1-2. (1) Eaha te mau uiraa ta tatou e hiˈopoa? (2) Eaha te faaite ra e te hinaaro mau ra Iehova e tauturu ia tatou?

 E NEHENEHE Iehova e tauturu ia tatou ia faaoromai tamau i te mau fifi o te oraraa e ia oaoa i roto i ta tatou taviniraa. Eaha ta ˈna e rave ra no te tauturu ia tatou e e nafea tatou e faufaahia ˈi i te reira? E pahonohia teie mau uiraa i roto i teie tumu parau haapiiraa. Na mua râ, e pahono tatou i teie uiraa faufaa roa: Te hinaaro mau ra anei Iehova e tauturu ia tatou?

² I roto i ta ˈna rata i te mau Hebera, ua faaohipa te aposetolo Paulo i te hoê taˈo o te tauturu ia tatou ia ite i te pahonoraa. Ua parau o ˈna: “O Iehova to ˈu tauturu. E ore au e mǎtaˈu. Eaha hoi ta te taata e nehenehe e rave i nia ia ˈu?” (Heb. 13:6) Ia au i te hoê tatararaa Bibilia, ua faaohipahia te taˈo “tauturu” i roto i teie irava no te hoê taata o te ru i te tauturu i te tahi atu. Hoê â huru no Iehova. Ia ahoaho tatou, oioi o ˈna i te tauturu mai. Na roto i teie faahohoˈaraa, te taa ra ia tatou e te hinaaro mau ra Iehova e tauturu ia tatou no te faaoromai tamau i te mau fifi ma te oaoa.

3. Eaha na ravea e toru ta Iehova e faaohipa ra no te tauturu ia tatou ia faaoromai tamau i te mau fifi ma te oaoa?

³ E nafea Iehova e tauturu ai ia tatou ia faaoromai tamau i te mau fifi ma te oaoa? No te ite i te pahonoraa, e hiˈopoa tatou i te buka a Isaia. No te aha? No te mea e faufaahia  tatou i e rave rahi parau tohu ta Iehova i faaite ia Isaia. Hau atu, ua faahohoˈa Isaia ia Iehova ma te faaohipa i te tahi mau taˈo ohie ia taa. Ei hiˈoraa, i roto i te pene 30, ua faaohipa Isaia i te tahi faahohoˈaraa nehenehe mau o te faaite ra e nafea Iehova e tauturu ai i ta ˈna mau tavini. A tahi, e tauturu mai Iehova ma te faaroo e ma te pahono i ta tatou mau pure, a piti, e aratai oia ia tatou e a toru, e haamaitai oia ia tatou i teie nei â e a muri aˈe. E hiˈopoa anaˈe i teie na ravea e toru.

4. (1) Eaha ta Iehova i parau no te ati Iuda i te tau o Isaia e eaha tei tupu no ratou? (2) Eaha te tiaturiraa ta Iehova i horoa no te ati Iuda tei vai taiva ore ia ˈna? (Isaia 30:18, 19)

⁴ I te omuaraa o te pene 30 o te buka Isaia, te faahohoˈa ra Iehova i te ati Iuda i “te mau tamaiti haapaari” ua “apǎpǎ” noa ta ratou hara. Ua parau atoa o ˈna: “E nunaa orure hau hoi teie, . . . o te ore e hinaaro e faaroo i te ture a Iehova.” (Isa. 30:1, 9) I te mea e aita te ati Iuda i hinaaro e faaroo, ua tohu Isaia e e vaiiho Iehova ia roohia ratou i te ati. (Isa. 30:5, 17; Ier. 25:8-11) Tera iho â tei tupu. Ua hopoi-ê-hia ratou i Babulonia. Tera râ, te vai ra vetahi ati Iuda tei vai taiva ore ia Iehova. E parau apî oaoa ïa ta Isaia no ratou. Ua faaite o ˈna e e faahoˈi Iehova ia ratou i Ierusalema. (A taio i te Isaia 30:18, 19.) Ua tupu iho â teie parau tohu. Ua faaora Iehova ia ratou mai Babulonia mai. E rave rahi râ matahiti tei mairi hou Iehova i faaora ˈi ia ratou. Ua parau hoi Isaia “te tiai nei Iehova ma te faaoromai no te hamani maitai ia outou.” Te auraa ïa, e titauhia i teie ati Iuda taiva ore ia tiai i tera taime faaoraraa. Inaha, ua hopoi-ê-hia te mau Iseraela i Babulonia e 70 matahiti te maoro hou a nehenehe ai vetahi o ratou e hoˈi i Ierusalema. (Isa. 10:21; Ier. 29:10) I to ratou hoˈiraa ˈtu i Ierusalema, ua taˈi ratou no te oaoa e ua faaora Iehova ia ratou.

5. Eaha te haapapuraa ta te Isaia 30:19 e horoa mai ra?

⁵ I teie mahana, e itoitohia tatou maoti teie mau parau: “E hamani maitai mau â oia ia oe ia faaroohia ta oe pii no te tauturu.” (Isa. 30:19) Te haapapu mai ra Isaia e faaroo maite Iehova ia pii tatou ia ˈna e e pahono oioi o ˈna i ta tatou mau taparuparuraa. Ua na ô atoa Isaia: “E pahono oia ia oe i te faarooraa iho â oia i ta oe pii.” Te haapapu ra te reira e te hinaaro mau ra Iehova e tauturu i te feia atoa e pure ra ia ˈna. No reira, e nehenehe tatou e faaoromai tamau ma te oaoa.

6. E nafea te mau parau a Isaia e faaite ai e te faaroo ra Iehova i te pure a ta ˈna mau tavini tataitahi?

⁶ Eaha ta teie mau irava e haapii mai ra no nia i ta tatou mau pure? Te haapapu ra te reira e te faaroo maite ra Iehova i te pure a te taata tataitahi. Ei hiˈoraa, i roto i te tuhaa matamua o te pene 30 o te buka a Isaia, ua faaohipahia te taˈo “outou” no te mea te paraparau ra Iehova i ta ˈna mau tavini. I roto râ i te irava 19, ua faaohipahia te taˈo “oe.” Ua parau Isaia: “Eita mau â oe e taˈi,” “e pahono oia ia oe,” e “e hamani maitai mau â oia ia oe.” Mai te hoê Metua î i te here, eita Iehova e parau ia tatou ei tamaiti aore ra tamahine e toaruaru ra: ‘Eita anei oe e nehenehe e rave mai to oe taeae aore ra tuahine?’ Aita roa ˈtu! Te tâuˈa ra Iehova ia tatou e te faaroo maite ra o ˈna i ta tatou mau pure.—Sal. 116:1; Isa. 57:15.

7. Mea nafea to Isaia raua Iesu faaiteraa i te faufaaraa ia tamau i te pure?

 ⁷ Ia pure tatou ia Iehova no te hoê fifi taa maitai, e horoa na mua Iehova i te puai no te faaruru i te reira. Mai te peu râ eita tera fifi e ore oioi, e tia ia tatou ia ani noa ia Iehova i te puai no te faaoromai tamau. Tera iho â ta Iehova e titau ra ia tatou ia rave. Te na ô ra Isaia: “Eiaha e vaiiho ia [Iehova] ia faafaaea.” (Isa. 62:7) Eaha ïa te auraa? Ia ore tatou e faaea i te pure ia Iehova, eita ïa tatou e vaiiho ia ˈna ia faafaaea. Te haamanaˈo ra te mau parau a Isaia i te faahohoˈaraa ta Iesu i faaohipa no nia i te pure faahitihia i roto i te Luka 11:8-10, 13. Te faaitoito ra Iesu ia tatou ia pure ma te “onoono rahi” e ia “tamau i te ani” i te varua moˈa o te Atua. E nehenehe atoa tatou e ani i te aratairaa a Iehova no te rave i te mau faaotiraa maitai.

8. I tahito ra, mea nafea te mau parau o te Isaia 30:20, 21 i te tupuraa?

⁸ A taio i te Isaia 30:20, 21. A haaati ai te nuu Babulonia ia Ierusalema i te roaraa hoê matahiti e te afa, ua ahoaho roa te nunaa i te mau mahana atoa. Tera râ, ia au i te mau irava 20 e 21, ua fafau Iehova i te ati Iuda e faaora o ˈna ia ratou, ia tatarahapa e ia taui ratou i to ratou haerea. A pii ai Isaia ia Iehova te “Orometua Rahi roa ˈˈe,” ua parau o ˈna e e haapii Iehova i te ati Iuda eaha te rave no te haamori ia ˈna ia au i to ˈna hinaaro. Ua tupu teie parau tohu i to te ati Iuda faaoraraahia mai Babulonia mai. Ua riro mau Iehova ei Orometua Rahi roa ˈˈe no ratou e i raro aˈe i ta ˈna aratairaa, ua haamau faahou ratou i te haamoriraa viivii ore. I teie mahana, te oaoa nei tatou no te mea o Iehova atoa to tatou Orometua Rahi roa ˈˈe.

9. I teie mahana, e nafea tatou e fanaˈo ai i te aratairaa a Iehova?

⁹ Te faahohoˈa ra Isaia ia tatou i te mau piahi ta Iehova e haapii ra na roto e piti ravea. A tahi, ua parau Isaia: “E ite outou i to outou Orometua Rahi roa ˈˈe i to outou iho mata.” I roto i teie faahohoˈaraa, te parau ra Isaia e te tia ra te Orometua i mua i ta ˈna mau piahi. Auê ïa haamaitairaa taa ê no tatou ia fanaˈo i te mau haapiiraa a Iehova na roto i ta ˈna faanahonahoraa! E mauruuru tatou i teie mau aratairaa ta tatou e fanaˈo na roto i te mau putuputuraa, te mau tairururaa, te mau papai, te mau haapurororaa teata  e te vai atu ra. Maoti teie mau ravea e nehenehe ai tatou e faaoromai tamau i te mau fifi ma te oaoa.

10. Eaha te auraa ia parauhia e e faaroo tatou “i te reo i muri ia [tatou]”?

¹⁰ Ua faahiti Isaia i te piti o te ravea e haapii ai Iehova ia tatou ma te parau: “Na to oe iho tariˈa e faaroo i te reo i muri ia oe.” Te faahohoˈa ra Isaia ia Iehova i te hoê orometua o te haere ra na muri i ta ˈna mau piahi no te aratai ia ratou e no te faaite eaha te eˈa e tia ia ratou ia rave. I teie mahana, te faaroo ra tatou i te reo o te Atua i muri ia tatou. Eaha te auraa? Ua papaihia te mau parau a te Atua i roto i te Bibilia e mea maoro i teie nei, tei muri ïa ia tatou i roto i te tereraa o te tau. No reira, ia taio tatou i te Bibilia, mai te huru ra e te faaroo ra tatou i te reo o te Atua i muri ia tatou.—Isa. 51:4.

11. Eaha te tia ia tatou ia rave no te faaoromai tamau ma te oaoa e no te aha?

¹¹ E nafea tatou e faufaahia ˈi i te aratairaa ta Iehova e horoa ra na roto i ta ˈna faanahonahoraa e i ta ˈna Parau? A tapao na eaha ta Isaia i parau. A tahi, “teie te eˈa.” A piti, “a na reira i te haere.” (Isa. 30:21) Eita e navai noa ia ite eaha “te eˈa,” e titau-atoa-hia ia “na reira i te haere.” Te auraa ïa, e titauhia ia tatou ia haapii eaha ta Iehova e titau mai ra maoti te Bibilia e te mau faataaraa ta ta ˈna faanahonahoraa e horoa ra. E ite atoa tatou e nafea ia faaohipa i ta tatou e haapii ra. Mea faufaa na taahiraa e piti no te faaoromai tamau ma te oaoa a tavini ai ia Iehova. Ma te na reira, e haamaitai iho â Iehova ia tatou.

12. Ia au i te Isaia 30:23-26, mea nafea Iehova i te haamaitairaa i to ˈna nunaa?

¹² A taio i te Isaia 30:23-26. Mea nafea teie parau tohu i te tupuraa no te ati Iuda tei hoˈi i te fenua o Iseraela i muri aˈe i to ratou hopoi-ê-raahia i Babulonia? E rave rahi haamaitairaa ta ratou i fanaˈo i te pae tino e i te pae varua. Ua horoa Iehova i te maa na ratou. Te mea faufaa roa ˈtu â, ua horoa o ˈna i te mau mea atoa ia nehenehe ratou e faafatata ˈtu ia ˈna e e haamori ia ˈna ia au i to ˈna hinaaro. Aita ratou i fanaˈo aˈenei i tera mau huru haamaitairaa no ǒ mai ia Iehova. Mai tei faahitihia i roto i te irava 26, ua tauturu mǎrû noa Iehova i te ati Iuda ia taa i ta ˈna Parau. (Isa. 60:2) Ua tauturu te mau haamaitairaa a Iehova ia ratou ia tavini ia ˈna ma te oaoa e te itoito mau e “ia umere . . . no te huru maitai o to ratou aau.”—Isa. 65:14.

13. Mea nafea te parau tohu e haamau-faahou-hia te haamoriraa viivii ore i te tupuraa i teie mahana?

 ¹³ Ua tohuhia e haamau-faahou-hia te haamoriraa viivii ore. Mea nafea teie parau tohu i te tupuraa i teie mahana? Mai 1919 mai â, e rave rahi taata tei faarue ia Babulonia rahi, oia hoi, te taatoaraa o te mau haapaoraa hape. Ua arataihia ratou i te hoê vahi maitai aˈe i te Fenua tǎpǔhia o Iseraela. I teie nei, tei roto ratou i te hoê paradaiso pae varua. (Isa. 51:3; 66:8) Eaha râ teie paradaiso pae varua?

14. Eaha te paradaiso pae varua e o vai ma te ora ra i roto, i teie mahana? (A hiˈo i te nota “No te taa maitai atu â.”)

¹⁴ Mai 1919 mai â, te oaoa ra te feia faatavaihia i te ora i roto i te hoê paradaiso pae varua. b I muri mai, ua apiti atoa mai te mau “mamoe ê atu,” oia hoi, te feia e tiaturi ra e ora i nia i te fenua e te oaoa ra ratou i te fanaˈo i te mau haamaitairaa no ǒ mai ia Iehova.—Ioa. 10:16; Isa. 25:6; 65:13.

15. Teihea roa te paradaiso pae varua?

¹⁵ Teihea roa te paradaiso pae varua? I te mea e itehia te mau tavini a Iehova ati aˈe te ao nei, oia atoa ïa te paradaiso pae varua. No reira, e nehenehe tatou e ora i roto i teie paradaiso pae varua mai te peu e turu tatou i te haamoriraa mau, noa ˈtu eaha te fenua ta tatou e ora ra.

16. Eaha te tia ia rave no te vai noa i roto i teie paradaiso pae varua?

¹⁶ No te vai noa i roto i teie paradaiso pae varua, mea tia atoa ia faaite i to tatou mauruuru no te fetii taeae na te ao nei. E nafea ïa? Ma te tiatonu i nia noa i te mau huru maitatai o to tatou mau taeae e tuahine, eiaha râ i nia i ta ratou mau hape. (Ioa. 17:20, 21) No te aha mea faufaa te reira? Ei hiˈoraa, ia haere tatou e mataitai i te hoê uru raau, te vai ra te mau tumu raau e rave rau. Hoê â huru i roto i te paradaiso pae varua, ua rau te taata i roto i te mau amuiraa. E nehenehe  ratou e faaauhia i teie mau tumu raau. (Isa. 44:4; 61:3) E hiˈo tatou i te nehenehe o te uru raau, eiaha râ te huru o te mau tumu raau tataitahi. Eiaha ïa e vaiiho i ta tatou mau hape aore ra te hape a vetahi ê ia haafifi i te auhoêraa e vai ra i rotopu i te fetii taeae ati aˈe te ao nei.

17. E nafea tatou tataitahi e haa ˈi ia vai noa te auhoêraa i roto i te amuiraa?

¹⁷ E nafea tatou tataitahi e haa ˈi ia vai noa te auhoêraa i roto i te amuiraa? Ma te riro ei taata o te faatupu i te hau. (Mat. 5:9; Roma 12:18) I te mau taime atoa e faatupu ai tatou i te hau i roto i te amuiraa, e unauna ˈtu â te paradaiso pae varua. E haamanaˈo noa tatou e na Iehova i faafatata ia tatou tataitahi i roto i teie paradaiso pae varua o te haamoriraa mau. (Ioa. 6:44) E feruri anaˈe i te oaoa o Iehova a ite ai e te tutava ra tatou i te haa ia vai noa te hau e te auhoêraa i rotopu i ta ˈna mau tavini ta ˈna e poihere ra.—Isa. 26:3; Hag. 2:7.

18. Eaha te mau mea e titauhia ia tatou ia feruriruri e no te aha?

¹⁸ E rave rahi maitai ta Iehova e horoa ra na ta ˈna mau tavini. E nafea ïa tatou e fanaˈo ai i te reira? Ma te feruriruri i nia i ta tatou e haapii nei i roto i te Bibilia e i ta tatou mau papai. Na te reira e tauturu ia tatou ia faatupu i te mau huru maitatai Kerisetiano o te turai ia tatou ia faaite i “te here taeae” e te “here mau” i roto i te amuiraa. (Roma 12:10) Ia feruriruri tatou i nia i te mau haamaitairaa ta tatou e fanaˈo ra, e puai atu â to tatou auhoaraa e o Iehova e e faaoti papu tatou i te tavini ia ˈna e a muri noa ˈtu. E tauturu te reira ia tatou ia tavini ia Iehova ma te oaoa i teie nei â.

19. (1) Ia au i te Isaia 30:18, eaha ta tatou e nehenehe e papu? (2) Eaha te tauturu ia tatou ia faaoromai tamau ma te oaoa?

¹⁹ “E tia” Iehova no tatou i te taime e haamou ai o ˈna i teie ao ino. (Isa. 30:18) Ua papu ia tatou e “Atua parau-tia” Iehova, eita ïa o ˈna e vaiiho ia Satani ia faatere i teie nei ao e a muri noa ˈtu. (Isa. 25:9) Te tiai ru nei tatou e o Iehova atoa ia tae mai tera mahana. A tiai noa ˈi, e faaoti papu anaˈe i te haafaufaa i te ô o te pure, i te haapii i te Bibilia, i te faaohipa i te reira e i te feruriruri i nia i te mau haamaitairaa ta tatou e fanaˈo ra. Ma te na reira, e tauturu Iehova ia tatou ia faaoromai tamau ma te oaoa a tavini noa ˈi ia ˈna.