“E terono tei faatiahia i nia i te raˈi, e te parahi ra te hoê i nia iho i taua terono ra. E o tei parahi i nia iho i taua terono ra, mai te isephe ra, e te ofai adama ra, te huru; e i haaatihia taua terono ra i te anuanua, mai te semaradino ra te huru.”—Apokalupo 4:2, 3.

“Ua ati aˈera oia i te anaana. Mai te huru o te anuanua e vai i roto i te ata i te mahana ûa nei, o te huru ïa o te anaana e ati noa ˈˈe. O te huru ra teie o te anaana o Iehova.”—Ezekiela 1:27, 28.

Ua horoahia teie na orama i te aposetolo Ioane e i te peropheta Ezekiela. Te faataa ra te reira i te hanahana o te Atua teitei ra o Iehova maoti te mau mea ta tatou i matau: te ofai maitatai anaana, te hoê anuanua e te hanahana o te hoê terono. Te auraa ïa e mea nehenehe mau e te hau to reira anaˈe Iehova.

Te tuea ra teie faataaraa o te Atua i ta te papai salamo: “E rahi hoi Iehova, e ia rahi hoi te haamaitai ia ˈna; e ia rahi hoi to ˈna mǎtaˈuraahia i te mau atua atoa ra! Te mau atua atoa o te mau etene, idolo faufaa ore ïa: area o Iehova na ˈna i hamani i te mau raˈi ra. Te tura e te mana tei mua i tana aro. Te puai e te nehenehe tei to ˈna ra ïa vahi moˈa.”—Salamo 96:4-6.

Noa ˈtu o Iehova te Atua teitei, te ani mai ra o ˈna ia haafatata ˈtu ia ˈna na roto i te pure ma te haapapu e e faaroo mai o ˈna. (Salamo 65:2) Te here e te haapao rahi mai ra te Atua. No reira te aposetolo Ioane i papai ma te tiaturi: “E aroha hoi te Atua.”—Ioane 1, 4:8.

“Î aˈera [te pǐpǐ Kerisetiano ra o Setephano] i te Varua Maitai, e hiˈo tamau maite atura i nia i te raˈi, e ite atura i te hanahana o te Atua, e ia Iesu i te tia-maite-raa i te rima atau o te Atua ra. Ua na ô aˈera oia, Inaha, te ite atura vau i te raˈi, ua vevetehia, e te Tamaiti a te taata i te tiaraa i te rima atau o te Atua ra.”—Ohipa 7:55, 56.

Hou Setephano a ite ai i tera orama, ua haapohehia Iesu. I teie nei, te paraparau ra Setephano i te  mau aratai ati Iuda, te feia iho tei turai i te tahi atu ia haapohe ia Iesu. Ua haapapu te orama e ua faatiahia mai Iesu i te ora e ua fanaˈo i te hanahana. Ua papai te aposetolo Paulo no nia i te reira: “A faatia ˈi [Iehova] ia [Iesu] mai te pohe maira, e i haaparahi ihora ia ˈna i to ˈna iho rima atau i te basileia ra i te ao; i nia ê roa i te mau arii, e te feia mana, e te puai, e te rahi, e te mau iˈoa atoa i faahitihia nei, eiaha i teie nei ao anaˈe ra, i te ao atoa râ a muri atu.”—Ephesia 1:20, 21.

Te faataa ra te mau Papai i te tiaraa teitei o Iesu. E faaite atoa mai râ te reira e mai ia Iehova, te haapao rahi ra Iesu i te taata. I to ˈna taviniraa i te fenua, ua faaora Iesu i tei maˈihia e i te feia hapepa e ua faatia faahou mai i te taata pohe. E ma to ˈna tusia, ua faaite o ˈna i to ˈna here rahi no te Atua e no te taata. (Ephesia 2:4, 5) I te rima atau o te Atua, fatata Iesu i te faatere mai e i te haamaitai rahi mai i te huitaata faaroo i te mau vahi atoa.

“Te hiˈo ra vau [te peropheta Daniela], e haamauhia ihora te mau terono e ua parahi maira To te mau mahana tahito ra [Iehova], . . . e ua tausani hoi te tausaniraa i te taviniraa ia ˈna ra, e ua ahuru hoi te tausaniraa i te manotini i te tiaraa i mua i tana aro.”—Daniela 7:9, 10.

I roto i teie orama o te raˈi, ua ite Daniela e rave rahi roa melahi, eiaha noa hoê. Auê ïa orama faahiahia mau! E varua hanahana, maramarama e te puai te mau melahi. Te vai ra i roto ia ratou te seraphi e te kerubi. Te faahiti ra te Bibilia i te mau melahi hau atu i te 250 taime.

E ere te melahi i te taata tei ora na i te fenua. Ua poiete te Atua ia ratou na mua roa ˈˈe i te taata. Ua ite te mau melahi a poietehia ˈi te fenua e ua pii noa ratou i te oaoa.—Ioba 38:4-7.

Te tahi ravea e tavini ai ratou i te Atua maoti ïa te ohipa faufaa roa ˈˈe i te fenua: te faaiteraa i te parau apî oaoa o te Faatereraa arii a te Atua. (Mataio 24:14) E ua faaitehia ta ratou tuhaa i roto i te hoê orama a te aposetolo Ioane o tei papai: “Hiˈo atura vau i te hoê melahi i te maueraa na ropu i te reva nei: ma te evanelia e tia i te vairaa ra ei pororaa ˈtu i te feia e parahi i te ao nei ra, i te mau fenua  atoa, e te mau opu atoa, e te mau reo atoa, e te mau nunaa atoa.” (Apokalupo 14:6) Aita te mau melahi e paraparau i te taata mai ta ratou i rave i te tahi taime i na mua ˈˈe. Te tauturu nei râ ratou ma te aratai i te feia e poro ra i te parau apî oaoa i te feia aau farii e tano.

“E tamaˈi tei nia i te raˈi: O Mihaela [Iesu Mesia] e ta ˈna ra mau melahi tamaˈi atura i te teni; e ua tamaˈi maira te teni e ta ˈna ra mau melahi. Aore râ i riro te re ia ratou; e aore roa ˈtura o ratou e parahiraa i nia i te raˈi. Hurihia ˈtura hoi te teni rahi i rapae, o taua ophi tahito ra ïa, o tei parauhia o te diabolo ra, e o Satani hoi, o tei haavare i to te ao atoa nei; i hurihia oia i rapae i nia iho i te fenua nei, e ta ˈna mau melahi atoa ua huri-atoa-hia i rapae.”—Apokalupo 12:7-9.

Aita te hau i vai noa i te raˈi. I te omuaraa roa o te tuatapaparaa, ua orure hau te hoê melahi ia Iehova. Ua hinaaro teie melahi ia haamorihia o ˈna, riro mai nei ïa oia Satani, o “Patoi” te auraa. I muri iho, ua pee atoa te tahi atu mau melahi i ta ˈna orureraa hau e ua piihia ratou te mau demoni. Te patoi roa nei teie mau melahi ino ia Iehova e ua faaatea ê ratou i te rahiraa o te taata i te aratairaa î i te here a Iehova.

Mea ino mau Satani e ta ˈna mau demoni. E enemi ratou no te huitaata e o ratou te tumu o te mauiui e rave rahi. A hiˈo na, ua haapohe Satani i te nǎnǎ e te mau tavini a te taata taiva ore o Ioba. Ua haapohe atoa i na ahuru tamarii a Ioba na roto i te hoê “mataˈi uˈana” o tei vavahi i te fare to reira ratou. I muri iho, tairi atura Satani ia Ioba i te “maˈi mai te tapuaˈe avae e tae noa aˈera i te tupuai upoo.”—Ioba 1:7-19; 2:7.

Fatata roa râ aita faahou Satani. Ua hurihia mai o ˈna i nia i te fenua e ua ite o ˈna e “maa taime poto to ˈna e toe nei.” (Apokalupo 12:12) E haamou-roa-hia Satani. Auê ïa parau apî oaoa!

“Ua hoo oe [Iesu] ia matou ei taata no te Atua, i to oe iho na toto, no roto i te mau opu atoa, e te mau reo atoa, e te mau nunaa atoa e te mau fenua atoa; e ua faariro oe ia matou ei hui arii, e ei tahuˈa na to matou Atua, e e riro ia matou te hau i teie nei ao.”—Apokalupo 5:9, 10.

Mai ia Iesu i faatiahia mai no te ora i te raˈi, e na reira-atoa-hia te tahi atu. Ua parau Iesu i ta ˈna mau aposetolo taiva ore: “Te haere nei au e haamaitai  i te hoê vahi no outou. E ua oti anaˈe . . . e hoˈi mai au e aratai ia outou i o ˈu ra; ei reira atoa outou i te vahi e parahihia e au ra.”—Ioane 14:2, 3.

E haere ratou i te raˈi no te apiti ia Iesu i roto i te Faatereraa arii o te faatere e te haamaitai i te huitaata. Teie te Faatereraa arii, aore ra hau, ta Iesu i parau i ta ˈna mau pǐpǐ ia pure: “E to matou Metua i te ao ra, ia raa to oe iˈoa. Ia tae to oe ra hau. Ia haapaohia to oe hinaaro i te fenua nei, mai tei te ao atoa na.”—Mataio 6:9, 10.

“Ua faaroo atura vau [te aposetolo Ioane] i te hoê reo rahi no te raˈi maira, i te na ôraa mai e, Inaha tei ǒ te taata ra te sekene o te Atua, . . . na te Atua e horoi i to ratou roimata atoa; e e ore roa te pohe, e te oto, e te mihi, e te mauiui, e ore atoa ïa, no te mea ua mou te mau mea tahito ra.”—Apokalupo 21:3, 4.

Te faataa ra teie orama i te taime e ohipa ˈi te Faatereraa arii a te Atua, oia hoi o Iesu e te feia hoohia mai no te fenua. E haamou te reira i te faatereraa a Satani a faariro atu ai i te fenua ei paradaiso. E ore roa te mau mea e mauiui e e oto ai te huitaata. E mou atoa te pohe.

Eaha te tupu no na miria taata tei pohe e te ore e tia faahou i te raˈi? E ora ratou e a muri noa ˈtu i roto i te paradaiso i nia i te fenua.—Luka 23:43.