1. Ia feruri tatou i te faaroo o Aberahama, eaha paha te uiraa e puta mai?

 NOA ˈTU mea rahi tei faarooroo no Aberahama, mea iti râ ta te rahiraa i ite no nia ia ˈna. Area outou, ua matau maitai outou ia ˈna. Ua ite outou e ua piihia o ˈna te “metua no te feia atoa i faatupu i te faaroo.” (Roma 4:11) E ui paha ïa outou: ‘E nehenehe anei au e faatupu i te hoê â faaroo e to Aberahama e e pee i to ˈna hiˈoraa?’ E, e nehenehe.

2. No te aha mea faufaa ia hiˈopoa i te hiˈoraa o Aberahama? (Iakobo 2:22, 23)

² Hoê ravea e faatupu ai tatou i te hoê â faaroo e to Aberahama, o te hiˈopoaraa ïa i to ˈna hiˈoraa. Mai ta te Atua i faaue ia ˈna, ua faarue o ˈna i to ˈna fenua no te ora i raro aˈe i te fare ie. Ua ineine atoa o ˈna i te pûpû i ta ˈna tamaiti ei tusia. E faaiteraa teie mau ohipa i to ˈna faaroo puai. Ua fanaˈo ïa oia i te farii maitai a te Atua e to ˈna auhoaraa. (A taio i te Iakobo 2:22, 23.) Te hinaaro ra Iehova ia fanaˈo atoa tatou, ia fanaˈo oe i teie mau haamaitairaa. No reira Iehova i aratai ai ia Paulo e ia Iakobo ia faahiti i te hiˈoraa o Aberahama i roto i te Bibilia. E hiˈopoa anaˈe i to ˈna hiˈoraa, faahitihia i roto i te Roma pene 4 e te Iakobo pene 2. I roto i na pene e piti, ua faahitihia te hoê parau faahiahia mau no nia ia Aberahama.

3. Nohea mai te parau ta Paulo raua Iakobo i faahiti no nia ia Aberahama?

³ Ua faahiti Paulo raua Iakobo i tei papaihia i roto i te  Genese 15:6. Te na ôhia ra: “Faatupu ihora [Aberahama] i te faaroo ia Iehova, e hiˈo ihora te Atua ia ˈna ei taata parau-tia.” E hiˈo Iehova i te hoê taata ei taata parau-tia i te taime ua mauruuru oia ia ˈna. Auê te faahiahia e nehenehe te taata hara e riro ei taata parau-tia i te aro o te Atua! O ta outou paha ïa e hiaai nei. No reira, ia nehenehe tatou e riro mai ei taata parau-tia, e hiˈopoa anaˈe mea nafea Aberahama i te riroraa ei taata parau-tia no te Atua.

4. Na te aha e tapea ra i te taata ia ore ia riro ei taata parau-tia?

⁴ I roto i ta ˈna rata i to Roma, ua parau Paulo e ua hara te taata atoa. (Roma 3:23) E nafea te Atua e hiˈo ai ia tatou ei taata parau-tia a nehenehe atu ai e fanaˈo i ta ˈna farii maitai? No te ite i te pahonoraa, ua faaohipa Paulo i te hiˈoraa o Aberahama.

5. No te aha te Atua i hiˈo ai ia Aberahama ei taata parau-tia? (Roma 4:2-4)

⁵ Ua hiˈo Iehova ia Aberahama ei taata parau-tia a ora noa ˈi oia i te fenua o Kanaana. No te aha? No te mea anei ua haapao Aberahama i te Ture a Mose ma te tia roa? E ere roa ˈtu. (Roma 4:13) Ua horoahia teie Ture i te nunaa o Iseraela hau atu i te 400 matahiti i muri aˈe roa. No te aha ïa te Atua i hiˈo ai ia Aberahama ei taata parau-tia? No to ˈna faaroo.​—A taio i te Roma 4:2-4.

6. E nafea Iehova e hiˈo ai i te taata hara ei taata parau-tia?

⁶ Ua faataa Paulo i muri mai e ia tiaturi te tahi taata i te Atua, “e hiˈohia ïa to ˈna faaroo ei parau-tia.” (Roma 4:5) Ua parau atoa Paulo: “Ua parau atoa Davida no nia i te oaoa o te taata ta te Atua i hiˈo ei taata parau-tia, noa ˈtu e aita ta ˈna mau ohipa e tu roa ra i te ture: ‘E oaoa te feia tei faaorehia ta ratou mau ohipa iino e tei tapoˈihia ta ratou mau hara, e oaoa te taata ta Iehova e ore e haamanaˈo faahou i ta ˈna hara.’ ” (Roma 4:6-8; Sal. 32:1, 2) E faaore roa aore ra e tapoˈi te Atua i te mau hara a te feia e tiaturi ra ia ˈna. Eita o ˈna e haamanaˈo faahou i te reira. No to ratou faaroo e hiˈo ai o ˈna ia ratou ei taata parau-tia.

7. Mea nafea te mau tavini taiva ore i te riroraa ei taata parau-tia?

⁷ Papu ua riro Aberahama, Davida e te tahi atu mau tavini taiva ore ei taata parau-tia no te Atua noa ˈtu e taata hara ratou. Maoti to ratou faaroo, ua hiˈo Iehova ia ratou ei taata hapa ore ia faaauhia i te feia tei ore i haamori ia Iehova. (Eph. 2:12) I roto i ta ˈna rata i to Roma, ua haapapu Paulo e e titauhia te faaroo no te riro ei hoa no te Atua mai ia Davida raua Aberahama. Hoê â huru no tatou maoti ïa te faaroo.

8-9. Eaha ta vetahi i parau no nia i te mau rata a Paulo raua Iakobo e no te aha?

⁸ I te roaraa o te mau senekele, ua tupu te aimârôraa i rotopu i te tahi mau tia haapaoraa no nia i te faaroo e te ohipa. E haapii vetahi o ratou e ia faaorahia te taata e navai noa te tiaturiraa ia Iesu Mesia. Ua faaroo paha outou ia ratou ia parau “A farii ia Iesu, e ora ïa oe.” E faahiti atoa ratou i ta Paulo i parau: “Te taata ta te Atua i hiˈo ei taata parau-tia, noa ˈtu e aita ta ˈna mau ohipa e tu roa ra i te ture.” (Roma 4:6) I te tahi atu pae, e  parau vetahi e nehenehe “oe e faaorahia” ia tere oe na te mau vahi faataahia ei vahi moˈa na te Ekalesia e ia rave oe i te mea maitai. E faahiti paha ratou i te Iakobo 2:24: “E parauhia te hoê taata e taata parau-tia na roto i te ohipa, eiaha i te faaroo anaˈe.”

⁹ No te mea e mea taa ê ta ratou mau tiaturiraa, te manaˈo ra te tahi feia tuatapapa Bibilia e aita to Paulo raua Iakobo manaˈo e tu ra no nia i te faaroo e te ohipa. Ia au i te tahi mau tia haapaoraa, no Paulo e navai noa te faaroo no te fanaˈo i te farii maitai a te Atua, area no Iakobo, mea faufaa ia rave i te mea maitai. Ua parau te hoê orometua tuatapapa faaroo e aita Iakobo i taa no te aha Paulo i parau ai e navai noa te faaroo no te riro ei taata parau-tia. No ˈna aita Iakobo i farii i teie manaˈo. Tera râ, ua aratai Iehova ia raua toopiti ia papai i te reira. (Tim. 2, 3:16) No reira, no te taa i te tumu i papai ai Paulo raua Iakobo i te reira mea faufaa ia hiˈopoa eaha ˈtu â ta raua i faahiti.

10. Eaha “te ohipa” ta Paulo i faahiti? (Roma 3:21, 28) (A hiˈo atoa i te hohoˈa.)

¹⁰ Eaha te “ohipa” ta Paulo i faahiti i te Roma pene 3 e te pene 4? Na mua roa, ua faahiti o ˈna i “te ohipa i ravehia ia au i te ture,” oia hoi te Ture a Mose tei horoahia i te mouˈa Sinai. (A taio i te Roma 3:21, 28.) E au ra e i te tau o Paulo, ua manaˈo vetahi Kerisetiano ati Iuda e titauhia ia tamau ratou i te haapao i te Ture a Mose e te mau ohipa ta teie Ture e faaue ra ia rave. No reira Paulo i faahiti ai i te hiˈoraa o Aberahama. Ua haapapu o ˈna e eita e titauhia ia haapao i “te ohipa i ravehia ia au i te ture” no te riro ei taata parau-tia i te aro o te Atua. Ua  faataa râ Paulo mea faufaa ia faatupu i te faaroo. Mea faaitoito mau teie manaˈo inaha, te haapii mai ra te reira e ia faatupu tatou i te faaroo i te Atua e ia Iesu, e fanaˈo ïa tatou i te farii maitai a te Atua.

11. Eaha te mau “ohipa” ta Iakobo i faahiti?

¹¹ Mea ê râ te “ohipa” ta Iakobo i faahiti i te pene 2 i “te ohipa i ravehia ia au i te ture” ta Paulo i faahiti. Te faahiti ra Iakobo i te mau ohipa ta te mau Kerisetiano e rave i roto i to ratou oraraa. Na te reira e faaite e faaroo mau anei to te hoê Kerisetiano aore ra aita. E hiˈopoa anaˈe e piti faahohoˈaraa ta Iakobo i faaohipa.

12. Mea nafea Iakobo i te faataaraa i te tuatiraa i roto i te faaroo e te ohipa? (A hiˈo atoa i te hohoˈa.)

¹² I roto i te faahohoˈaraa matamua, ua faataa Iakobo eiaha te mau Kerisetiano e maitiiti i te taata. Ua faahohoˈa o ˈna i teie manaˈo ma te faaohipa i te hiˈoraa o te hoê taata tei faaite i te hamani maitai i te tahi taata taoˈa rahi, area te taata veve, ua haafaufaa ore ïa o ˈna. Ua faahiti atoa Iakobo e te parau nei teie taata e faaroo to ˈna, tera râ aita ta ˈna mau ohipa e haapapu ra i te reira. (Iak. 2:1-5, 9) I roto i te piti o ta ˈna faahohoˈaraa, ua faahiti Iakobo i te tahi taata tei ite ‘e te ere nei te hoê taeae aore ra tuahine i te ahu e te maa,’ aita râ i tauturu atu. Noa ˈtu e parau teie taata e faaroo to ˈna, mea faufaa ore aita anaˈe e ohipa. Ua papai hoi Iakobo: “Te faaroo aita e ohipa, mea pohe.”​—Iak. 2:14-17.

13. O vai te hiˈoraa ta Iakobo i faahiti no te faataa i te faufaaraa ia faaite i te faaroo na roto i te ohipa? (Iakobo 2:25, 26)

¹³ Ua faahiti Iakobo ia Rahaba ei hiˈoraa maitai, inaha ua faaite oia i to ˈna faaroo na roto i ta ˈna mau ohipa. (A taio i  te Iakobo 2:25, 26.) I to ˈna faarooraa i te parau no nia ia Iehova, ua taa ia ˈna e tei ia Iseraela ra o Iehova. (Ios. 2:9-11) Ua paruru oia e piti Iseraela mata huna. Ei faahopearaa, ua riro teie vahine tia ore e ere i te Iseraela, ei taata parau-tia mai ia Aberahama. Te haapapu ra te hiˈoraa o Rahaba i te faufaaraa ia faaite i te faaroo na roto i te ohipa.

14. No te aha tatou e parau ai e te tuati ra te manaˈo o Paulo raua Iakobo no nia i te faaroo e te ohipa?

¹⁴ Noa ˈtu mea ê te faataaraa a Paulo e ta Iakobo no nia i te faaroo e te ohipa, te tuati ra to raua manaˈo. Ua parau Paulo i te mau Kerisetiano ati Iuda e eita roa ˈtu ratou e fanaˈo i te farii maitai a Iehova mai te peu e pee noa ratou i ta te Ture a Mose e faaue ra. Area Iakobo, ua faataa o ˈna i te faufaaraa ia faaite te mau Kerisetiano atoa i to ratou faaroo ma te hamani maitai ia vetahi ê.

15. Eaha te tahi mau ravea e faaite ai tatou i te faaroo? (A hiˈo atoa i te hohoˈa.)

¹⁵ Aita Iehova i parau ia rave iho â mai ta Aberahama i rave no te riro ei taata parau-tia. E rave rahi ravea e nehenehe ai tatou e faaite i te faaroo na roto i te ohipa. Ma te farii maitai anei i te taata i te mau putuputuraa, ma te tauturu i te mau taeae e tuahine e ma te hamani maitai i to tatou mau fetii. Ma te na reira, e fanaˈo tatou i te farii maitai a te Atua. (Roma 15:7; Tim. 1, 5:4, 8; Ioa. 1, 3:18) Te ravea hoê roa no te faaite i to tatou faaroo, o te pororaa ïa i te parau apî oaoa ma te itoito. (Tim. 1, 4:16) E nehenehe tatou paatoa e faaite na roto i te  ohipa e te tiaturi ra tatou e tupu iho â te mau parau fafau a Iehova, e o ta ˈna mau huru raveraa te mea maitai roa ˈ ˈe. Ia na reira tatou, e hiˈo ïa te Atua ia tatou ei taata parau-tia e ei hoa no ˈna.

16. Eaha te tuatiraa i roto i te tiaturiraa e te faaroo o Aberahama?

¹⁶ I te Roma pene 4, e itehia te tahi atu haapiiraa faufaa no nia ia Aberahama, oia hoi te faufaaraa o te tiaturiraa. Ua fafau Iehova e haamaitai oia i “te nunaa e rave rahi” na roto ia Aberahama. A feruri na i te tiaturiraa faahiahia o Aberahama! (Gen. 12:3; 15:5; 17:4; Roma 4:17) Tera râ, i te 100raa o to Aberahama matahiti e 90 to Sara, aita â raua i tamariihia ˈtura. Ia hiˈohia, e au ra e aita raua e nehenehe e fanau i te tamarii. Mea fifi paha ïa no Aberahama ia tiaturi i teie parau fafau. “No to ˈna râ faaroo i tiaturi noa ˈi oia e riro mau oia ei metua no te nunaa e rave rahi.” (Roma 4:18, 19) Tera iho â tei tupu. Ua riro oia ei metua tane no Isaaka, te tamaiti ta ˈna i tiai noa na.​—Roma 4:20-22.

17. E nafea ia ite e nehenehe tatou e riro ei taata parau-tia e ei hoa no te Atua?

¹⁷ E nehenehe tatou e fanaˈo i te farii maitai a te Atua, a riro atu ai ei taata parau-tia e ei hoa no ˈna mai ia Aberahama. Ua faahiti Paulo i teie manaˈo a na ô ai: “Aita . . . te parau ‘ua hiˈohia oia ei taata parau-tia no to ˈna faaroo’ i papaihia no [Aberahama] anaˈe, no tatou atoa râ tei maitihia e te Atua ia hiˈohia tatou ei taata parau-tia, no te mea te tiaturi nei tatou i te Atua tei faatia ia Iesu.” (Roma 4:23, 24) Mai ia Aberahama, mea faufaa ia faatupu i te faaroo, ia faaite i te reira na roto i te ohipa e ia puai atu â to tatou tiaturi i te mau parau fafau a Iehova. Ua faahiti Paulo i to tatou tiaturiraa i roto i te Roma pene 5. Ta tatou ïa e hiˈopoa i to muri nei tumu parau haapiiraa.