1. Eaha te huru o Petero a ite ai i te semeio ta Iesu i faatupu?

 UA TAIˈA Petero i te hoê po taatoa e aita ta ˈna iˈa i noaa mai. Ani atura Iesu ia ˈna: “A hôe atu i te vahi hohonu, e a tuu i ta outou mau upeˈa.” (Luka 5:4) Aita Petero i papu e noaa mai te iˈa, ua rave râ o ˈna mai tei faauehia mai. Ua î roa te mau upeˈa i te iˈa e mutumutu atura te reira. A ite ai i teie semeio, maere roa ihora Petero e to ˈna mau hoa i tei tupu. Parau atura o ˈna :“E te Fatu, eiaha e tapiri mai ia ˈu, e taata hara hoi au.” (Luka 5:6-9) Ua manaˈo Petero e eita e tia ia ˈna ia faaea i pihai iho ia Iesu.

2. No te aha e faufaahia ˈi tatou i te hiˈoraa o Petero?

² Ua tano o Petero, “e taata hara” iho â o ˈna. Te faaite ra te Bibilia e ua hapa o ˈna i te tahi taime e ua tatarahapa i muri mai. E oe, te tutava ra anei oe i te haamaitai i to oe mau paruparu e i te aro i te hoê haerea tano ore? Mai te peu e e, e nehenehe oe e faufaahia i te hiˈoraa o Petero. No te aha? Ua faaoti te Atua e faahiti i te mau hapa a Petero i roto i te Bibilia ei haapiiraa na tatou. (Tim. 2, 3:16, 17) Ma te haapii no nia i to ˈna mau paruparu e huru aau, e taa ia tatou e ua ite Iehova e e hapa iho â tatou i te tahi taime. E hinaaro râ o ˈna ia tutava tatou i te tavini ia ˈna noa ˈtu to tatou huru tia ore.

3. No te aha e mea faufaa ia tutava noa tatou?

³ No te aha e mea faufaa ia tutava noa tatou? No te mea ia tutava noa tatou i roto i te hoê tuhaa, e maitai mai tatou. Teie te hoê faahohoˈaraa: E titauhia i te hoê taata hauti upaupa e rave matahiti ia aravihi roa mai o ˈna. A haamataro noa ˈi o ˈna i ta ˈna upaupa, papu e hapehape noa o ˈna. Ia tutava noa râ o ˈna, e maitai mai ta ˈna  huru hautiraa. Noa ˈtu e aravihi roa mai o ˈna, e nehenehe â oia e hape, eita râ o ˈna e tuu. Hoê â huru no tatou, noa ˈtu ua vî ia tatou te hoê paruparu, e nehenehe tatou e hapa faahou. Mea tia râ ia tutava noa tatou. Parau mau, e hapa tatou pauroa. Ia ore râ tatou e tuu, e tauturu Iehova ia tatou ia haamaitai i to tatou huru. (Pet. 1, 5:10) E hiˈopoa anaˈe mea nafea Petero i te tutavaraa. Noa ˈtu ua hapa o ˈna, ua faaite Iesu i te aumihi ia ˈna. Ua riro ïa te reira ei faaitoitoraa na tatou ia tamau i te tavini ia Iehova.

4. Eaha ta Petero i parau no ˈna iho i roto i te Luka 5:5-10, mea nafea râ to Iesu tamahanahanaraa ia ˈna?

⁴ Aita te Bibilia e parau ra no te aha Petero i parau ai “e taata hara” o ˈna aore ra eaha te hara ta ˈna e manaˈo ra. (A taio i te Luka 5:5-10.) Eita râ e ore e rave rahi hara ta Petero i rave. Ua ite Iesu e ua mǎtaˈu Petero, no to ˈna paha haafaufaa-ore-raa ia ˈna iho. Ua ite atoa râ o ˈna e e nehenehe ta Petero e vai taiva ore noa. Ua parau ïa Iesu ia ˈna e “eiaha e mǎtaˈu faahou.” I to Petero iteraa e mea tiaturi na Iesu ia ˈna, ua itoito roa mai o ˈna. I muri aˈe, ua faaoti Petero raua Anederea, to ˈna taeae, e vaiiho i ta raua ohipa ravaai no te pee tamau i te Mesia, e ua haamaitai-rahi-hia raua no ta raua faaotiraa.​—Mar. 1:16-18.

5. Eaha te haamaitairaa ta Petero i fanaˈo no te mea aita o ˈna i toaruaru?

⁵ Ei pǐpǐ na te Mesia, e rave rahi tupuraa faahiahia ta Petero i ite. Ua ite o ˈna ia Iesu i te faaoraraa i te taata maˈi, i te tiavaruraa i te demoni e i te faatiaraa i te feia pohe. b (Mat. 8:14-17; Mar. 5:37, 41, 42) Ua ite orama atoa Petero ia Iesu o te riro mai ei Arii o te Faatereraa arii hanahana, e aita roa i moˈe ia Petero taua orama ra. (Mar. 9:1-8; Pet. 2, 1:16-18) Oia mau, ua ite Petero i te tahi mau tupuraa ta ˈna i ore i manaˈo aˈenei. Ua oaoa roa paha o ˈna i te fanaˈoraa i teie mau haamaitairaa. Ahani o ˈna i toaruaru no te hepohepo, eita ïa te reira e tupu.

6. Mea oioi anei to Petero haavîraa i to ˈna mau paruparu? A faataa.

⁶ Noa ˈtu teie mau haamaitairaa, ua aro noa Petero i to ˈna mau paruparu. Ei hiˈoraa, i to Iesu faaiteraa ˈtu e haamauiuihia e e haapohehia o ˈna ia tupu te  parau tohu Bibilia, ua tamaˈi Petero ia ˈna. (Mar. 8:31-33) Pinepine atoa Petero e te tahi atu mau aposetolo i te mârô o vai te mea rahi aˈe. (Mar. 9:33, 34) E i te po hou te pohe o Iesu, no te iria, ua tapu Petero i te tariˈa o te tahi taata. (Ioa. 18:10) I taua noa po ra, no to ˈna riaria, e toru taime to Petero parauraa e aita o ˈna i ite o vai Iesu. (Mar. 14:66-72) I te taaraa ia Petero ta ˈna i rave, auê ihora oia.​—Mat. 26:75.

7. I te tia-faahou-raa mai Iesu, eaha te hopoia ta ˈna i horoa ia Petero?

⁷ Aita Iesu i faarue i ta ˈna mau aposetolo tei toaruaru roa. Ia ˈna i tia faahou mai, ua horoa o ˈna ia Petero i te hoê ravea no te haapapu mai i to ˈna here. Ua titau Iesu ia Petero ia aupuru i ta ˈna mau mamoe. (Ioa. 21:15-17) Ua farii Petero i teie hopoia. Tei Ierusalema o ˈna i te mahana o te Penetekose e tei rotopu oia i te mau pǐpǐ matamua tei faatavaihia i te varua moˈa.

8. Eaha te hapa ta Petero i rave i Anetiohia?

⁸ Noa ˈtu ua riro mai Petero ei Kerisetiano faatavaihia, ua aro noa o ˈna i to ˈna mau paruparu. I te matahiti 36, ua ite mata Petero i te faatavairaahia Korenelio, te hoê taata ê peritome-ore-hia. E haapapuraa teie e “e ore te Atua e maitiiti i te taata” e ua fariihia te feia ěê i roto i te amuiraa Kerisetiano. (Ohi. 10:34, 44, 45) I muri iho, ua farii Petero e tamaa i te feia ěê. (Gal. 2:12) Tera râ, ua manaˈo vetahi Kerisetiano ati Iuda e aita e tano ra ia tamaa ratou e te feia ěê. I te taeraa mai ratou i Anetiohia, aita ˈtura Petero i tamaa faahou e to ˈna mau taeae no te mau nunaa ěê, aita paha o ˈna i hinaaro ia hiˈo-ino-hia oia e te mau Kerisetiano ati Iuda. I to te aposetolo Paulo iteraa, ua aˈo etaeta o ˈna ia Petero i mua i te taata atoa. (Gal. 2:13, 14) Noa ˈtu ua hapa faahou Petero, ua tamau o ˈna i te tutava. Na te aha râ i tauturu ia ˈna?

9. Mea nafea te Ioane 6:68, 69 e haapapu ai i te taiva ore o Petero?

⁹ E tavini taiva ore o Petero, aita o ˈna i vaiiho i te hoê noa ˈˈe tupuraa ia faatoaruaru roa ia ˈna. Ei hiˈoraa, ua faaite o ˈna i to ˈna taiva ore i to Iesu faahitiraa i te hoê parau ta te mau pǐpǐ i ore i taa. (A taio i te Ioane 6:68, 69.) E rave rahi pǐpǐ tei faaea i te pee ia Iesu e aita ratou i imi aˈe i te auraa o ta ˈna mau parau. Area o Petero, ua faaite papu o ˈna i tera mahana e tei ia Iesu anaˈe “te mau parau o te ora mure ore.”

10. Mea nafea Iesu i faaite ai e mea tiaturi na ˈna ia Petero? (A hiˈo atoa i te hohoˈa.)

¹⁰ Aita Iesu i faarue ia Petero. I te po hou o ˈna a pohe ai, ua ite ê na Iesu e faaruehia o ˈna e Petero e te tahi atu mau aposetolo. Noa ˈtu râ, ua papu ia Iesu e e hoˈi faahou mai Petero ia ˈna ra a ore atu ai e taiva ia ˈna. (Luka 22:31, 32) Ua taa ia Iesu e i roto i tera tupuraa, ua “hinaaro iho â te aau, te tino râ, mea paruparu ïa.” (Mar. 14:38) No reira Iesu i ore ai i faarue ia Petero i to ˈna parauraa e aita o ˈna i ite o vai o ˈna. I te tia-faahou-raa mai Iesu, ua fa mai o ˈna i mua ia Petero. E au ra e o Petero anaˈe i tera taime. (Mar. 16:7; Luka 24:34; Kor. 1, 15:5) Eaha râ paha Petero i te itoitohia a farerei ai ia Iesu!

11. Mea nafea Iesu i haapapu ai ia Petero e e tauturu Iehova ia ˈna?

 ¹¹ Ua haapapu Iesu ia Petero e e tauturu noa Iehova ia ˈna. I muri aˈe i to ˈna tia-faahou-raa, ua faatupu faahou Iesu i te hoê semeio i mua ia Petero e te tahi atu mau aposetolo, ua noaa mai ta ratou e rave rahi iˈa. (Ioa. 21:4-6) Ua haapapu te reira ia Petero e e nehenehe ta Iehova e aupuru atoa ia ˈna i te pae tino. I reira paha to Petero haamanaˈoraa i te parau a Iesu e e “tamau i te imi na mua i te Faatereraa arii” e e aupuru Iehova ia ratou. (Mat. 6:33) Mea na reira ïa to Petero tuuraa i te taviniraa, eiaha râ te ohipa ravaai, na mua roa i roto i to ˈna oraraa. I te Penetekose 33, ua tauturu oia e rave rahi tausani taata ia farii i te parau apî oaoa. (Ohi. 2:14, 37-41) I muri iho, ua tauturu oia i to Samaria e te feia ěê ia farii i te Mesia. (Ohi. 8:14-17; 10:44-48) Papu, ua faaohipa maitai Iehova ia Petero no te aratai i te taata e rave rau i roto i te amuiraa.

12. A feruri noa ˈi i te hiˈoraa o Petero, eaha te tia ia tatou ia haamanaˈo mai te peu te aro ra tatou i te hoê paruparu?

¹² E nehenehe Iehova e tauturu ia tatou ia tutava. E ere i te mea ohie ia aro noa i te hoê paruparu o te ore e vî oioi. Ia maoro roa, e manaˈo paha tatou e mea fifi aˈe to tatou tupuraa i to Petero. E nehenehe râ Iehova e horoa mai i te puai no te tamau i te tutava. (Sal. 94:17-19) Ei hiˈoraa, ua rave noa na te hoê taata i te peu mahu e rave rahi matahiti hou a haapii ai i te parau mau. Ua taui roa o ˈna i to ˈna huru oraraa e ua pee i te aratairaa a te Bibilia. Tera râ, te aro noa ra o ˈna i te mau hinaaro tia ore. Eaha tei tauturu ia ˈna ia tutava? Te faataa ra oia: “Na Iehova e horoa ia tatou i te puai.” Te na ô faahou ra o ˈna: “Maoti to Iehova varua . . . , ua haapii au e e nehenehe tatou e tamau i te haere na nia i te eˈa o te parau mau . . . Te faaohipa noa ra Iehova ia ˈu, e noa ˈtu to ˈu huru tia ore, te horoa noa mai ra o ˈna i te puai.”

13. E nafea ia pee i te hiˈoraa o Petero ia au i te Ohipa 4:13, 29, 31? (A hiˈo atoa i te hohoˈa.)

¹³ Mai ta tatou i ite mai, e rave rahi taime to Petero mǎtaˈuraa i te taata. Ma te  itoito râ, ua pure uˈana o ˈna ia noaa ia ˈna te puai. (A taio i te Ohipa 4:13, 29, 31.) E nehenehe atoa tatou e haavî i te mǎtaˈu. Teie te hiˈoraa o Horst, te hoê taeae tei ora na i Heremani Nazi. I te fare haapiiraa, e rave rahi taime to ˈna faaheporaahia ia faahanahana ia Hitler. Ma te ore e tamaˈi ia ˈna, ua pure to ˈna na metua e o ˈna no te ani ia Iehova ia horoa i te itoito i ta raua tamaiti. Maoti te tauturu a to ˈna na metua e te tiaturi ia Iehova, ua noaa ia Horst te puai no te mau papu. I muri aˈe ua nehenehe o ˈna e parau: “Aita roa ˈtu Iehova i faarue ia ˈu.” c

14. E nafea te mau matahiapo e nehenehe ai e faaitoito i tei toaruaru?

¹⁴ Eita Iehova e Iesu e faarue ia tatou. I to Petero parauraa e aita o ˈna i ite o vai Iesu, e faaotiraa tei tia ia ˈna ia rave. E faarue anei o ˈna i te Mesia, aore ra e tamau o ˈna i te tavini ei pǐpǐ na ˈna? Ua taparu Iesu ia Iehova ia ore te faaroo o Petero ia morohi. Ua faaite Iesu ia Petero e ua pure oia no ˈna e ua haapapu atu e na Petero e faaitoito i to ˈna mau taeae. (Luka 22:31, 32) Auê paha Petero i te mahanahana i teie mau parau a Iesu! Ia titauhia ia tatou ia rave i te hoê faaotiraa, e faaohipa Iehova i te mau matahiapo no te haamanaˈo ia tatou i te faufaaraa ia vai taiva ore noa. (Eph. 4:8, 11) Mea maoro to Paul taviniraa ei matahiapo. I te hoê mahana, ua tamata oia i te horoa ˈtu i tera huru tamahanahanaraa. Ua ani oia i te feia toaruaru ia haamanaˈo e mea nafea ratou i te iteraa i te parau mau. I muri mai, ua haapapu o ˈna ia ratou e, no to Iehova here taiva ore,  eita roa o ˈna e faarue ia ratou. I te pae hopea, ua parau o ˈna: “Ua ite mata roa vau ia ratou i te itoitoraa mai e i te tutavaraa maoti te tauturu a Iehova.”

15. Mea nafea te hiˈoraa o Petero e to Horst e haapapu ai e parau mau te Mataio 6:33?

¹⁵ Mai ia Iehova i aupuru ia Petero e i te tahi atu mau aposetolo, e aupuru atoa oia ia tatou i te pae tino ia tuu tatou i te taviniraa na mua roa i roto i to tatou oraraa. (Mat. 6:33) I muri mai i te piti o te Tamaˈi rahi, ua manaˈo Horst e rave i te taviniraa pionie. Mea veve roa râ o ˈna, ua manaˈo ïa o ˈna e eita e haere ia ˈna ia rave i te taviniraa taime taatoa. Eaha râ ta ˈna i rave? Ua faaoti oia i te tamata ia Iehova ma te poro i te hebedoma taatoa e tere mai ai te tiaau haaati ia ratou ra. I te hopea o taua hebedoma ra, ua maere roa o ˈna i to te tiaau haaati horoaraa mai i te hoê vehî rata e aita o ˈna i ite e na vai ra. E tino moni rahi to roto, ua nehenehe ïa o ˈna e rave i te taviniraa pionie no e rave rahi avaˈe. No Horst, e haapapuraa teie no ǒ mai ia Iehova e na ˈna e aupuru ia ˈna. Mai reira mai, ua tuu noa o ˈna i te Faatereraa arii na mua roa i roto i to ˈna oraraa.​—Mal. 3:10.

16. No te aha e mea faufaa ia hiˈopoa i te hiˈoraa o Petero e ta ˈna na rata?

¹⁶ Ua oaoa roa paha Petero e aita Iesu i faarue ia ˈna. Ua tamau râ Iesu i te faaineine ia Petero ia riro mai ei aposetolo taiva ore e ei hiˈoraa faahiahia no te mau Kerisetiano. E nehenehe tatou paatoa e faufaahia i teie faaineineraa. I roto i te mau rata ta ˈna i hapono i te mau amuiraa o te senekele matamua, te faaite ra Petero i te tahi mau haapiiraa ta ˈna i fanaˈo no ǒ mai ia Iesu ra. I roto i to muri nei tumu parau haapiiraa, e hiˈo mai tatou i te tahi mau manaˈo i roto i teie na rata e e nafea ia faaohipa i te reira i teie mahana.