1. Eaha to tatou huru a feruriruri ai i nia i te parau fafau o te ora mure ore?

 UA FAFAU Iehova e e fanaˈo te feia e auraro ra ia ˈna i “te ora mure ore.” (Roma 6:23) Ia feruriruri tatou i nia i te reira e puai atu â to tatou here ia Iehova. A feruri na, no to Iehova here rahi ia tatou, eita hoê aˈe mea te nehenehe e faataa ê ia tatou ia ˈna.

2. E nafea te tiaturiraa o te ora mure ore e tauturu ai ia tatou?

² E tauturu mai te tiaturiraa o te ora mure ore ia faaoromai tamau i to tatou mau fifi. Ei hiˈoraa, ia haamǎtaˈu to tatou mau enemi e haapohe ia tatou, eita tatou e faaea i te tavini ia Iehova. No te aha? No te mea ua ite tatou e ia pohe tatou ma te taiva ore, e faatia mai Iehova ia tatou mai te pohe mai a nehenehe atu ai e ora e a muri noa ˈtu. (Ioa. 5:28, 29; Kor. 1, 15:55-58; Heb. 2:15) No te aha tatou e papu ai e e nehenehe tatou e ora e a muri noa ˈtu? Teie te tahi mau tumu.

3. No te aha tatou e papu ai e e nehenehe Iehova e horoa mai i te ora mure ore? (Salamo 102:12, 24, 27)

³ I te mea e Atua mure ore Iehova e tei ia ˈna ra te ora, ua papu ïa ia tatou e nehenehe o ˈna e horoa mai i te ora mure ore. (Sal. 36:9) A tapao na i teie mau irava o te haapapu ra e i vai noa na Iehova e e vai noa o ˈna e a muri noa ˈtu. Te na ô ra te Salamo 90:2 no Iehova: “Mai tahito mai â e a muri noa ˈtu, o oe te Atua.” Tera atoa tei parauhia i roto i te Salamo 102. (A taio i te Salamo 102:12, 24, 27.) Ua papai te peropheta Habakuka no nia ia Iehova: “E ere anei oe mai tahito mai â, e Iehova? To ˈu Atua, Tei Moˈa, e ore oe e pohe.”​—Hab. 1:12.

4. E haapeapea anei tatou no te mea mea fifi no tatou ia tiaturi e Atua “mure ore” Iehova? A faataa.

 ⁴ Mea fifi anei no outou ia tiaturi e Atua “mure ore” Iehova? (Isa. 40:28) Mea fifi no vetahi ia farii i te reira. Ua parau Elihu no te Atua: “Eita ta tatou e nehenehe e taa i te rahiraa o to ˈna mau matahiti.” (Ioba 36:26) Tera râ, noa ˈtu mea fifi no tatou ia taa i te tahi mea, e ere te auraa e mea hape te reira. Ei hiˈoraa, noa ˈtu mea fifi no tatou ia taa e nafea te uira e haere ai, e ere te auraa e aita e uira. Hoê â huru no Iehova. Eita te taata e taa maitai e i vai noa na Iehova e e vai noa o ˈna e a muri noa ˈtu. E ere râ te auraa e mea hape tera parau. (Roma 11:33-36) I vai noa na te Atua hou te ao nui, te mahana e te mau fetia a poietehia ˈi. Ua papu ia tatou e o Iehova “tei hamani i te fenua i to ˈna puai.” (Ier. 51:15; Ohi. 17:24) Eaha te tahi atu tumu e papu ai ia tatou e nehenehe iho â tatou e ora e a muri noa ˈtu?

5. I te omuaraa, eaha ta Adamu raua Eva i nehenehe e fanaˈo?

⁵ I roto i ta ˈna opuaraa matamua, e pohe iho â te mau mea ora atoa ta Iehova i poiete i nia i te fenua. Area te taata, eita ïa. Ua poiete hoi Iehova i te taata ia nehenehe o ˈna e ora e a muri noa ˈtu. Tera râ, ua faaara Iehova ia Adamu ma te parau: “Area i to te tumu raau e ite ai i te maitai e te ino, eiaha roa oe e amu, i te mahana hoi e amu ai oe i te reira, e pohe mau â oe.” (Gen. 2:17) Ahani Adamu raua Eva i faaroo ia Iehova, eita ïa raua e pohe. Mea tano ia manaˈo e ia tae i te hoê taime, e vaiiho Iehova ia raua ia amu i te maa hotu o “te tumu raau o te ora.” E riro ïa te reira ei haapapuraa no Adamu raua Eva e e nehenehe raua e ora “e a muri noa ˈtu.” b​—Gen. 3:22.

6-7. (1) Eaha te haapapu ra e ua poietehia te taata ia ora oia e a muri noa ˈtu? (2) Eaha ta outou e hinaaro e rave a muri aˈe? (A hiˈo i te mau hohoˈa.)

⁶ Ua itehia mai i te mau aivanaa i te haapapuraa e nehenehe to tatou roro e haaputu e rave rahi haamaramaramaraa i te roaraa o to tatou oraraa. I 2010, ua faaite te vea Scientific American Mind e nehenehe te roro e haaputu hau atu toru mirioni hora hohoˈa tavirihia. Tera râ, e nehenehe to tatou roro e haaputu hau atu â haamaramaramaraa. Te haapapu ra te reira e ua hamani Iehova i te roro ia  nehenehe e haaputu hau atu â haamaramaramaraa, hau aˈe i ta tatou e nehenehe e haaputu i te roaraa o to tatou oraraa.​—Sal. 90:10.

⁷ Ua poiete atoa Iehova ia tatou e te hinaaro e ora e a muri noa ˈtu. Te parau ra te Bibilia e ua tuu te Atua i “te manaˈo e ora e a muri noa ˈtu” i roto i te aau o te mau taata. (Koh. 3:11) Tera hoê o te tumu i riro ai te pohe ei enemi no tatou. (Kor. 1, 15:26) Ia maˈihia tatou, e faaea anei tatou mai tera a tiai noa ˈi ia pohe tatou? Aita. E haere tatou i te taote e e rave tatou i te raau e horoahia mai. Papu, e rave tatou i te mau mea atoa ia ore tatou e pohe. E ia pohe tei herehia, mea apî anei aore ra mea paari, papu e oto iho â tatou. (Ioa. 11:32, 33) Te auraa, e hinaaro tatou e haapii e e ora e a muri noa ˈtu no te mea ua poiete Iehova ia tatou mai tera. Papu, e rave o ˈna i te mau faanahoraa atoa ia fanaˈo tatou i te ora mure ore. Tera râ, te vai ra te tahi atu tumu e nehenehe ai tatou e tiaturi i te reira. E hiˈopoa anaˈe eaha ta Iehova i rave i tahito ra e eaha ta ˈna e rave ra i teie mahana o te haapapu ra e aita ta ˈna opuaraa i taui.

8. Eaha ta te Isaia 55:11 e haapii mai ra no nia i ta Iehova opuaraa no tatou?

⁸ Noa ˈtu ua hara Adamu raua Eva e ua roohia to raua huaai i te pohe, aita Iehova i taui noa ˈˈe i ta ˈna opuaraa. (A taio i te Isaia 55:11.) Te hinaaro noa ra Iehova ia fanaˈo te feia taiva ore i te ora mure ore. Ua papu ia tatou i te reira a hiˈopoa ˈi i ta Iehova i parau e i rave no te faatupu i ta ˈna opuaraa.

9. Eaha ta te Atua i fafau? (Daniela 12:2, 13)

 ⁹ Ua fafau Iehova e faatia mai i te feia tei pohe a nehenehe atu ai ratou e fanaˈo i te ora mure ore. (Ohi. 24:15; Tito 1:1, 2) Ua papu ia Ioba e te hinaaro mau ra Iehova e faatia mai i te feia pohe. (Ioba 14:14, 15) Ua ite te peropheta Daniela e nehenehe te feia pohe e faatiahia mai no te ora e a muri noa ˈtu. (Sal. 37:29; a taio i te Daniela 12:2, 13.) Ua ite atoa te ati Iuda i te tau o Iesu e e horoa Iehova i “te ora mure ore” no ta ˈna mau tavini taiva ore. (Luka 10:25; 18:18) Ua faahiti Iesu i teie parau fafau e rave rahi taime, i te mea e ua faatiahia mai o ˈna mai te pohe mai na to ˈna Metua.​—Mat. 19:29; 22:31, 32; Luka 18:30; Ioa. 11:25.

10. Eaha ta te mau tia-faahou-raa i tahito ra e haapapu ra? (A hiˈo i te hohoˈa.)

¹⁰ O Iehova te Tumu o te ora e e mana to ˈna no te faahoˈi mai i te feia pohe i te ora. Ua horoa o ˈna i te mana i te peropheta Elia no te faatia mai i te tamaiti a te vahine ivi no Zarephate. (Arii 1, 17:21-23) Tau matahiti i muri aˈe, maoti te tauturu a te Atua, ua nehenehe te peropheta Elisaia e faatia mai i te tamaiti a te hoê vahine no Sunema. (Arii 2, 4:18-20, 34-37) Te haapapu ra teie mau tia-faahou-raa e e mana to Iehova no te faahoˈi i te feia pohe i te ora. A ora noa ˈi i nia i te fenua, ua nehenehe atoa Iesu e faatia mai i te feia pohe no te mea ua horoa to ˈna Metua i tera mana ia ˈna ra. (Ioa. 11:23-25, 43, 44) Tei te raˈi Iesu i teie nei e ua horoahia ia ˈna “te mana atoa i te raˈi e i te fenua.” E nehenehe ïa o ˈna e faatia mai i “te feia atoa i roto i te menema” a nehenehe atu ai ratou e fanaˈo i te ora mure ore.​—Mat. 28:18; Ioa. 5:25-29.

11. No te aha e nehenehe ai tatou e fanaˈo i te ora mure ore maoti te hoo?

¹¹ No te aha Iehova i vaiiho ai i ta ˈna Tamaiti here ia faaruru i te hoê pohe ino mau? Ua parau Iesu: “No to ˈna here rahi i to te ao i horoa mai ai te Atua i ta ˈna Tamaiti otahi ia ore ia mou te taata atoa o te faatupu i te faaroo ia ˈna, ia roaa râ ia ratou te ora mure ore.” (Ioa. 3:16) Ma te horoa i ta ˈna Tamaiti ei hoo no ta tatou mau hara, ua horoa te Atua i te ravea ia nehenehe tatou e fanaˈo i te ora mure ore. (Mat. 20:28) Ua faataa te aposetolo Paulo i teie tuhaa faufaa o te opuaraa a te Atua a papai ai: “No te taata hoê ra i ô mai ai te pohe, oia atoa no te taata hoê e faatia-faahou-hia ˈi tei pohe. No Adamu hoi te taata atoa e pohe ai, no te Mesia atoa e noaa ˈi i te taata atoa te ora.”​—Kor. 1, 15:21, 22.

12. E nafea te Faatereraa arii e faatupu ai i te opuaraa a Iehova no tatou?

¹² Ua haapii Iesu i ta ˈna mau pǐpǐ ia pure ia tae mai te Faatereraa arii a te Atua e ia ravehia te hinaaro o te Atua i nia i te fenua. (Mat. 6:9, 10) Hoê tuhaa o te opuaraa a te Atua, ia nehenehe ïa te taata e ora e a muri noa ˈtu i nia i te fenua. No te faatupu i te reira, ua maiti Iehova i ta ˈna Tamaiti, te Mesia, ei Arii no te Faatereraa arii. Ua maiti te Atua i na 144 000 feia faatavaihia i nia i te fenua no te ohipa e o Iesu. Ta ratou fa, o te faatupuraa ïa i te hinaaro o te Atua.​—Apo. 5:9, 10.

13. Eaha ta Iehova e rave ra i teie mahana e eaha te titauhia ia tatou ia rave?

¹³ Te haaputu ra Iehova i “te hoê nahoa rahi” taata e te faaineine ra o ˈna ia ratou ia ora i raro aˈe i te aratairaa a ta ˈna Faatereraa arii. (Apo. 7:9, 10; Iak. 2:8) I teie  mahana, ua amahamaha teie ao no te ino e te tamaˈi. Tera râ, te tutava ra te nahoa rahi i te ore e pee i te huru o teie nei ao. Te faaite ra ratou na roto i to ratou haerea, e aita ratou e hinaaro ra e apiti i roto i te tamaˈi. (Mika 4:3) Te tauturu ra ratou i te taata ia ite i “te ora mau” ma te haapii ia ratou no nia i te Atua mau e i ta ˈna mau opuaraa. (Tim. 1, 6:19) E patoi mai paha to ratou fetii ia ratou aore ra e nehenehe ratou e fifihia i te pae moni no te mea te turu ra ratou i te Faatereraa arii a te Atua. Tera râ, te aupuru noa ra Iehova ia ratou. (Mat. 6:25, 30-33; Luka 18:29, 30) Te haapapu ra te reira e mea mau te Faatereraa arii a te Atua e na roto i teie ravea e tupu ai te opuaraa a Iehova.

14-15. E nafea Iehova e haamou roa ˈi i te pohe?

¹⁴ I teie nei, te faatere nei Iesu ei arii o te Faatereraa arii a te Atua i te raˈi e na ˈna e faatupu i te mau parau fafau a Iehova. (Kor. 2, 1:20) Mai 1914, ua vî te mau enemi o Iesu ia ˈna. (Sal. 110:1, 2) Fatata o ˈna e te feia faatavaihia i te haamou roa i te feia ino.​—Apo. 6:2.

¹⁵ I te roaraa o ta ˈna Faatereraa tausani matahiti, e faatiahia mai te feia pohe e e tauturuhia te taata o te auraro ia Iehova ia riro mai ei taata tia roa. I muri  aˈe i te tamataraa hopea, e fatu te feia o te vai taiva ore ia Iehova i te fenua e “e parahi ratou i nia iho e a muri noa ˈtu.” (Sal. 37:10, 11, 29) Hau atu, “o te pohe te enemi hopea ta ˈna e haamou.”​—Kor. 1, 15:26.

16. Eaha te turai ia tatou ia tavini ia Iehova?

¹⁶ Mai ta tatou i ite mai i roto i teie tumu parau haapiiraa, ua niuhia to tatou tiaturiraa e ora e a muri noa ˈtu i nia i te Bibilia. E tauturu mai teie tiaturiraa ia vai taiva ore i te roaraa o te mau mahana hopea fifi mau. Tera râ, e faaoaoa tatou ia Iehova eiaha noa no te fanaˈo i te ora mure ore, no to tatou râ here ia ˈna e ia Iesu. Tera te tumu faufaa roa e vai taiva ore ai tatou ia Iehova e ia Iesu. (Kor. 2, 5:14, 15) E turai te here ia tatou ia pee i to raua hiˈoraa e ia faaite i to tatou tiaturiraa ia vetahi ê. (Roma 10:13-15) I te mea e ua haapii tatou ia faatupu i te aau horoa noa, e riro ïa tatou ei hoa no Iehova e a muri noa ˈtu.​—Heb. 13:16.

17. Eaha te tia ia tatou tataitahi ia rave? (Mataio 7:13, 14)

¹⁷ Tei roto anei tatou i te feia o te fanaˈo i te ora mure ore? Papu, ua horoa mai Iehova i te ravea no te fanaˈo i te reira. Tera râ, e tia ia tatou ia faaea noa i nia i te eˈa e aratai ra i te ora. (A taio i te Mataio 7:13, 14.) Eaha râ te huru oraraa i te taime a fanaˈo ai tatou i te ora mure ore? O ta tatou ïa e hiˈopoa i roto i to muri nei tumu parau haapiiraa.