1. Eaha “te hau o te Atua” e e nafea tatou e fanaˈo ai i te reira? (Philipi 4:6, 7)

 AITA te feia o teie nei ao e ite eaha “te hau o te Atua.” E hau teie ta tatou e fanaˈo a faatupu ai i te hoê auhoaraa piri e to tatou Metua i te raˈi. Maoti te hau o te Atua, eita tatou e haapeapea rahi roa. (A taio i te Philipi 4:6, 7.) E fanaˈo tatou i te auhoaraa piri e o Iehova, “te Atua o te hau” e te feia e here ra ia ˈna. (Tes. 1, 5:23) Ia matau maitai tatou ia Iehova, ia tiaturi e ia auraro tatou ia ˈna e nehenehe te hau o te Atua e tamǎrû i to tatou aau ia faaruru tatou i te hoê tupuraa fifi.

2. E nafea tatou e papu ai e e nehenehe tatou e fanaˈo i te hau o te Atua?

² E nehenehe anei tatou e fanaˈo i te hau o te Atua ia faaruru tatou i te fifi, mai te maˈi pee, te ati natura, te faahuehueraa e te hamani-ino-raa? E nehenehe teie mau fifi e haamǎtaˈu ia tatou. Ua horoa râ Iesu i teie faaueraa i ta ˈna mau pǐpǐ: “Eiaha to outou aau ia horuhoru, eiaha atoa ia taiâ.” (Ioa. 14:27) Te oaoa nei te mau taeae e tuahine i te pee i teie faaueraa a Iesu. Maoti ta Iehova tauturu, ua nehenehe ratou e fanaˈo i te hau i te taime a faaruru ai ratou i te fifi rahi.

3. E nafea te maˈi pee aore ra te maˈi parare e nehenehe ai e faaere i to tatou hau?

³ E nehenehe te maˈi pee aore ra te maˈi parare e taui roa i to tatou oraraa. A feruri na i te mau fifi ta e rave rahi i faaruru a tupu ai te COVID-19. Ia au i te hoê titorotororaa, i te roaraa o te maˈi parare, ua hau i te afaraa o te taata tei ore e taoto maitai faahou. Ua haapeapea rahi roa  vetahi o ratou, ua hepohepo, ua inu hua i te ava, ua rave i te raau taero, ua haavî i to ratou utuafare e ua hinaaro e haapohe ia ratou. Mai te peu ua farerei outou i teie mau tupuraa, e nafea outou ia ore e haapeapea rahi roa e ia fanaˈo i te hau o te Atua?

4. E nafea te iteraa i ta Iesu i tohu e tauturu ai ia tatou ia fanaˈo i te hau?

⁴ Ua tohu Iesu e, i te mau mahana hopea, e tupu te maˈi pee “i tera e tera vahi.” (Luka 21:11) E nafea te iteraa i te reira e hopoi mai ai i te hau? Na mua roa, eita tatou e maere ia tupu te maˈi pee. A piti, te tupu ra te mau mea ta Iesu i tohu. Mea tia ïa ia pee i te faaueraa ta ˈna i horoa ia tatou o te ora nei i te anotau hopea: “A ara eiaha outou ia riaria.”​—Mat. 24:6.

5. (1) Ia au i te Philipi 4:8, 9, eaha te mau mea ta tatou e nehenehe e ani a faaruru ai i te maˈi pee? (2) E nafea tatou e faufaahia ˈi i te faarooraa i te haruharuraa o te taioraa Bibilia?

⁵ E nehenehe te maˈi pee e faatupu i te haapeapearaa e te mǎtaˈuraa. Tera tei tupu no te tuahine Desi. b No te COVID-19, ua pohe e piti o to ˈna fetii e ta ˈna taote. Ua mǎtaˈu ïa o ˈna e e roo-atoa-hia oia i tera maˈi a pee atu ai i nia i to ˈna mama tei paari roa. Hau atu, ua haapeapea o ˈna i te ere i ta ˈna ohipa e e nafea o ˈna e aupuru ai i to ˈna utuafare. Aita ˈtura to ˈna taoto e topa. Ua fanaˈo faahou râ o ˈna i te hau. Mea nafea ïa? Ua ani o ˈna ia Iehova i te hau e i te tauturu no te haapae roa i te mau manaˈo faatoaruaru. (A taio i te Philipi 4:8, 9.) Ma te faaroo i te haruharuraa o te taioraa Bibilia, ua vaiiho o ˈna ia Iehova ia aratai ia ˈna. Te na ô ra o ˈna: “A faaroo ai i te mǎrû o te mau reo i roto i te haruharuraa, ua iti roa mai to ˈu mau haapeapearaa e ua haamanaˈo te reira ia ˈu i to Iehova aroha hamani maitai.”​—Sal. 94:19.

6. E nafea ta tatou iho haapiiraa Bibilia e te mau putuputuraa e tauturu ai ia tatou?

⁶ Ia tupu te maˈi pee, e ere i te mea ohie ia rave noa i ta tatou i matau i te rave. Eiaha râ e vaiiho i te reira ia haafifi ia tatou no te rave i ta tatou iho haapiiraa e no te apiti i te mau putuputuraa. I roto i ta tatou mau papai e video, e fanaˈo tatou e rave rahi faatiaraa a te mau taeae e tuahine tei vai taiva ore noa ˈtu te mau fifi ta ratou i faaruru. (Pet. 1, 5:9) I te mau putuputuraa, e itoitohia tatou i te mau irava Bibilia e e nehenehe tatou e faaitoito te tahi e te tahi. (Roma 1:11, 12) Ia feruri tatou i ta Iehova e rave no te turu i ta ˈna mau tavini tei roohia i te  maˈi, tei mǎtaˈu aore ra tei moˈemoˈe, e papu atu â ia tatou e e tauturu mai iho â Iehova.

7. Eaha te haapii mai i te hiˈoraa o te aposetolo Ioane?

⁷ A tamau i te tauaparau e te mau taeae e tuahine. A tupu ai te maˈi pee, e titauhia ia tatou ia faaateatea no te arai i te maˈi. E na reira atoa tatou a farerei ai i te mau taeae e tuahine. I tera mau taime, hoê â paha manaˈo to tatou i to te aposetolo Ioane. Ua hinaaro mau o ˈna e farerei tino roa ia Gaio, hoê o to ˈna mau hoa. (Ioa. 3, 13, 14) Ua faaoti râ Ioane i te papai ia Gaio, i te mea e aita o ˈna e nehenehe e farerei tino roa ia ˈna. Aita anaˈe tatou e nehenehe e farerei tino roa i to tatou mau taeae e tuahine, e tamau tatou i te tauaparau ia ratou na roto i te niuniu paraparau aore ra ma te hapono atu i te poroi. Ia tamau tatou i te na reira, eita tatou e moˈemoˈe e e vai hau noa tatou. A ahoaho ai outou, a ani i te tauturu a te mau matahiapo ia nehenehe ratou e faaitoito ia outou.​—Isa. 32:1, 2.

8. E nafea te ati natura e nehenehe ai e faaere ia outou i te hau?

⁸ Ia faaruru tatou i te miti faaî, te aueueraa fenua aore ra te ati auahi, e ahoaho tatou no te hoê taime maoro. Ia pohe tei herehia aore ra ia ere tatou i te taoˈa, e oto iho â tatou a manaˈo atu ai e aita e ravea faahou. E ere râ te auraa e e taata nounou taoˈa tatou aore ra aita tatou e tiaturi faahou ra ia Iehova. I te tahi taime, e manaˈo paha vetahi e ua inoino roa tatou no te rahi o te mau fifi ta oe i faaruru. (Ioba 1:11) Tera râ, noa ˈtu teie mau tupuraa ahoaho, e nehenehe tatou e vai hau noa. E nafea ïa?

9. Mea nafea to Iesu faaineineraa ia tatou no te mau ati natura?

⁹ A haamanaˈo i ta Iesu i tohu. Noa ˈtu, te manaˈo ra vetahi e eita roa ˈtu ratou e faaruru i te ati natura, ua ite râ tatou e e tupu iho â te reira. Ua parau Iesu i ta ˈna mau pǐpǐ e “e tupu te aueueraa fenua rahi” e te tahi atu mau ati natura hou a tae mai ai te hopea. (Luka 21:11) Ua tohu atoa o ˈna e e uˈana te ino mai te taparahiraa taata, te hamani-ino-raa e te ohipa totoaraa. (Mat. 24:12) Aita roa ˈtu Iesu i parau e o te feia anaˈe tei atea ia Iehova te faaruru i tera mau ati. Inaha, ua faaruru atoa vetahi mau taeae e tuahine i te ati natura. (Isa. 57:1; Kor. 2, 11:25) Eita paha Iehova e paruru ia tatou i te mau ati natura, e horoa mai râ o ˈna i ta tatou e hinaaro mau no te vai hau noa.

10. E nafea te faaineineraa no te mau ati natura e faaite ai e te tiaturi ra tatou ia Iehova? (Maseli 22:3)

¹⁰ Mea ohie aˈe no tatou ia vai hau noa, mai te peu ua faaineine atea tatou no te hoê tupuraa ru. Te auraa anei râ e, aita tatou e tiaturi ra ia Iehova? Aita! Ia faaineine atea tatou no te mau ati natura te faaite ra tatou e te tiaturi nei tatou e e haapao iho â Iehova ia tatou. Na roto i ta ˈna Parau, te ani mai ra Iehova ia faaineine atea no te mau ati natura. (A taio i te Maseli 22:3.) Hau atu, na roto i ta tatou mau papai, putuputuraa e parau faaara, te tamau nei te faanahonahoraa a Iehova i te ani ia tatou ia faaineine no te mau tupuraa ru. c Te tiaturi ra anei tatou ia Iehova? Mai te peu e e, e faaineine tatou  ia tatou i teie nei â no te mau ati natura i mua.

11. Eaha te haapii mai i te hiˈoraa o Margaret?

¹¹ Teie te hiˈoraa o tuahine Margaret. Ua faauehia o ˈna ia faarue i to ˈna fare i muri aˈe i te hoê ati auahi. No te mea e rave rahi tei horo ê, ua otaa noa te pereoo i nia i te purumu. E au auahi ereere tei itehia i nia i te purumu e mea fifi no Margaret ia ite maitai a faahoro ai. E hohoˈa fenua atoa ta ˈna i faaineine no te aratai ia ˈna. Ua faarue oioi atoa o ˈna i to ˈna fare ia ore o ˈna e mau i nia i te purumu. Ua ora mai Margaret no te mea ua faaineine atea o ˈna ia ˈna!

12. No te aha tatou e pee ai i te mau aratairaa no nia i te parururaa?

¹² No te paruru ia tatou e ia vetahi ê, e ani mai paha te mau tia mana ia auraro i te mau ture opanipaniraa e te tahi atu mau faatureraa. Aita vetahi e auraro i teie mau faatureraa no to ratou nounou i te taoˈa. Eaha râ te huru o te mau Kerisetiano? Te na ô ra te Bibilia: “No te Fatu, a auraro i te mau mea atoa ta te taata i hamani, i te hoê arii anei tei nia ˈˈe aore ra i te mau tavana ta ˈna i faatoroa.” (Pet. 1, 2:13, 14) Te horoa atoa nei te faanahonahoraa i te mau aratairaa no te paruru ia tatou. Pinepine atoa te faanahonahoraa i te faaitoito ia tatou ia horoa i te mau haamaramaramaraa no nia ia tatou i te mau matahiapo, hou a tupu ai te hoê ati. Ua na reira anei tatou? E horoa-atoa-hia mai paha te tahi mau aratairaa no nia i te vahi puhaparaa e te mau faanahoraa ravehia no te tauturu ia vetahi ê e i te taime e na reira ˈi tatou. Aita anaˈe tatou e auraro, e nehenehe tatou e fifihia. Hau atu, mea ohipa rahi no te mau matahiapo i te haapao ia tatou. A haamanaˈo e te hinaaro ra teie mau taeae taiva ore e paruru ia tatou. (Heb. 13:17) Ua na ô Margaret: “Ua papu roa ia ˈu e ua nehenehe au e ora mai no te mea ua auraro vau i te mau aratairaa a te mau matahiapo e a te faanahonahoraa.”

13. Eaha tei tauturu i te mau Kerisetiano tei purara ê no te hamani-ino-raa ia vai hau noa?

¹³ Noa ˈtu ua horo ê e rave rahi taeae e tuahine no te hoê ati natura aore ra te tamaˈi tivira, ua tamau noa râ ratou i te  ohipa no Iehova. I te senekele matamua, ua tamau te mau Kerisetiano i te “faaite haere . . . i te parau apî oaoa o te poroi a te Atua” noa ˈtu ua purara ê ratou no te hamani-ino-raa. (Ohi. 8:4) Ua tauturu te pororaa ia ratou ia tiatonu noa i nia i te Faatereraa arii, eiaha râ i nia i to ratou mau fifi. Maoti te reira, ua vai hau noa ratou.

14. E nafea te hamani-ino-raa e faaiti ai i to tatou hau?

¹⁴ No te hamani-ino-raa, e nehenehe tatou e ere i te hau. Papu, e oaoa e e mauruuru tatou i te putuputu amui e i te poro ma te ore e haapeapea e nehenehe tatou e tapeahia. Ia opanihia râ ta tatou ohipa, e haapeapea roa paha tatou. E titauhia râ ia vai ara. No te aha? Ua na ô hoi Iesu e, no te hamani-ino-raa e nehenehe ta ˈna mau pǐpǐ e turori. (Ioa. 16:1, 2) E nafea râ tatou e vai hau noa ˈi noa ˈtu te hamani-ino-raa?

15. No te aha eita tatou e mǎtaˈu i te hamani-ino-raa? (Ioane 15:20; 16:33)

¹⁵ Te na ô ra te Bibilia: “Te feia atoa e hinaaro e haamori i te Atua anaˈe ma te hoê e te Mesia ra o Iesu, e hamani-ino-atoa-hia ïa.” (Tim. 2, 3:12) Teie te hiˈoraa o te taeae Andrei. Ua opanihia ta tatou ohipa i to ˈna fenua, mea fifi râ no ˈna ia farii e e hamani-ino-hia te mau tavini a Iehova. Ua manaˈo hoi o ˈna: ‘Inaha, mea rahi te Ite no Iehova i ǒ nei, eita ïa e haere i te mau mutoi ia tapea ia matou pauroa!’ Noa ˈtu râ, ua haapeapea roa Andrei. Ere atura o ˈna i te hau. Area te tahi mau taeae, ua tiaturi ratou ia Iehova. Ua taa ia ratou e e nehenehe ratou e tapeahia, aita râ ratou i haapeapea rahi roa mai ia Andrei. Faaoti atura Andrei i te pee i to ratou hiˈoraa e i te tiaturi ia Iehova. Oioi atura o ˈna i te fanaˈo i te hau e te oaoa nei o ˈna i teie nei noa ˈtu te vai noa ra te fifi. Hoê â huru no tatou. Ua faaara mai Iesu e e hamani-ino-hia tatou. Tera râ, ua haapapu atoa o ˈna e e nehenehe tatou e vai taiva ore.​—A taio i te Ioane 15:20; 16:33.

16. Eaha te aratairaa e titauhia ia pee ia faaruru tatou i te hamani-ino-raa?

¹⁶ Ia opanihia aore ra ia haafifihia ta tatou  ohipa, e fanaˈo paha tatou i te tahi mau aratairaa no ǒ mai i te amaa e te mau matahiapo. Ua faanahohia te reira no te paruru ia tatou, ia nehenehe tatou e fanaˈo i te maa pae varua e ia tamau tatou i te poro i e rave rahi atu â vahi. E tutava anaˈe i te pee i te mau aratairaa noa ˈtu aita tatou e taa maitai ra i te reira. (Iak. 3:17) Hau atu, eiaha roa ˈtu tatou e horoa ia vetahi ê i te mau haamaramaramaraa no nia i to tatou mau taeae e tuahine.​—Koh. 3:7.

17. Mai te mau aposetolo i te senekele matamua, eaha ta tatou e faaoti papu i te rave?

¹⁷ Te hamani ino ra Satani i te mau tavini a Iehova no te mea “tei ia ratou ra te ohipa faaiteraa i te parau o Iesu.” (Apo. 12:17) Eiaha râ e mǎtaˈu ia Satani e i te feia e pee ra ia ˈna. Ia poro e ia haapii tatou i te taata noa ˈtu te patoiraa, e oaoa e e vai hau noa tatou. I te senekele matamua, ua faaue te mau tia mana ati Iuda i te mau aposetolo ia faaea i te poro. Tera râ, ua maiti te mau aposetolo i te auraro i te Atua. Ua tamau ratou i te poro e ua oaoa ratou i te na reiraraa. (Ohi. 5:27-29, 41, 42) Papu, ia haafifihia ta tatou ohipa, e titauhia ia haapao maitai ia tatou a poro ai. (Mat. 10:16) Ia tutava râ tatou i te horoa i te mea maitai roa ˈˈe, e fanaˈo tatou i te hau e te oaoa ia rave i to Iehova hinaaro e ia poro i te taata.

18. O vai te nehenehe e horoa i te hau mau?

¹⁸ Ia papu ia outou e i te mau taime fifi, e nehenehe tatou e fanaˈo i te hau. I taua taime ra, e haamanaˈo anaˈe e no ǒ mai i te Atua te hau mau. Maoti noa Iehova e fanaˈo ai tatou i te reira. A tiaturi ia ˈna a faaruru ai outou i te maˈi pee, te ati natura aore ra te hamani-ino-raa. A vai piri noa i ta Iehova faanahonahoraa. A feruri i te a muri aˈe faahiahia mau e tiai mai ra ia outou. A na reira ˈi, “ei pihai iho ïa te Atua o te hau ia outou.” (Phil. 4:9) I roto i to muri nei tumu parau haapiiraa, e ite mai tatou e nafea tatou e nehenehe ai e tauturu i to tatou mau taeae e tuahine ia fanaˈo i te hau o te Atua.