1. Hou Iesu a pohe ai, eaha ta ˈna i parau i te taata ohipa ino i pihai iho ia ˈna? (Luka 23:39-43)

 TE MAUIUI ra Iesu e na piti taata ohipa ino i pihai iho ia ˈna. (Luka 23:32, 33) I te mea e ua faaooo raua ia Iesu, papu e ere raua i te pǐpǐ na ˈna. (Mat. 27:44; Mar. 15:32) Ua taui râ hoê o raua i to ˈna huru. Ani atura o ˈna ia Iesu: “Iesu, haamanaˈo mai oe ia ˈu ia tae oe i roto i ta oe Faatereraa arii.” Pahono ihora Iesu ia ˈna: “Oia mau ta ˈu e parau atu ia oe i teie mahana: Ei te paradaiso oe e o vau atoa.” (A taio i te Luka 23:39-43.) Aita e haapapuraa e ua farii teie taata ohipa ino i te poroi no nia i “te Faatereraa arii o te raˈi” ta Iesu i poro i te roaraa o ta ˈna taviniraa. Aita Iesu i parau e ô tera taata i roto i tera Faatereraa arii. (Mat. 4:17) Ua faahiti hoi Iesu i te paradaiso i nia i te fenua nei. Eaha te haapapu ra i te reira?

2. Eaha te haapapu ra e e ati Iuda teie taata ohipa ino tei tatarahapa?

² E ati Iuda paha teie taata ohipa ino tei tatarahapa. Ua parau o ˈna i te tahi atu: “Aita oe e mǎtaˈu ra i te Atua, ua roohia oe i te hoê â utua?” (Luka 23:40) Hoê noa Atua ta te ati Iuda e haamori, area te feia o te nunaa ěê, mea rahi to ratou mau atua. (Exo. 20:2, 3; Kor. 1, 8:5, 6) Mai te peu no te mau nunaa ěê raua, e parau ïa o ˈna, “Aita oe e mǎtaˈu ra i te mau atua?” Hau atu, aita Iesu i tonohia i te mau taata atoa, “i te mau mamoe anaˈe râ tei moˈe o te utuafare o Iseraela.” (Mat. 15:24) Ua faaite te Atua i te mau Iseraela e e faatia o ˈna i te feia mai te pohe mai. Ua ite paha te taata ohipa ino i te reira. Ua taa ïa ia ˈna e e faatia mai Iehova ia Iesu mai te pohe mai no te faatere i roto i ta ˈna Faatereraa arii. Ua tiaturi ïa o ˈna e e faatia-atoa-hia mai o ˈna.

3. Eaha ta te taata ohipa ino i taa a faahiti ai Iesu i te parau o te paradaiso? A faataa. (Genese 2:15)

 ³ Inaha e ati Iuda tera taata ohipa ino, ua faaroo ïa o ˈna i te parau no Adamu raua Eva e te paradaiso ta Iehova i faaineine no raua. No reira, ua taa paha ia ˈna e tera te paradaiso ta Iesu i faahiti. Hoê vahi nehenehe mau i nia i te fenua nei.​—A taio i te Genese 2:15.

4. Eaha ta te mau parau ta Iesu i faahiti i te taata ohipa ino e turai ia tatou ia feruriruri?

⁴ E turai te mau parau ta Iesu i faahiti i te taata ohipa ino ia feruriruri i nia i te huru oraraa i roto i te paradaiso. Inaha, e nehenehe atoa tatou e haapii no nia i te paradaiso a hiˈopoa ˈi i te hau tei itehia a faatere ai te arii Solomona. Ua ite tatou e mea maitai aˈe Iesu ia Solomona. E nehenehe ïa tatou e papu e e ohipa o ˈna e te feia faatavaihia no te faariro i te fenua nei ei paradaiso nehenehe mau. (Mat. 12:42) Papu maitai, mea faufaa ia feruri te mau “mamoe ê atu” i te mau mea e tia ia rave no te ora e a muri noa ˈtu i roto i te paradaiso.​—Ioa. 10:16.

5. A feruriruri ai i te huru oraraa i roto i te paradaiso, eaha te puta mai i roto i to outou feruriraa?

⁵ A feruriruri ai i te huru oraraa i roto i te paradaiso, eaha te puta mai i roto i to outou feruriraa? Te ite ra paha outou i te hoê aua nehenehe mau mai te ô i Edene. (Gen. 2:7-9) Te haamanaˈo ra paha outou i te parau tohu a Mika no nia i te mau tavini a te Atua. Ua parau o ˈna e e parahi ratou “tataitahi i raro aˈe i ta ratou tumu vine e ta ratou tumu suke.” (Mika 4:3, 4) Te haamanaˈo atoa ra paha outou i te mau irava Bibilia o te faahiti ra i te rahi o te maa e itehia i roto i te paradaiso. (Sal. 72:16; Isa. 65:21, 22) A feruri na tei roto outou i te hoê aua haviti mau. I mua ia outou, te vai ra te hoê amuraa maa e e rave rau maa monamona to nia iho. Ua uaa te tiare e mea noˈanoˈa to ˈna hauˈa. Te faaroo ra outou i to outou utuafare e hoa e ataata ra. Te haere atoa mai ra te feia tei faatiahia mai. E ere roa ˈtu i te moemoeâ. E nehenehe tatou e papu e e tupu te reira i nia i te fenua. E ere noa râ tera te oraraa, e titauhia ia tatou ia rave i te tahi atu ohipa.

6. Eaha ta tatou e rave i roto i te paradaiso? (A hiˈo i te hohoˈa.)

⁶ Ua poiete Iehova ia tatou ia oaoa noa no te ohipa ta tatou e rave. (Koh. 2:24) Mea rahi te ohipa ta tatou e rave i te roaraa o na tausani matahiti Faatereraa a te Mesia. E tia ia haapaohia te feia tei ora mai i te ati rahi. Hau atu, ia faatiahia mai te feia pohe, e hinaaro atoa ratou i te ahu, te maa e te hoê nohoraa. E tia  atoa ia faariro i te fenua ei paradaiso, mai tei faauehia ia Adamu raua Eva. E titau-atoa-hia ia haapii i te feia atoa tei faatiahia mai e ia tauturu i te mau tavini taiva ore tei ora hou te tau o Iesu ia ite atu â no nia ia Iehova e ia Iesu.

7. Eaha ta tatou e nehenehe e papu e no te aha?

⁷ E nehenehe tatou e papu e i roto i te paradaiso e fanaˈo tatou i te hau, te oaoa e te mau mea atoa ta tatou e hinaaro. No te mea ua faaite aˈena Iehova na roto i te huru faatereraa a te arii Solomona, mai te aha te huru oraraa i raro aˈe i te Faatereraa arii a ta ˈna Tamaiti.

8. Mea nafea te mau parau o te Salamo 37:10, 11, 29 i te tupuraa i muri aˈe i to Davida faahitiraa i te reira? (I roto i teie vea, a hiˈo i te “Uiraa a te feia taio.”)

⁸ I raro aˈe i te aratairaa a te varua moˈa, ua papai Davida eaha te huru oraraa a faatere ai hoê arii î i te paari. (A taio i te Salamo 37:10, 11, 29.) Pinepine tatou i te faaohipa i te Salamo 37:11 a tauaparau ai ia vetahi ê no nia i te paradaiso a muri aˈe. Mea tano iho â ia na reira no te mea ua faahiti atoa Iesu i teie irava i roto i ta ˈna Aˈoraa i nia i te mouˈa ma te parau e fatata te reira i te tupu. (Mat. 5:5) I to Solomona faatereraa ia Iseraela, ua fanaˈo te nunaa i te hau e ua ora ratou i te hoê fenua “e tahe noa te û e te meri.” Ua parau te Atua: “Ia tamau outou i te pee i ta ˈu mau faatureraa . . . e tuu vau i te hau i to outou fenua e e taoto outou ma te ore e haamǎtaˈuhia.” (Lev. 20:24; 26:3, 6) Ua tupu iho â te reira i te roaraa o te faatereraa a Solomona. (Par. 1, 22:9; 29:26-28) Ua fafau Iehova e “aita faahou te feia ino.” (Sal. 37:10) Ua tupu ïa te mau parau o te Salamo 37:10, 11, 29 e e tupu atoa te reira a muri aˈe.

9. Eaha ta te arii vahine no Seba i parau no nia i te faatereraa a te arii Solomona?

⁹ Ua faaroo te arii vahine no Seba no nia i te hau ta te mau Iseraela e fanaˈo ra i raro aˈe i te faatereraa a te arii Solomona. Haere maira oia i Ierusalema no te ite  mata roa i te reira. (Arii 1, 10:1) A ite ai oia i te faatereraa a Solomona, parau atura o ˈna: “Aita i faaite-pauroa-hia mai ia ˈu . . . Mea oaoa no to oe mau taata, e mea oaoa no ta oe mau tavini o te tia tamau ra i pihai iho ia oe, a faaroo noa ˈtu ai i ta oe mau parau î i te paari!” (Arii 1, 10:6-8) Papu, mea maitai te huru faatereraa a te arii Solomona. Tera râ, mea maitai atu â te mau mea atoa ta Iehova e rave no te huitaata i raro aˈe i te faatereraa a ta ˈna Tamaiti, o Iesu.

10. No te aha mea maitai aˈe Iesu ia Solomona?

¹⁰ Mea maitai aˈe Iesu ia Solomona. No te aha? E taata tia ore Solomona e i te tahi taime, ua rave o ˈna i te mau faaotiraa tano ore tei haamauiui i te nunaa o te Atua. Area Iesu, i te mea e e taata tia roa o ˈna, aita oia i hapa aˈenei. (Luka 1:32; Heb. 4:14, 15) Ua vai taiva ore o ˈna ia Iehova i mua i te mau tamataraa a Satani. Ua haapapu o ˈna e eita roa ˈtu oia e rave i te hara aore ra i te tahi noa ˈˈe mea o te nehenehe e haamauiui i te mau tavini a te Atua. Eita e ore, o Iesu te Arii maitai roa ˈˈe ta tatou e nehenehe e fanaˈo.

11. O vai te ohipa na muri ia Iesu?

¹¹ E ohipa Iesu e na 144 000 feia faatavaihia no te haapao i te huitaata e no te faatupu i te opuaraa a Iehova no te fenua. (Apo. 14:1-3) A ora ˈi i te fenua, ua faaoromai tamau te feia faatavaihia e rave rahi fifi, e nehenehe ïa ratou e taa eaha ta tatou e faaruru ra. Eaha mau râ te tuhaa ta ratou e haapao?

12. Eaha te hopoia ta Iehova i horoa i na 144 000?

¹² Mea rahi aˈe te ohipa ta Iesu e te feia faatavaihia i rave i ta Solomona. Ei hiˈoraa, ua haapao Solomona e mirioni taata i te hoê noa fenua. Area o Iesu e te feia faatavaihia, e miria ïa taata ta ratou e haapao ati aˈe te ao nei. Auê ïa hopoia faahiahia mau ta Iehova i horoa i na 144 000!

13. Eaha te ohipa taa ê mau ta te feia faatavaihia e rave?

¹³ Mai ia Iesu, e faatere na 144 000 ei arii e ei tahuˈa rahi. (Apo. 5:10) I raro aˈe i te ture a Mose, na te mau tahuˈa na mua e haapao ia maitai noa te nunaa i te pae tino e i te pae varua. I te mea e “e ata te Ture no te mau haamaitairaa e tupu a muri aˈe,” mea tano ïa ia manaˈo e tera atoa ta Iesu e te feia faatavaihia e rave. E haapao ratou ia maitai noa te mau tavini a te Atua i te pae tino e i te pae varua. (Heb. 10:1) Inaha, tei te fenua tatou, aita ïa tatou e ite e nafea teie mau arii e tahuˈa e horoa mai ai i te mau aratairaa. Noa ˈtu râ, ua papu ia tatou e ua rave Iehova i te mau faanahoraa atoa ia nehenehe tatou e fanaˈo i te aratairaa hinaarohia a ora ˈi i roto i te paradaiso.​—Apo. 21:3, 4.

14. Eaha te taairaa e vai ra i rotopu i te mau “mamoe ê atu” e te feia faatavaihia?

¹⁴ Ua pii Iesu i te feia faatavaihia “te nǎnǎ iti.” (Luka 12:32) Ua faahiti atoa o ˈna i te piti o te pǔpǔ, oia hoi, te mau “mamoe ê atu.” Ua riro na pǔpǔ e piti, ei hoê noa nǎnǎ. (Ioa. 10:16) I teie mahana, te ohipa amui ra ratou e e tamau ratou i te na reira e tae roa ˈtu i roto i te paradaiso. I muri iho, e ora “te nǎnǎ iti” i te raˈi, area te mau “mamoe ê atu” e fanaˈo ïa ratou i te ora mure ore i nia i te fenua. Tera râ, i teie nei â, e tia i te mau  “mamoe ê atu” ia rave i te tahi ohipa no te nehenehe e ora i roto i te paradaiso.

15. (1) E nafea te mau “mamoe ê atu” e ohipa amui ai e te mau taeae faatavaihia? (2) E nafea tatou e pee ai i te hiˈoraa o te taeae i roto i te fare raau? (A hiˈo i te hohoˈa.)

¹⁵ Ua pohe taua taata ohipa ino ra tei tatarahapa hou a nehenehe ai e faaite i to ˈna mauruuru ia Iesu. Area tatou, te mau “mamoe ê atu,” e ravea ta tatou no te faaite i to tatou mauruuru ia Iesu. Ei hiˈoraa, e faaite tatou i to tatou here ia ˈna ma te auraro i te feia faatavaihia. E haava hoi Iesu ia tatou ia au i to tatou huru i nia i to ˈna mau taeae faatavaihia. (Mat. 25:31-40) E turu tatou ia ratou ma te apiti i te pororaa e te faariroraa i te taata ei pǐpǐ na Iesu. (Mat. 28:18-20) No reira tatou e faaohipa ˈi i te mau mauhaa no te haapiiraa a te faanahonahoraa mai te buka Ia ora oe e a muri noa ˈtu! Mai te peu aita ta tatou e haapiiraa Bibilia, e nehenehe ïa tatou e haamau i te fa e pûpû i te hoê haapiiraa Bibilia i te mau taata atoa ta tatou e farerei i roto i te pororaa.

16. Eaha ta tatou e nehenehe e rave i teie nei â no te faaite e ua ineine tatou no te ora i roto i te paradaiso?

¹⁶ Eita tatou e tiai ia tae i roto i te paradaiso no te faatupu i te mau huru maitatai ta Iehova e hinaaro ra. I teie mahana, e nehenehe tatou e faaite i te hoê haerea afaro na roto i ta tatou mau parau e ohipa. E titau-atoa-hia ia vai aifaito noa tatou i roto i to tatou oraraa e ia vai taiva ore ia Iehova, i to tatou hoa faaipoipo e i to tatou mau taeae e tuahine. Ia pee tatou i te mau faaueraa a te Atua i teie nei â, ohie noa ïa no tatou i te na reira i roto i te paradaiso. E nehenehe atoa tatou e faatupu i te tahi mau aravihi e huru maitatai hinaarohia o te faaite e ua ineine tatou i te fanaˈo i te ora mure. I roto i teie vea, a hiˈo i te tumu parau “Ua ineine anei oe no te fatu i te fenua?”

17. No te aha mea faufaa ia faaea tatou i te faahapa ia tatou no te hoê hara ta tatou i rave na mua ˈˈe? A faataa.

¹⁷ Mea faufaa ia faaea tatou i te faahapa noa ia tatou no te hoê hara ta tatou i  rave na mua ˈˈe. Eita atoa tatou e rave “i te hara ma te hinaaro mau,” no te mea ua ite tatou e ua pohe Iesu no ta tatou mau hara. (Heb. 10:26-31) Tera râ, e nehenehe tatou e papu e faaore roa Iehova i ta tatou hara, ia tatarahapa mau tatou, ia ani tatou i te tauturu a Iehova e te mau matahiapo a rave atu ai i te mau tauiraa titauhia. (Isa. 55:7; Ohi. 3:19) A haamanaˈo i ta Iesu i parau i te mau Pharisea: “Ua haere mai hoi au e titau i te feia rave hara ia tatarahapa, eiaha râ te feia parau-tia.” (Mat. 9:13) Maoti te hoo, e nehenehe ta tatou mau hara atoa e faaore-roa-hia.

18. Eaha paha ta oe e hinaaro e ani i te taata ohipa ino tei pohe i pihai iho ia Iesu?

¹⁸ A feruri na tei roto oe i te paradaiso a tauaparau ai i te taata ohipa ino tei pohe i pihai iho ia Iesu. Eita e ore e faaite orua i to orua mauruuru no te tusia taraehara o Iesu. E nehenehe oe e ani ia ˈna eaha tei tupu i te mau taime hopea o Iesu i nia i te fenua e eaha to ˈna huru i to Iesu pahonoraa i ta ˈna aniraa. Area o ˈna, e ani paha o ˈna ia oe mai te aha te huru o te oraraa i te mau mahana hopea o teie ao ino. Papu, e oaoa tatou i te haapii i te Bibilia e te hoê taata mai ia ˈna!​—Eph. 4:22-24.

19. No te aha eita roa ˈtu tatou e haumani i roto i te paradaiso? (A hiˈo i te hohoˈa i te api matamua.)

¹⁹ Eita roa ˈtu tatou e haumani i roto i te paradaiso. E feia maitai anaˈe ta tatou e farerei e e ohipa faahiahia mau ta tatou e rave. Te mea faufaa roa ˈˈe, e haapii atu â tatou no nia i to tatou Metua i te raˈi i te mau mahana atoa e e oaoa tatou i te fanaˈo i te mau mea atoa ta ˈna e horoa mai. Mea rahi ta tatou e haapii no nia ia ˈna e te mau mea ta ˈna i poiete. A na reira ˈi, e rahi atu â to tatou here ia Iehova. Auê tatou i te mauruuru e ua horoa mai Iehova e o Iesu i te tiaturiraa o te ora mure ore i roto i te paradaiso!