Ua poietehia tatou no te ora e a muri noa ˈtu
O VAI o te ore e hinaaro e fanaˈo i te oraraa oaoa e a muri noa ˈtu? A feruri na i tera huru oraraa! E taime ïa to tatou no te feia ta tatou e here ra, no te tere na te ara e no te haapii e nafea ia rave i te mau ohipa e rave rahi ta tatou e mauruuru ra.
E hinaaro tano anei te reira? No te aha te taata e hinaaro ai e ora a muri noa ˈtu? Te parau ra te Bibilia e ua tuu te Atua i tera hinaaro i roto i to tatou aau. (Koheleta 3:11) Te parau atoa ra e “e here te Atua.” (Ioane 1, 4:8) Te here ra te Atua ia tatou e aita oia e horoa mai i te hinaaro e ora a muri noa ˈtu mai te peu aita roa ˈtu tatou e nehenehe e fanaˈo i te reira.
Papu maitai, e ere te pohe i te hoê hoa. Ia au i te Bibilia, e “enemi” au ore te reira. (Korinetia 1, 15:26) E pohe vetahi i to ratou apîraa, area te tahi atu, e ora maoro aˈe ïa. I te pae hopea râ, e pohe tatou pauroa. No e rave rahi, mea au ore ia feruri i te pohe. Mea riaria atoa. E haamouhia anei te pohe? E nehenehe anei te reira e tupu?
MEA PAPU TE TIATURIRAA
E maere anei oe a ite ai e aita roa ˈtu te Atua i opua ia pohe te taata? Ia au i te buka Bibilia o te Genese, mea papu maitai e ua opua te Atua ia ora te taata a muri noa ˈtu i nia i te fenua. Ua faaineine maitai te Atua ra o Iehova i te fenua e te mau mea atoa ta te taata e hinaaro mau no te ora e no te oaoa. I muri iho, ua poiete oia i te taata matamua, o Adamu, e ua tuu oia ia ˈna i roto i te hoê paradaiso, te hoê ô i Edene. I muri aˈe i te reira, “hiˈo aˈera te Atua i te mau mea atoa ta ˈna i hamani, e inaha, e mea maitai roa.”—Genese 1:26, 31.
Ua poietehia o Adamu ei taata tia roa, i to te Atua ra huru. (Deuteronomi 32:4) Oia atoa ta Adamu vahine, o Eva. Aita roa ˈtu e hapa i nia ia ˈna. E vahine tia roa i te pae o te feruriraa e te tino. Ua parau Iehova ia raua: “Ia fanau orua, e ia rahi roa, e faaî i te fenua nei, e e haavi iho; e ia mana orua i nia iho i te iˈa o te tai, e i nia iho i te mau manu o te reva, e i nia iho i te mau mea atoa e nee haere i nia iho i te fenua nei.”—Genese 1:28.
No te faaî i te fenua e ta raua mau tamarii, e titauhia te taime. E fanau o Eva i te tamarii e e fanau atoa taua mau tamarii ra i te tamarii a î atu ai te fenua mai ta te Atua i opua. (Isaia 45:18) Mea tano anei ia manaˈo e e horoa Iehova i teie huru oraraa ia Adamu raua Eva no te ite noa i ta raua mau tamarii e peneiaˈe ta raua mau mootua ma te ore e ite i to raua a muri aˈe?
A feruri atoa na i te faaueraa ia mana i nia i te mau animara. Ua faauehia Adamu ia horoa i te iˈoa i te mau animara. E titauhia te taime no te na reira. (Genese 2:19) Hau atu, no te mana i nia i te mau animara, e titauhia ia haapii mai no nia ia ratou e ia taa e nafea ia haapao maitai ia ratou. E titauhia hau atu â taime no te na reira.
Te faaite ra te faaueraa a te Atua ia faaî i te fenua e ia mana i nia i te animara e ua poietehia na taata matamua no te ora a muri noa ˈtu. Oia mau, ua ora maoro roa o Adamu.
TEIE TE OPUARAA A TE ATUA NO TE TAATA: IA ORA RATOU A MURI NOA ˈTU I ROTO I TE PARADAISO I NIA I TE FENUA NEI
UA ORA MAORO ROA RATOU
Adamu: 930 matahiti
Metusela: 969 matahiti
Noa: 950 matahiti
Taata i teie tau: 70-80 matahiti
Te faaite ra te Bibilia e i te hoê taime, ua ora maoro aˈe te taata ia faaauhia i teie mahana. Te na ô ra: “E to Adamu pue mahana atoa i to ˈna ra oraraa, e iva ïa hanere, e toru ahuru i te matahiti.” I muri iho, ua faahitihia te iˈoa o e ono atu tane tei ora hau atu i te 900 matahiti! O Seta, Enoha, Kainana, Iareda, Metusela e Noa. Ua ora ratou pauroa hou te diluvi i to Noa tau e ua ora o Noa e 600 matahiti hou a tupu ai te diluvi. (Genese 5:5-27; 7:6; 9:29) Nafea ratou i nehenehe ai e ora maoro aˈe?
Ua fanauhia taua mau tane ra aita i maoro aˈe i te taime e oraraa tia roa to Adamu raua Eva. E au ra e no te reira ratou i ora maoro aˈe. Tera râ, nafea te tia-roa-raa e taaihia i te faito roa o te oraraa? E e nafea te pohe e haamouhia ˈi? No te ite i te mau pahonoraa, e titauhia na mua roa ia taa e no te aha tatou e ruhiruhia ˈi e e pohe ai.