Ua taio maitai anei outou i te mau tumu parau i roto i Te Pare Tiairaa? E hiˈo anaˈe e nafea outou ia pahono i teie mau uiraa:

Eaha te mau maitai ta tatou e ite a faataa ˈi i te taime no te pure, no te faaroo ia Iehova e no te feruriruri no nia ia ˈna?

E rave tatou i te mau faaotiraa maitai aˈe, e riro tatou ei taata aravihi i te haapii atu e e puai atu â to tatou faaroo e here ia Iehova.​—w22.01, api 30-31.

E nafea tatou e faufaahia ˈi ia tiaturi i te mau taeae ta Iehova i faatoroa i roto i ta ˈna faanahonahoraa?

Teie te taime tano no te haapii i te tiaturi i te mau huru raveraa a te Atua. Eiaha e feaa i te aratairaa e te mau faaotiraa a te mau matahiapo. Ia tupu te ati rahi, e ineine ïa tatou i te pee i te mau aratairaa noa ˈtu mea fifi ia taa aore ra ia pee i te reira.​—w22.02, api 4-6.

Eaha ta te melahi i hinaaro e faaite a paraparau ai o ˈna ia Zekaria no nia i “te tapau faito i roto i te rima o [te tavana ati Iuda] Zerubabela”? (Zek. 4:8-10)

Ua haapapu teie orama i te nunaa o te Atua e e oti roa te hiero i te patuhia e e tu te reira i to Iehova hinaaro.​—w22.03, api 16-17.

E nafea tatou e riro ai ei hiˈoraa maitai na roto i ta tatou mau parau? (Tim. 1, 4:12)

Ma te faaite i te parau maitai e te tura i roto i te taviniraa, ma te himene ma te aau atoa, ma te tamau i te horoa i te pahonoraa i te putuputuraa, ma te faaite i te parau mau, ma te faaitoito ia vetahi ê e ma te haapae roa i te mau huru parau ino atoa.​—w22.04, api 6-9.

No te aha e itehia ˈi te huru o na maha animara (faatereraa) faahitihia i roto i te Daniela pene 7 i nia i te puaa taehae o te Apokalupo 13:1, 2?

E ere te puaa taehae faahitihia i roto i te Apokalupo 13 i te hoê faatereraa taa maitai mai ia Roma. Te faahohoˈahia ra tera puaa taehae i te mau hau puai atoa tei faatere i te taata.​—w22.05, api 9.

E nafea tatou e faaite ai e te tiaturi ra tatou i to Iehova parau-tia?

Ia parau ino aore ra ia haamauiui te tahi taata ia tatou, eita tatou e tamau i te riri e i te inoino, e vaiiho râ tatou i te reira i roto i te rima o Iehova. Fatata hoi o ˈna i te faaore roa i te mau mea ino atoa ta te hara i faatupu.​—w22.06, api 10-11.

Eaha ta te taeae maitihia no te pure i te mau putuputuraa e tia ia haamanaˈo?

Aita te pure i faanahohia no te aˈo aore ra no te horoa i te faaararaa i te amuiraa. Aita e titauhia ia rahi roa te parau, no te omua iho â râ i te hoê putuputuraa. (Mat. 6:7)​—w22.07, api 24-25.

Eaha te auraa ia parauhia e tia mai “te feia i rave noa i te mea ino . . . no te haavaraa”? (Ioa. 5:29)

E ere te reira i te hoê haavaraa ino no te mau ohipa ta ratou i rave hou a pohe ai. E hiˈopoahia to ratou huru e haerea i muri aˈe i te tia-faahou-raa.​—w22.09, api 18.

Eaha te mea faufaa ta te taeae Rutherford i parau i te tairururaa i tupu i Tetepa 1922?

I te tairururaa i Cedar Point, Ohio, Marite, ua parau o ˈna: “Inaha, te faatere ra te Arii! E vea outou na ˈna. No reira, a poro, a poro, a poro i te Arii e i to ˈna basileia!”​—w22.10, api 3-5.

I roto i te Isaia pene 30, eaha na toru ravea ta te Atua e horoa ra no te tauturu ia tatou ia faaoromai tamau?

A tahi, e tauturu mai Iehova ma te faaroo e ma te pahono i ta tatou mau pure, a piti, e aratai oia ia tatou e a toru, e haamaitai oia ia tatou i teie nei â e a muri aˈe.​—w22.11, api 9.

No te aha tatou e parau ai e ua tupu te mau parau itehia i roto i te Salamo 37:10, 11, 29 e fatata atoa te reira i te tupu?

I roto i te mau parau a Davida, te faataahia ra te mau haamaitairaa ta te ati Iseraela i fanaˈo i raro aˈe i te faatereraa a te arii Solomona. Ua faahiti Iesu i te parau o te hoê paradaiso no a muri aˈe e ua faahiti atoa o ˈna i te irava 11. (Mat. 5:5; Luka 23:43)​—w22.12, api 8-10, 14.