1. Ia au i te Malaki 3:16, eaha te buka ta Iehova i papai e eaha to roto?

 E BUKA taa ê mau ta Iehova i papai a tausani matahiti i teie nei e e iˈoa tei tapaohia i roto. To Abela te iˈoa matamua i papaihia i roto, o ˈna hoi te tavini haapao maitai matamua. * (Luka 11:50, 51) Mai reira mai, e rave rahi mirioni iˈoa ta Iehova i papai i roto. E piihia teie buka i roto i te Bibilia, te “buka haamanaˈoraa,” “te buka o te ora” e “te otaro o te ora.” I roto râ i teie tumu parau haapiiraa, e tapea noa tatou i te parau o “te buka o te ora.”​—A taio i te Malaki 3:16; Apo. 3:5; 17:8.

2. To vai ma iˈoa tei tapaohia i roto i te buka o te ora e eaha te titauhia ia rave ia papai-atoa-hia to tatou iˈoa i roto?

² I roto i teie buka, ua tapaohia te iˈoa o te mau tavini a Iehova o te faatura ra e o te haafaufaa ra i to ˈna iˈoa. E nehenehe ratou e fanaˈo i te ora mure ore. Ia faatupu tatou i te hoê auhoaraa piri e o Iehova na roto i te tusia taraehara o Iesu Mesia, i reira to tatou iˈoa e papaihia ˈi i roto i tera buka. (Ioa. 3:16, 36) Noa ˈtu tei te raˈi aore ra tei te fenua to tatou tiaturiraa, o tatou pauroa te hinaaro ia tapaohia to tatou iˈoa i roto i tera buka.

3-4. (1) Mai te peu to roto to tatou iˈoa i te buka o te ora, te auraa anei e fanaˈo iho â tatou i te ora mure ore? A faataa. (2) Eaha ta tatou e hiˈopoa i roto i teie e to muri nei tumu parau haapiiraa?

³ Teie nei, mai te peu to roto to tatou iˈoa i tera buka, te  auraa anei e fanaˈo iho â tatou i te ora mure ore? Ia au i te Exodo 32:33, ua parau Iehova ia Mose: “Te taata i hara ia ˈu, to ˈna te iˈoa ta ˈu e tumâ i roto i ta ˈu buka.” E nehenehe ïa te mau iˈoa i roto i tera buka e tumâhia, mai te huru ra e ua papai Iehova i te reira i te penitara. (Apo. 3:5, nota) E tutava anaˈe ïa ia vai noa to tatou iˈoa i roto i tera buka.

⁴ E puta mai paha te tahi mau uiraa mai teie: Eaha ta te Bibilia e parau ra no nia i te feia to roto to ratou iˈoa i te buka o te ora e no nia i te feia aita to ratou iˈoa to roto? Afea te feia ua papaihia to ratou iˈoa i roto i tera buka e fanaˈo ai i te ora mure ore? Eaha te tupu no te feia tei pohe ma te ore e ite o vai Iehova? E nehenehe anei to ratou iˈoa e tapaohia i roto i tera buka? E pahonohia teie mau uiraa i roto i teie e to muri nei tumu parau haapiiraa.

TO VAI MA IˈOA TEI TAPAOHIA I ROTO I TE BUKA O TE ORA?

5-6. (1) Ia au i te Philipi 4:3, to vai ma iˈoa tei tapaohia i roto i te buka o te ora? (2) I teihea taime to ratou iˈoa e vai ai i roto i tera buka e a muri noa ˈtu?

⁵ To vai ma iˈoa tei tapaohia i roto i te buka o te ora? No te pahono i tera uiraa, e ite mai tatou e pae pǔpǔ taata taa maitai. I rotopu ia ratou, te vai ra te feia ua papaihia to ratou iˈoa i roto i tera buka e te feia aita to ratou iˈoa to roto.

⁶ O te feia tei maitihia no te riro ei arii e o Iesu i te raˈi te pǔpǔ matamua. To roto anei to ratou iˈoa i te buka o te ora? E. Ia au i ta te aposetolo Paulo i parau i to ˈna mau “hoa ohipa” i Philipi, to roto te iˈoa o te feia faatavaihia i te buka o te ora. (A taio i te Philipi 4:3.) Ia vai noa to ratou iˈoa i roto i tera buka, e tia ia ratou ia vai taiva ore ia Iehova. I te taime e fanaˈo ai  ratou i te tapaoraa hopea hou ratou a pohe ai aore ra hou a haamata ˈi te ati rahi, i reira to ratou iˈoa e vai ai i roto i tera buka e a muri noa ˈtu.​—Apo. 7:3.

7. Ia au i te Apokalupo 7:16, 17, eaha te titauhia i te nahoa rahi o te mau mamoe ê atu ia tapaohia to ratou iˈoa i roto i te buka o te ora e a muri noa ˈtu?

⁷ O te nahoa rahi o te mau mamoe ê atu te piti o te pǔpǔ. Ua tapaohia anei to ratou iˈoa i roto i te buka o te ora? E. E vai anei to ratou iˈoa i roto i te buka i muri aˈe ia Aramagedo? E. (Apo. 7:14) Ua parau Iesu e fanaˈo teie mau taata e au i te mamoe i “te ora mure ore.” (Mat. 25:46) Aita râ ratou e fanaˈo i te reira i muri noa ˈˈe ia Aramagedo. Ua papaihia hoi to ratou iˈoa i roto i tera buka i te penitara. I te roaraa o te Faatereraa tausani matahiti, “e aupuru e e aratai [Iesu] ia ratou i te mau pape pihaa o te ora.” O te iˈoa o te feia anaˈe ïa o te auraro i te Mesia e o te vai taiva ore ia Iehova te tapaohia i roto i te buka o te ora e a muri noa ˈtu.​—A taio i te Apokalupo 7:16, 17.

8. To vai ma iˈoa tei ore e tapaohia i roto i te buka o te ora e eaha te tupu no ratou?

⁸ O te mau puaaniho te haamouhia i Aramagedo te toru o te pǔpǔ. Aita to ratou iˈoa to roto i te buka o te ora. Ua parau Iesu: “E roohia teie nei feia i te pohe mure ore.” (Mat. 25:46) Ua papai atoa Paulo: “O ratou mau â te faautuahia i te haamouraa mure ore.” (Tes. 2, 1:9; Pet. 2, 2:9) Hoê â utua te tiai mai ra i te feia o te hara i te varua moˈa ma te opua mau. E roohia ratou i te haamouraa mure ore. Papu, eita ratou e tia-faahou-mai. (Mat. 12:32; Mar. 3:28, 29; Heb. 6:4-6) I teie nei, e ite mai tatou e piti pǔpǔ taata o te fanaˈo i te tia-faahou-raa i nia i te fenua.

TE FEIA O TE FANAˈO I TE TIA-FAAHOU-RAA

9. Ia au i te Ohipa 24:15, o vai na piti pǔpǔ taata te tia faahou mai i nia i te fenua e eaha te taa-ê-raa i roto i na piti pǔpǔ?

⁹ I roto i te Bibilia, e piti pǔpǔ taata te tia faahou mai i nia i te fenua e e nehenehe ratou e fanaˈo i te ora mure ore. Te vai ra “te feia parau-tia” e “te feia parau-tia ore.” (A taio i te Ohipa 24:15.) “Te feia parau-tia”o te feia ïa tei tavini ia Iehova a ora noa ˈi ratou. Area “te feia parau-tia ore,” ua pohe ratou ma te ore e ite o vai Iehova e aita ratou i faaite i te haerea tia. I te mea e e faatiahia mai na pǔpǔ taata e piti, te auraa anei ïa ua tapaohia to ratou iˈoa i roto i te buka o te ora? No te pahono i tera uiraa, e hiˈopoa anaˈe i te pǔpǔ taitahi.

10. No te aha e faatiahia mai “te feia parau-tia” e eaha te haamaitairaa ta vetahi o ratou e fanaˈo? (I roto i teie vea, a hiˈo atoa i te “Uiraa a te feia taio” no nia i te tia-faahou-raa i nia i te fenua.)

¹⁰ O “te feia parau-tia” te maha o te pǔpǔ. Hou ratou a pohe ai, tei roto to ratou iˈoa i te buka o te ora. Teie nei, ia pohe ratou e tatarahia anei to ratou iˈoa mai roto mai i te buka o te ora? Aita, no te mea te “ora” noa ra ratou i roto i to Iehova mehara. “E Atua [Iehova] no te feia ora, eiaha no te feia pohe, mea ora hoi ratou pauroa no ˈna.” (Luka 20:38) Te auraa, ia faatiahia mai te feia parau-tia i nia i te fenua, to roto noa â to ratou iˈoa i te buka o te ora, ua papaihia râ te reira i te penitara. (Luka 14:14) E tavini vetahi o ratou “ei huiarii i te fenua taatoa.”​—Sal. 45:16.

11. Eaha te titauhia i “te feia parau-tia ore” ia rave ia nehenehe to ratou iˈoa e tapaohia i roto i te buka o te ora?

¹¹ O “te feia parau-tia ore” te pae o te  pǔpǔ. Ua pohe te rahiraa o ratou ma te ore e ite o vai Iehova e aita ratou i faaite i te haerea tia. Aita ïa to ratou iˈoa i tapaohia i roto i te buka o te ora. Tera râ, e faahoˈi mai Iehova ia ratou i te ora, a nehenehe atu ai to ratou iˈoa e tapaohia i roto i tera buka. E titauhia ia tauturu i taua “feia parau-tia ore” ra no te mea i roto i to ratou oraraa na mua ˈtu ua rave vetahi o ratou i te mea ino. E titauhia ia ratou ia haapii i te mau ture aveia tia a Iehova a nehenehe atu ai ratou e ora ia au i te reira. E faanaho te Faatereraa arii a te Atua i te hoê porotarama haapiiraa rahi roa ˈˈe aita i ravehia aˈenei i roto i te aamu o te huitaata.

12. (1) Na vai e haapii i te feia parau-tia ore? (2) Eaha te tupu no te feia o te ore e hinaaro e auraro?

¹² Na vai e haapii i te feia parau-tia ore? Na te nahoa rahi e te feia parau-tia o te faatiahia mai. Ia nehenehe te iˈoa o te feia parau-tia ore e tapaohia i roto i te buka o te ora, e tia ia faatupu ratou i te auhoaraa e o Iehova e ia pûpû ratou i to ratou ora ia ˈna. Mai te raˈi mai, e hiˈopoa maite Iesu e te feia faatavaihia eaha te huru o te feia parau-tia ore a haapiihia ˈi ratou. (Apo. 20:4) E haamouhia te feia o te ore e hinaaro e auraro, noa ˈtu e 100 matahiti to ratou. (Isa. 65:20) I te mea te ite ra Iehova e Iesu eaha to roto i te aau, eita ïa raua e vaiiho i te hoê noa ˈˈe taata ia tuino i te oraraa i roto i te ao apî.​—Isa. 11:9; 60:18; 65:25; Ioa. 2:25.

TE TIA-FAAHOU-RAA NO TE ORA E NO TE HAAVARAA

13-14. (1) Mea nafea te mau parau a Iesu i roto i te Ioane 5:29, i te faataaraahia na mua ˈˈe? (2) Eaha râ ta tatou e tapao ra i roto i ta ˈna mau parau?

¹³ Ua faahiti atoa Iesu i te feia te faatiahia mai i nia i te fenua. Ua parau o ˈna: “Eiaha ïa e maere, no te mea ua fatata te hora e faaroo ai te feia atoa i roto i te menema i to ˈna reo, a haere mai ai i  rapae. E tia mai te feia i rave i te mea maitai no te ora, e te feia i rave noa i te mea ino, e tia mai ïa no te haavaraa.” (Ioa. 5:28, 29) Eaha te auraa o te mau parau a Iesu?

¹⁴ Na mua ˈˈe, ua manaˈohia e te faahiti ra Iesu i te mau ohipa ta te feia e faatiahia mai e rave i muri aˈe i to ratou tia-faahou-raa, te mea maitai anei aore ra te mea ino. Aita râ Iesu i parau, e rave ratou i te mea maitai aore ra e rave ratou i te mea ino. Ua faahiti o ˈna i “te feia i rave i te mea maitai” e “te feia i rave noa i te mea ino.” Te auraa, o te mau ohipa ïa ta teie mau taata i rave hou ratou a pohe ai. E mea tano iho â no te mea eita e fariihia ia rave i te mea ino i roto i te ao apî. Papu maitai, ua rave te feia parau-tia ore i te mea ino hou ratou a pohe ai. Eaha ïa ta tatou e taa ra i te mau parau a Iesu no nia i te tia-faahou-raa “no te ora” e te tia-faahou-raa “no te haavaraa”?

15. O vai te fanaˈo i te tia-faahou-raa “no te ora” e no te aha?

¹⁵ O te feia parau-tia tei rave i te mea maitai hou a pohe ai te fanaˈo i te tia-faahou-raa “no te ora” no te mea ua papai-aˈena-hia to ratou iˈoa i roto i te buka o te ora. Te auraa, hoê â ïa tia-faahou-raa no “te feia i rave i te mea maitai” faahitihia i roto i te Ioane 5:29 e no “te feia parau-tia” faahitihia i roto i te Ohipa 24:15. E tuati maitai tera faataaraa i tei parauhia i roto i te Roma 6:7: “Te taata hoi tei pohe, ua matara ïa oia i ta ˈna hara.” Te auraa ïa, e faaore Iehova i te hara a teie feia parau-tia i te taime e pohe ai ratou, eita râ e moˈe ia ˈna i te mau ohipa maitai atoa ta ratou i rave a tavini ai ia ˈna. (Heb. 6:10) Papu, ia vai noa to ratou iˈoa i roto i te buka o te ora e titauhia ia ratou ia vai taiva ore noa ia Iehova.

16. Eaha te auraa ia parauhia e tia mai ratou “no te haavaraa”?

¹⁶ Eaha râ te tupu no te feia tei rave i te mea ino hou a pohe ai? Noa ˈtu ua faaorehia ta ratou mau hara i te taime a pohe ai ratou, ua pohe ratou ma te ore e ite o vai Iehova. Aita to ratou iˈoa i tapaohia i roto i te buka o te ora. Te auraa, hoê â ïa tia-faahou-raa no “te feia i rave i te mea ino” e no “te feia parau-tia ore” faahitihia i roto i te Ohipa 24:15. E tia mai ratou “no te haavaraa.” * Tera haavaraa, o te taime ïa e hiˈopoa ˈi Iesu i te haerea o te feia parau-tia ore. (Luka 22:30) E titauhia te taime no te faaoti e tapaohia anei to ratou iˈoa i roto i te buka o te ora. I te taime noa e taui ai te feia parau-tia ore i to ratou haerea e e pûpû ai ratou i to ratou ora ia Iehova, e nehenehe ai to ratou iˈoa e tapaohia i roto i te buka o te ora.

17-18. Eaha te titauhia i te feia e faatiahia mai i nia i te fenua ia rave e e faaauhia te mau “ohipa” faahitihia i roto i te Apokalupo 20:12, 13 i te aha?

¹⁷ Noa ˈtu e feia parau-tia aore ra e feia parau-tia ore te feia e faatiahia mai, e titauhia ia ratou pauroa ia auraro i te mau ture i roto i te mau otaro apî o te iritihia i te roaraa o na tausani matahiti. Te na ô ra te aposetolo Ioane: “Ite atura vau i tei pohe, te feia riirii e te feia tiaraa teitei, i te tia-noa-raa i mua i te terono, e hohorahia ˈtura te tahi mau otaro. Hohorahia  ˈtura râ te tahi atu otaro, te otaro o te ora. Haavahia ihora te feia pohe ia au i tei papaihia i roto i te mau otaro, ia au i ta ratou mau ohipa.”​—Apo. 20:12, 13.

¹⁸ E haavahia te feia e faatiahia mai ia au i te aha? I te mau ohipa anei ta ratou i rave hou a pohe ai? Aita. Ua faaorehia hoi ta ratou mau hara i to ratou poheraa. Aita ïa tatou e nehenehe e parau e e haavahia te feia e faatiahia mai ia au i te mau “ohipa” ta ratou i rave hou a pohe ai, ia au râ i te mau ohipa ta ratou e rave i roto i te ao apî. I te mea e e titauhia i te mau tavini haapao maitai mai ia Noa, Samuela, Davida e Daniela ia haapii no nia ia Iesu Mesia e ia faatupu i te faaroo ia ˈna, eaha ˈtu â ïa no te feia parau-tia ore.

19. Eaha te tupu no te feia o te ore e farii i te faanahoraa a Iehova?

¹⁹ Eaha te tupu no te feia o te ore e farii i te faanahoraa a Iehova? Te na ô ra te Apokalupo 20:15: “Te taata aita i itehia to ˈna iˈoa i roto i te buka o te ora, ua hurihia ïa i raro i te roto auahi.” Papu maitai, e haamou-roa-hia ratou. No reira, mea faufaa roa ia vai to tatou iˈoa i roto i te buka o te ora e a muri noa ˈtu.

20. Eaha te ohipa faahiahia mau e ravehia i te roaraa o na Faatereraa tausani matahiti? (A hiˈo i te hohoˈa i te api matamua.)

²⁰ Auê taime faahiahia ta tatou e fanaˈo i te roaraa o na Faatereraa tausani matahiti! E ravehia te hoê porotarama haapiiraa rahi roa ˈˈe aita i ravehia aˈenei i roto i te aamu o te huitaata. I reira atoa e hiˈopoahia ˈi te haerea o te feia parau-tia e o te feia parau-tia ore. (Isa. 26:9; Ohi. 17:31) E nafea teie porotarama haapiiraa e haapaohia ˈi? E tauturu mai to muri nei tumu parau haapiiraa ia taa e ia haafaufaa i teie faanahoraa faahiahia mau.