1-2. No te aha Iehova i poiete ai ia tatou ia oaoa tatou i te horoa na vetahi ê?

 E RAHI aˈe te oaoa ia horoa na vetahi ê i te horoahia mai. Mai tera to Iehova poieteraa ia tatou. (Ohi. 20:35) E ere râ te auraa eita tatou e oaoa ia horoahia mai. Mea oaoa iho â ia horoa mai te tahi taata i te hoê ô. E rahi aˈe râ to tatou oaoa mai te peu na tatou e horoa. No to tatou iho maitai i na reira ˈi Iehova i te poiete ia tatou. No te aha?

² Auaˈe Iehova i hamani ia tatou mai tera e nehenehe ai tatou e oaoa ˈtu â i te horoa na vetahi ê. E imi ïa tatou i te mau ravea no te na reira. Mea faahiahia mau â to Iehova hamaniraa ia tatou mai tera, e ere anei?​—Sal. 139:14.

3. No te aha Iehova i parauhia ˈi e “Atua oaoa”?

³ Te haapapu mai ra te Bibilia e oaoa tatou ia horoa tatou na vetahi ê. No reira te Bibilia e parau ai e “Atua oaoa” Iehova. (Tim. 1, 1:11) O ˈna tei horoa na mua roa e aita e Atua horoa mai ia ˈna. Maoti hoi o ˈna e “ora ˈi, e hahaere ai e e vai mai ai tatou.” (Ohi. 17:28) “Te mau ô maitatai atoa e te mau mea tia roa i horoahia mai,” no ǒ mai ia Iehova ra.​—Iak. 1:17.

4. Eaha te tauturu mai ia ite tatou i te oaoa rahi?

⁴ Eita e ore o tatou pauroa te hinaaro e ite i te oaoa rahi ia horoa na vetahi ê. E nehenehe tatou e pee i te  hiˈoraa o Iehova, e Atua horoa hoi o ˈna. (Eph. 5:1) E hiˈopoa mai ïa tatou i to ˈna hiˈoraa faahiahia mau, e eaha te rave ia ore te feia ta tatou i horoa ˈtu e haamauruuru mai. E tauturu mai hoi te reira ia tamau i te horoa na vetahi ê, a rahi atu â ˈi to tatou oaoa.

MAI IA IEHOVA, A HOROA NOA

5. Eaha te tahi mau mea ta Iehova e horoa mai?

⁵ Eaha te tahi mau mea ta Iehova e oaoa i te horoa mai? Teie te tahi mau hiˈoraa. E horoa mai Iehova i te mau mea e hinaaro-mau-hia e tatou. E ere te oraraa fanaˈo ta ˈna e horoa mai, te mau mea râ ta tatou e hinaaro mau, mai te maa, te ahu e te nohoraa. (Sal. 4:8; Mat. 6:31-33; Tim. 1, 6:6-8) E aupuru iho â o ˈna ia tatou i te pae tino. E na reira anei o ˈna no te mea noa e hopoia na ˈna? E ere roa ˈtu!

6. Eaha te haapiiraa e huti mai i te Mataio 6:25, 26?

⁶ No to ˈna here e aupuru ai Iehova ia tatou i te pae tino. A hiˈo na i ta Iesu i parau i roto i te Mataio 6:25, 26. (A taio.) Ua faahiti o ˈna i te mau manu ta Iehova i poiete. Teie ta ˈna i parau: “Eita ratou e ueue i te huero, e ooti e e haaputu i te maa.” A tapao na râ i ta ˈna i parau i muri iho: “Te faaamu ra to outou Metua i te raˈi ia ratou.” Ui atura ïa o ˈna: “E ere anei mea faufaa aˈe outou ia ratou?” Eaha ïa te haapiiraa? No Iehova, mea faufaa aˈe ta ˈna mau tavini i te animara. Mai te peu mea aupuru na Iehova i te mau animara, ia tatou atoa ïa. Mai te hoê papa hamani maitai, e aupuru Iehova i ta ˈna mau tavini no to ˈna here ia ratou.​—Sal. 145:16; Mat. 6:32.

7. Eaha te tahi ravea e horoa ˈi tatou na vetahi ê mai ia Iehova? (A hiˈo atoa i te hohoˈa.)

⁷ E nehenehe tatou atoa e horoa na vetahi ê i ta ratou e hinaaro mau ra no to tatou here ia ratou. Te pee ra ïa tatou i te hiˈoraa o Iehova. Ua matau paha tatou i te hoê taeae aore ra tuahine e hinaaro ra i te maa aore ra te ahu. E nehenehe Iehova e faaohipa ia tatou no te tauturu atu. Ia tupu te ati, mea horoa atoa te mau tavini a Iehova. Te tupuraa te maˈi parare COVID-19, ua horoa te  mau taeae e tuahine i te maa, te ahu e te tahi atu â mau mea na tei roohia i te ati. Mea rahi atoa tei horoa i te moni no te turu i te ohipa pororaa na te ao nei e te ohipa tauturu i te mau taeae i roto i te ati. Ua pee noa ratou i tei papaihia i roto i te Hebera 13:16: “Eiaha e haamoˈe i te rave i te maitai e i te tufa i ta outou mau mea na vetahi ê, e mauruuru hoi te Atua i taua mau huru tusia ra.”

8. E horoa mai Iehova i te puai ia nehenehe tatou e aha? (Philipi 2:13)

⁸ E horoa mai Iehova i te puai. E puai otia ore to Iehova ta ˈna e horoa ma te oaoa na ta ˈna mau tavini haapao maitai. (A taio i te Philipi 2:13.) Eita e ore ua pure oe ia ˈna no te ani i te puai ia mau papu oe i mua i te faahemaraa, ia faaruru i te hoê fifi rahi, aore ra ia itoito faahou mai. A ite ai oe e ua pahonohia ta oe pure, ua parau paha oe mai ia Paulo: “E puai to ˈu ia faaruru i te mau mea atoa maoti tei horoa mai i te puai.”​—Phil. 4:13.

9. E nafea ia faaohipa i to tatou puai ia au i te hiˈoraa o Iehova? (A hiˈo atoa i te hohoˈa.)

⁹ Aita to tatou e puai otia ore mai to Iehova. E nehenehe râ tatou e pee i to ˈna hiˈoraa ma te faaohipa i to tatou puai no te tauturu ia vetahi ê. No te tamâ anei i te fare o te hoê Kerisetiano ruhiruhia aore ra maˈimaˈi, aore ra no te haere i te fare toa no ˈna. E nehenehe atoa tatou e apiti i te tamâraa e te atuaturaa i te Piha a te Basileia. No te maitai o to tatou mau taeae e tuahine e faaohipa ˈi tatou i to tatou puai mai tera.

10. E nafea ia faaitoito ia vetahi ê na roto i ta tatou mau parau?

¹⁰ A haamanaˈo atoa e mea faufaa ta oe e parau no te faaitoito i to oe mau taeae e tuahine. Te hinaaro ra paha hoê i te tamahanahanaraa aore ra ia haapopouhia o ˈna. E nehenehe oe e haere roa ˈtu e hiˈo ia ˈna, e niuniu atu aore ra e papai atu i te tahi poroi. Eiaha e faarahi i te parau. Maa parau rii î i te here, ua navai ïa no te faaitoito i to oe taeae aore ra tuahine ia vai taiva ore aore ra ia itoito mai.​—Mas. 12:25; Eph. 4:29.

11. E nafea Iehova e horoa mai ai i to ˈna paari?

¹¹ E horoa mai Iehova i te paari. Ua papai te pǐpǐ Iakobo: “Ia ere noa ˈtu hoê o outou i te paari, ia tamau noa ïa oia i te ani atu i te Atua, e horoa noa mai hoi oia i te taata atoa ma te ore e faahapa.” (Iak. 1:5) Ia au i teie irava, eita Iehova e pipiri i to ˈna paari. E horoa noa oia i  te reira. A tapao atoa e horoa o ˈna i te paari “ma te ore e faahapa.” Eiaha ïa tatou e taiâ i te ani i ta ˈna aratairaa, no te mea te hinaaro ra iho â o ˈna ia ani tatou ia ˈna.​—Mas. 2:1-6.

12. Eaha te tahi mau ravea e horoa ˈi tatou na vetahi ê i to tatou ite?

¹² E tatou ïa, e nafea ia pee i te hiˈoraa o Iehova? (Sal. 32:8) Mea rahi te ravea e na reira ˈi tatou. Ei hiˈoraa, e nehenehe tatou e haapii i te mau mero no haamata noa ˈtu ra i te poro. E nehenehe te mau matahiapo e faaineine i te mau tavini tauturu e te mau taeae bapetizohia ia amo i ta ratou mau hopoia i roto i te amuiraa. E na te mau taeae e tuahine aravihi i roto i te paturaa e te atuaturaa e haapii ia vetahi ê no taua mau ohipa ra.

13. Ia faaineine tatou ia vetahi ê, e nafea ia pee i ta Iehova huru raveraa?

¹³ Mea maitai ia pee te feia o te faaineine ra ia vetahi ê i ta Iehova huru raveraa. A haamanaˈo, e horoa noa Iehova i to ˈna paari. Ia na reira atoa ïa tatou ia horoa tatou i to tatou ite e aravihi ia vetahi ê. Eiaha tatou e taiâ aˈunei ratou e rave ai i ta tatou hopoia a muri aˈe. Eiaha atoa tatou e na ô: ‘Aita e taata i haapii mai ia ˈu. Na ˈu ïa e haapii ia ˈna?’ Aita tera huru feruriraa i rotopu i te nunaa o Iehova. Ia oaoa râ tatou i te horoa eiaha noa i to tatou ite, i to tatou atoa râ ora no te feia ta tatou e faaineine ra. (Tes. 1, 2:8) E hinaaro hoi tatou ia ‘ite atoa ratou i te haapii maitai ia vetahi ê.’ (Tim. 2, 2:1, 2) No reira, ia horoa noa tatou pauroa i to tatou ite e aravihi, o tatou pauroa atoa ïa te oaoa.

IA ORE VETAHI E HAAMAURUURU MAI

14. Eaha ta te rahiraa e rave ia horoa tatou?

¹⁴ Ia horoa anaˈe tatou na to tatou mau taeae e tuahine, pinepine ratou i te haamauruuru roa mai na roto i te poroi aore ra te tahi atu ravea. (Kol. 3:15) Ia na reira ratou, e rahi atu â to tatou oaoa.

15. Ia haamanaˈo tatou i te aha ia ore vetahi e haamauruuru mai?

¹⁵ Teie râ, te vai ra o te ore e haamauruuru mai no ta tatou i rave no ratou. Ua horoa paha tatou i to tatou taime, to tatou itoito aore ra ta tatou mau faufaa. E au ra hoi e aita ratou e tâuˈa mai ra. Ia tupu noa ˈtu te reira, eaha ta tatou e nehenehe e rave ia ore tatou ia inoino? E haamanaˈo ïa tatou i te irava tumu o teie tumu parau Ohipa 20:35. E oaoa iho â tatou i te horoa ˈtu, noa ˈtu e haamauruuruhia mai aore ra eita. E tamau noa ïa tatou i te horoa. E hiˈo mai tatou i te tahi mau ravea.

16. Ia haamanaˈo tatou i te aha ia horoa tatou?

¹⁶ A haamanaˈo e te pee ra oe i te hiˈoraa o Iehova. Ia haamauruuru te taata ia ˈna aore ra eita, e horoa noa Iehova i te mea maitai na ratou. (Mat. 5:43-48) Ua fafau o ˈna e fanaˈo tatou i te “haamaitairaa rahi” ia horoa tatou “ma te ore e tiai ia faahoˈihia mai.” Oia atoa ma te ore e tiai ia haamauruuruhia mai. (Luka 6:35) Na Iehova e faahoˈi mai i to tatou hamani maitai ia vetahi ê, no te mea ua horoa tatou ma te aau tae.​—Mas. 19:17; Kor. 2, 9:7.

17. No te horoa na vetahi ê mai ia Iehova, eaha te tauturu mai? (Luka 14:12-14)

¹⁷ No te horoa na vetahi ê mai ia Iehova, e tauturu mai te aratairaa i roto i te  Luka 14:12-14. (A taio.) Aita e fifi ia farii maitai aore ra ia hamani maitai tatou i te feia e nehenehe e na reira atoa mai. Teie nei râ, ia ite tatou e te tiai ra tatou i te tahi faahoˈiraa, eaha ta tatou e nehenehe e rave? E faaohipa anaˈe ïa i te aratairaa ta Iesu i horoa. E nehenehe tatou e farii maitai i te hoê taata, ua ite tatou eita ta ˈna e nehenehe e farii maitai atoa mai. E oaoa tatou no te mea te pee ra tatou i te hiˈoraa o Iehova. Ia tapea mai tatou i tera huru feruriraa, e oaoa noa ïa tatou, noa ˈtu eita tatou e haamauruuruhia.

18. Eiaha tatou e aha, e no te aha?

¹⁸ Eiaha tatou e manaˈo ino ia vetahi ê. (Kor. 1, 13:7) Ia ore vetahi e haamauruuru mai, e tumu ïa. Ua moˈehia paha ia ratou aore ra mea fifi no ratou ia faaite roa mai i to ratou mauruuru. No te haama atoa paha, te vai ra mea tauturu roa na mua ˈˈe, e teie nei o ratou te hinaaro ra i te tauturu. No to tatou râ here i to tatou mau taeae e tuahine, eita tatou e manaˈo ino ia ratou. E tamau râ tatou i te horoa ˈtu ma te oaoa.​—Eph. 4:2.

19-20. Eaha ˈtu â te tauturu tatou ia oaoa i te horoa? (A hiˈo atoa i te hohoˈa.)

¹⁹ A tiai noa. I papai na hoi te arii Solomona: “A taue i ta oe faraoa i nia i te pape, e ite faahou mai oe i te reira e rave rahi mahana i muri iho.” (Koh. 11:1) Te haapii mai ra teie irava e faaite vetahi i to ratou mauruuru i muri iho roa, oia hoi “e rave rahi mahana i muri iho.” Teie te tahi tupuraa.

²⁰ Mea maoro aˈenei, ua papai te vahine a te hoê tiaau haaati i te tahi rata i te hoê tuahine no bapetizo-noa-hia ˈtura, no te faaitoito ia ˈna ia tapea i to ˈna taiva ore. E vaˈu matahiti i muri aˈe roa to teie tuahine pahonoraa ˈtu, a na ô ai: “Ua hinaaro roa vau e faaite atu e ua tauturu mau â oe ia ˈu i tera rahiraa matahiti.”  Te na ô atoa ra o ˈna: “Mea mahanahana mau â ta oe rata. Ua putapû roa râ vau i te irava ta oe i papai. Mau roa ia ˈu tera irava.” a Faataa ˈtura te tuahine i te fifi ta ˈna i faaruru e na ô atura: “I te tahi taime, ua hinaaro roa vau e taora i te tauera, e faarue i te parau mau. Auaˈe te irava ta oe i papai mai, ua itoito mai au.” Te na ô faahou ra tuahine: “I te roaraa o na vaˈu matahiti, na ta oe rata e te irava ta oe i papai mai i faaitoito ia ˈu.” Papu, ua oaoa roa te vahine a te tiaau haaati i te pahonoraahia ta ˈna rata “e rave rahi mahana i muri iho.” E nehenehe tatou atoa e haamauruuruhia i muri aˈe roa no ta tatou i rave no vetahi ê.

21. No te aha tatou e faaoti ai e pee i te hiˈoraa o Iehova?

²¹ Mai tei faahitihia na, e ite tatou i te oaoa rahi ia horoa tatou. Ua poiete hoi Iehova ia tatou mai tera. Parau mau, e oaoa tatou ia horoahia mai. E rahi atu â râ to tatou oaoa mai te peu na tatou e horoa ˈtu, a tauturu ai i to tatou mau taeae e tuahine. Mea oaoa atoa ia haamauruuru mai ratou. Teie râ, ia haamauruuruhia mai aore ra eita, e nehenehe tatou e oaoa no te mea e ohipa maitai ta tatou i rave. Noa ˈtu eaha ta oe e horoa, eiaha e haamoˈe, “e nehenehe ta Iehova e horoa hau aˈe na oe.” (Par. 2, 25:9) E hau aˈe iho â ta ˈna e horoa na oe, i ta oe e nehenehe e horoa na vetahi ê. Na ˈna e faahoˈi mai i ta oe, e tera te haamaitairaa rahi roa ˈˈe. No reira, e faaoti papu anaˈe i te pee i te hiˈoraa o Iehova o te horoa noa mai.