1-2. (1)Eaha tei tupu i Iudea i to Paulo papairaa i te rata i te mau Kerisetiano Hebera? (2) No te aha teie rata i tauturu ai ia ratou?

 I MURI aˈe i to Iesu poheraa i te matahiti 33, ua faaruru te mau Kerisetiano Hebera e ora ra i Ierusalema e Iudea e rave rahi fifi. I muri iti noa ˈˈe te haamauraahia te amuiraa, ua hamani-ino-rahi-hia ratou. (Ohi. 8:1) E 20 matahiti i muri aˈe, ua faaruru ratou i te fifi no te oˈe rahi. (Ohi. 11:27-30) Tera râ, i te area matahiti 61, ua topa rii te hau. I reira ïa to te aposetolo Paulo papairaa i te hoê rata no te faaitoito ia ratou.

² Ua tae mai tera rata i te taime tano, no te mea aita te mau Kerisetiano Hebera i fanaˈo maoro i te hau. Ua papai Paulo i te mau aˈoraa no te tauturu ia ratou ia faaoromai tamau i te ati e fatata i te tupu, oia hoi te haamouraa o Ierusalema ta Iesu i tohu. (Luka 21:20) Papu, aita Paulo e te mau Kerisetiano i Iudea i ite afea te reira e tupu ai. Ua nehenehe râ ratou e faaineine ma te haapuai i to ratou faaroo e faaoromai tamau.​—Heb. 10:25; 12:1, 2.

3. No te aha mea faufaa te buka Hebera no tatou?

³ Fatata atoa tatou i te faaruru i te ati rahi aˈe i ta te mau Kerisetiano Hebera i faaruru. (Mat. 24:21; Apo. 16:14, 16) E hiˈopoa mai ïa tatou i te tahi mau aˈoraa ta  Iehova i horoa ia ratou o te tauturu atoa ia tatou.

‘A HAERE RU I MUA I TE PAARI PAE VARUA’

4. Eaha te fifi ta te mau Kerisetiano ati Iuda i faaruru? (A hiˈo atoa i te hohoˈa.)

⁴ E tauiraa rahi tei titauhia i te ati Iuda tei riro mai ei Kerisetiano. E ere mea ohie no ratou. E rave rahi hoi matahiti te maoro o ratou te nunaa maitihia e Iehova, o Ierusalema te oire pu o te Faatereraa arii a te Atua, e to reira atoa te hiero no te haamori ia ˈna. Pauroa te ati Iuda tei pee i te Ture a Mose, e te mau faatureraa horoahia mai e to ratou mau aratai faaroo. No nia anei te maa, te peritomeraa e to ratou huru i nia i te feia e ere i te ati Iuda. I muri aˈe râ i te poheraa o Iesu, aita Iehova i farii faahou i te mau tusia i pûpûhia na i te hiero. E ere ïa mea ohie no te mau Kerisetiano ati Iuda ia taui i ta ratou huru haamoriraa. I matau noa na hoi ratou i te pee i te Ture a Mose. (Heb. 10:1, 4, 10) E ere atoa mea ohie no te mau Kerisetiano paari i te pae varua, mai ia Petero. (Ohi. 10:9-14; Gal. 2:11-14) No tera mau tauiraa, ua hamani ino te mau aratai faaroo i taua mau Kerisetiano ra.

5. Ia ara te mau Kerisetiano i te aha?

⁵ Ua faaruru te mau Kerisetiano Hebera i te patoiraa no ǒ mai e piti pǔpǔ taata. Oia hoi te mau aratai faaroo tei manaˈo e ua taiva ratou. E vetahi o te amuiraa tei mârô ia pee noa i te Ture a Mose, peneiaˈe ia ore ratou ia hamani-ino-hia. (Gal. 6:12) Eaha râ tei tauturu i te mau Kerisetiano taiva ore ia tapea maite i te parau mau?

6. Eaha ta Paulo i faaitoito i te mau Kerisetiano ia rave? (Hebera 5:14–6:1)

⁶ I roto i ta ˈna rata i te mau Kerisetiano Hebera, ua faaitoito Paulo i to ˈna mau taeae e tuahine ia hiˈopoa e ia feruriruri i te Parau a te Atua. (A taio i te  Hebera 5:14–6:1.) Ma te faahiti i te mau Papai Hebera, ua faataa oia ia ratou no te aha te haamoriraa a te mau Kerisetiano ia Iehova i hau ê ai i ta te ati Iuda. a Ua faaitoito Paulo ia ratou ia haapii e ia taa maitai ia ratou te parau mau i roto i te mau Papai. E taa ïa ia ratou eaha te mau haapiiraa hape, a haapae atu ai i te reira.

7. Eaha te fifi ta tatou e faaruru nei i teie mahana?

⁷ I teie mahana, ua atutu te mau parau aore ra manaˈo aita e tuati ra i te mau ture aveia parau-tia a Iehova. Te faahapa nei te feia patoi i ta tatou mau tiaturiraa Bibilia no nia i te mea maitai e te mea ino. No ratou, mea etaeta e mea ino roa tatou. Te atea ê noa ˈtu ra te haerea e te huru feruriraa o to teie nei ao i to Iehova. (Mas. 17:15) No reira, mea faufaa roa ia ite e ia haapae tatou i te mau manaˈo tano ore. Eiaha e vaiiho i te feia patoi ia haaparuparu mai e ia tapea ia tatou ia tavini ia Iehova.​—Heb. 13:9.

8. Eaha te tauturu mai ia haere ru i mua i te paari i te pae varua?

⁸ E pee anaˈe ïa i te aˈoraa ta Paulo i horoa i te mau Kerisetiano Hebera, ia haere ru i mua i te paari i te pae varua. Oia hoi ia hiˈopoa i te Bibilia, a ite maitai atu ai o vai Iehova e eaha to ˈna manaˈo. E tamau tatou i te na reira i muri mai atoa i to tatou pûpûraa ia tatou e bapetizoraa. Noa ˈtu mea maoro tatou i roto i te parau mau aore ra eita, o tatou pauroa te titauhia ia tamau i te taio e i te haapii i te Bibilia. (Sal. 1:2) Ia na reira tatou, e puaihia to tatou faaroo, te hoê huru maitai ta Paulo i faaitoito i te mau Kerisetiano Hebera ia faatupu.​—Heb. 11:1, 6.

“E FAAROO TO TATOU A ORA ˈTU AI”

9. No te aha i titauhia ˈi te faaroo puai i te mau Kerisetiano Hebera?

⁹ Ua titauhia te faaroo puai i te mau Kerisetiano Hebera no te ora ˈtu i te ati e fatata mai ra i Iudea. (Heb. 10:37-39) I faaara na Iesu i ta ˈna mau pǐpǐ e ia ite ratou ia Ierusalema ia haaatihia e te nuu, e titauhia ia horo ratou i te mau mouˈa. Tera aˈoraa, no te mau Kerisetiano atoa ïa e ora ra i tera oire e i te mataeinaa. (Luka 21:20-24) Ia aro mai te hoê nuu, e horo hoi to te mataeinaa i te oire i reira ratou e paruruhia ˈi. Ua titauhia ïa te faaroo puai no te pee i ta Iesu aˈoraa e horo i te mau mouˈa.

10. Eaha ta te faaroo puai e turai i te mau Kerisetiano ia rave? (Hebera 13:17)

¹⁰ Ua titau-atoa-hia i te mau Kerisetiano Hebera ia tiaturi i te feia ta Iesu e faaohipa ra no te aratai i te amuiraa. Na ratou hoi e horoa i te tahi mau faaueraa no te tauturu i te amuiraa ia pee i te aratairaa a Iesu i te taime tano e ma te naho. (A taio i te Hebera 13:17.) Ua parau Paulo i to ˈna mau taeae e tuahine ia “faaroo i te mau aratai.” Aita o ˈna i parau e ia na reira ratou no te mea e faaheporaa, no te mea râ te tiaturi ra ratou i taua mau aratai ra. No reira, mea faufaa roa ia tiaturi te mau Kerisetiano Hebera i te mau aratai hou te ati e tae mai ai. Ua matau anaˈe hoi ratou i te  na reira i te taime hau, mea ohie aˈe ïa ia na reira i te taime fifi.

11. No te aha e titauhia ˈi te faaroo puai i teie mahana?

¹¹ Mai te mau Kerisetiano Hebera, e titauhia ia tatou te faaroo. Te ora ra tatou i te hoê anotau e rave rahi o te patoi ra aore ra o te haafaufaa ore ra i te faaararaa a te Bibilia no nia i te hopea e fatata mai ra. (Pet. 2, 3:3, 4) Noa ˈtu te faataa ra te Bibilia i te tahi tuhaa no nia i te ati rahi e fatata mai ra, e rave rahi râ ohipa aita tatou i ite. No reira e titauhia ˈi te faaroo puai e mou iho â teie nei ao i te taime ta Iehova i faataa e na ˈna e paruru ia tatou.​—Hab. 2:3.

12. Eaha te tauturu mai ia ora ˈtu tatou i te ati rahi?

¹² Ia haapuai atoa tatou i to tatou faaroo i te pǔpǔ taata ta Iehova e faaohipa nei no te aratai ia tatou, “te tavini haapao maitai e te paari.” (Mat. 24:45) Ia tupu te ati rahi, e fanaˈo tatou i te mau faaueraa taa maitai o te faaora ia tatou. Mai ta te mau Kerisetiano Hebera i fanaˈo a haaati ai te nuu Roma ia Ierusalema. No reira, mea faufaa roa ia tiaturi e ia auraro tatou i taua mau aratai ra i roto i te faanahonahoraa a Iehova. Mai te peu eita tatou e na reira i teie nei, mea fifi roa ˈtu â ïa ia tupu te ati rahi.

13. No te aha mea faufaa te aˈoraa o te Hebera 13:5?

¹³ A tiai ai i te tapao no te horo ê, ua titauhia i te mau Kerisetiano Hebera ia ara i te “nounou moni. ” (A taio i te Hebera 13:5.) I faaruru na hoi vetahi o ratou i te oˈe e te veve. (Heb. 10:32-34) Ua ineine paha ratou na mua ˈˈe i te faaruru i te reira no te parau apî oaoa. Ua manaˈo râ paha vetahi e paruru te moni ia ratou. Tera râ, aita te moni i paruru ia ratou i te haamouraahia o Ierusalema. (Iak. 5:3) Te taata o tei nounou i ta ˈna mau taoˈa, e ere ïa mea ohie no ˈna ia horo ê a faarue atu ai i to ˈna oraraa e ta ˈna mau faufaa.

14. E nafea te faaroo puai e tauturu mai ai ia rave i te mau faaotiraa no nia i te mau taoˈa materia?

¹⁴ E titauhia ia tatou te faaroo puai a piri mai ai te hopea o teie nei ao. Eita ïa tatou e nounou i te taoˈa materia. I te roaraa o te ati rahi, mea faufaa ore te moni. “E taora [hoi te taata] i ta ratou ario na te mau aroâ.” E taa hoi ia ratou “eita ta ratou ario, eita atoa ta ratou auro e nehenehe e faaora ia ratou i te mahana o to Iehova riri rahi.” (Ezk. 7:19) Aita ïa e faufaa ia haaputu i te moni. E rave râ tatou i te mau faaotiraa o te tauturu mai ia aupuru ia tatou e to tatou utuafare, a tavini noa ˈi ia Iehova. Te auraa, eiaha e tarahu faufaa ore noa aore ra e haamâuˈa i to tatou taime i te atuaturaa i ta tatou mau faufaa. E ara atoa tatou eiaha e haapeapea rahi roa no ta tatou mau faufaa. (Mat. 6:19, 24) E tamatahia to tatou faaroo no nia i te mau taoˈa materia e te tahi atu mau ohipa, a fatata mai ai te hopea o teie nei ao.

“MEA TITAUHIA HOI IA FAAOROMAI TAMAU”

15. No te aha i titauhia ia faaoromai tamau te mau Kerisetiano Hebera?

¹⁵ Ua tamatahia te faaroo o te mau Kerisetiano Hebera a ino roa ˈi te oraraa i Iudea. (Heb. 10:36) Noa ˈtu ua faaruru  vetahi i te hamani-ino-raa uˈana, e rave rahi o ratou aita â ïa. No reira Paulo i faaara ˈi ia ineine ratou i te vai taiva ore e tae noa ˈtu i te pohe, mai ia Iesu. (Heb. 12:4) Tera râ, no te mea ua riro mai e rave rahi ei Kerisetiano, ua uˈana roa ˈtu â te riri e te ino o te ati Iuda. Tau matahiti hou oia a papai ai i ta ˈna rata, ua tupu te faahuehueraa a poro ai Paulo i Ierusalema. Hau atu i te 40 ati Iuda tei horeo “eita ratou e tamaa e eita atoa e inu e ia haapohe noa ˈtu ratou ia Paulo.” (Ohi. 22:22; 23:12-14) No reira, noa ˈtu teie mau tupuraa, ua titauhia ia tamau taua mau Kerisetiano ra i te haamori ia Iehova, i te poro i te parau apî oaoa e i te haapuai i to ratou faaroo.

16. E nafea ta Paulo rata i te mau Kerisetiano Hebera e faaite ai i te faufaaraa ia faaoromai tamau? (Hebera 12:7)

¹⁶ Eaha tei tauturu i te mau Kerisetiano Hebera ia faaoromai tamau i te patoiraa? Ua hinaaro Paulo ia ite ratou i te faufaaraa ia faaoromai tamau. Ua faataa oia e ia tamatahia to ratou faaroo, e nehenehe Iehova e faaohipa i te reira ei haapiiraa ia ratou. (A taio i te Hebera 12:7.) E tauturu teie haapiiraa, aore ra faaineineraa, ia faatupu i te mau huru maitatai faufaa mau. Ma te tiatonu i te reira, mea ohie aˈe ïa no te mau Kerisetiano Hebera ia faaoromai tamau.​—Heb. 12:11.

17. Eaha ta Paulo i haapii mai no nia i te faarururaa i te hamani-ino-raa?

¹⁷ Ua aˈo Paulo i te mau Kerisetiano Hebera ia faaoromai tamau ma te itoito rahi i te mau tamataraa. Ua tano iho â e na ˈna e horoa i teie aˈoraa. I hamani ino na hoi o ˈna i te mau Kerisetiano. Ua ite ïa o ˈna eaha ta ratou e faaruru ra. I te mea ua faaruru atoa oia i te patoiraa i to ˈna riroraa mai ei Kerisetiano, ua ite maitai ïa o ˈna e nafea ia faaoromai tamau.  (Kor. 2, 11:23-25) No reira oia i haamanaˈo ai i taua mau Kerisetiano ra ia tiaturi ia Iehova, eiaha râ to ratou iho puai. Ua parau Paulo: “O Iehova to ˈu tauturu. E ore au e mǎtaˈu.”​—Heb. 13:6.

18. Eaha ta tatou e faaruru i mua nei, e eaha te rave i teie nei?

¹⁸ Te faaruru nei vetahi o to tatou mau taeae i te hamani-ino-raa. E nehenehe tatou e pure no ratou aore ra e horoa ˈtu i ta ratou e hinaaro mau ra. (Heb. 10:33) Tera râ, te parau maitai ra te Bibilia: “Te feia atoa e hinaaro e haamori i te Atua anaˈe ma te hoê e te Mesia ra o Iesu, e hamani-ino-atoa-hia ïa.” (Tim. 2, 3:12) No reira, ia ineine tatou paatoa no te tupu i mua nei. E tamau anaˈe i te tiaturi ia Iehova, e tauturu iho â o ˈna ia tatou ia faaoromai tamau i te mau tamataraa. Na ˈna e tamahanahana i ta ˈna mau tavini taiva ore atoa.​—Tes. 2, 1:7, 8.

19. Eaha ta tatou e nehenehe e rave ia ineine tatou no te ati rahi? (A hiˈo atoa i te hohoˈa.)

¹⁹ Ua tauturu mau â te rata a Paulo i te mau Kerisetiano Hebera ia ineine no te ati rahi ta ratou i faaruru. Ua aˈo Paulo ia ratou ia hiˈopoa e ia taa maitai i te Parau a te Atua. E taa ïa ia ratou eaha te mau haapiiraa o te haaparuparu i te faaroo, a haapae atu ai i te reira. Ua faaitoito o ˈna ia ratou ia haapuai i to ratou faaroo, no te pee oioi i te aratairaa a Iesu e a te mau aratai i roto i te amuiraa. E ua tauturu o ˈna ia ratou ia faaoromai tamau i te mau tamataraa, ei faaineineraa na Iehova ia ratou. No reira, e faaohipa anaˈe i teie mau aˈoraa no ǒ mai ia Iehova ra. E tauturu mai hoi te reira ia faaoromai tamau tae roa ˈtu i te hopea.​—Heb. 3:14.