E, te vai ra. Ua poietehia anei ratou mai tera? A haamanaˈo na e ua horoa te Atua i te mau melahi ta ˈna i poiete i te tiamâraa ia maiti. Tau taime rii i muri aˈe i te poieteraahia na taata matamua o Adamu raua Eva, ua faaohipa hape te tahi melahi tia roa i to ˈna tiamâraa ia maiti. Ua opua oia e faatupu i te orureraa hau i nia i te fenua. Ua manuïa oia no te mea ua tia ia ˈna ia turai ia Adamu raua Eva ia patoi i te Atua. (Genese 3:1-7; Apokalupo 12:9) Aita te Bibilia e faaite ra i te iˈoa e te tiaraa o tera melahi i te raˈi na mua ˈˈe oia a patoi ai i te Atua. I muri aˈe râ i ta ˈna orureraa hau, te faaite maitai ra te Bibilia o Satani to ˈna iˈoa, o Patoi te auraa. E pii-atoa-hia o ˈna te Diabolo, o Pari haavare te auraa.—Mataio 4:8-11.

Aita râ tera orureraa hau i faaea noa i ǒ. I te tau o Noa, ua vaiiho te tahi mau melahi i te utuafare o te Atua i te raˈi e “ua faarue . . . i to ratou iho nohoraa.” Aita i faaitehia ehia rahiraa ratou o tei na reira. Ua pou mai râ tera mau melahi i nia i te fenua e ua rave i te hoê tino taata no te haamâha i to ratou mau hinaaro iino e te tia ore. Aita roa hoi ratou i hamanihia no te reira.—Iuda 6; Genese 6:1-4; Petero 1, 3:19, 20.

I to te Atua faatupuraa i te diluvi no te tamâ i te fenua taatoa, ua faarue tera mau melahi ino i to ratou tino taata e ua hoˈi i to ratou nohoraa i te raˈi. Tera râ, aita te Atua i faatia i tera mau melahi faatura ore ia hoˈi faahou i “to ratou tiaraa matamua.” Ua faaoti râ oia ia tapeahia ratou i roto i te hoê tupuraa haihai roa, “i roto i te poiri taˈotaˈo [i te pae varua]” piihia Taretaruso. (Iuda 6; Petero 2, 2:4) Na tera noa iho â mau melahi ino, pii-atoa-hia demoni, i maiti ia riro te Diabolo ra o Satani ei faatere no ratou. Te parauhia ra o Satani “te raatira o te mau demoni,” o ˈna e “faahua noa nei ia ˈna ei melahi no te maramarama.”—Mataio 12:24; Korinetia 2, 11:14.

Te haapii ra te Bibilia ua haamauhia te Basileia o te Atua i 1914, e faatereraa arii tera o te Mesia te Arii. a I muri iho, ua tiahihia Satani e ta ˈna mau demoni i te raˈi e ua hurihia mai i raro nei i te fenua. Ua rahi roa te ino e te mau peu taotoraa tia ore faufau na te ao nei. Ua riro te reira ei haapapuraa i te riri o Satani e ta ˈna mau melahi, oia atoa i to ratou hinaaro e haamauiui i te taata.—Apokalupo 12:9-12.

Tera râ, te haapapu atoa ra te rahi o te ino e te mau taparahiraa taata riaria mau ua fatata roa Satani e ta ˈna mau demoni i te tapeahia. I mua nei, eita ratou e nehenehe faahou e haamauiui mai. No te hoê maororaa 1 000 matahiti, e mana mai te Faatereraa arii a te Atua i nia i te fenua nei o te riro roa ei paradaiso. Ia hope te reira, e tuuhia tera mau melahi ino no te hoê taime poto, o te tamataraa hopea roa o te huitaata. I muri iho, e haamou-roa-hia Satani e ta ˈna mau melahi ino e a muri noa ˈtu.—Mataio 25:41; Apokalupo 20:1-3, 7-10.