1-2. Ia au i te tupuraa o Angelito, eaha te titauhia i te taata tataitahi ia rave?

 E ITE no Iehova anei to outou mau metua? Mai te peu e e, a haamanaˈo e ere te auraa e hoa iho â ïa outou no Iehova! E tavini anei to outou metua na Iehova aore ra aita, e titauhia i te taata tataitahi ia faatupu i to ˈna iho auhoaraa e o Iehova.

² Teie te hiˈoraa o Angelito e ora ra i Asia. Ua paari oia i roto i te hoê utuafare e tavini ra ia Iehova. I to ˈna râ apîraa, aita to Angelito e auhoaraa e te Atua. Te faataa ra oia: “Ua tavini noa vau ia Iehova no te mea te na reira ra to ˈu utuafare.” Ua faaoti râ Angelito i te faaherehere i te taime no te taio e no te feruri maite i te Parau a te Atua. Haamata aˈera oia i te pure pinepine atu â ia Iehova. Eaha tei tupu i muri mai? Te na ô ra Angelito: “Taa ˈtura ia ˈu no te faafatata ˈtu i to [tatou] Metua ra o Iehova, ua titauhia na ˈu iho e tutava i te ite o vai o ˈna!” Mea faufaa roa ïa ia pahono i to muri nei mau uiraa: No te aha mea taa ê ia ite i te tahi mau mea no nia ia Iehova e ia ite roa o vai o ˈna? E nafea ia ite mau o vai Iehova?

3. No te aha mea taa ê ia ite i te tahi mau mea no nia ia Iehova e ia ite roa o vai o ˈna?

³ E ite paha te hoê taata i te tahi mau mea no nia i te Atua mai to ˈna iˈoa anei aore ra ta ˈna i parau e ta ˈna i  rave. No te ite roa râ o vai Iehova, e titauhia ia haapii i te parau mau no nia ia ˈna e to ˈna mau huru maitatai. I reira noa tatou e haamata ˈi i te taa eaha tei turai ia ˈna ia parau aore ra ia rave i te tahi mea. E tauturu mai te reira ia taa ua tuati anei to tatou manaˈo i to ˈna e ua mauruuru anei o ˈna i ta tatou mau faaotiraa aore ra ohipa. Ua taa anaˈe ia tatou i ta Iehova e titau mai ra ia rave, e titauhia ia haa ia au i ta tatou i ite.

4. E nafea tatou e faufaahia ˈi i te mau hiˈoraa i roto i te Bibilia?

⁴ E faaooo mai vetahi ia faaoti tatou i te tavini ia Iehova. Peneiaˈe, e patoi uˈana ˈtu â vetahi ia haamata tatou i te amuimui i to ˈna nunaa. Ia tiaturi râ tatou i te Atua, eita o ˈna e faarue ia tatou e e tupu mai te hoê auhoaraa i roto ia tatou e o Iehova. E nehenehe iho â anei e ite o vai Iehova? E, mea rahi te taata mai ia tatou te huru o tei riro ei hoa mau no te Atua. O Mose e te arii Davida te tahi o ratou. A hiˈopoa ˈi i to raua aamu, e pahono mai tatou i na uiraa e piti: A tahi, mea nafea raua i te iteraa o vai Iehova? A piti, eaha te haapiiraa e huti mai i to raua hiˈoraa?

5. Eaha ta Mose i faaoti i te rave?

⁵ Ua faaoti Mose i te tavini i te Atua. I te 40raa o to ˈna matahiti, ua vaiiho Mose i te tiaraa “tamaiti a te tamahine a Pharao” no te tia i te pae o Iseraela, te nunaa o te Atua. (Heb. 11:24) Ma te turu i te nunaa Iseraela o tei riro na ei tîtî i Aiphiti, ua ite Mose e riri roa Pharao, te faatere rahi ta te taata i faariro ei atua. E faaroo puai mau râ to Mose! Ua tiaturi oia i te Atua e riro atura ei hoa piri no Iehova.—Mas. 3:5.

6. Eaha te haapiiraa e huti mai i te hiˈoraa o Mose?

⁶ Eaha ta te hiˈoraa o Mose e haapii mai ra? Mai ia Mose, e titauhia ia tatou paatoa ia rave i te hoê faaotiraa faufaa: E tavini anei tatou i te Atua a apiti atu ai i to ˈna nunaa aore ra aita? E titauhia paha ia rave i te haapaeraa e ia faaruru i te patoiraa no ǒ mai i te feia i ore i ite o vai Iehova. Ia tiaturi râ tatou i to tatou Metua i te raˈi, eita o ˈna e faarue ia tatou!

7-8. Eaha ta Mose i tamau i te haapii?

⁷ Ua imi maite noa Mose i te mau huru maitatai o Iehova e ua rave i to ˈna hinaaro. I te aniraa ˈtu te Atua ia aratai i to ˈna nunaa i rapae mai ia Aiphiti, ua taiâ Mose e hopea ore oia i te parau ia Iehova eita e maraa ia ˈna. Ua aroha râ Iehova ia Mose e tauturu atura ia ˈna. (Exo. 4:10-16) Eaha tei tupu i muri aˈe? Ua tia Mose i mua ia Pharao no te faaite i ta te Atua poroi faautuaraa. I muri mai, ua ite roa Mose i te puai faahiahia ta Iehova i faaohipa no te faaora i te mau Iseraela, e i te hoê â taime, no te haamou ia Pharao e ta ˈna nuu i te miti Uteute!—Exo. 14:26-31; Sal. 136:15.

⁸ I muri aˈe i to ratou tiamâraa mai i Aiphiti, pinepine te mau Iseraela i te amuamu. Ua ite Mose i te faaoromai rahi o Iehova i nia i te nunaa ta ˈna i faaora mai i te faatîtîraa! (Sal. 78:40-43) A taparu ai ia Iehova ia taui i to ˈNa manaˈo, ua ite atoa Mose i te haehaa rahi o Iehova.—Exo. 32:9-14.

9. Ia au i te Hebera 11:27, mai te aha to Mose auhoaraa e o Iehova?

⁹ I te roaraa o te mau matahiti i aratai ai Mose ia Iseraela, ua piri atu â o ˈna ia Iehova mai te huru ra te ite ra oia i to tatou Metua i te raˈi! (A taio i te Hebera  11:27.) Te faatia ra te Bibilia: “Ua paraparau noa mai Iehova ia Mose, mai te taata e parau noa i mua i te mata o to ˈna ra taua.”—Exo. 33:11.

10. No te riro ei hoa piri no Iehova, eaha te titauhia ia rave?

¹⁰ Eaha ˈtu â te haapii mai i te hiˈoraa o Mose? No te riro ei hoa piri no Iehova, eita e navai ia ite i to ˈna mau huru maitatai, e titau-atoa-hia râ ia rave i to ˈna hinaaro! I teie mahana, te hinaaro ra Iehova ia “ora mai te mau huru taata atoa e ia noaa ia ratou te ite papu i te parau mau.” (Tim. 1, 2:3, 4) E haapii anaˈe ïa i te taata o vai Iehova!

11. A haapii ai i te taata o vai Iehova, e nafea tatou e piri roa ˈtu ai ia Iehova?

¹¹ E piri atu â tatou ia Iehova a haapii ai i te taata o vai o ˈna. E ite roa tatou i to Iehova aroha a aratai ai oia ia tatou i te feia aau tae. (Ioa. 6:44; Ohi. 13:48) E ite atoa tatou i to ˈna mana rahi ia tauturu ta ˈna Parau i te hoê piahi ia faarue i ta ˈna mau peu iino e ia ahu mai i te huru taata apî. (Kol. 3:9, 10) E ite atoa tatou i te faaoromai o te Atua a tamau ai oia i te tono ia tatou no te faaite i te parau mau o te faaora i te taata!—Roma 10:13-15.

12. Ia au i te Exodo 33:13, eaha ta Mose i ani ia Iehova e no te aha?

¹² Ua haafaufaa noa Mose i to ˈna auhoaraa e o Iehova. A faatupu ai e rave rahi ohipa faahiahia mau, mea rahi ta Mose i haapii no nia i te Atua. Noa ˈtu râ, ua taparu Mose ia ite atu â o ˈna no nia ia Iehova! (A taio i te Exodo 33:13.) I te taime a ani ai oia i te reira, ua hau atu i te 80 matahiti to Mose! Ua taa râ ia ˈna e titau-noa-hia ia ite atu â no nia i to tatou Metua i te raˈi!

13. Eaha te tahi ravea no te faaite te haafaufaa ra tatou i to tatou auhoaraa e o Iehova?

¹³ E nafea ˈtu â tatou ia pee i to Mose hiˈoraa? Noa ˈtu ehia matahiti tatou i te taviniraa i te Atua, e titauhia ia tamau i te haafaufaa i to tatou auhoaraa e o Iehova. Te tahi ravea no te na reira, o te tamauraa ïa i te pure ia ˈna.

14. No te aha mea faufaa te pure ia piri atu â tatou ia Iehova?

¹⁴ Mea faufaa roa te aparauraa i rotopu i te hoa. No reira, a tamau i te faafatata i te Atua na roto i te pure, eiaha e taiâ i te faaite ia ˈna i to outou mau manaˈo hohonu. (Eph. 6:18) Te na ô ra Krista e ora ra i Turekia: “I te mau taime atoa e haamahora ˈi au i to ˈu aau na roto i te pure a ite atu ai i ta Iehova tauturu, e rahi roa mai to ˈu here e tiaturi ia Iehova! I to ˈu iteraa mea nafea Iehova i te pahonoraa i ta ˈu mau pure, ua faariro vau ia Iehova ei Hoa e ei Metua no ˈu!”

15. Eaha ta Iehova i parau no te arii Davida?

¹⁵ Ua fanauhia te arii Davida i roto i te hoê nunaa tei pûpû-aˈena-hia i te Atua. Aita râ Davida i tavini ia Iehova no te pee noa i to ˈna na metua. Ua rave râ o ˈna i ta ˈna iho tuhaa no te faatupu i te hoê auhoaraa piri e te Atua e ua here mau Iehova ia ˈna. Ua parau roa Iehova ua riro Davida ei taata “ta to [ˈna] aau e farii.” (Ohi. 13:22) Mea nafea Davida i te riroraa mai ei hoa piri roa no Iehova?

16. Eaha ta Davida i ite no nia ia Iehova na roto i te mau mea poietehia?

¹⁶ Ua ite Davida o vai Iehova na roto i te mau mea poietehia. I to ˈna apîraa, ua tiai Davida e rave rahi hora i te nǎnǎ mamoe a to ˈna metua tane. Peneiaˈe, mea na  reira oia i te haamataraa i te feruri maite i te mau mea ta Iehova i hamani. I te po, a nânâ ˈi to ˈna mata i nia, aita oia i ite noa i te mau fetia, i te mau huru maitatai atoa râ o te Atua poiete! Papai roa aˈera Davida: “Te parau hua nei te mau raˈi i te hanahana o te Atua! e te faaite nei te reva i te ohipa a tana rima!” (Sal. 19:1, 2) A feruri ai mea nafea Iehova i te hamaniraa i te taata, ua ite Davida i te paari rahi o Iehova! (Sal. 139:14) Ua feruri maite Davida i te mau mea poietehia e ua taa mea haihai roa oia ia faaauhia ia Iehova!—Sal. 139:6.

17. Eaha ta tatou e haapii a feruri maite ai i te mau mea poietehia?

¹⁷ E nafea ia pee i te hiˈoraa o Davida? A faaherehere i te taime no te feruri maite i te mau mea ta Iehova i poiete. E fenua nehenehe mau ta Iehova i hamani, eiaha ïa e haafaufaa ore i te reira, a faahiahia râ! I te mau mahana atoa, a feruri maite i te mau mea e haaati ra ia tatou mai te mau raau, tiare, animara e taata! I muri mai, a haroˈaroˈa eaha ta te reira e haapii mai ra no nia ia Iehova! A mairi noa ˈi tera e tera mahana, mea rahi ta tatou e ite no nia i to tatou Metua î i te here! (Roma 1:20) E rahi e e puai roa ˈtu â ïa to tatou here ia Iehova!

18. Eaha ta Davida i haapapu i roto i te Salamo 18?

¹⁸ Ua ite Davida na Iehova e tauturu ra ia ˈna. I te parururaa Davida i te nǎnǎ a to ˈna metua tane i te liona e te daba, ua parau Davida na Iehova i faaora ia ˈna i tera nau animara taehae. I te upootiaraa o ˈna i nia i te aito ra o Golia, ua papu ia Davida na Iehova i aratai ia ˈna i roto i tera aroraa. (Sam. 1, 17:37) I te oraraa mai oia i te rima o te arii pohehae ra o Saula, ua ite Davida na Iehova i faaora ia ˈna. (Sal. 18, parau omuaraa) Ahani e taata teoteo Davida, ua parau paha ïa oia maoti to ˈna puai i rave ai o ˈna i tera mau ohipa atoa! Ma te haehaa râ, ua faaite papu Davida na Iehova i tauturu ia ˈna i roto i to ˈna oraraa!—Sal. 138:6.

19. Eaha ta tatou e haapii mai na roto i te hiˈoraa o Davida?

¹⁹ Eaha te haapiiraa e huti mai i te hiˈoraa o Davida? Eita e navai noa ia taparu ia Iehova ia tauturu mai. E titau-atoa-hia ia imi maite i teihea taime e e nafea o ˈna ia tauturu ia tatou. Ma te haamanaˈo i to tatou mau otia, e ite papu tatou i te puai ta Iehova e horoa mai no te rave i te ore e maraa ia tatou. I te mau taime atoa e ite ai tatou i te rima o Iehova, e piri roa ˈtu â tatou ia ˈna. Tera mau ta te taeae Isaac no Fiti i ite i te roaraa o ta ˈna taviniraa ia Iehova. Te na ô ra oia: “Ia feruri au i to ˈu oraraa, te ite ra vau mea nafea Iehova i te tautururaa ia ˈu mai te taime a haamata ˈi au i te haapii i te Bibilia e tae roa mai i teie mahana. Ua riro mau Iehova ei Hoa piri no ˈu!”

20. Eaha te haapiiraa e huti mai i to Davida auhoaraa e o Iehova?

²⁰ Ua faaite Davida i te mau huru maitatai o Iehova. Ua hamani Iehova ia tatou ia nehenehe tatou e faaite i to ˈna mau huru maitatai. (Gen. 1:26) Rahi atu â tatou i te ite i to ˈna mau huru maitatai, rahi atu â tatou i te faaite i te reira. Ua piri roa to Davida auhoaraa e o Iehova i tia ˈi ia ˈna ia faaite i to ˈNa mau huru maitatai i nia ia vetahi ê. Ei hiˈoraa, ua aroha hamani maitai Davida ia vetahi ê mai ia Iehova. No reira te Atua i aroha hamani maitai atoa ˈi ia ˈna i to ˈna hararaa ma te faaturi e o Bate-seba e ma  te haapohe i ta ˈna tane. (Sam. 2, 11:1-4, 15) No to ˈna auhoaraa piri roa e o Iehova i riro ai Davida hoê o te mau arii Iseraela tei here-roa ˈˈe-hia. Faaohipa ˈtura Iehova ia ˈna no te riro ei hiˈoraa maitai no te tahi atu mau arii Iseraela.—Arii 1, 15:11; Arii 2, 14:1-3.

21. Ia au i te Ephesia 4:24 e te 5:1, eaha te tupu ia pee tatou i “te haerea o te Atua”?

²¹ Eaha ˈtu â ta te hiˈoraa o Davida e haapii mai ra? Mea titauhia ia pee i “te haerea o te Atua.” Eita noa ïa tatou e faaite i to ˈna mau huru maitatai, e piri roa ˈtu â râ tatou ia ˈna a haapapu atu ai e tamarii tatou na ˈna!—A taio i te Ephesia 4:24; 5:1.

22-23. Eaha te tupu ia faaohipa tatou i ta tatou i ite no nia ia Iehova?

²² Mai ta tatou i haapii mai, e ite tatou o vai Iehova na roto i te mau mea poietehia e na roto i ta ˈna Parau. Ua haapapai Iehova te aamu o ta ˈna mau tavini taiva ore i roto i te Bibilia ia pee tatou i to ratou hiˈoraa mai to Mose raua Davida. Ua rave Iehova i ta ˈna tuhaa. Teie nei, na tatou atura e rave i ta tatou. E faaohipa anaˈe i to tatou mata, tariˈa e aau no te ite atu â o vai Iehova!

²³ Eita roa tatou e faaea i te haapii i te huru o Iehova! (Koh. 3:11) No reira te uiraa faufaa, eaha ta tatou e rave no ta tatou i ite no nia ia ˈna? Ia faaohipa tatou i ta tatou i ite no nia ia Iehova a faaite atoa ˈi i to ˈna mau huru maitatai, e faafatata noa ˈtu â tatou ia ˈna a riro atu ai ei hoa piri roa no ˈna. (Iak. 4:8) Na roto i ta ˈna Parau, te haapapu mai ra Iehova eita roa o ˈna e faarue i te feia e imi maite ia ˈna!