1. Eaha te tupuraa fifi ta Iehoasa, Uzia e Iosia i farerei?

 A FERURI na e tamarii aore ra e taurearea outou a maitihia ˈi outou ei arii no te nunaa o te Atua. E nafea outou e faaohipa ˈi i to outou mana? I roto i te Bibilia, e rave rahi feia apî tei riro ei arii no Iuda. Ei hiˈoraa, e 7 matahiti to Iehoasa i te riroraa mai ei arii, e 16 matahiti to Uzia e e 8 noa matahiti to Iosia. E hopoia teimaha mau teie no ratou! Noa ˈtu râ, ua fanaˈo ratou i te tauturu no te amo i teie hopoia e no te haere na nia i te eˈa maitai.

2. No te aha e mea faufaa ia hiˈopoa i te hiˈoraa o Iehoasa, Uzia e Iosia?

² Noa ˈtu e ere tatou i te arii, e haapiiraa faufaa te nehenehe e apo mai i teie na tavini a Iehova. E faaotiraa maitai ta ratou i rave i roto i to ratou oraraa, e faaotiraa ino atoa râ. Maoti to ratou hiˈoraa, e hiˈo tatou no te aha e mea faufaa ia maiti i te hoa maitai, ia faatupu i te aau haehaa e ia imi i te aratairaa a Iehova.

3. Mea nafea to te arii Iehoasa faaohiparaa i te haapiiraa a te tahuˈa rahi ra o Iehoiada?

³ A pee i te faaotiraa paari a Iehoasa. I to ˈna apîraa, e faaotiraa paari ta te arii Iehoasa i rave. No te mea aita to ˈna e metua tane, ua pee oia i te aratairaa a te tahuˈa rahi ra o Iehoiada, te hoê tavini haapao maitai. Ua haapii o ˈna ia Iehoasa mai ta ˈna iho tamaiti. No reira, ua faaoti Iehoasa e turu maite i te haamoriraa viivii ore e e tavini ia Iehova. Ua faanaho atoa o ˈna ia tataîhia te hiero o Iehova.​—Par. 2, 24:1, 2, 4, 13, 14.

4. Eaha te haamaitairaa ia haafaufaa tatou i te mau ture a Iehova? (Maseli 2:1, 10-12)

⁴ Mai te peu ua haapiihia outou ia here ia Iehova e ia haapao i ta ˈna mau ture, mea fanaˈo roa outou. (A taio i  te Maseli 2:1, 10-12.) Ua rau te ravea e haapii ai te mau metua i ta ratou mau tamarii. A hiˈo na mea nafea te metua tane o te tuahine Katya i tauturu ai ia ˈna ia rave i te faaotiraa maitai. Pauroa te mahana, e faahoro o ˈna ia Katya i te fare haapiiraa e e aparau raua no nia i te irava mahana. Te faatia ra Katya: “Maoti teie mau aparauraa i noaa ˈi ia ˈu i te rave i te faaotiraa maitai ia farerei au i te hoê fifi.” E nafea râ ia manaˈo outou e mea etaeta roa te haapiiraa a to outou mau metua? E nafea outou e farii ai i ta ratou aratairaa niuhia i nia i te Bibilia? Te haamanaˈo ra te tuahine Anastasia i te huru raveraa a to ˈna na metua. Na mua raua e haamau ai i te hoê faatureraa, e faataa maitai raua ia ˈna no te aha e mea faufaa te reira. Te parau ra o ˈna: “Aita vau i hiˈo faahou i te reira mai te hoê faatureraa, mai te hoê râ parururaa î i te here.”

5. E nafea outou e faaoaoa ˈi i to outou na metua e ia Iehova? (Maseli 22:6; 23:15, 24, 25)

⁵ Ia haapao outou i te mau aˈoraa Bibilia, e oaoa to outou na metua. Te mea faufaa roa ˈtu â, e oaoa te Atua e e riro outou ei hoa no ˈna e a muri noa ˈtu. (A taio i te Maseli 22:6; 23:15, 24, 25.) Eita anei te reira e faaitoito ra ia outou ia pee i te hiˈoraa o Iehoasa i to ˈna apîraa?

6. O vai ta Iehoasa i faaroo, e eaha te faahopearaa? (Paraleipomeno 2, 24:17, 18)

⁶ Ia riro te faaotiraa ta Iehoasa i rave ei haapiiraa na outou. I te poheraa Iehoiada, ua amuimui Iehoasa i te hoa ino. (A taio i te Paraleipomeno 2, 24:17, 18.) Ua faaoti oia e faaroo i te mau huiarii o Iuda o te ore e tavini ra ia Iehova. E manaˈo anei outou e ua tano Iehoasa i te amuimuiraa i tera mau orure hau? Aita roa ˈtu! (Mas. 1:10) Ua faaroo râ oia i tera mau taata ta ˈna i manaˈo e hoa no ˈna. Ua tamata to ˈna fetii o Zekaria i te aˈo ia ˈna, ua faaue râ Iehoasa ia haapohehia o ˈna. (Par. 2, 24:20, 21; Mat. 23:35) Auê te maamaa e! E taata maitai Iehoasa i te haamataraa, i muri mai râ, ua riro o ˈna ei apotata e ei taparahi taata. I te pae hopea, na ta ˈna iho mau tavini i haapohe ia ˈna. (Par. 2, 24:22-25) Ahani o ˈna i faaroo ia Iehova e te feia e here ra i te Atua mau, eita ïa te reira e tupu. Eaha te haapii mai i to ˈna hiˈoraa?

7. O vai ta outou e maiti ei hoa? (A hiˈo atoa i te hohoˈa.)

⁷ Hoê haapiiraa ta tatou e apo mai, o te faufaaraa ïa ia maiti i te mau hoa maitai  o te here ra ia Iehova e o te faaoaoa i to ˈna aau. Eiaha e amuimui noa i te taata hoê â faito matahiti e to outou. A haamanaˈo, mea paari aˈe Iehoiada ia Iehoasa. A feruri ai i te huru o to outou mau hoa, a ui ia outou iho: ‘E tauturu anei ratou ia ˈu ia haapuai i to ˈu faaroo ia Iehova? E faaitoito anei ratou ia ˈu ia haapao i te mau ture aveia a te Atua? Mea au anei na ratou e aparau no nia ia Iehova e te mau pue parau mau Bibilia? E faatura anei ratou i te manaˈo o te Atua? Ia hape au, e aˈo anei ratou ia ˈu mai tei tia, aore ra e faanavenave noa ratou i to ˈu tariˈa?’ (Mas. 27:5, 6, 17) Ia ite mai outou, aita anaˈe to outou mau hoa e here ra ia Iehova, e ere ïa i te hoa maitai. Area to outou mau hoa e here ra ia Iehova, a ati maite ia ratou, e hoa papu tera.​—Mas. 13:20.

8. Mai te peu e reni faahoaraa ta outou, eaha ta outou e vai ara?

⁸ Mea au te mau reni faahoaraa no te aparau e te mau fetii e hoa. Tera râ, e rave rahi taata o te faaohipa nei i teie ravea no te faatietie ia ratou, a tuu atu ai i te hohoˈa e te video o te mau mea ta ratou i hoo mai e te ohipa ta ratou i rave. Mai te peu e reni faahoaraa ta outou, a ui ia outou iho: ‘Te hinaaro ra anei au e faatietie ia ˈu? Eaha ta ˈu fa, te faaitoitoraa anei ia vetahi ê aore ra te faateiteiraa ia ˈu? Te vaiiho ra anei au i te reira ia tuino i to ˈu mau manaˈo, ta ˈu huru paraparau e ohipa?’ Ua horoa taeae Nathan Knorr, tei tavini na ei mero o te Tino aratai, i teie aˈoraa: “Eiaha e imi i te ravea ia auhia mai outou e te taata, e mâuˈa to outou taime. A faaoaoa râ i te aau o Iehova, e auhia mai outou e te feia atoa e here ra ia ˈna.”

9. Eaha ta Iehova i tauturu ia Uzia ia rave? (Paraleipomeno 2, 26:1-5)

⁹ A pee i te faaotiraa maitai a Uzia. I to ˈna apîraa, e arii haehaa o Uzia. Ua haapii o ˈna i “te mǎtaˈu i te Atua mau.” E ua haamaitai noa Iehova ia ˈna e 68 matahiti te maoro. (A taio i te Paraleipomeno 2, 26:1-5.) Ua upootia Uzia i nia e rave rahi nunaa enemi e ua haapaari i te mau aua paruru o Ierusalema. (Par. 2, 26:6-15) Eita e ore ua mauruuru Uzia i te mau ohipa atoa ta te Atua i tauturu ia ˈna ia rave.​—Koh. 3:12, 13.

10. Eaha tei tupu no Uzia i te hopearaa?

¹⁰ Ia riro te faaotiraa ta Uzia i rave ei haapiiraa na outou. Ua matau te arii Uzia ia auraro noa te taata i ta ˈna mau faaueraa. No reira paha o ˈna i manaˈo ai e nehenehe ta ˈna e rave i te mau mea atoa ta ˈna i hinaaro. I te hoê mahana, ua tomo oia i roto i te hiero o Iehova, e no te teoteo, ua tamata i te tutui i te mea noˈanoˈa i nia i te fata. O te mau tahuˈa anaˈe te nehenehe e na reira, eiaha râ te arii. (Par. 2, 26:16-18) Ua tamata te tahuˈa rahi ra o Azaria i te tapea ia ˈna e riri roa ˈtura Uzia. Ino atura te roo o Uzia, e ere faahou o ˈna i te hoê tavini haapao maitai e ua faautuahia o ˈna i te maˈi lepera. (Par. 2, 26:19-21) Ahani o ˈna i vai haehaa noa, eita ïa te reira e tupu!

11. E nafea tatou e faaite ai e mea haehaa mau tatou? (A hiˈo atoa i te hohoˈa.)

¹¹ I te rahiraa mai te mana o Uzia, ua moˈe roa ia ˈna e o Iehova te tumu o te puai e te hanahana. Eaha te haapiiraa? Mea faufaa ia haamanaˈo noa e no ǒ mai ia Iehova ra ta tatou mau haamaitairaa e hopoia. Eiaha ïa e faatietie ia tatou, e  faahoˈi râ i te hanahana ia Iehova ra tei tauturu ia tatou. b (Kor. 1, 4:7) E tia ia farii ma te haehaa e e feia hara tatou, e hinaaro ïa tatou i te aˈoraa. Ua papai te hoê taeae ua hau i te 60 matahiti: “Ua haapii au eiaha e inoino ia itehia ta ˈu mau hape. Ia aˈohia vau, e faaitoito vau i te haamaitai i tera pae e i te nuu noa i mua.” No reira, ia mǎtaˈu tatou ia Iehova a vai haehaa noa ˈi, e maitai noa to tatou oraraa.—Mas. 22:4.

12. Mea nafea to Iosia imiraa ia Iehova i to ˈna taurearearaa? (Paraleipomeno 2, 34:1-3)

¹² A pee i te faaotiraa maitai a Iosia. E taurearea noa o Iosia i te haamataraa oia i te imi ia Iehova. Ua hinaaro o ˈna e haapii no nia ia Iehova e e rave i to ˈna hinaaro. E ere râ te oraraa o teie arii apî i te mea ohie. Ua tia ia ˈna ia paturu i te haamoriraa viivii ore i te hoê tau ua parare roa te haamoriraa hape. O ta ˈna ïa i rave ma te itoito! Hou te 20raa o to ˈna matahiti, ua haamata oia i te faaore i te haamoriraa hape.—A taio i te Paraleipomeno 2, 34:1-3.

13. Eaha te auraa ia pûpû outou ia outou no Iehova?

¹³ Noa ˈtu e mea apî roa outou, e nehenehe outou e pee ia Iosia ma te imi ia Iehova e ma te haapii no nia i to ˈna mau huru maitatai. A na reira ˈi, e faaoti outou i te pûpû ia outou no ˈna. Eaha ïa te auraa? Te na ô ra Luke tei bapetizohia i te 14raa o to ˈna matahiti: “Mai teie atu nei mahana, e tuu noa vau i ta ˈu taviniraa ia Iehova na mua roa e e faaoaoa noa vau i to ˈna aau.” (Mar. 12:30) E haamaitai-rahi-hia outou ia pee outou i te hiˈoraa o Luke!

14. Eaha te mau tamataraa ta te feia apî e farerei nei a tavini ai ia Iehova?

¹⁴ Eaha te mau tamataraa ta te feia apî e farerei nei a tavini ai ia Iehova? Te faahiti ra Johan, tei bapetizohia i te 12raa o to ˈna matahiti, e e onoono to ˈna mau hoa ia pupuhi o ˈna i te avaava uira. Ihea o ˈna e ite mai ai i te puai no te faaruru i  teie tamataraa? E haamanaˈo o ˈna e e nehenehe teie peu e tuino i to ˈna ea e to ˈna auhoaraa e o Iehova. Area o Rachel, tei bapetizohia i te 14raa o to ˈna matahiti, te faatia ra o ˈna eaha te tauturu ra ia ˈna ia faaruru i te mau faahemaraa i te fare haapiiraa. Te na ô ra o ˈna: “Ia ite au i te hoê ohipa, e imi noa vau i te hoê haapiiraa Bibilia. Ei hiˈoraa, e haamanaˈo vau i te hoê aamu aore ra hoê parau tohu. Aore ra i roto i te hoê aparauraa, e haamanaˈo vau i te hoê irava Bibilia ta ˈu e faaite atu.” E ere paha hoê â fifi ta outou e farerei ra e ta te arii Iosia, e nehenehe râ outou e pee i to ˈna feruriraa paari e to ˈna haapao maitai. Ia faaruru outou i te fifi i to outou apîraa, e ineine atu â outou i te mau papu ia paari mai outou.

15. Eaha tei tauturu ia Iosia ia tavini ia Iehova ma te haapao maitai? (Paraleipomeno 2, 34:14, 18-21)

¹⁵ I to ˈna paariraa mai, faanaho ihora te arii Iosia ia tataîhia te hiero. Itehia mai nei “te buka o te Ture a Iehova tei horoahia mai na roto ia Mose.” I te faarooraa te arii i te taioraahia tera buka, hinaaro roa ˈtura o ˈna e haapao i te mau parau atoa i roto. (A taio i te Paraleipomeno 2, 34:14, 18-21.) E fa anei na outou e taio i te Bibilia i te mau mahana atoa? Mai te peu e e, eaha ˈtura? Ua tapao anei outou i te tahi mau irava o te nehenehe e tauturu ia outou? E papai Luke, tei faahitihia na mua ˈtu, i te mau manaˈo faufaa ta ˈna i ite mai i roto i te hoê buka papai. E nehenehe anei outou e na reira atoa no te haamanaˈo i te mau irava ta outou i au? Rahi atu â outou i te haafaufaa i te Bibilia, rahi atu â ïa outou i te hinaaro e tavini ia Iehova. E mai te arii Iosia, e hinaaro roa outou e haapao i ta te Bibilia e parau ra.

16. No te aha Iosia i hara ˈi, e eaha te haapiiraa no tatou?

¹⁶ Ia riro te faaotiraa ta Iosia i rave ei  haapiiraa na outou. E 39 matahiti to Iosia i to ˈna raveraa i te hoê hara e pohe atura o ˈna. Aita o ˈna i ani i te aratairaa a Iehova, ua tiaturi râ o ˈna ia ˈna iho. (Par. 2, 35:20-25) Eaha te haapiiraa? Noa ˈtu mea paari tatou e mea maoro tatou i te haapiiraa i te Bibilia, e tia ia tatou ia imi noa ia Iehova. E nafea? Ma te ani i ta ˈna aratairaa na roto i te pure, ma te haapii i ta ˈna Parau e ma te farii i te aˈoraa a te mau Kerisetiano paari i te pae varua. A na reira ˈi, eita tatou e hahi ê, e oaoa noa râ.—Iak. 1:25.

17. Eaha ta tatou i haapii mai i te hiˈoraa o na toru arii no Iuda?

¹⁷ E taime tano te apîraa no te rave i te faaotiraa maitai. Te haapapu ra te hiˈoraa o Iehoasa, Uzia e Iosia e e nehenehe te feia apî e rave i te faaotiraa maitai e e faaoaoa i te aau o Iehova. Parau mau, e ere i te auraa e vai taiva ore noa tatou e tae noa ˈtu i te hopea. E nehenehe râ tatou e pee i to ratou haerea maitai e e ape i te mau faaotiraa ino ta ratou i rave. A na reira ˈi, e vai taiva ore tatou ia Iehova.

18. Eaha te mau hiˈoraa Bibilia e faaite ra e e nehenehe atoa outou e oaoa? (A hiˈo atoa i te hohoˈa.)

¹⁸ I roto i te Bibilia, te vai ra te aamu o te tahi atu feia apî tei faafatata ˈtu ia Iehova, tei fanaˈo i ta ˈna farii maitai e tei oaoa i roto i to ratou oraraa. O Davida te tahi. I to ˈna apîraa, ua maiti oia i te tia i te pae o Iehova e ua riro mai ei arii taiva ore. Noa ˈtu ua hape o ˈna i te tahi taime, ua fanaˈo noa o ˈna i te farii maitai a te Atua. (Arii 1, 3:6; 9:4, 5; 14:8) E itoitohia outou a haapii ai i te aamu o Davida e ta ˈna taviniraa. E nehenehe atoa outou e haapii no nia ia Mareko aore ra Timoteo. Ua tavini raua ia Iehova i te apîraa e ua fanaˈo i ta ˈna farii maitai a paari mai ai e ua oaoa raua i to raua oraraa.

19. E nafea outou e oaoa ˈi?

¹⁹ Tei ta outou mau faaotiraa noa e oaoa ˈi outou aore ra eita. Ia tiaturi outou ia Iehova eiaha râ ia outou iho, na ˈna ïa e aratai i to outou taahiraa avae. (Mas. 20:24) E nehenehe outou e oaoa e e fanaˈo e rave rahi haamaitairaa. A haamanaˈo, e haafaufaa Iehova i ta outou e rave nei no ˈna. Aita ˈtu e faaotiraa maitai aˈe maori râ te taviniraa i to tatou Metua î i te here!