TUMU PARAU HAAPIIRAA 40
E rave rahi taata te arataihia i te parau-tia
“Te feia o te aratai ra i te taata e rave rahi i te parau-tia, e anaana ïa mai te mau fetia, e a muri noa ˈtu.”—DAN. 12:3.
HIMENE 151 E faaara oia i tei pohe
HAAPOTORAA *
1. Eaha te mau tupuraa oaoa e tiai mai ra ia tatou i te roaraa o na tausani matahiti Faatereraa?
E OAOA roa tatou a ite ai i to tatou feia herehia o te tia faahou mai i nia i te fenua i te roaraa o na tausani matahiti Faatereraa a te Mesia. Mai ia Iehova, te tiai ru nei tatou paatoa i te farerei faahou ia ratou. (Ioba 14:15) A feruri na i te oaoa e itehia i tera taime. Mai ta tatou i ite i roto i to na mua ˈtu tumu parau haapiiraa, ua tapaohia te iˈoa o te “feia parau-tia” i roto i te buka o te ora e e tia mai ratou “no te ora.” (Ohi. 24:15; Ioa. 5:29) I rotopu i te feia e faatiahia mai i muri aˈe ia Aramagedo, to roto atoa paha to outou feia herehia. * Ua ite atoa tatou e e faatiahia mai “te feia parau-tia ore” tei pohe ma te ore e ite o vai Iehova e tei ore i faaite i te haerea tia, “no te haavaraa.”
2-3. (1) Ia au i te Isaia 11:9, 10, eaha te porotarama haapiiraa rahi roa ˈˈe aita i ravehia aˈenei i roto i te aamu o te huitaata? (2) Eaha ta tatou e hiˈopoa i roto i teie tumu parau haapiiraa?
2 O ratou pauroa te titauhia ia haapii. (Isa. 26:9; 61:11) I reira ïa te porotarama haapiiraa rahi roa ˈˈe aita i ravehia aˈenei i roto i te aamu o te huitaata e faanahohia ˈi. (A taio i te Isaia 11:9, 10.) No te aha? No te mea e titauhia i te feia parau-tia ore ia haapii no nia ia Iesu Mesia, te Faatereraa arii, te hoo, te iˈoa e te tiaraa Arii hau ê o Iehova. E titau-atoa-hia râ i te feia parau-tia ia haapii eaha te mau haamaramaramaraa apî ta Iehova i faaite no nia i ta ˈna opuaraa. Ua pohe vetahi o tera mau tavini taiva ore hou te Bibilia i hope roa ˈi i te papaihia. E rave rahi haapiiraa ta te feia parau-tia ore e te feia parau-tia e titauhia ia ite.
3 I roto i teie tumu parau haapiiraa, e hiˈopoa tatou i teie mau uiraa: E nafea teie porotarama haapiiraa e faanahohia ˈi? Eaha te huru o te feia e faatiahia mai i mua i tera porotarama haapiiraa, tei roto anaˈe to ratou iˈoa i te buka o te ora aore ra aita? Mea faufaa ia ite tatou i te mau pahonoraa. E tauturu mai te tahi mau parau tohu faahiahia o te buka Daniela e Apokalupo ia taa maitai eaha te tupu ia tia faahou mai te feia pohe. E hiˈopoa na mua tatou i te mau tupuraa tohuhia i roto i te Daniela 12:1, 2.
E ARA MAI TE FEIA E TAOTO RA I RARO I TE REPO O TE FENUA
4-5. Eaha ta te Daniela 12:1 e faaite ra no nia i te anotau o te hopea?
4 A taio i te Daniela 12:1. Te faaite ra te buka Daniela eaha te tupu i te roaraa o te anotau o te hopea. I roto i te Daniela 12:1, te parauhia ra “te tia ra” Mihaela, oia hoi Iesu Mesia, no te nunaa o te Atua. Ua tupu teie tuhaa o te parau tohu i 1914, i te taime a riro ai Iesu ei Arii o te Faatereraa arii a te Atua i te raˈi.
5 Tera râ, ua faaitehia ia Daniela e “e tia mai” Iesu i “te hoê tau ahoaho o tei ore i itehia aˈenei mai te taime a tia mai ai te hoê nunaa e tae roa ˈtu i tera tau.” Taua “tau ahoaho” ra, o te “ati rahi” ïa faahitihia i roto i te Mataio 24:21. E tia mai aore ra e haa Iesu no te paruru i te nunaa o te Atua, i te hopea o te tau ahoaho, oia hoi i Aramagedo. Te faahiti atoa ra te buka Apokalupo i teie nunaa mai te hoê nahoa rahi o te “na roto mai . . . i te ati rahi.”—Apo. 7:9, 14.
6. Eaha te tupu a ora mai ai te nahoa rahi i te ati rahi? A faataa. (I roto i teie vea, a hiˈo atoa i te “Uiraa a te feia taio” no nia i te tia-faahou-raa i nia i te fenua.)
6 A taio i te Daniela 12:2. Eaha te tupu a ora mai ai te nahoa rahi i te ati rahi? Aita teie parau tohu e faahiti ra i te hoê tia-faahou-raa pae varua o te tupu i te roaraa o te mau mahana hopea mai ta tatou i manaˈo na mua ˈˈe. * Tera râ, te faahiti ra teie mau parau i te tia-faahou-raa e tupu i roto i te ao apî. Eaha te haapapu ra i te reira? I roto i te Ioba 17:16, ua faaohipahia te taˈo “repo” no te faataa i te parau o te “Apoo.” Te faaite ra ïa te Daniela 12:2 i te tia-faahou-raa e tupu i muri aˈe i te hopea o te mau mahana hopea e i muri aˈe ia Aramagedo.
7. (1) Eaha te auraa ia parauhia e e tia mai vetahi “no te ora mure ore”? (2) No te aha e “tia-faahou-raa maitai aˈe” teie?
7 Eaha te auraa ia parauhia i roto i te Daniela 12:2 e e tia mai vetahi “no te ora mure ore”? E nehenehe te feia e faatiahia mai e fanaˈo i te ora mure ore, mai te peu noa e tamau ratou i te ite e i te auraro ia Iehova e ia Iesu i te roaraa o na tausani matahiti. (Ioa. 17:3) E “tia-faahou-raa maitai aˈe” teie i tei tupu no vetahi taata i tahito ra. (Heb. 11:35) No te aha? No te mea ua pohe faahou taua mau taata ra i muri mai.
8. Eaha te auraa ia parauhia e e tia mai vetahi “no te haama e te vahavaha mure ore”?
8 E ere pauroa te feia te faatiahia mai te farii ia haapiihia ratou e Iehova. I roto i te parau tohu a Daniela, te parauhia ra e e faatiahia mai vetahi “no te haama e te vahavaha mure ore.” I te mea e e faaite ratou i te haerea orure hau, eita ïa to ratou iˈoa e tapaohia i roto i te buka o te ora e eita atoa ratou e fanaˈo i te ora mure ore. E roohia ratou i “te vahavaha mure ore” te auraa, e haamouhia ratou. Te faahiti ra ïa te Daniela 12:2, eaha te tupu no te feia e faatiahia mai. Ia au i te mau ohipa ta ratou e rave i muri aˈe i te tia-faahou-raa, e fanaˈo vetahi i te ora mure ore area vetahi atu aita ïa. *—Apo. 20:12.
E RAVE RAHI TAATA TE ARATAIHIA I TE PARAU-TIA
9-10. Eaha te tupu i muri aˈe i te ati rahi e o vai ma te anaana “mai te anaana o te raˈi”?
9 A taio i te Daniela 12:3. Eaha te tupu i muri aˈe i te ati rahi? Hau atu i ta te Daniela 12:2 e parau ra, te faahiti ra te irava 3 i te tupu i muri aˈe i te ati rahi.
10 O vai ma te anaana “mai te anaana o te raˈi”? E tauturu mai te Mataio 13:43 ia ite o vai ma ratou. Te parau ra Iesu: “I reira te feia parau-tia e anaana ˈi mai te mahana i roto i te Faatereraa arii a to ratou Metua.” I roto, te faahiti ra Iesu i te mau tamarii a te Faatereraa arii, oia hoi, to ˈna mau taeae faatavaihia o te tavini e o ˈna i roto i te Faatereraa arii i te raˈi. (Mat. 13:38) Te faahiti ra ïa te Daniela 12:3 i te feia faatavaihia e te ohipa ta ratou e rave i te roaraa o na tausani matahiti Faatereraa.
E ohipa amui na 144 000 Kerisetiano faatavaihia e o Iesu no te haapao i te porotarama haapiiraa e ravehia i nia i te fenua i te roaraa o na tausani matahiti (A hiˈo i te paratarafa 11)
11-12. Eaha te ohipa ta te feia faatavaihia e rave i te roaraa o na tausani matahiti?
11 E nafea te feia faatavaihia e aratai ai i “te taata e rave rahi i te parau-tia”? E ohipa amui ratou e o Iesu no te haapao i te porotarama haapiiraa e ravehia i nia i te fenua i te roaraa o na tausani matahiti. E faatere ratou ei arii e ei tahuˈa. (Apo. 1:6; 5:10; 20:6) E tauturu atoa ratou no te faaora i te maˈi o te mau nunaa, te auraa ïa, e aratai ratou i te taata atoa i te tia-roa-raa. (Apo. 22:1, 2; Ezk. 47:12) Auê ïa taime oaoa no te feia faatavaihia!
12 O vai ma tei rotopu i “te taata e rave rahi” e arataihia i te parau-tia? Te vai ra te feia e faatiahia mai, te feia o te ora ˈtu i Aramagedo e te mau tamarii e fanauhia i roto i te ao apî. I te hopea o na tausani matahiti, e riro mai ratou pauroa ei taata tia roa. I teihea râ taime e tapaohia ˈi to ratou iˈoa i roto i te buka o te ora e a muri noa ˈtu?
TE TAMATARAA HOPEA
13-14. Eaha te titauhia i te mau taata tia roa i nia i te fenua ia rave no te fanaˈo i te ora mure ore?
13 Mea tia ia haamanaˈo e noa ˈtu e riro tatou ei taata tia roa e ere râ te auraa e e fanaˈo iho â tatou i te ora mure ore. A feruri na ia Adamu raua Eva, noa ˈtu e taata tia roa raua, ua titauhia ia raua ia faaroo ia Iehova no te fanaˈo i te ora mure ore. Aita roa ˈtu râ raua i faaroo ia ˈna.—Roma 5:12.
14 I te hopea o na tausani matahiti, eaha te tupu no te feia i nia i te fenua? E riro ratou pauroa ei taata tia roa. E turu anei râ ratou i te Faatereraa arii a Iehova e a muri noa ˈtu? E pee anei vetahi i te haerea o Adamu raua Eva tei taiva ia Iehova noa ˈtu e taata tia roa raua? E titauhia ia ite i te pahonoraa o tera mau uiraa.
15-16. (1) I teihea taime e titauhia ˈi i te huitaata ia faaite e te turu ra ratou ia Iehova? (2) Eaha te faahopearaa o tera tamataraa hopea?
15 E tapeahia Satani i te roaraa o na tausani matahiti, eita ïa o ˈna e nehenehe e haafifi faahou i te taata. Ia hope râ na tausani matahiti, e tuuhia mai Satani e e tamata o ˈna i te haavare i te taata. I te roaraa o tera tamataraa, e titauhia i te taata ia faaite e te hinaaro ra iho â ratou e turu i te iˈoa e te tiaraa Arii hau ê o Iehova. (Apo. 20:7-10) Na to ratou huru i mua i tera tamataraa e faaite e e vai noa anei to ratou iˈoa i roto i te buka o te ora aore ra aita.
16 Te faaite ra te Bibilia e e rave rahi taata te pee i te haerea o Adamu raua Eva ma te taiva ia Iehova e ma te patoi i to ˈna tiaraa Arii hau ê. Eaha te tupu no ratou? Te na ô ra te Apokalupo 20:15: “Te taata aita i itehia to ˈna iˈoa i roto i te buka o te ora, ua hurihia ïa i raro i te roto auahi.” Papu maitai, e haamouhia teie feia orure hau. Area te rahiraa o te huitaata, e mau papu ratou i mua i tera tamataraa hopea. I reira ïa to ratou iˈoa e vai ai i roto i te buka o te ora e a muri noa ˈtu.
I TE ROARAA O “TE ANOTAU O TE HOPEA”
17. Eaha ta te hoê melahi i faaite ia Daniela no nia i te tupu i to tatou tau? (Daniela 12:4, 8-10)
17 Mea oaoa roa ia feruri i te tupu a muri aˈe. Tera râ, ua horoa te hoê melahi ia Daniela i te tahi mau haamaramaramaraa faufaa no to tatou tau, oia hoi, “te anotau o te hopea.” (A taio i te Daniela 12:4, 8-10; Tim. 2, 3:1-5) Ua parau te melahi ia Daniela: “E haere te ite mau i te rahiraa.” I reira ïa te mau tavini a te Atua e taa maitai atu â ˈi i te auraa o teie mau parau tohu. Ua faaite atoa te melahi e i te roaraa o tera anotau o te hopea, “e rave te feia ino i te mea ino, e eita hoê taata ino e taa i tera mau parau.”
18. Eaha te tupu no te feia ino?
18 I teie mahana, e au ra e aita te feia ino e faautuahia ra no te mau ohipa ino ta ratou e rave ra. (Mal. 3:14, 15) Fatata râ Iesu i te haava i te feia ino e au i te puaaniho e e faataa ê o ˈna ia ratou i te feia e au i te mamoe. (Mat. 25:31-33) Eita taua feia ino ra e ora ˈtu i te ati rahi e eita atoa ratou e faatiahia mai i roto i te ao apî. Eita ïa to ratou iˈoa e tapaohia i roto i te “buka haamanaˈoraa” faahitihia i roto i te Malaki 3:16.
19. Eaha te titauhia ia tatou ia rave i teie nei â e no te aha? (Malaki 3:16-18)
19 E taime tano teie ia faaite tatou na roto i to tatou haerea e e ere tatou i te taata ino. (A taio i te Malaki 3:16-18.) Te haaputuputu ra Iehova i te feia ta ˈna e faariro ra “ei nunaa taa ê” aore ra ei mea faufaa no ˈna. Tei rotopu anei tatou i teie feia ta Iehova e poihere ra? Papu maitai, tera ta tatou e hinaaro ra.
Te tiai ru nei tatou i te taime e “tia mai” ai Daniela, te feia ta tatou e here ra e te tahi atu i roto i te ao apî (A hiˈo i te paratarafa 20)
20. Eaha te parau fafau hopea ta Iehova i horoa ia Daniela e no te aha oe e tiai ru ai ia tupu te reira?
20 Te ora nei tatou i te hoê tau faahiahia mau. E tupuraa faahiahia ˈtu â râ te tiai mai ra ia tatou. Fatata te feia ino i te haamouhia. I muri aˈe, e ite tatou i te tupuraa o ta Iehova i fafau ia Daniela: “I te hopea o te mau mahana, e tia mai oe a fanaˈo atu ai i ta oe tuhaa.” (Dan. 12:13) Te tiai ru ra anei oe i te taime e “tia mai” ai Daniela e te feia ta oe e here ra? A tutava ïa i teie nei â i te tavini ia Iehova ma te taiva ore. Ma te na reira, e nehenehe oe e papu e e vai noa to oe iˈoa i roto i te buka o te ora a Iehova.
HIMENE 80 “A tamata na ia ite i te maitai o Iehova”
^ I roto i teie tumu parau haapiiraa, e ite tatou i te hoê faatanoraa no nia i te porotarama haapiiraa rahi roa ˈˈe faataahia i roto i te Daniela 12:2, 3. E ite tatou afea tera porotarama e tupu ai e o vai te apiti atu. E ite atoa tatou e nafea teie porotarama haapiiraa e faaineine ai i te feia i nia i te fenua no te tamataraa hopea, ia hope na tausani matahiti Faatereraa a te Mesia.
^ Peneiaˈe, o te mau tavini taiva ore tei pohe i te roaraa o te mau mahana hopea te feia matamua e faatiahia mai. E i muri mai, o te feia tei pohe na mua ˈˈe ia ratou, te hoê ui i muri aˈe i te tahi. E nehenehe ïa te ui tataitahi e farii maitai i te feia ta ratou i matau. Noa ˈtu râ, ia au i te Bibilia e tupu te tia-faahou-raa i nia i te raˈi “ia au” i tei faanahohia, e nehenehe ïa tatou e papu e hoê â faanahoraa te ravehia no te tia-faahou-raa i nia i te fenua.—Kor. 1, 14:33; 15:23.
^ E faatanoraa teie no nia i tei faataahia i roto i te pene 17 o te buka Prêtons attention à la prophétie de Daniel! e Te Pare Tiairaa o te 1 no Tiurai 1987 api 14-18.
^ Ia parauhia “te feia parau-tia” e “te feia parau-tia ore” i roto i te Ohipa 24:15 e “te feia i rave i te mea maitai” e “te feia i rave noa i te mea ino” i roto i te Ioane 5:29, te faahitihia ra ïa i te mau ohipa ta te feia e faatiahia mai i rave hou ratou a pohe ai.
