UA TOHUHIA i roto i te Bibilia, “e mauruuru ore” te rahiraa o te taata i to tatou nei tau. (Tim. 2, 3:2) Peneiaˈe, ua farerei aˈenei outou i te tahi mau taata o te titau na vetahi ê e horoa ˈtu i te mau mea atoa. E feia teie o te manaˈo ra eita e titauhia ia haamauruuru ratou ia vetahi ê! Mea au anei na outou e faaea i pihai iho i te taata mai tera te huru? E outou, e taata anei outou o te faaite i te mauruuru? E titauhia ia tatou paatoa ia hiˈopoa i to tatou huru i roto i tera tuhaa.

Te faaitoito ra te Bibilia i te mau tavini a Iehova ia “mauruuru” e ia “haamauruuru” no te mau mea atoa. (Kol. 3:15; Tes. 1, 5:18) E faufaahia tatou ia faaite i te mauruuru. E hiˈo anaˈe eaha te tahi o te mau maitai e noaa i te feia aau mauruuru.

Ia faaite tatou i te mauruuru, e tauturu mai te reira ia faatupu i te manaˈo tano no nia ia tatou. E oaoa te taata o te haamauruuru, oia atoa râ te taata i haamauruuruhia. No te aha? Ia faaineine te tahi taata i te hoê mea na outou, e tapao faaite ïa mea faufaa outou no ˈna. Ia ite outou i te reira, e oaoa outou. A feruri na ia Ruta a hamani maitai ai Boaza ia ˈna. Eita e ore ua oaoa roa Ruta mea faufaa o ˈna no te tahi taata!—Ruta 2:10-13.

Mea faufaa roa ˈtu â ia faaite i te mauruuru i te Atua. Ua manaˈo aˈenei paha outou maa taime i te mau maitai i te pae varua e i te pae tino ta ˈna i horoa e e tamau â i te horoa ˈtu. (Deut. 8:17, 18; Ohi. 14:17) Ia feruri maoro atu â râ outou i te mau haamaitairaa no ǒ mai i te Atua, e ite mau outou i to ˈna maitai rahi! Ma te feruri maite i te aau horoa noa o Iehova, e rahi atu â to outou mauruuru e e papu atu â ia outou mea here na ˈna ia outou.—Ioa. 1, 4:9.

Eiaha râ e manaˈo e e feruri noa i te mau haamaitairaa a te Atua, a haamauruuru roa ˈtu râ ia ˈna no to ˈna maitai rahi. (Sal. 100:4, 5) Te parauhia ra e oaoa te taata ia haamauruuru ratou ia vetahi ê.

Te tahi atu maitai, e tauturu te mauruuru ia tatou ia faatupu i te auhoaraa piri e o vetahi ê. E hinaaro tatou paatoa ia auhia tatou e te taata. Ia haamauruuru te tahi taata i tei hamani maitai atu, e piri te tahi i te tahi. (Roma 16:3, 4) Hau atu â, mea tauturu aˈe te feia aau mauruuru i to ratou taata tupu. E mauruuru hoi ratou ia hamani maitai atu te tahi e e turaihia ratou ia na reira atoa ˈtu. E oaoa te noaa mai ia tauturu tatou ia vetahi ê! Te tuati ra ïa te reira i ta Iesu i parau: “E rahi aˈe te oaoa ia horoa ˈtu i te horoahia mai.”—Ohi. 20:35.

Ua rave te tahi haapiiraa teitei no Kalifonia i te hoê maimiraa no nia i te mauruuru. Te faahiti ra hoê o te mau tia o Robert Emmons te iˈoa i teie manaˈo faufaa: “No te faatupu i te mauruuru, e titauhia ia farii e hinaaro tatou paatoa te tahi i te tahi. I te tahi taime, na tatou e horoa, i te tahi atu taime, na vera ma e horoa mai.” E hinaaro tatou i te tauturu a vetahi ê no te ora e no te oaoa i roto i te oraraa. Ei hiˈoraa, e horoa mai paha te tahi taata i te maa aore ra e utuutu paha ia tatou. (Kor. 1, 12:21) E aau mauruuru anaˈe to te tahi taata, e haamauruuru oia ia vetahi ê no te mau mea atoa ta ratou e rave no ˈna. Ua matau anei outou i te haamauruuru ia hamani maitai atu vetahi ê?

Te tahi atu maitai, e tauturu te hoê aau mauruuru ia tatou ia tapea noa mai i te mea maitai. E au to tatou feruriraa i te hoê titia. E nehenehe to tatou feruriraa e tapea mai i te vahi maitai, area te vahi ino, e faarue atu ïa. E noaa ia tatou te hoê feruriraa maitai aˈe e eita atoa tatou e tâuˈa rahi roa i te fifi. Ma te faatupu i te mauruuru, e rahi atu â to outou feruriraa i te maitai mai e e rahi atu â to outou mauruuru! E haapao atoa ïa outou i teie aˈoraa a te aposetolo Paulo: “A oaoa noa i roto i te Fatu.”—Phil. 4:4.

E aau mauruuru anaˈe to outou, eita outou e manaˈo ino. Eita hoi e nehenehe e faaite i te mauruuru e i te hoê â taime e pohehae, e oto aore ra e riri. E tauturu atoa te mauruuru ia ore e titau i te taoˈa rahi. Ia mauruuru noa hoi outou i te vai ra ia outou, eita outou e titau atu â.—Phil. 4:12.

I mua i te ati, e tauturu te mauruuru ia tatou ia tapea i te hoê feruriraa maitai. Ei hiˈoraa, ia ere outou i ta outou ohipa, e huti mai outou i te vahi maitai o tera tupuraa ma te manaˈo, e taime ïa tera no te rave i te tahi tauiraa i roto i te oraraa. No te feia aau mauruuru, e ere te hoê tauiraa i te fifi, e maitai râ.

Te hinaaro ra Satani ia inoino e ia mauruuru ore tatou i teie mau mahana hopea! No te aha? E hepohepo e e toaruaru ïa tatou a taupupu atu ai te ohipa pororaa i te parau apî oaoa! Eaha râ te tupu ia faaite tatou i te aau mauruuru? E faatupu ïa tatou i te tahi atu mau huru maitatai ta Iehova e au, mai te oaoa e te tiaturi i ta ˈna mau parau fafau.—Gal. 5:22, 23.

Ei mero o te nunaa o Iehova, ua ite outou ua tano iho â tei parauhia i roto i teie tumu parau. Ua taa atoa râ ia outou, eita te aau mauruuru e tupu noa mai mai tera. Eiaha râ e haaparuparu, e nehenehe outou e faatupu e e faaite noa i te mauruuru. E nafea? A faaherehere i te taime i te mau mahana atoa no te feruri i te mau mea e mauruuru ai outou. Rahi atu â outou i te na reira, ohie noa ˈtu â outou i te faaite i te mauruuru. E oaoa aˈe outou i te feia e haapeapea ra no te mau mea o te oraraa nei. A tapea noa mai i te mau maitai ta te Atua e ta vetahi ê e rave no outou. No te aha e ore ai e papai i roto i te hoê buka e piti aˈe ohipa ta outou i mauruuru i tera e tera mahana?

Ua parau te tahi feia maimi “ia tamau te hoê taata i te faaite i te mauruuru, e ohipa maitai atu â te mau taoˈa tahi uira o to ˈna roro.” Mea oaoa aˈe te taata aau mauruuru. No reira, a feruri maite i te mau maitai ta outou e fanaˈo ra, a haamanaˈo noa i te mau taime oaoa o to outou oraraa e a faaite noa i te mauruuru! Eiaha e titau na vetahi ê noa e horoa mai! “A haamauruuru i te Atua no te mau mea atoa.” “E haamaitai ia Iehova; e maitai hoi to ˈna.”—Par. 1, 16:34; Tes. 1, 5:18.