TEIE TE HOÊ TIATURIRAA FAAHIAHIA MAU! Ua fafau to tatou Atua poiete i te horoa mai i te ora mure ore, i nia iho i te fenua nei. No e rave rahi râ, mea fifi ia farii i tera manaˈo. Te na ô ra ratou: “E pohe iho â te taata i te hoê taime. Ua riro te pohe ei tuhaa i roto i te oraraa o te taata.” No vetahi, e nehenehe te taata e ora e a muri noa ˈtu eiaha i nia i te fenua nei, i muri aˈe râ i to ˈna pohe e to ˈna haereraa i nia i te raˈi. Eaha to oe manaˈo?

Hou a pahono ai, a feruri na i nia i te pahonoraa Bibilia o na uiraa e toru: Eaha ta te huru poieteraa o te hoê taata e faaite ra i nia i te roaraa mau o to ˈna oraraa? Eaha ta te Atua opuaraa no te fenua e no te huitaata? No te aha te taata i roohia ˈi i te pohe?

A hiˈo ai i te mau mea atoa ta te Atua i poiete i nia i te fenua nei, mea taa ê iho â te huru o te taata. E parau mau roa te reira inaha te na ô ra te Bibilia o te taata anaˈe tei poietehia ia au i to te Atua “huru” e “hohoˈa.” (Genese 1:26, 27) Eaha ïa te auraa? Ua poietehia te taata ia faatupu oia i te hoê â mau huru maitatai e to te Atua, mai te here e te parau-tia.

Hau atu, ua poietehia te mau taata ia nehenehe ratou e feruri, e ite eaha te mea maitai e te mea ino e ia hinaaro ratou e faatupu i te auhoaraa e o te Atua. No reira tatou e faahiahia ˈi i mua i te ao nui e te mau mea poietehia o te natura. Oia atoa i mua i te ohipa aravihi, te himene e te mau pehepehe. Te mea au roa ˈˈe, o te huitaata anaˈe te nehenehe e haamori i te Atua poiete. Na teie mau haamaramaramaraa e haapapu ra e mea taa ê roa te taata i te tahi atu mau mea poietehia i nia i te fenua nei.

A feruri na râ: e horoa anei te Atua i teie mau huru maitatai faahiahia mau i te mau taata e i te hoê ite o te maitai atu â i te roaraa o te tau, mai te peu e ua hinaaro oia ia ora tau matahiti noa ratou? Mea papu maitai e ua horoa te Atua i teie mau huru maitatai e aravihi i te mau taata ia nehenehe ratou e fanaˈo i te oraraa oaoa i nia i te fenua nei e a muri noa ˈtu.

Te parau ra vetahi aita roa ˈtu te Atua i hinaaro ia ora te taata i nia i te fenua nei e a muri noa ˈtu. Te paturu ra ratou e ua poietehia te fenua no te riro ei vahi nohoraa o te ore e vai maoro e ei vahi no te tamata i te taata e no te ite o vai te tia ia ora i nia i te raˈi e a muri noa ˈtu i pihai iho i te Atua. Mai te peu e tera iho â, e au ra e o te Atua te tumu o te ino atoa i nia i te fenua nei. Mea hape roa râ te reira. Aita  teie manaˈo e tu ra i to te Atua huru mau. Te na ô ra te Bibilia no nia i te Atua: “O tei au atoa to ˈna ra mau haerea; e Atua parau mau, e te ino ore ra; e parau-tia ta ˈna e te titiaifaro!”—Deuteronomi 32:4.

Te faaite papu ra te Bibilia eaha te opuaraa a te Atua no te fenua i te haamataraa a na ô ai e: “Te mau raˈi ra, na Iehova ïa mau raˈi; area te fenua nei, ua horoa mai oia i te reira na te tamarii a te taata nei.” (Salamo 115:16) Papu maitai, ua poiete te Atua i te fenua no te huitaata ia riro te reira ei vahi nohoraa nehenehe mau o te vai noa. Ua poiete atoa oia i te mau mea atoa ta tatou e hinaaro mau ra no te fanaˈo i te oraraa oaoa e te mure ore.—Genese 2:8, 9.

“Te mau raˈi ra, na Iehova ïa mau raˈi; area te fenua nei, ua horoa mai oia i te reira na te tamarii a te taata nei.”—Salamo 115:16

Mea papu atoa te Bibilia i nia i te opuaraa a te Atua no te huitaata. Ua faaue oia i te tane e vahine matamua ia “faaî i te fenua nei, e e haavi iho; e ia mana . . . i nia iho i te mau mea atoa e nee haere i nia iho i te fenua nei.” (Genese 1:28) E fanaˈoraa taa ê mau no raua ia haapao e ia faariro i te fenua taatoa ei paradaiso! Papu maitai, te a muri aˈe fafauhia no Adamu raua Eva e no ta raua mau tamarii, o te ora mure ore ïa i nia i te fenua nei, eiaha roa ˈtu râ i nia i te raˈi.

No te aha ïa tatou e pohe ai? Te faaite ra te Bibilia e ua hinaaro te hoê melahi a te Atua e totoa i ta te Atua i faanaho i te ô i Edene. O Satani te Diabolo ïa tera melahi orure hau. Eaha ta ˈna i rave?

Ua turai oia i to tatou na metua matamua, o Adamu raua Eva, ia apiti ia ˈna i roto i te orureraa hau i te Atua. Ua parau Satani e ua faaere te Atua ia raua i te hoê mea maitai no raua, oia hoi te tiamâraa ia faaoti raua iho eaha te mea maitai e te mea ino. Apiti atura raua ia Satani e faaoti atura raua i te turu ia ˈna. Eaha ïa te faahopearaa? Ua pohe raua, mai ta te Atua i faaara ˈtu. Ua ere raua i te ora mure ore i roto i te paradaiso i nia i te fenua nei.—Genese 2:17; 3:1-6; 5:5.

E faahopearaa to te orureraa hau a Adamu raua Eva i nia i te mau taata atoa e tae roa ˈtu i teie mahana. Te na ô ra te Parau a te Atua: “No reira, mai te hara i ô mai i te ao nei na roto i te taata hoê ra [o Adamu] e te pohe na roto i te hara, e ua raea roa ïa te mau taata atoa i te pohe no te mea ua hara ratou paatoa.” (Roma 5:12) Aita tatou e pohe ra no te mea ua faataa aˈena te Atua i te mau tupuraa e aita tatou e nehenehe e taa i te reira. Te pohe nei râ tatou no te mea no ǒ mai te hara e te pohe i to tatou na metua matamua.

Aita te orureraa hau i Edene i faataui i te opuaraa a te Atua no te huitaata e no te fenua. No te mea e Atua î i te here oia e te parau-tia, ua horoa oia i te hoê ravea no te faatiamâ ia tatou i te faatîtîraa o te hara e te pohe. Te faataa ra te aposetolo Paulo: “Ta te hara hoi e aufau mai i te taata, o te pohe ïa. Area te ô ta te Atua e horoa mai, o te ora mure ore ïa na roto i te Mesia ra o Iesu, to tatou Fatu.” (Roma 6:23) Ma te here, ua “horoa mai . . . te Atua i ta ˈna Tamaiti otahi [o Iesu Mesia] ia ore ia mou te taata o te faatupu i te faaroo ia ˈna, ia roaa râ te ora mure ore.” (Ioane 3:16) Ma te faaoti i te pûpû ia ˈna iho ei tusia taraehara, ua faahoˈi mai Iesu i te mau mea atoa tei erehia na roto ia Adamu. a

Ua fafau te Atua e riro te fenua ei paradaiso. Fatata roa te reira i te tupu. E nehenehe oe e fanaˈo i teie a muri aˈe faahiahia mau mai te peu e pee maite oe i ta Iesu i parau: “A tomo na te uputa pirihao, mea ateatea hoi te uputa e mea aano te eˈa e tae atu ai i te haamouraa, e mea rahi o te na reira i te haere. Mea pirihao râ te uputa e mea ôaôa te eˈa e tae atu ai i te ora, e aita i rahi te taata o te ite atu i taua eˈa ra.” (Mataio 7:13, 14) Papu maitai, na oe e faaoti eaha to oe a muri aˈe. Eaha ïa ta oe e rave?