1-2. No te aha tatou e apiti ai i te Oroa haamanaˈoraa i te mau matahiti atoa?

 FATATA e 2 000 matahiti i teie nei, ua horoa Iesu i to ˈna ora no tatou pauroa, ia nehenehe tatou e fanaˈo i te ora mure ore. I te po hou oia a pohe ai, ua faaue o ˈna i ta ˈna mau pǐpǐ ia haamanaˈo i to ˈna tusia na roto i te hoê Amuraa maa haihai. Inaha, ua faaohipa noa ratou i te pane e te uaina.​—Kor. 1, 11:23-26.

² E faaroo tatou i te faaueraa a Iesu no to tatou here ia ˈna. (Ioa. 14:15) I te mau matahiti atoa, e faaite tatou i to tatou mauruuru ma te feruriruri i nia i te faufaaraa o to ˈna pohe no tatou e ma te faahiti i te reira i roto i ta tatou mau pure. E oaoa atoa tatou i te titau manihini i te taata ia apiti mai i teie oroa taa ê mau. Hau atu, e faaoti papu tatou i te apiti i te Oroa haamanaˈoraa noa ˈtu te mau fifi ta tatou e nehenehe e farerei.

3. Eaha ta tatou e hiˈopoa i roto i teie tumu parau haapiiraa?

³ I roto i teie tumu parau haapiiraa, e hiˈopoa tatou e toru ravea i faatupu ai te mau tavini a Iehova i te Oroa haamanaˈoraa: (1) E haapao ratou i te reira mai ta Iesu i haapii ia ratou ia rave, (2) e titau manihini ratou i te taata ia apiti i teie oroa e (3) e haapao ratou i taua Oroa ra noa ˈtu te fifi ta ratou e nehenehe e faaruru.

4. Eaha te pahonohia i roto i te oreroraa parau o te Oroa haamanaˈoraa e no te aha mea faufaa roa te reira no tatou? (Luka 22:19, 20)

⁴ I roto i te oreroraa parau o te Oroa haamanaˈoraa, e pahonohia te tahi mau uiraa. Ei hiˈoraa, e haapii tatou i te  faufaaraa o te hoo e e nafea te pohe o Iesu e nehenehe ai e faaore i ta tatou mau hara. E haamanaˈo-atoa-hia te auraa o te pane e te uaina e o vai ma te nehenehe e amu e e inu i te reira. (A taio i te Luka 22:19, 20.) E feruriruri atoa tatou i nia i te mau haamaitairaa e fanaˈohia e te feia tei te fenua to ratou tiaturiraa. (Isa. 35:5, 6; 65:17, 21-23) Eiaha roa ˈtu tatou e haafaufaa ore i teie mau haapiiraa. E miria taata aita â i haapii atura i te reira. Aita ïa ratou i ite eaha te faufaaraa o te tusia taraehara o Iesu. Aita atoa ratou e haapao ra i te Oroa haamanaˈoraa mai ta Iesu i haapii i ta ˈna mau pǐpǐ. No te aha hoi?

5. I te poheraa te rahiraa o te mau aposetolo, mea nafea te taata i te faatupuraa i te Oroa haamanaˈoraa?

⁵ I te poheraa te rahiraa o te mau aposetolo, ua haaparare vetahi Kerisetiano i te haapiiraa hape i roto i te amuiraa. (Mat. 13:24-27, 37-39) Ua haamata ratou i te “taviri i te parau mau no te ume i te mau pǐpǐ na muri ia ratou.” (Ohi. 20:29, 30) Ei hiˈoraa, ua “taviri” taua mau taata ra i te parau mau no nia i te tusia a Iesu. Ua parau ratou e aita Iesu i pûpû ia ˈna “ei tusia hoê roa pûpûraa no te amo i te mau hara a te taata e rave rahi” mai ta te Bibilia e parau ra. Te auraa ïa, no ratou, eita e navai hoê noa pûpûraa tusia, e titauhia râ ia tamau i te rave i te reira. (Heb. 9:27, 28) I teie mahana, e rave rahi taata o te vare ra i teie haapiiraa. E putuputu ratou i te fare pureraa i te mau hebedoma aore ra i te mau mahana atoa no te faatupu i tei piihia “Te Pureraa tiairaa euhari.” b I roto i te tahi atu mau haapaoraa, aita te Oroa haamanaˈoraa e faatupu-pinepine-hia. Tera râ, aita te rahiraa o te feia faaroo e taa maitai ra i te auraa o te tusia taraehara o Iesu. E ui hoi vetahi ia ratou iho: ‘E nehenehe iho â anei te pohe o Iesu e faaore i ta ˈu mau hara?’ No te aha ratou e uiui ai mai tera? No te mea paha tera tei haapapuhia ia ratou e te feia o te ore e tiaturi ra i te tusia o Iesu. Teie nei râ, mea nafea te mau pǐpǐ a Iesu i te tautururaa i teie mau taata ia taa i te auraa o te tusia o Iesu e e nafea ia haamanaˈo i to ˈna pohe ma te tano?

6. I te area 1872, eaha ta te hoê pǔpǔ haapii Bibilia i taa?

⁶ I te hopea o te senekele 19, ua haamata te hoê pǔpǔ haapii Bibilia arataihia e Charles Russell i te rave i te maimiraa i roto i te mau Papai. Ua hinaaro ratou e ite i te parau mau no nia i te faufaaraa o te tusia o Iesu e e nafea ia haamanaˈo i to ˈna pohe. I te area 1872, ua taa ia ratou na roto i ta ratou maimiraa i roto i te Bibilia e maoti iho â Iesu e fanaˈo ai te huitaata i te hoo. Aita ratou i tapea i ta ratou maimiraa na ratou noa. Ua faaite râ ratou i teie mau haapiiraa i te mau taata atoa na roto i te mau buka e vea. E ma te pee i te hiˈoraa o te mau Kerisetiano matamua, haamata ihora ratou i te haapao i te Oroa haamanaˈoraa hoê taime i te matahiti.

7. E nafea tatou e faufaahia ˈi i te mau maimiraa a teie pǔpǔ haapii Bibilia?

⁷ E faufaahia tatou i teie mahana i te maimiraa ta teie mau Kerisetiano aau tae i rave e mea maoro aˈenei. E nafea? Maoti te haamaitairaa a Iehova, ua araara to tatou mata i te parau mau no nia i te tusia o Iesu e ta te reira e hopoi mai. (Ioa. 1, 2:1, 2) Ua haapii atoa tatou e e piti tiaturiraa ta te taata e nehenehe e fanaˈo ia  mauruuru te Atua ia ratou. Te vai ra te ora pohe ore i nia i te raˈi no vetahi e te ora mure ore i te fenua nei no e rave rahi mirioni taata. E piri atu â tatou ia Iehova ia feruri tatou i to ˈna here ia tatou e e nafea tatou tataitahi e faufaahia ˈi i te tusia o Iesu. (Pet. 1, 3:18; Ioa. 1, 4:9) No reira, mai to tatou mau taeae e tuahine taiva ore na mua ia tatou, e titau tatou i te taata ia apiti mai no te haapao i te Oroa haamanaˈoraa mai ta Iesu i haapii i ta ˈna mau pǐpǐ.

8. Eaha ta te nunaa o Iehova i rave i te roaraa o te tau no te titau i te taata i te Oroa haamanaˈoraa? (A hiˈo i te hohoˈa.)

⁸ Mai te tau mai â to te nunaa o Iehova titau-manihini-raa i te taata ia apiti mai i te Oroa haamanaˈoraa. I 1881, ua titau-manihini-hia te mau taeae e tuahine no Marite ia putuputu i te hoê fare i Allegheny, Pennsylvanie, no teie oroa. I muri mai, na te amuiraa tataitahi e faatupu i ta ˈna Oroa haamanaˈoraa. I Mati 1940, ua parauhia te feia poro e e nehenehe ta ratou e titau i te feia atoa o ta ratou tuhaa fenua e anaanatae ra. I 1960, a tahi ra te Betela a nenei ai e a hapono ai i te titau-manihini-raa i te mau amuiraa. Mai reira mai, e miria titau-manihini-raa tei operehia na te ao atoa nei. No te aha tatou e tutava ˈi i te titau i te taata i te Oroa haamanaˈoraa?

9-10. O vai ma te faufaahia i ta tatou mau tutavaraa e titau i te taata i te Oroa haamanaˈoraa? (Ioane 3:16)

⁹ Hoê tumu e titau ai tatou i te taata ia haapao i te Oroa haamanaˈoraa na muri ia tatou, no te mea ïa te hinaaro ra tatou ia  ite ratou i te parau mau no nia i ta Iehova raua Iesu i rave no tatou paatoa. (A taio i te Ioane 3:16.) E hinaaro tatou ia haapii ratou i te Bibilia e ia riro mai ratou ei tavini na Iehova maoti ta ratou e ite e e faaroo i te Oroa haamanaˈoraa. E ere râ o ratou anaˈe te faufaahia.

¹⁰ E titau manihini atoa tatou i te feia tei faaea i te tavini ia Iehova no te haamanaˈo ia ratou e te here noa ra te Atua ia ratou. E rave rahi o ratou te farii e e oaoa roa tatou i te farerei faahou ia ratou. Ia apiti mai ratou, e haamanaˈo ratou i to ratou oaoa i to ratou taviniraa ia Iehova i te matamua ra. Teie te hiˈoraa o Monica. c Ua haamata faahou oia i te poro i te tau a parare ai te maˈi pee COVID-19. I to ˈna apitiraa i te Oroa haamanaˈoraa i 2021, ua parau oia: “Ua putapû roa vau i te Oroa haamanaˈoraa i tera matahiti. E 20 matahiti to ˈu faaearaa i te poro. A tahi ra ïa vau a poro faahou ai i te taata e a titau manihini ai ia ratou i te Oroa haamanaˈoraa. Ua rave au i ta ˈu tuhaa ma te aau atoa no to ˈu mauruuru rahi ia Iehova e ia Iesu no ta raua i rave no ˈu.” (Sal. 103:1-4) Ia farii te taata i te titau-manihini-raa aore ra eita, e faaitoito noa iho â tatou i te titau i te taata no te Oroa haamanaˈoraa. Eaha te tumu? No te mea ua ite tatou e te mauruuru nei Iehova i ta tatou mau tutavaraa.

11. Mea nafea Iehova i te haamaitairaa i ta tatou mau tutavaraa e titau i te taata i te Oroa haamanaˈoraa? (Hagai 2:7)

¹¹ Ua haamaitai rahi Iehova i ta tatou mau tutavaraa e titau i te taata i te Oroa haamanaˈoraa. I 2021, noa ˈtu te mau faatureraa no te arai i te maˈi pee COVID-19, e 21 367 603 taata tei apiti i teie oroa, a tahi ra ïa teie faito numera i raeahia ˈi. Ua hau ïa i te numera tataipiti o te rahiraa Ite no Iehova na te ao atoa nei! Parau mau, o te taata tataitahi te mea faufaa roa ˈˈe no Iehova, e ere râ te numera. (Luka 15:7; Tim. 1, 2:3, 4) Ua papu ia tatou e e faaohipa Iehova i ta tatou ohipa titau-manihini-raa no te ite mai i te taata aau tae.​—A taio i te Hagai 2:7.

12. Eaha te nehenehe e haafifi ia tatou ia haapao i te Oroa haamanaˈoraa? (A hiˈo i te hohoˈa.)

¹² Ua tohu Iesu e i te mau mahana hopea, e faaruru tatou i te fifi e rave rau, mai te patoiraa a te mau mero o te utuafare, te hamani-ino-raa, te tamaˈi, te maˈi pee e te vai atu ra. (Mat. 10:36; Mar. 13:9; Luka 21:10, 11) I te tahi taime, e haafifi te reira ia tatou ia haapao i te Oroa haamanaˈoraa i te pohe o Iesu. Mea nafea to tatou mau taeae e tuahine i te faarururaa i teie mau fifi, e mea nafea Iehova i te tautururaa ia ratou?

13. Mea nafea Iehova i te haamaitairaa i te itoito o Artem e ta ˈna tutavaraa e haapao i te Oroa haamanaˈoraa a mau ai oia i te fare auri?

¹³ I te fare auri. No to ratou faaroo, ua mau te tahi mau taeae i te fare auri. Noa ˈtu râ, te faaitoito ra ratou i te haapao i te Oroa haamanaˈoraa. Teie te hiˈoraa o Artem. I 2020, tau hebedoma hou te Oroa haamanaˈoraa, ua mau oia i te fare auri i roto i te hoê piha 17 metera tuea. E pae mau auri ratou i roto i tera piha. Noa ˈtu râ, ua roaa ia ˈna i te haaputu mai i te mea ta ˈna e hinaaro no te mau tapao Oroa, e ua opua oia e horoa i te oreroraa parau o te Oroa haamanaˈoraa no ˈna iho. Tera râ, mea pupuhi avaava to ˈna mau hoa piha e mea parau ino roa. Eaha ta ˈna i rave? Ua ani oia ia ratou eiaha e parau ino e e  pupuhi i te avaava no hoê noa hora. Ua maere o Artem i to ratou fariiraa. Te na ô ra oia: “Ua parau vau ia ratou e faataa ˈtu vau i te tereraa o te Oroa haamanaˈoraa.” Aita ratou i hinaaro. I to ratou râ iteraa e faarooraa ia Artem ia haapao i te Oroa haamanaˈoraa, ani atura ratou ia ˈna ia faataa i te auraa o teie oroa.

14. Mea nafea to Iehova nunaa faaitoitoraa i te haapao i te Oroa haamanaˈoraa noa ˈtu te maˈi pee COVID-19?

¹⁴ Te maˈi pee COVID-19. I te parareraa teie maˈi pee, aita ˈtura te nunaa o Iehova i nehenehe e faatupu tino i te Oroa haamanaˈoraa. Aita râ te reira i tapea ia ratou ia haapao i teie oroa. d Te mau amuiraa e natirara ta ratou, ua faatupu ïa i te Oroa haamanaˈoraa na roto i te hoê ravea natirara. Ua nafea râ na mirioni taata aita ta ratou e natirara? I te tahi mau fenua, ua haapurorohia te oreroraa parau na roto i te afata teata aore ra te radio. Hau atu â, ua haruharuhia te oreroraa parau na roto hau atu i te 500 reo ia nehenehe atoa to te vahi moˈemoˈe e haapao atoa i te Oroa haamanaˈoraa. E ua faanaho te mau taeae  ia haponohia tera mau haruharuraa i te feia e hinaaro ra.

15. Eaha te haapii mai i te hiˈoraa o te hoê piahi Bibilia o Sue te iˈoa?

¹⁵ Te patoiraa a te utuafare. Mea fifi no vetahi ia haapao i te Oroa haamanaˈoraa no te patoiraa a te utuafare. Teie te hiˈoraa o te piahi Bibilia ra o Sue te iˈoa. I 2021, i te mahana hou te Oroa haamanaˈoraa, ua parau Sue i te tuahine e haapii ia ˈna i te Bibilia e eita o ˈna e apiti i te Oroa haamanaˈoraa no te patoiraa a to ˈna utuafare. Ua taio te tuahine i te Luka 22:44. Ua faataa ˈtura oia ia ˈna e i mua i te fifi, mea faufaa ia pee i te hiˈoraa o Iesu ma te pure ia Iehova e ma te tiaturi papu ia ˈna. Ananahi aˈe, ua faaineine Sue i te pane e te uaina e mataitai atura i te haamoriraa poipoi o te Oroa haamanaˈoraa i nia i te jw.org. I taua po ra, o ˈna anaˈe i roto i to ˈna piha, ua apee oia i te oreroraa parau no te Oroa haamanaˈoraa na roto i te niuniu. I muri mai, papai atura Sue i te tuahine: “Ua faaitoito maitai oe ia ˈu inanahi ra. Ua rave au i tei maraa ia ˈu no te apiti i te Oroa haamanaˈoraa, e na Iehova i tauturu mai. Aita ta ˈu e parau no te faaite i to ˈu oaoa e to ˈu mauruuru rahi!” Mai te peu e te faaruru ra oe i te hoê â tupuraa, eita anei Iehova e nehenehe atoa e tauturu ia oe?

16. No te aha ua papu ia tatou e e haamaitai Iehova i ta tatou mau tutavaraa no te apiti i te Oroa haamanaˈoraa? (Roma 8:31, 32)

¹⁶ E mauruuru Iehova ia tutava tatou i te haapao i te Oroa haamanaˈoraa i te pohe o Iesu. Papu, e haamaitai mai oia ia faaite tatou i te mauruuru no ta ˈna i rave no tatou. (A taio i te Roma 8:31, 32.) No reira, e faaoti papu anaˈe i te apiti i te Oroa haamanaˈoraa i teie matahiti e i te rave i te mau mea atoa e maraa ia tatou no te turu atu â i te mau tuhaa ohipa e faanahohia no te tau o te Oroa haamanaˈoraa.