1. Eaha ta Petero i rave hou oia a pohe ai?

 UA ITE te aposetolo Petero e fatata o ˈna i te pohe. I te roaraa o ta ˈna taviniraa, ua haere oia na muri ia Iesu, ua poro oia i te vahi aita i porohia aˈenei e ua tavini ei mero o te tino aratai. Aita râ ta ˈna taviniraa i hope atura. I te matahiti 62 tae atu i te 64, ua aratai te varua moˈa ia ˈna ia papai e piti rata, oia hoi te buka Bibilia o te Petero 1 e te Petero 2. Ua tiaturi o ˈna e e tauturu ta ˈna na rata e piti i te mau Kerisetiano i muri aˈe i to ˈna pohe.​—Pet. 2, 1:12-15.

2. No te aha ua tae mai te mau rata a Petero i te taime tano?

² Ua papai Petero i ta ˈna na rata e piti i te taime a roohia ˈi te mau Kerisetiano i “te mau ati e rave rau.” (Pet. 1, 1:6) Ua tamata te tahi mau tane i te faaô i te haapiiraa hape e te mau peu tia ore i roto i te amuiraa. (Pet. 2, 2:1, 2, 14) Fatata roa hoi te mau Kerisetiano i Ierusalema i te faaruru i “te hopea o te mau mea atoa,” oia hoi te haamouraa te mau faehau Roma i te oire e te hiero. (Pet. 1, 4:7) Eita e ore ua tauturu te mau rata a Petero i te mau Kerisetiano ia ite e nafea ia faaoromai tamau i te fifi e ia faaineine ia ratou no te mau tupuraa i mua. b

3. No te aha mea faufaa ia hiˈopoa tatou i te mau rata a Petero?

³ Noa ˈtu ua papai Petero i teie mau rata no te mau Kerisetiano matamua, ua tuu Iehova i te reira i roto i ta ˈna Parau ei haapiiraa na tatou. (Roma 15:4) Te ora nei tatou i roto i te hoê ao viivii e te haafifi-atoa-hia ra ta tatou taviniraa ia Iehova. Hau atu, fatata tatou i te faaruru i te  hoê ati rahi aˈe i tei tupu i Ierusalema. E ite ïa tatou i te tahi mau manaˈo faufaa i roto i te mau rata a Petero. E tauturu te reira ia tatou ia tiai maite i te mahana o Iehova, ia ore e mǎtaˈu i te taata e ia here rahi te tahi i te tahi. E faufaa-atoa-hia te mau matahiapo, inaha e haamanaˈo te reira ia ratou e nafea ia aupuru i te nǎnǎ.

4. Ia au i te Petero 2, 3:3, 4 eaha te nehenehe e haaparuparu ia tatou?

⁴ Te haaatihia ra tatou e te taata o te ore e tiaturi ra i te mau parau tohu Bibilia. E faaooo te feia patoi ia tatou no te mea e mea maoro to tatou poro-noa-raa i te hopea o teie nei ao. E parau atoa vetahi e eita roa ˈtu te hopea e tae mai. (A taio i te Petero 2, 3:3, 4.) Ia faaroo tatou i teie huru parau no roto mai i te hoa ohipa, te hoê fetii aore ra i roto i te pororaa e nehenehe to tatou faaroo e paruruhia. Ua faataa Petero eaha te nehenehe e tauturu ia tatou.

5. Eaha te tauturu ia tatou ia tapea i te hoê feruriraa maitai no nia i te hopea o teie nei ao? (Petero 2, 3:8, 9)

⁵ No vetahi, mea taere roa o Iehova i te haamou i teie ao ino. E tauturu mai te mau parau a Petero ia tapea i te hoê feruriraa maitai e te haamanaˈo mai ra te reira e eita Iehova e taio i te mahana mai ia tatou te taata nei. (A taio i te Petero 2, 3:8, 9.) Inaha hoê mahana no Iehova, e tausani matahiti ïa no tatou. Mea faaoromai roa o Iehova, aita hoi o ˈna i hinaaro ia mou te hoê noa ˈˈe taata. Ia tae mai râ to ˈna mahana, e haamou roa o ˈna i teie nei ao. E haamaitairaa faahiahia mau ia faaohipa i te taime e toe ra no te faaara i te mau nunaa atoa.

6. E nafea tatou “ia haamanaˈo noa” i te mahana o Iehova? (Petero 2, 3:11, 12)

⁶ Te faaitoito ra Petero ia tatou “ia haamanaˈo noa” i te mahana o Iehova. (A taio i te Petero 2, 3:11, 12.) E nafea? E feruriruri tatou i te mau mahana atoa i te mau haamaitairaa atoa ta te ao apî e hopoi mai. A feruri na ia outou e huti ra i te mataˈi apî e te viivii ore, te amu ra outou i te maa maitai no te tino, te tauahi ra outou i te feia herehia e outou tei faatiahia mai e te haapii ra outou i te taata tei ora e hanere matahiti na mua ˈtu i te tupuraa o te mau parau tohu Bibilia. Ia na reira outou, e vai ara noa outou i teie tau ino mau ta tatou e ora nei a tiai noa ˈi i te ao apî. No te mea “ua ite ê na outou i teie mau mea atoa,” eita ïa outou e faahemahia i te haavare a te taata.​—Pet. 2, 3:17.

7. E nafea te mǎtaˈu taata e haafifi ai ia tatou?

⁷ A haamanaˈo noa ˈi tatou i te mahana o Iehova, e hinaaro tatou e poro i te parau apî oaoa ia vetahi ê. E nehenehe noa râ tatou e taiâ i te poro i te tahi taime. No te aha? No te mǎtaˈu taata. Ua farerei atoa Petero i tera fifi. I te po i haavahia ˈi Iesu, ua taiâ o ˈna i te faaite e e pǐpǐ o ˈna na Iesu e ua parau roa o ˈna e aita o ˈna i ite o vai o ˈna. (Mat. 26:69-75) I muri mai râ, ua parau Petero: “Eiaha râ e riaria i ta ratou e riaria ra, eiaha atoa e horuhoru.” (Pet. 1, 3:14) Na roto i teie mau parau, ua haapapu o ˈna e e nehenehe tatou e haavî i te mǎtaˈu taata.

8. E nafea e vî ai ia tatou te mǎtaˈu taata? (Petero 1, 3:15)

⁸ E nafea e vî ai ia tatou i te mǎtaˈu te taata? Te na ô mai ra Petero: “I roto râ i  to outou aau, a farii e mea moˈa te Mesia e e Fatu oia.” (A taio i te Petero 1, 3:15.) Te auraa, e tia ia tatou ia farii i te mana e te tiaraa o te Mesia ra o Iesu, to tatou Fatu e Arii. Ia taiâ outou i te poro, e haamanaˈo anaˈe i to tatou Arii. A feruri ia ˈna i nia i to ˈna terono tei haaatihia i e mirioni melahi. A haamanaˈo e “ua horoahia mai [ia ˈna] te mana atoa i te raˈi e i te fenua” e “tei pihai iho [oia ia tatou] i te mau mahana atoa e tae noa ˈtu i te anotau hopea o te ao nei.” (Mat. 28:18-20) Te faaitoito ra Petero ia tatou ia vai “ineine noa” no te faataa i te tumu o to tatou faaroo. E hinaaro anei outou e poro i te vahi raveraa ohipa, i te fare haapiiraa aore ra i te tahi atu vahi? A faaineine atea eaha ta outou e parau hou a farerei ai i te hoê o teie mau tupuraa. A ani ia Iehova i te itoito, ma te tiaturi e e tauturu o ˈna ia outou ia haavî i te mǎtaˈu taata.​—Ohi. 4:29.

9. A faatia na i te hoê tupuraa i ore ai Petero i faaite i te here. (A hiˈo atoa i te hohoˈa.)

⁹ Ua haapii Petero e nafea ia faaite i te here. Tei reira o ˈna i te parauraa Iesu: “E faaueraa apî ta ˈu e horoa ˈtu nei, ia here outou te tahi i te tahi. Mai ia ˈu i here ia outou, ia here atoa outou te tahi i te  tahi.” (Ioa. 13:34) Noa ˈtu râ, ua fati Petero no to ˈna mǎtaˈu i te taata e aita ˈtura i tamaa faahou i to ˈna mau taeae e tuahine no te mau nunaa ěê. Ua pii te aposetolo Paulo i tera peu ta Petero “e huru haavarevare” no ˈna. (Gal. 2:11-14) Ua farii Petero i teie aˈoraa. I roto i ta ˈna na rata, ua haapapu o ˈna i te manaˈo e eita e navai noa ia here i to tatou mau taeae e tuahine i roto i te aau, e tia râ ia faaite roa ˈtu na roto i te ohipa.

10. No te aha tatou e here ai i te mau taeae e tuahine “ma te haavarevare ore”? A faataa na. (Petero 1, 1:22)

¹⁰ Te ani ra Petero ia tatou ia here i to tatou mau taeae e tuahine “ma te haavarevare ore.” (A taio i te Petero 1, 1:22.) Mea here na tatou ia ratou no to tatou “faaroo i te parau mau.” I roto i te Bibilia, ua haapii tatou e “e ore te Atua e maitiiti i te taata.” (Ohi. 10:34, 35) Ia faaite tatou i te here i te tahi noa mau mero o te amuiraa, eiaha râ i te taatoaraa, aita ïa tatou e haapao nei i teie faaueraa a Iesu. Parau mau, mai ia Iesu, te vai ra iho â to tatou mau hoa piri. (Ioa. 13:23; 20:2) Tera râ, te haamanaˈo mai ra Petero e e tia ia tatou ia “here i te fetii taeae taatoa” ma te faariro i te mau taeae e tuahine mai te mau mero o to tatou utuafare.​—Pet. 1, 2:17.

11. Eaha te auraa ia here rahi te tahi i te tahi ma te aau atoa?

¹¹ Te faaitoito ra Petero ia tatou ia here rahi “te tahi i te tahi ma to [tatou] aau atoa.” Ia parauhia i ǒ nei e “here rahi,” e here taa ê ïa, e ere noa ïa i te huru aau matauhia. Ei hiˈoraa, eaha te rave ia haamauiui te hoê taeae ia tatou? No to tatou huru tia ore, e hinaaro paha tatou e tahoo. Ua haapii râ Petero na roto ia Iesu e na te Atua te tahoo. (Ioa. 18:10, 11) Ua papai Petero: “Eiaha e tahoo i te ino i te ino aore ra te tuhi i te tuhi. A haamaitai atu râ.” (Pet. 1, 3:9) No reira, a vaiiho i te here rahi ia turai ia tatou ia hamani maitai e ia faatura i te mau huru taata atoa, oia atoa te taata i haamauiui ia tatou.

12. (1) Eaha ˈtu â ta te here rahi e turai ia tatou ia rave? (2) Mai te faaitehia ra i roto i te video A paruru i te ô faufaa roa o te auhoêraa, e tutava tatou i te aha?

¹² I roto i ta ˈna rata matamua, ua faaohipa Petero i te tahi atu parau hoê â auraa e te “here rahi.” Eita teie huru e tapoi i te tahi noa mau hapa, e tapoi râ “i te hara e rave rahi.” (Pet. 1, 4:8) Eita e ore ua haamanaˈo Petero i ta Iesu i haapii ia ˈna tau matahiti na mua ˈtu. I tera taime, ua manaˈo paha Petero e e taata faahiahia o ˈna i to ˈna parauraa e faaore oia i te hara a to ˈna taeae ‘e hitu taime.’ Ua haapii mai râ Iesu ia faaore i te hara e 77 taime. E auraa parau teie. Te tanoraa mau, eiaha e taio ehia taime tatou e faaore ai i te hara a vetahi ê. (Mat. 18:21, 22) Mai te peu e mea fifi na outou ia haapao i teie aˈoraa, a faaitoito! E ere i te mea ohie no te mau tavini atoa a Iehova ia faaore i te hara. Mea faufaa roa râ ia faaore i te hara a te mau taeae e tuahine e ia faahoa ia ratou. c

13. No te aha e ere i te mea ohie no te mau matahiapo ia aupuru i te mau taeae e tuahine?

¹³ Papu, aita roa ˈtu i moˈe ia Petero i te parauraa Iesu ia ˈna i muri aˈe i to ˈna  tia-faahou-raa: “A aupuru i ta ˈu mau fanauˈa mamoe.” (Ioa. 21:16) Ua ite te mau matahiapo e no ratou teie faaueraa. E ere i te mea ohie no te mau matahiapo ia faanaho i te taime no te haapao i te hoê hopoia faufaa. Tera râ, e tia ia ratou ia haapao na mua roa i to ratou utuafare i te pae tino, huru aau e varua. O ratou atoa te itehia na mua roa i roto i te ohipa pororaa. E faaineine maite e e vauvau ratou i ta ratou mau tumu parau no te mau putuputuraa e tairururaa. E mero vetahi no te Tomite tuatiraa e te fare maˈi e e apiti vetahi atu i te paturaa na muri i te Tuhaa haapao i te paturaa tiaauhia e te amaa o to ratou fenua. Oia mau, mea rahi te ohipa a te mau matahiapo!

14. Eaha te faaitoito i te mau matahiapo ia aupuru i te mau taeae e tuahine? (Petero 1, 5:1-4)

¹⁴ Teie te faaitoitoraa ta Petero i horoa i te mau matahiapo: “A aupuru i te nǎnǎ a te Atua.” (A taio i te Petero 1, 5:1-4.) E te mau matahiapo, ua papu ia matou e mea here na outou i to outou mau taeae e tuahine e e hinaaro iho â outou e aupuru ia ratou. I te tahi râ taime, no te rahi o te ohipa e no te rohirohi, e manaˈo outou e eita e haere ia outou. E nafea outou? A haamahora i to outou aau ia Iehova. Ua papai Petero: “Ia tavini te hoê taata, ia na reira oia ma te turui i nia i te puai ta te Atua e horoa.” (Pet. 1, 4:11) No te tahi mau fifi ta te mau taeae e tuahine e faaruru nei, e faaoromai noa ratou i te reira e tae roa ˈtu i roto i te ao apî. A haamanaˈo râ e mana rahi aˈe to “te tiai mamoe rahi,” o Iesu Mesia, no te tauturu ia ratou i teie nei â e i roto atoa i te ao apî. Ta te Atua noa e ani ra i te mau matahiapo, o te hereraa ïa i to ratou mau taeae e tuahine, te aupururaa ia ratou e te riroraa “ei hiˈoraa no te nǎnǎ.”

15. E nafea te hoê matahiapo e aupuru ai i te mau taeae e tuahine? (A hiˈo atoa i te hohoˈa.)

¹⁵ Mea maoro to William taviniraa ei matahiapo, ua taa maitai ïa ia ˈna te faufaa rahi o teie hopoia. A haamata ˈi te COVID-19 i te parare, ua ohipa amui o ˈna e te mau matahiapo o ta ˈna amuiraa no te ite eaha te huru o te mau mero o ta ratou pǔpǔ pororaa i te mau hebedoma atoa. Te faataa nei o ˈna i te tumu:  “Ua moˈemoˈe roa te mau taeae e tuahine o ratou anaˈe to te fare, oioi noa te manaˈo toaruaru i te ô mai i roto i te feruriraa.” Mai te peu e fifi ta te hoê mero e faaruru ra, e faaroo maite William ia ˈna no te ite eaha ta ˈna e haapeapea ra e e hinaaro mau ra. I muri mai, e imi o ˈna i te hoê manaˈo no te faaitoito atu, pinepine o ˈna i te ite mai i te faaitoitoraa tano i roto i te hoê video o ta tatou reni natirara. Te parau faahou ra o ˈna: “Mea faufaa roa ia aupuru maitai i te mau taeae e tuahine, i teie iho â râ tau ta tatou e ora nei. Mai ta tatou e tuu nei i to tatou puai atoa i roto i te ohipa pororaa, e na reira atoa anaˈe no te aupuru i te mau taeae e tuahine ia faaea noa mai i roto i te parau mau.”

16. E nafea tatou e faaohipa ˈi i te mau haapiiraa itehia mai i roto i na rata a Petero?

¹⁶ Ua hiˈopoa mai tatou i te tahi mau haapiiraa no roto mai i na rata e piti a Petero. Peneiaˈe ua tapao mai outou i te hoê vahi te nehenehe e haamaitaihia. E hinaaro anei outou e feruri maite atu â i nia i te ao apî e te mau haamaitairaa ta outou e fanaˈo? Ua haamau anei outou i te fa e poro i te vahi raveraa ohipa, i te fare haapiiraa aore ra i te tahi atu vahi? Te ite ra anei outou i te tahi mau ravea no te here rahi atu â i te mau taeae e tuahine? E te mau matahiapo, ua ineine anei outou i te aupuru i te mau mamoe a Iehova ma te aau tae e te itoito rahi? Mai te peu e tia ia outou ia haamaitai mai i te tahi mau tuhaa, eiaha e toaruaru. “E mea hamani maitai te Fatu” e e tauturu o ˈna ia outou ia haamaitai mai. (Pet. 1, 2:3) Te haapapu nei Petero: “E faaineine hope roa [te Atua] ia outou. E faaitoito oia ia outou, e haapuai oia ia outou, e haamau papu oia ia outou.”​—Pet. 1, 5:10.

17. Ia tutava tatou a vaiiho noa ˈi ia Iehova ia faaineine ia tatou, eaha te haamaitairaa ta tatou e fanaˈo?

¹⁷ A haamanaˈo e ua haama na Petero i te tiaraa i pihai iho i te Tamaiti a te Atua. (Luka 5:8) Maoti râ te tauturu a Iehova e Iesu, ua tamau Petero i te tavini ei pǐpǐ na te Mesia. Fanaˈo ihora o ˈna i te farii maitai a te Atua “a ô atu ai i roto i te Faatereraa arii mure ore a to tatou Fatu e Faaora ra o Iesu Mesia.” (Pet. 2, 1:11) Auê ïa haamaitairaa! Ia vaiiho noa outou ia Iehova ia faaineine ia outou mai ia Petero, e fanaˈo atoa outou i te ora mure ore, “a noaa ˈi ia outou te fa o to outou faaroo, to outou faaoraraa.”​—Pet. 1, 1:9.