E PARAU anei oe e Kerisetiano oe? Mai te peu e, tei rotopu oe i na piti miria tiahapa taata na te ao o te parau ra e pǐpǐ ratou na te Mesia. Hoê ïa taata i nia e toru o te pahono mai tera! I teie mahana, e tausani pǔpǔ faaroo o te piihia Kerisetiano, mea taa ê râ ta ratou mau haapiiraa e to ratou mau manaˈo. Mea taa ê roa paha ta oe mau tiaturiraa i ta te tahi atu mau taata o te parau ra e Kerisetiano ratou. Mea faufaa anei ia hiˈopoa i ta oe mau tiaturiraa? E, mai te peu iho â râ te hinaaro ra oe e haapao i ta te Bibilia e haapii ra.

I piihia na te mau pǐpǐ matamua a Iesu Mesia, “Kerisetiano.” (Ohipa 11:26) Aita e faufaa ia horoa i te iˈoa ê no ratou, hoê anaˈe hoi faaroo Kerisetiano i tera tau. Mea hoê te mau Kerisetiano no te mea ua haapao ratou paatoa i te mau haapiiraa e faaueraa a Iesu Mesia tei haamau i te amuiraa Kerisetiano. E no ta oe haapaoraa? Te haapii ra anei i ta te Mesia i haapii? Eaha te mau tiaturiraa a te mau pǐpǐ matamua a Iesu? E nafea ia papu i te reira? Hoê anaˈe ravea, e hiˈopoa i ta te Bibilia e parau ra.

 A hiˈo na: Mea faatura roa na Iesu Mesia i te mau Papai, te Parau a te Atua. Mea au ore roa na ˈna te feia o tei haafaufaa aˈe i te manaˈo taata i te mau haapiiraa Bibilia. (Mareko 7:9-13) Mea tano ïa ia parau, ua niuhia te mau tiaturiraa a te mau pǐpǐ mau a Iesu i nia i te Parau a te Atua. Mea maitai ia uiui te mau Kerisetiano atoa, ‘Ua niuhia anei te mau haapiiraa a ta ˈu haapaoraa i nia i te Bibilia?’ No te pahono i tera uiraa, no te aha e ore ai e faaau i ta ta oe haapaoraa e haapii ra e ta te Bibilia e parau ra?

Ua faaite Iesu e tia ia haamori i te Atua ma te parau mau o te itehia i roto i te Bibilia. (Ioane 4:24; 17:17) E ua parau te aposetolo Paulo, e faaorahia tatou “ia noaa te ite i te parau mau.” (Timoteo 1, 2:4) Mea faufaa roa ia niuhia ta tatou mau tiaturiraa i nia i te parau mau papu a te Bibilia. No te aha? Ia ora tatou!

A taio e a feruri maite na i na ono uiraa e te pahonoraa a te Bibilia. I muri iho, a uiui ia oe, ‘Ua tano anei ta ta ˈu haapaoraa e haapii ra i ta te Bibilia e parau ra?’

Mea faufaa roa te hiˈopoaraa o ta oe e rave maoti teie mau manaˈo. E farii anei oe i te faaau i te tahi atu haapiiraa a ta oe haapaoraa e ta te Bibilia e haapii ra? E oaoa roa te mau Ite no Iehova i te tauturu ia oe ia hiˈopoa i te parau mau papu i roto i te Bibilia. No te aha e ore ai e ani i te hoê haapiiraa Bibilia tamoni ore i te tahi Ite no Iehova? Aita anaˈe, a hiˈo i nia i ta matou reni jw.org/ty.