Paul: Auê hoi mâua i te oaoa e! Tei te matahiti 1985 i Novema tatou. Mea reva mâua i Libéria i Afirika tooa o te râ no te tavini ei mitionare. Parau mai nei Anne: “I roto noa hoê hora, e tapae tâua i Libéria!” Faaarahia maira: “Te anihia ra i te mau horopatete e reva ra i Libéria ia pou mai. Eita e nehenehe e faareva i ǒ no te mea ua haamata te feia orure hau i te haru i te faatereraa.” Ua faaea mâua i Sénégal ahuru mahana a tiai noa ˈi te parau apî. Ua haapohehia e rave rahi taata i ǒ. Opani ihora te faatereraa i te taata ia haere i rapae i to ratou fare e na nia i te purumu i te po. Aita anaˈe e pupuhihia ratou e te mau faehau.

Anne: Mea haapao maitai roa vau. Mai to ˈu tamariiraa mai â, i faaooo na te taata ia ˈu no te mea e riaria hanoa vau. E riaria atoa vau i te haere na nia i te purumu. Ua hinaaro râ mâua e haere i Libéria noa ˈtu mea atâta roa i ǒ.

Paul: Ua paari mâua Anne i te pae tooa o te râ i Beretane. Ua faaitoito noa mai to ˈu na metua e te mama o Anne ia rave mâua i te taviniraa pionie. Ua riro ïa mâua ei pionie i muri aˈe i te haapiiraa tuarua. Ua oaoa roa ratou. I te 19raa o to ˈu matahiti, ua anihia vau ia tavini i te Betela e ua apiti mai Anne i to mâua faaipoiporaa i 1982.

Anne: Ua au roa mâua i te Betela, ua hinaaro râ mâua e tavini i te vahi e hinaaro-rahi-hia te feia poro. Ua ohipa mâua na muri i te mau mero o te Betela tei tavini na ei mitionare. Ua turai to ratou hiˈoraa ia mâua ia riro atoa ei mitionare. Ua pure mâua no tera fa i te mau po atoa i te roaraa e toru matahiti. E i 1985, ua titau-manihini-hia mâua i te 79raa o te Piha haapiiraa no Gileada. I muri iho, ua tonohia mâua i Afirika tooa o te râ i Libéria.

Paul: Teie ïa to mâua tere matamua. Ua mǎtaˈu roa te taata i Libéria e aita â ratou i faatiahia ˈtura e haere i rapae i to ratou fare i te po. No te riaria, ia maniania taue anaˈe te hoê pereoo, e tutuô e e horo ê ratou. No te tamǎrû ia mâua e taio mâua i te tahi tuhaa o te buka Salamo i te mau po atoa. Noa ˈtu teie faahuehueraa, ua au roa mâua  i ta mâua taviniraa. Ei mitionare, e poro Anne i te mau mahana atoa. Area vau, tei te Betela ïa e te taeae John Charuk. a Mea rahi ta ˈu i haapii mai ia ˈna ra. Ua ora maoro o ˈna i Libéria, ua taa maitai ïa ia ˈna te fifi o te mau taeae e tuahine i ǒ.

Anne: No te aha mâua i au roa ˈi e tavini i Libéria? No to tatou ïa mau taeae e tuahine. Mea mahanahana e mea haapao roa ratou ia mâua. Ua riro ratou ei utuafare no mâua. Ua faaitoito atoa ta ratou mau aˈoraa paari ia mâua. Hope te au te pororaa! Ei hiˈoraa, eita te taata e au ia faarue oioi oe ia ratou. Inaha mea tauaparau roa te taata no nia i te Bibilia, mea ohie ïa ia paraparau atu. Hau atu, no te rahi o ta mâua mau piahi Bibilia, mea fifi ia haapii e o ratou paatoa.

Paul: I ora na te fenua taatoa ma te hau e i 1989, tupu maira te tamaˈi. I te 2 no Tiurai 1990, ua haru te mau nuu orure hau i te mau vahi e haaati ra i te Betela. I te roaraa e toru avaˈe, aita matou i nehenehe e paraparau i te feia no rapae mai, oia atoa te fetii e te pu rahi. Ua huehue roa i te mau vahi atoa, ua iti roa mai te maa e mea rahi te vahine tei maferahia. Ua tupu te reira 14 matahiti.

Anne: Ua haapohe vetahi mau opu te tahi i te tahi. Ua itehia te mau orure hau mea huru ê to ratou ahu na roto i te mau aroâ no te eiâ i roto i te mau fare. Ua parau vetahi o ratou e au te taparahiraa taata “i te tupairaa moa.” Ua apǎpǎhia te mau tino pohe i te hoê â vahi, e te tahi atu i pihai iho ïa i te Betela. Ua haapohe-atoa-hia vetahi mau Ite no Iehova, oia atoa e piti mitionare.

Ua tapuni te mau taeae i to ratou mau hoa Kerisetiano. No roto mai vetahi o ratou i te mau opu mea hae na te orure hau. Ua na reira atoa te mau mitionare e te mau mero o te Betela. I te Betela, ua taoto te tahi mau Ite no Iehova tei horo ê i raro mai i te tahua e te tahi atu i roto ïa i to matou mau piha. Ua farii mâua i roto i to mâua piha hoê utuafare e hitu ratou.

Paul: I te mau mahana atoa, ua tamata te mau orure hau i te tomo i roto i te Betela no te ite e te tapuni ra anei matou i te taata. E maha ïa matou no te tiai. E piti e hiˈo ra na te haamaramarama e e piti i te uputa i rapaeau. Ia tuu na piti taata i rapaeau i to raua rima i mua, aita ïa e fifi. Mai te peu râ e tuu raua i to raua rima i muri i te tua, te auraa ïa mea ino roa te mau orure hau. I reira  ïa na piti e tiai ra i te haamaramarama e haaviti ai i te tapuni i to matou mau hoa.

Anne: I te hoê mahana, aita te mau taeae i nehenehe e tapea i te tahi mau orure hau ia tomo mai. Ua horo mâua te hoê tuahine i te vahi haumitiraa, i reira te vai ra te hoê vahi nainai hunahia. Ua haere ïa teie tuahine i roto no te tapuni. Tapapa maira te mau orure hau. Tupai maira ratou i te opani. Ua tamata Paul i te tapea ia ratou ma te parau: “Tei roto ta ˈu vahine i te haumitiraa.” I to ˈu opaniraa i te vahi to reira te tuahine, ua faahoˈi au i te mau taihaa i to ratou vairaa. No te maoro, manaˈo ihora vau e te uiui ra paha te mau orure hau te aha ra vau. Ua riaria roa vau. No te tamǎrû ia ˈu hou a iriti ai i te opani, ua pure au ia Iehova. Topa ihora to ˈu hau. I to ˈu tatararaa i te opani, turai maira hoê o ratou e paheru ihora, a hue hanoa ˈi i te mau taihaa. Aita râ te tuahine i itehia mai. Haere atura o ˈna e te tahi atu mau orure hau e paheru i te mau piha. Aita atoa i itehia mai ia ratou to matou mau hoa.

Paul: Ua iti roa mai ta matou maa e rave rahi avaˈe. O te maa pae varua râ ta matou maa. O te haamoriraa poipoi i te Betela ta matou “taofe” ei auraa parau e na te reira i horoa mai i te puai no te faaoromai tamau.

Ua ite matou e ia haere matou e tii i te maa e te pape, eita ïa ta matou e nehenehe e paruru i te mau taeae e tuahine e tapuni ra. E nehenehe hoi ratou e haapohehia. Pinepine ïa Iehova i te horoa mai i ta matou i hinaaro i te taime tano e na roto i te mau ravea faahiahia mau. Ua aupuru mai Iehova e ua tauturu mai oia ia vai hau noa.

Rahi atu â teie ao i te inoraa, rahi atu â ïa te parau mau i te anaanaraa. E rave rahi o to tatou mau taeae e tuahine tei horo ê, aita râ ratou i aueue no to ratou faaroo puai. Ua parau vetahi e “faaineineraa teie mau fifi no te ati rahi.” Ma te itoito, ua faanaho te mau matahiapo e te mau taeae apî i te tauturu no te mau taeae e tuahine. Ua tauturu noa tei horo ê te tahi i te tahi e ua poro atoa. E ua faatupu ratou i te mau putuputuraa i roto i te uru raau. I roto i teie mau ati, e faaitoitoraa te mau putuputuraa e te pororaa. Ia matou i opere i te maa, i te ahu e te mau mea hinaarohia, e rave rahi taeae tei ani mai i te pute no te pororaa. Ua putapû roa matou. Mea farii te taata i te parau apî oaoa, inaha ua faaruru ratou i te tamaˈi. Ua maere roa ratou i te iteraa e mea taa ê te mau Ite no Iehova, no te mea te oaoa ra ratou e te here ra te tahi i te tahi. E au ra e ua riro teie mau taeae e tuahine ei maramarama i roto i te poiri. (Mat. 5:14-16). No te mea mea itoito roa  to tatou mau taeae, ua riro atoa te tahi mau orure hau ei Ite no Iehova.

Paul: I te tahi taime, ua faarue mâua ia Libéria. E toru taime no te hoê taime poto e e piti taime, no te hoê ïa matahiti. Ua parau te hoê tuahine e mitionare atoa: “I Gileada, ua haapiihia matou ia here i te mau taeae e tuahine ma to matou aau atoa. No reira, ia titauhia ia matou ia faarue ia ratou, e mauiui roa matou!” Ua tano iho â tera parau. Auaˈe râ, ua nehenehe mâua e turu noa i te mau taeae e tuahine e te ohipa pororaa i Libéria no te mea tei te mau fenua tapiri mâua.

Anne: I te avaˈe no Me 1996, ua haere e maha o matou na nia i te pereoo o te amaa. Tei ia matou ra te tahi mau api faufaa no nia i te ohipa pororaa i Libéria. Ua hinaaro matou e tere atu i te hoê vahi papu o te oire, 16 kilometera te atea i te Betela. A tere ai, tapea maira te tahi mau orure hau e pupuhi hanoa aˈera. E toru o matou tei hutihia i rapae i te pereoo, e tere atura ratou. O Paul noa ïa to roto i te pereoo. Ua riaria roa matou. Aita i maoro faura maira Paul, te tahe ra te toto mai nia mai i to ˈna upoo. Manaˈo ihora matou e ua pupuhihia o ˈna. Aita râ hoi! Ahani aita, eita ïa o ˈna e nehenehe e haere. Ua tupaihia o ˈna e te hoê orure hau no te turai ia ˈna i rapae i te pereoo.

Na pihai iho mai, e pereoo o te mau faehau ïa ua î i te taata tei riaria roa. Fatata ratou i te faareva, faaoti atura matou e tomo atu. Aita faahou râ e parahiraa. Ua tia noa ïa matou na te hiti o te pereoo a tapea noa ˈi i te tahi mea ia ore ia topa. Haruru ihora te pereoo, e mea tahua te tereraa. Pau te tuô, aita te taata faahoro i faaroo mai. Ua riaria atoa paha o ˈna. Ua faaoromai matou tae roa ˈtu i te vahi tapaeraa e aita matou i topa, ua rohirohi roa râ i te tapea-noa-raa.

Paul: Ua repo roa matou. Hiˈo atura matou te tahi i te ahi e maere ihora e te ora noa ra matou. I pihai iho mai ua ite matou i te hoê manureva tautau tei apoopoo. Poipoi aˈe, ua na nia matou i teie manureva tautau no te haere atu i Sierra Leone. Ua oaoa roa matou i te tapaeraa ˈtu i ǒ. Ua haapeapea râ matou no te mau taeae e tuahine.

Anne: Ua aupuru-maitai-hia matou i Sierra Leone. Tera râ, ua puta noa mai te mau mea ta ˈu i ite mata i Libéria, te haavîraa uˈana e te mau ohipa tano ore. Riaria noa vau aˈunei te tahi ohipa ino e tupu ai. Ua oti roa vau i te hepohepo. E ara noa vau i te po. E rari roa vau i te hou no te riaria. Na Paul ïa e tauahi mai e e faaoti atoa i te pure. I himene atoa na mâua i te mau himene arueraa ia Iehova haapao mǎrû roa mai au. Ua manaˈo vau e ua inohia to ˈu upoo, e aita ta ˈu e nehenehe faahou e tamau i ta ˈu taviniraa.

Eita roa e moˈe ia ˈu tei tupu i muri iho. I taua hebedoma ra, ua tae mai e piti vea. Te A ara mai na! o te 8 no Tiunu 1996 (Beretane). Ua tauturu mai te tumu parau “Eaha te tauturu mai ia aro i te riaria?” ia taa i to ˈu mau huru aau. Te piti, o Te Pare Tiairaa ïa o te 15 no Me 1996. I roto i te tumu parau “Ihea roa e noaa ˈi i to ratou puai?” ua faahitihia te hiˈoraa o te pepe. Noa ˈtu ua pêpê rii o ˈna aore ra hoê o to ˈna na pererau, te tamau noa nei oia i te imi i te maa e i te rere. Hoê â huru no tatou. Noa ˈtu ua pêpê roa tatou, e nehenehe tatou e tauturu noa ia vetahi ê maoti Iehova. E faaitoitoraa teie na tumu parau ta Iehova i horoa mai i te taime tano. (Mat. 24:45) Rave atura vau i te mau maimiraa no te ite mai i te tahi atu mau tumu parau mai teie. Mea na reira vau i te maitairaa mai.

Paul: Oaoa noa mâua ia hoˈi mâua i Libéria. I te hopea o te matahiti 2004, fatata ïa e 20 matahiti to mâua taviniraa e tautururaa i te mau taeae e tuahine i ǒ. Ua hope te tamaˈi e ua haamata te tahi mau paturaa i te amaa. Tera râ, ua tupu te tahi tauiraa i roto i ta mâua taviniraa.

Ua tonohia mâua i Ghana. E ere roa ˈtu mea ohie ia vaiiho i te mau taeae e tuahine. Mea here roa hoi na mâua ia ratou. Tera râ, ua ite mâua i te haamaitairaa a Iehova i to mâua haereraa i Gileada. Ua titauhia hoi ia vaiiho mâua i to mâua nei mau fetii e utuafare.

 Anne: Mea auê mâua a faarue ai ia Libéria. Parau maira te hoê taeae paari: “Eiaha orua e manaˈonaˈo noa ia matou! Ua ite matou eita matou e moˈehia ia orua. Tera râ, mea faufaa ia rave orua i teie haamaitairaa apî ma te aau taatoa. Na Iehova hoi teie haamaitairaa. No reira, a here e a aupuru maitai orua i te mau taeae e tuahine i Ghana.” Ua itoito-roa-hia mâua no ta ˈna i parau, inaha e haamataraa apî teie no mâua.

Paul: Aita i maoro, riro mai nei te mau taeae e tuahine no Ghana ei utuafare apî no mâua. Mea rahi hoi te mau Ite no Iehova i ǒ! Mea rahi ta mâua i haapii i to ratou taiva ore e to ratou faaroo. I muri aˈe 13 matahiti taviniraa i Ghana, ua tonohia mâua i Kenya. Papu, ua mihi mâua i te mau taeae e tuahine i Libéria e i Ghana. Noa ˈtu râ, ua haamatau mâua i te mau taeae e tuahine i Kenya e ua here roa mâua ia ratou. E fenua atoa teie e hinaaro-rahi-hia te feia poro.

Anne: I roto i to ˈu oraraa, ua faaruru vau i te mau tupuraa riaria mau e te atâta. E nehenehe te reira e haamauiui mai i te pae tino, feruriraa e aau. Eita hoi Iehova e paruru semeio ia tatou. Tae roa mai i teie mahana, ia faaroo vau i te paaina o te pupuhi, e riaria roa vau. E paari roa to ˈu ouma e e toˈetoˈe roa to ˈu rima. Ua haapii râ vau i te turui i nia ia Iehova e ia farii i te tauturu a te mau taeae e tuahine. Ua ite atoa vau ua nehenehe mâua e faaea i roto i te taviniraa taime taatoa maoti te haapiiraa i te Bibilia, te pure, te pororaa e te haereraa i te mau putuputuraa.

Paul: I te tahi taime, e ui mai vetahi: “Mea au anei na orua ta orua taviniraa?” Mea nehenehe mau te tahi mau fenua, e nehenehe râ te oraraa e taui taue noa. No reira, eaha ta mâua i haafaufaa roa ˈˈe? To tatou ïa mau taeae e tuahine here. Noa ˈtu nohea mai tatou, hoê â manaˈo to tatou no nia ia Iehova. I manaˈo na mâua e ua tonohia mâua no te faaitoito ia ratou. Aita râ! Na ratou i faaitoito rahi mai.

Ia mâua i taui i te fenua no te taviniraa, ua ite mata mâua i te hoê semeio: to tatou fetii taeae here. Maoro noa ˈtu tatou i roto i ta Iehova faanahonahoraa, e utuafare e e nohoraa to tatou. Ua papu ia mâua e ia tamau mâua i te turui i nia ia Iehova, e haapuai mai o ˈna ma te horoa i ta mâua e hinaaro mau.—Phil. 4:13.