˈna e te tumu o ˈna i faaora ˈi ia oe? O te Atua ra o Iehova tei horoa i te ô o te faaora i te taata. Te hinaaro ra oia ia haapii oe o vai o ˈna e ia riro oe ei hoa no ˈna. No reira te Bibilia e faaitoito ai ia “haafatata ˈtu i te Atua, e na ˈna e haafatata mai.”—Iakobo 4:8.

•  A faatupu i te faaroo i te hoo. Te na ô ra te Bibilia i roto i te Ioane 3:36: “O tei faaroo i te Tamaiti ra e ora mure ore to ˈna.” Na te aha e faaite e faaroo to te tahi taata i te hoo? Na ta ˈna mau ohipa. (Iakobo 2:17) No te fanaˈo i te ô i faaineinehia na oe, e navai anei ia hiˈo aore ra ia ite noa oe i te reira? Eita, e titauhia ia rave mai aore ra ia farii i te reira. Eita atoa e navai ia ite ua pohe Iesu no te hoo mai ia tatou, e titau-atoa-hia râ ia mauruuru i te reira. Eaha ïa te tia ia oe ia rave? A haapii eaha ta te Atua e titau ra e i muri iho, a haa ia au i te reira. a A pure i te Atua ia faaore i ta oe mau hara ia faaea oe i te faahapa ia oe. A haafatata i te Atua ma te tiaturi papu e fanaˈo te feia atoa o te faatupu i te faaroo i te hoo i te mau haamaitairaa mure ore: Te hoê oraraa hau, peapea ore e te oaoa a muri aˈe!—Hebera 11:1.

• A haere i te Oroa haamanaˈoraa i te pohe o Iesu. Tera te oroa tamatahiti ta Iesu i haamau ia haamanaˈo tatou i te hoo i horoahia. Ua na ô oia: “E na reira outou ei manaˈoraa ia ˈu.” (Luka 22:19) E faatupu te mau Ite no Iehova i tera haamanaˈoraa i te pohe o Iesu i te Mahana piti 11 no Eperera 2017 i muri aˈe i te toparaa mahana. E faataa te oreroraa parau eaha te faufaaraa o te pohe o Iesu e eaha te mau maitai ta tatou e fanaˈo i teie nei e a muri aˈe. I te matahiti i mairi, fatata 20 mirioni taata na te ao tei tae i tera Oroa haamanaˈoraa. Te titau manihini atu nei matou ia oe ia amui mai e o matou no te faaite i te mauruuru i te ô rahi roa ˈˈe no ǒ mai i te Atua.