I te hoê mahana, ua mataitai te hoê tuahine i Niu Zelani i te video “Soucions-nous les uns des autres.” I roto, ua faataahia e nafea Iehova e faaite ai i to ˈna aumihi. (Isa. 63:7-9) Faaoti atura to tatou tuahine i te faaohipa i ta ˈna i apo mai i teie video. Ua hinaaro o ˈna e tauturu ia vetahi ê. I taua mahana ra, a haere ai i te fare toa, ua farerei o ˈna i te hoê vahine veve. Ani atura te tuahine i teie vahine e nehenehe anei ta ˈna e hoo mai i te tahi maa na ˈna. Afai atura te tuahine i te maa e ua poro atoa ˈtu o ˈna ma te faaohipa i te api parau E ore roa anei te mauiui?

Ua taˈi teie vahine, ua faataa ˈtu o ˈna e ua paari oia i roto i te parau mau, aita râ o ˈna i haere i mua i te pae varua. E rave rahi matahiti i teie nei to ˈna faarueraa i te faanahonahoraa a Iehova. Aita râ i maoro aˈenei, ua pure o ˈna ia Iehova ia tauturu ia ˈna ia hoˈi ia ˈna ra. Horoa ˈtura te tuahine i te hoê Bibilia na ˈna e ua faaau raua i te hoê mahana no te haapii i te Bibilia. a

Mai ia Iehova, e nehenehe tatou e faaite i te aumihi i te taata atoa, to tatou fetii e to tatou mau taeae e tuahine o te amuiraa e ma te imi i te mau ravea atoa no te poro i te taata.