Tauturu no te rave tamau i ta oe haapiiraa
MEA fifi anei no oe ia haapii i te Bibilia pauroa te hebedoma? E fiu anei oe i te tahi taime? E ere o oe anaˈe mai tera. Teie râ, a feruri na i te tahi mau mea ta oe i matau i te rave, mai te hopuraa i te pape. Noa ˈtu e titauhia te taime, e au roa râ oe ia mâ oe. Ua faaauhia te haapiiraa i te Bibilia i te ‘horoiraa ia tatou i te pape maoti te parau a te Atua.’ (Eph. 5:26) Teie te tahi mau manaˈo tauturu:
A faanaho i ta oe porotarama. Ua ite tatou e o ta tatou iho haapiiraa Bibilia, hoê o ‘te mau mea faufaa roa ˈˈe’ te titauhia ia rave. (Phil. 1:10) E nehenehe oe e tuu i ta oe porotarama i te vahi e ite maitai atu oe, i nia anei i ta oe iri piaraa aore ra i nia i te faatoetoeraa. Mea ohie aˈe ïa no oe ia pee i te reira. E tano atoa ia faataˈi i te hoê faaararaa i nia i ta oe vini hou rii a rave ai i ta oe haapiiraa.
A faatano i nia ia oe. E haere anei ia oe ia tiatonu i ta oe haapiiraa hoê hora, aore ra mea au aˈe na oe e haapotopoto? O oe anaˈe tei ite. A faatano ïa i te roaraa o ta oe mau taime haapiiraa. Ia ore atoa oe e hinaaro roa e haapii i te taime ta oe i faanaho, a tamata noa ˈtu ïa ahuru aˈe minuti. Mea au aˈe ahuru minuti i te ore roa. Peneiaˈe ia mairi na ahuru minuti, e au roa oe i ta oe haapiiraa a hinaaro atu ai e tamau â.—Phil. 2:13.
A faaoti eaha ta oe e haapii. Ia tiai roa oe i te taime haapiiraa no te faaoti eaha ta oe e hiˈopoa, eita ïa oe e “faaohipa maitai i to [oe] taime.” (Eph. 5:16) Mea maitai ïa ia papai oe i te tahi mau tumu parau ta oe e hinaaro e faahohonu. Ia puta mai te tahi uiraa, a tapao atoa i te reira. E ua oti anaˈe ta oe taime haapiiraa, te vai ra te tahi atu mau manaˈo ta oe e hinaaro e nota atoa.
A faatano i ta oe porotarama. Te mea faufaa roa ˈˈe, ia rave oe i ta oe haapiiraa Bibilia pauroa te hebedoma. E titauhia ïa ia faatano oe i ta oe porotarama, oia hoi e taui te mahana e te hora, te roaraa o ta oe haapiiraa aore ra te tumu parau ta oe e hiˈopoa.
E faufaahia mau â tatou i te haapii-tamau-raa i te Bibilia. E piri atu â tatou ia Iehova, e haapii tatou ia rave i te mau faaotiraa maitai, e e itoitohia tatou.—Ios. 1:8.
