1-2. Eaha te tahi mau fifi ta te mau tavini haapao maitai a Iehova e faaruru?

 E NEHENEHE to tatou oraraa e taui taue no te tahi ati. Mai ia taeae Luis a tei roohia i te mariri ai taata. Ta te taote parauraa tau avaˈe noa to ˈna e toe ra. Mea ohipa roa Monika raua ta ˈna tane i roto i te taviniraa. I te hoê râ mahana, ite ihora Monika e ua hara ta ˈna tane e rave rahi matahiti, e matahiapo hoi o ˈna. Ua faarue Olivia, te hoê tuahine taa noa, i to ˈna fare no te vero e piri mai ra. I to ˈna hoˈiraa ˈtu, ua parari to ˈna fare. Ua taui taue noa to ratou oraraa. E oe? Ua û aˈena anei oe i te tahi ati, a taahuri roa ˈtu ai to oe oraraa?

² E û tatou ei tavini haapao maitai a Iehova i te fifi e te maˈi, oia atoa te patoiraa e te hamani-ino-raa a te feia mea hae na ratou te nunaa o te Atua. Eita Iehova e tinai i tera mau tupuraa fifi, te fafau mai ra râ oia i te tauturu. (Isa. 41:10) Maoti hoi ta ˈna tauturu, e oaoa noa tatou, e rave tatou i te faaotiraa maitai, a ore atu ai e taiva ia ˈna noa ˈtu te mau tupuraa fifi roa ˈˈe. E faaite mai teie tumu parau e maha ravea e tauturu mai ai Iehova, e eaha te rave e fanaˈo ai tatou i ta ˈna tauturu.

E TIAI IEHOVA IA OUTOU

3. I roto i te ati, mea fifi ia aha tatou?

³ Te fifi. I roto i te ati, mea fifi ia feruri maitai e ia rave i te faaotiraa no te mauiui iti rahi. E haapeapea  noa tatou, tafifi te manaˈo, eita e taa faahou e haere ihea. Te na ô ra Olivia, tei faahitihia mai nei: “I te parariraa to ˈu fare i te vero, aita i taa faahou ia ˈu e nafea.” Te na ô ra Monika no ta ˈna tane tei taiva: “Ua mauiui roa vau. Aita i maraa faahou ia ˈu te mau ohipa rii o te oraraa. Aita vau i manaˈo noa ˈˈe e û vau i tera ati.” Eaha te tauturu ta Iehova i fafau mai?

4. Ia au i te Philipi 4:6, 7, eaha ta Iehova e fafau mai ra?

⁴ Ta Iehova e rave. Te fafau mai ra oia e horoa mai i ta te Bibilia e parau ra “te hau o te Atua.” (A taio i te Philipi 4:6, 7.) O te hau ïa o te feruriraa e o te aau no ǒ mai i to tatou auhoaraa faufaa roa e o Iehova. Ua “hau ê [te reira] i te mau manaˈo atoa,” hope i te faahiahia. Aita anei outou i fanaˈo aˈenei i te hau i muri iho i te taparuraa ia Iehova? O “te hau o te Atua” ïa.

5. E nafea te hau o te Atua e tiai ai i to tatou feruriraa e aau?

⁵ Ia au atoa i tera irava, e “tiai” aore ra e paruru te hau o te Atua i “to outou aau e feruriraa.” Na roto i te reo tumu, i faaohipahia na te taˈo “tiai” no te mau faehau e tiai ra i te oire no te paruru atu ia aro mai te enemi. E taoto ïa te feia o taua oire ra ma te hau, inaha tei te tomoraa taua mau faehau ra. Hoê â huru ia parauhia e tiai te hau o te Atua i to tatou aau e feruriraa, e parahi hau noa ïa tatou. (Sal. 4:8) Noa ˈtu eita to tatou tupuraa e taui oioi, e nehenehe tatou e ite i te tahi hau mai ia Hana. (Sam. 1, 1:16-18) E ia ite tatou i te hau, mea ohie aˈe ia feruri maitai e ia rave i te faaotiraa î i te paari.

6. Eaha te rave no te fanaˈo i te hau o te Atua? (A hiˈo atoa i te hohoˈa.)

⁶ Ta tatou e rave. Ia horuhoru outou, a ani i te paruru a te “tiai” ei auraa parau. E nafea? A pure haapao e ite roa outou i te hau o te Atua. (Luka 11:9; Tes. 1, 5:17) Te faataa ra Luis, tei faahitihia na, i tei tauturu ia raua Ana ta ˈna vahine i to raua iteraa tau avaˈe noa to ˈna e toe ra. Te na ô ra o ˈna: “I roto i te hoê tupuraa mai tera, mea fifi roa ia rave i te faaotiraa no nia i te ravea rapaauraa e te tahi atu mau ohipa. Maoti râ te pure i ite ai mâua i te hau.” Ua taparuparu noa raua ia Iehova ia  horoa mai i te hau o te feruriraa, te hau o te aau, e te paari no te rave i te faaotiraa maitai. E ua fanaˈo raua i ta ˈna tauturu. Te faaruru ra paha outou i te tahi ati, a tamau maite ïa i te pure. E ite ïa outou i te hau o Iehova o te tiai i to outou aau e feruriraa.—Roma 12:12.

O IEHOVA TO OUTOU PAPURAA

7. Eaha to tatou huru ia û tatou i te hoê fifi?

⁷ Te fifi. Ia û tatou i te hoê fifi, e tauiui noa to tatou huru aau, huru feruriraa e haerea, mai te hoê poti e taueue-noa-hia e te are. Te parau ra Ana, tei faahitihia na, e ua rau to ˈna huru aau i muri iho i to Luis poheraa. Te na ô ra o ˈna: “Ia parahi mai te moˈemoˈe, e ahoaho roa vau. E riri atoa vau ia ˈna no to ˈna faarueraa mai ia ˈu.” I te tahi taime, e hepohepo o ˈna ia rave i te mau ohipa ta Luis i haapao na. I te tahi atu taime, mai te huru ra e te paremo ra o ˈna. E nafea Iehova e tauturu mai ai ia uˈana tera mau huru aau?

8. Eaha ta Iehova e haapapu mai ra i roto i te Isaia 33:6?

⁸ Ta Iehova e rave. Te haapapu mai ra oia e o ˈna te papuraa o to tatou oraraa. (A taio i te Isaia 33:6.) Ia tupu te vero, e nehenehe te hoê pahi e opa roa. Na te taˈere i na pae e piti o te pahi i raro aˈe mai e arai i te reira. E iti roa mai ïa te opaoparaa, a ratere papu atu ai te mau horopatete. Tera râ, e itehia te faufaaraa o teie nau taˈere ia tere te pahi. E papu atoa to tatou oraraa ia Iehova ia tamau tatou i te tavini ia ˈna ma te taiva ore i roto i te fifi.

9. E nafea to tatou huru aau e vî ai i te mau ravea maimiraa? (A hiˈo atoa i te hohoˈa.)

⁹ Ta tatou e rave. I roto i te ahoaho, a faaitoito i te tamau i te pure, i te haere i te putuputuraa e i te poro. Parau mau, eita e haere ia outou ia rave mai ta outou i matau na, a haamanaˈo râ e eita Iehova e titau mai i tei ore e maraa ia tatou. (A hiˈo atoa i te Luka 21:1-4.) A faataa atoa i te taime no ta outou iho haapiiraa Bibilia e te feruriruriraa. Na roto i ta ˈna faanahonahoraa, e rave rau mauhaa ta Iehova i horoa mai, mai te JW Library^®, te Index des publications des Témoins de Jéhovah e te buka Maimiraa Bibilia no te mau Ite no Iehova. Ia haamata Monika i te ahoaho, e faaohipa  oioi oia i taua mau ravea maimiraa ra. Ei hiˈoraa, ua maimi o ˈna i nia i te taˈo “riri,” “taiva” aore ra “taiva ore.” A taio noa ˈi i te mau tumu parau, e mǎrû roa mai to ˈna feruriraa. No ˈna, mai te huru ra e te tauahi ra Iehova ia ˈna. Ua ite atoa o ˈna e te taa ra ia Iehova to ˈna mau huru aau, e te tauturu mai ra o ˈna. Maoti ta Iehova tauturu e vî ai to outou huru aau, a topa roa ˈtu ai te hau.—Sal. 119:143, 144.

E TURU IEHOVA IA OUTOU

10. Eaha paha to tatou huru i muri iho i te hoê tupuraa peapea mau?

¹⁰ Te fifi. I muri iho i te hoê tupuraa peapea mau, e paruparu e e toaruaru roa paha tatou. E au tatou i te hoê maona tei pepe o te ore e nehenehe e horo vitiviti faahou. E au ra e mea teimaha roa ia rave i te tahi mau ohipa rii. Eita atoa tatou e hinaaro faahou e rave i te mea e oaoa ˈi tatou mai na mua ˈˈe. Mai ia Elia, e tarava noa paha tatou, a ore atu ai e hinaaro e tia mai. (Arii 1, 19:​5-7) Eaha râ ta Iehova e fafau e rave ia paruparu tatou?

11. Eaha te tahi atu ravea e tauturu mai ai Iehova? (Salamo 94:18)

¹¹ Ta Iehova e rave. Te fafau ra Iehova e turu mai o ˈna. (A taio i te Salamo 94:18.) Mai te hoê maona tei pepe e hinaaro i te turu no te tamau i te horo, e hinaaro atoa tatou i te tauturu a Iehova no te tamau i te tavini ia ˈna. Te haapapu mai ra Iehova: “Te haru nei hoi au, o Iehova to oe Atua, i to oe rima atau. O vau te parau nei ia oe: ‘Eiaha e mǎtaˈu. E tauturu vau ia oe.’ ” (Isa. 41:13) Ua papu hoi ia Davida te reira. I mua i te fifi e a aro ai to ˈna mau enemi ia ˈna, ua parau o ˈna ia Iehova: “Te turu nei to rima atau ia ˈu.” (Sal. 18:35) E nafea râ Iehova e turu mai ai?

12. O vai ma ta Iehova e turai no te turu ia tatou?

¹² Pinepine Iehova i te turai ia vetahi ê ia tauturu mai. Ei hiˈoraa, a paruparu ai Davida, ua haere to ˈna hoa o Ionatana e farerei ia ˈna no te faaitoito atu. (Sam. 1, 23:16, 17) Ua maiti atoa Iehova ia Elisaia no te tauturu ia Elia. (Arii 1, 19:16, 21; Arii 2, 2:2) I teie mahana, e turai Iehova i te fetii, te hoa, aore ra te matahiapo no te turu ia  tatou. Ia ahoaho râ tatou, e faaatea ê mai paha tatou, eita e hinaaro e amui ia vetahi ê. E tupu iho â te reira. Eaha ta tatou e nehenehe e rave ia turu mai Iehova?

13. Ia aha tatou e turu mai ai Iehova? (A hiˈo atoa i te hohoˈa.)

¹³ Ta tatou e rave. A haavî i te hinaaro e faaatea ê mai. Ia faaatea ê mai tatou, e haapao noa ïa tatou ia tatou iho e to tatou mau fifi, a ore atu ai tatou e rave i te mau faaotiraa maitai. (Mas. 18:1) Parau mau, e hinaaro iho â tatou paatoa e faaea o tatou anaˈe, i roto iho â râ i te ati. Tera râ, ia maoro tatou i te na reira, e haafaufaa ore ïa tatou i te ravea ta Iehova e faaohipa ra no te turu mai. No reira, noa ˈtu te fifi o te tupuraa, a farii i te tauturu a to outou fetii, hoa e matahiapo. E ravea ratou na Iehova no te turu ia outou.—Mas. 17:17; Isa. 32:1, 2.

E TAMAHANAHANA IEHOVA IA OUTOU

14. Eaha te tahi mau tupuraa riaria e faaruru paha tatou?

¹⁴ Te fifi. I te tahi taime, e mǎtaˈu paha tatou. I roto i te Bibilia, ua faahiti te tahi mau tavini taiva ore a te Atua i to ratou ahoahoraa e rûrûraa no to ratou mau enemi aore ra te faaheporaa. (Sal. 18:4; 55:1, 5) Te faaruru atoa ra paha tatou i te patoiraa i te haapiiraa, te ohipa, a to tatou fetii aore ra a te faatereraa. E mǎtaˈu atoa paha tatou i te pohe ia û tatou i te hoê ati. I taua mau taime ra, e au tatou i te tamarii iti o te hinaaro i te tauturu. E nafea Iehova e tauturu mai ai?

15. Eaha ta te Salamo 94:19 e haapapu ra?

¹⁵ Ta Iehova e rave. E tamahanahana e e tamǎrû Iehova ia tatou. (A taio i te Salamo 94:19.) No teie irava, e manaˈo paha tatou i te hoê tamahine iti e riaria ra no te patiri e haruru ra, a ore atu ai e taoto. E haere atu to ˈna papa ia ˈna, a amo atu ai ia ˈna, haapao e topa roa to ˈna taoto. Noa ˈtu te haruru noa ra te patiri, ua topa to ˈna hau i roto i te rima tamahanahana o to ˈna papa. Ia û tatou i te mau tupuraa riaria, e hinaaro atoa tatou ia amo to tatou Metua i te raˈi ia tatou ei auraa  parau, haapao ia pee te riaria. E nafea tatou e fanaˈo ai i ta Iehova tamahanahanaraa?

16. Ia aha tatou no te fanaˈo i te tamahanahanaraa a Iehova? (A hiˈo atoa i te hohoˈa.)

¹⁶ Ta tatou e rave. A faataa i te taime no Iehova, ma te pure ia ˈna e ma te taio i ta ˈna Parau. (Sal. 77:1, 12-14) I te taime ahoaho, te mea matamua ta outou e rave, o te pureraa ïa i to outou Metua i te raˈi. A faaite pauroa ˈtu ia ˈna. A vaiiho ia ˈna ia paraparau e ia tamahanahana ia outou na roto i te Bibilia. (Sal. 119:28) Ia mǎtaˈu outou, e itehia mai ia outou te tahi mau irava taa maitai o te tamahanahana ia outou. Ei hiˈoraa, e itoitohia paha outou a taio ai i te buka a Ioba, te mau Salamo, te Maseli e i ta Iesu mau parau faahitihia i te Mataio pene 6. No reira, a pure ai ia Iehova e a taio ai i ta ˈna Parau, e fanaˈo outou i te tamahanahanaraa.

17. Ia papu tatou i te aha?

¹⁷ E nehenehe tatou e papu e tia noa mai Iehova i pihai iho ia tatou ia faaruru tatou i te ati. Eita oia e faarue ia tatou. (Sal. 23:4; 94:14) Ua fafau mai Iehova i te tiai, i te riro mai ei papuraa na tatou, i te turu e i te tamahanahana ia tatou. Te parau ra te Isaia 26:3 no Iehova: “E paruru oe i te feia e turui papu ra i nia ia oe. E faafanaˈo oe ia ratou i te hau mure ore, no te mea o oe ta ratou e tiaturi ra.” No reira, a tiaturi ia Iehova e a farii i te ravea ta ˈna e tuu mai ra no te tauturu ia outou. A na reira ˈi, e itoito-noa-hia outou noa ˈtu te ati.