Ua fanauhia vau i 1927 i Marite, i te hoê oire iti i pihai iho ia Chicago, i Illinois. E pae tamarii matou, o Jetha, Don, o vau, Karl, e o Joy. Ua faaoti matou pauroa e tavini ia Iehova ma to matou aau atoa. Ua apiti Jetha i te piti o te Piha haapiiraa no Gileada i 1943. Area Don, Karl e o Joy, ua tavini ïa ratou i te Betela i Brooklyn, i New York. O Don na mua i 1944, Karl i 1947, e o Joy i 1951. Ua faaitoito mai to ratou hiˈoraa, e to papa raua mama hiˈoraa, ia ˈu ia rave hau atu â i roto i ta Iehova taviniraa.

Mea taio roa papa raua mama i te Bibilia. Mea here atoa na raua i te Atua, e ua haapii raua ia matou ia here atoa ia ˈna. Aita papa i faatura faahou i te mau ekalesia i muri iho i ta ˈna tau faehau na Europa i te roaraa o te Tamaˈi rahi matamua. Ua oaoa roa mama i to papa hoˈiraa mai i te fare. Na ô atura o ˈna ia papa: “Mai Karl, haere tâua i te pureraa.” Pahono maira papa: “Mai ïa, eita râ vau e tomo i roto i te fare pure.” Ui atura mama: “Eˈha hoi?” Pahono maira papa: “A tupu ai te tamaˈi, ua haamaitai te mau tia o tera noa iho â haapaoraa i te mau faehau e aro ra te tahi i te tahi. O vai ïa ta te Atua i turu?”

Tei te fare pure o mama i te haereraa mai e piti Ite no Iehova i te fare. Ua pûpû na taeae e piti ia papa i na buka haapiiraa Maramarama (Beretane), o te faataa ra i te buka Apokalupo. Ua au roa papa i na buka e piti, ta mama i taio i to ˈna iho â iteraa i te reira. E i te hoê mahana, i roto i te vea, ite ihora mama i te tahi titau-manihini-raa i te taata atoa e hinaaro ia haapii i te Bibilia maoti na buka. Haere atura o ˈna e hiˈo. E vahine paari tei tatara mai i te opani. Ui atura mama ia ˈna a faaite ai hoê o na buka: “I ǒ nei e haapiihia ˈi teie buka?” Pahono maira taua vahine paari ra: “E, mama. A tomo mai.” I te hebedoma i muri iho, ua afai atoa mama ia matou na muri ia ˈna. E ua na reira matou pauroa te hebedoma.

I te hoê mahana, ua ani te taeae e faatere ra i te haapiiraa ia taio vau i te Salamo 144:15. Te parauhia ra i roto e mea oaoa te feia e haamori ra ia Iehova. Ua au roa vau i tera irava, oia atoa te Timoteo 1, 1:11 o te parau ra e “Atua oaoa” Iehova, e te Ephesia 5:1 e faaitoito mai ra ia “pee i te haerea o te Atua.” Ua haapii mai ïa vau  e ia oaoa hoi au i ta ˈu e nehenehe e rave no to ˈu Atua poiete, e ia haamauruuru vau ia ˈna no te reira. Ua faaitoito vau i te faaohipa i teie na haapiiraa faufaa i te roaraa o to ˈu oraraa.

Te amuiraa fatata roa ˈˈe i ǒ matou i Chicago, e 32 ïa kilometera te atea. Noa ˈtu râ, ua tae iho â matou i te mau putuputuraa, e ua rahi atu â to ˈu ite no nia i te Bibilia. Te haamanaˈo ra vau i te horoaraa Jetha i ta ˈna pahonoraa i te hoê putuputuraa. A faaroo noa ˈi au ia ˈna, feruri ihora vau: ‘Tera atoa hoi to ˈu manaˈo. E nehenehe atoa ïa vau e amo i to ˈu rima no te pahono.’ Haamata ihora ïa vau i te faaineine i ta ˈu mau pahonoraa. Te mea faufaa ˈtu â râ, ua piri atu â vau ia Iehova mai to ˈu na tuaana e na teina, e ua bapetizohia vau i 1941.

Eita e moˈehia ia ˈu te tairururaa tei tupu i 1942, i Cleveland, i Ohio. Hau atu i te 50 vahi na Marite tei natihia i taua tairururaa ra na roto i te niuniu paraparau. I roto matou i te fare ie i te nohoraa na pihai iho noa mai, i te vahi puhaparaa tei faanahohia e te mau taeae. I taua mau mahana ra, te tupu ra ïa te piti o te Tamaˈi rahi e te uˈana noa ˈtu ra te hamani-ino-raa i te mau Ite no Iehova. I te po, ua ite au i te mau taeae i te tuuraa i to ratou pereoo i mua i te vahi puhaparaa, mea huri te muaraa o te pereoo i rapae. E faaea noa hoê i roto i te pereoo no te tiai i te po taatoa. Ia faaroo-noa-hia ˈtu te maniania, e pata-noa-hia ïa te mori pereoo i nia i te feia imi hara ia poirihia to ratou mata, a pupu atoa ˈi. E nehenehe ïa te tahi atu e horo mai e tauturu. ‘Ua ineine noa iho â to Iehova nunaa,’ te manaˈo ïa i puta mai. Ua topa maitai ïa to ˈu taoto, e aita hoê aˈe fifi i tupu.

A manaˈo ai au i tera tairururaa i muri aˈe, ua taa ia ˈu e aita o mama i haapeapea aore ra i riaria noa ˈˈe. Mea papu to ˈna tiaturi ia Iehova e i ta ˈna faanahonahoraa. Eita e moˈehia ia ˈu to ˈna hiˈoraa maitai.

Ua riro mai mama ei pionie tamau na mua rii aˈe i taua tairururaa ra. Mea faaroo roa o ˈna i te mau oreroraa parau no nia i te taviniraa taime taatoa. I to matou hoˈiraa i te fare, na ô maira o ˈna: “E hinaaro vau e tamau i ta ˈu taviniraa pionie, eita râ e maraa mai te peu na ˈu noa e tamâ i te fare.” Ani maira ïa o ˈna i te tauturu. Ua farii matou. Faanaho atura ïa mama ia tamâ matou tataitahi hoê aore ra e piti piha hou te hora taoferaa. Ua reva anaˈe matou i te haapiiraa, e hiˈohiˈo o ˈna mea naho anei te fare hou a haere ai i te pororaa. Noa ˈtu mea ohipa roa mama, mea haapao roa o ˈna ia matou te mau tamarii. Ia hoˈi matou i te fare no te tamaa e ia oti te haapiiraa, to te fare o ˈna. I te tahi mau mahana ia oti te haapiiraa, e na muri atoa matou ia ˈna i roto i te pororaa. Taa ihora ia matou eaha te taviniraa pionie.

Ua riro mai au ei pionie i te 16raa o to ˈu matahiti. Aita â papa i riro atura ei Ite no Iehova. Noa ˈtu râ, ua hinaaro noa o ˈna e ite eaha te huru ta ˈu taviniraa. I te hoê po, ua parau vau ia ˈna e noa ˈtu ta ˈu mau tutavaraa, aita hoê aˈe taata e  hinaaro e haapii i te Bibilia. Ui maira ïa papa: “Eita oe e hinaaro e haapii ia ˈu?” Feruri ihora vau e farii atura. O to ˈu ïa papa ta ˈu piahi matamua. Ua oaoa roa vau.

Ua haapii mâua i te buka “Na te parau mau outou e faatiamâ” (Beretane). Tau taime i muri iho, taa ihora ia ˈu e te tauturu ra papa ia ˈu ia haamaitai i ta ˈu iho haapiiraa Bibilia e te faatereraa i ta vetahi ê haapiiraa. I te hoê po ei hiˈoraa, i muri iho i to mâua taioraa i te hoê paratarafa, ua parau mai o ˈna: “Te taa ra ia ˈu eaha ta te buka e parau ra. Ua papu râ ia oe e tera iho â?” Aita râ vau i ite e nafea ia pahono atu. Na ô atura ïa vau: “Eita ta ˈu e nehenehe e pahono ia oe i teie nei, i ta tâua râ haapiiraa i mua nei.” Imi ihora ïa vau i te mau irava o te haapapu i ta mâua i tauaparau na. Ua haapii ïa vau i te rave i te mau maimiraa ia ineine maitai aˈe au no ta mâua haapiiraa. Ua tauturu mai ïa te reira ia mâua papa ia nuu i mua i te pae varua. Ua faaohipa iho â o ˈna i ta ˈna i haapii mai e ua bapetizohia o ˈna i 1952.

Ia ˈu i faarue i te fare, 17 noa ïa matahiti to ˈu. Ua riro mai Jetha a ei mitionare e o Don ei mero no te Betela. Ua au roa raua i ta raua taviniraa. Ua faaitoito rahi mai te reira ia ˈu. Faaî ihora ïa vau i ta ˈu aniraa no te Betela e no te Haapiiraa no Gileada, e tiai atura vau i ta Iehova faaotiraa. O te taviniraa ïa i te Betela i 1946.

A mairi ai te mau matahiti, mea rahi te ohipa i te Betela tei horoahia mai. Mea rahi atoa ïa ta ˈu i haapii mai. I te roaraa e 75 matahiti i te Betela, ua haapii au i te ohipa nenei buka, te numeraraa faufaa, te hooraa mai e te haponoraa i tei hinaarohia. Ta ˈu râ e au roa, te haapiiraa pae varua ïa e horoahia i te Betela i roto i te haamoriraa poipoi e te tahi atu mau oreroraa parau.

Ua haapii atoa mai au i te hiˈoraa o Karl to ˈu taeae apî aˈe, tei ô i te Betela i 1947. Mea haapao roa o ˈna i ta ˈna iho haapiiraa Bibilia e mea ite atoa i te haapii ia vetahi ê. I te hoê mahana, ua ani au ia ˈna ia tauturu mai no ta ˈu oreroraa parau. Mea rahi te maimiraa ta ˈu i rave, aita râ vau i ite e nafea ia faanaho i te mau manaˈo. Hoê noa uiraa ta ˈna i tuu mai: “Joel, eaha te manaˈo tumu o ta oe oreroraa parau?” I reira noa, taa ihora ia ˈu eaha te rave. Oia hoi e tapea noa mai i te mau manaˈo faufaa. Mau roa ia ˈu tera haapiiraa.

No te oaoa noa i te Betela, mea faufaa roa ia apiti i te pororaa. E nehenehe hoi tatou e farerei i te mau tupuraa faaitoito mau. Te haamanaˈo  maitai ra vau i to mâua te hoê taeae pororaa i te ahiahi i te Bronx i te oire no New York. Ua haere mâua e hiˈo i te hoê vahine tei rave na i Te Pare Tiairaa e te A ara mai na! Ua na ô atu mâua: “Teie ahiahi, te faaite nei mâua i te taata i te mau manaˈo faaitoito no roto mai i te Bibilia.” Teie ta ˈna i parau mai: “Mai te peu e no roto mai i te Bibilia, a tomo mai ïa.” Ua taio e ua aparau matou i nia e rave rahi irava no nia i te Faatereraa arii a te Atua e te ao apî. No te mea ua au roa tera mama, ua titau manihini o ˈna e rave rahi o to ˈna mau hoa ia apiti atoa mai i te hebedoma i muri iho. I muri aˈe, ua riro mai o ˈna e ta ˈna tane faaipoipo ei tavini taiva ore na Iehova.

Ua hinaaro iho â vau e faaipoipo. Ahuru matahiti i muri iho te itearaa mai ia ˈu to ˈu apiti. Ua pure ïa vau ia Iehova ia tauturu mai, a feruri ai i ta ˈu e hinaaro e rave ua faaipoipo anaˈe mâua.

I muri mai i te tairururaa no 1953 i te Yankee Stadium to ˈu farereiraa ia Mary Aniol. Hoê â Piha haapiiraa no Gileada ta raua Jetha, e ua tonohia raua ei mitionare i te hoê â vahi. Mea au roa na Mary e faatia mai i ta ˈna taviniraa mitionare i te taamotu Caraïbes e te mau haapiiraa Bibilia ta ˈna i faatere i tera roaraa. A matau maitai ai mâua te tahi i te tahi, taa ihora ia mâua e hoê â fa ta mâua. Ua here roa mâua te tahi i te tahi e ua faaipoipo mâua i Eperera 1955. E ô mau â Mary ta Iehova i horoa mai, e hiˈoraa maitai atoa o ˈna. Aita e hiˈoraa te ohipa e anihia ia ˈna e rave, mea oaoa noa o ˈna, mea rohi atoa, mea haapao roa ia vetahi ê. E i roto i to ˈna oraraa, o Iehova na mua e ta ˈna Faatereraa arii. (Mat. 6:33) Ua tavini atoa mâua i roto i te tuhaa haaati e toru matahiti. E i 1958, ua titau-manihini-hia mâua i te Betela.

Mea rahi ta ˈu i haapii mai i te hiˈoraa o Mary. I te omuaraa o to mâua faaipoiporaa ei hiˈoraa, ua faaoti mâua e taio mâua i te Bibilia, 15 irava mai tera. Ua oti anaˈe te taioraa, e tatara mâua i tei taiohia mai, a feruri atu ai e nafea ia faaohipa i roto i to mâua oraraa. Pinepine Mary i te faahiti i ta ˈna i haapii mai i Gileada aore ra i roto i ta ˈna taviniraa mitionare. Ua huti mai ïa vau i te haapiiraa e nafea ia faaineine maitai aˈe i ta ˈu mau oreroraa parau, e e nafea ia faaitoito i te mau tuahine.​—Mas. 25:11.

Ua faarue mai ta ˈu vahine here i 2013. Te tiai ru nei au i te farerei faahou ia ˈna i roto i te ao apî. Ua faaoti au e tamau noa i te haapii mai, a tiaturi ai ia Iehova ma to ˈu aau atoa. (Mas. 3:5, 6) E mahanahana e e oaoa roa to ˈu aau ia feruri au i ta te mau tavini a Iehova e rave i roto i te ao apî. Oia atoa te haapiiraa mai i te mau mea apî no ǒ mai e no nia i to tatou Orometua Rahi roa ˈˈe. E mauruuru noa vau ia ˈna no ta ˈna mau haapiiraa atoa i tera roaraa e no to ˈna hamani maitai rahi.