Ua papai Paulo i te matahiapo ra o Timoteo: “E faaueraa mana ta ˈu e tuu atu ia oe i te aro o te Atua e o te Mesia ra o Iesu e te mau melahi maitihia, oia hoi ia haapao maite oe i teie mau aratairaa ma te ore e faahapa ru noa e ma te ore e maitiiti i te taata.”—Tim. 1, 5:21.

Te mea papu, e ere na 144 000. I to Paulo papairaa ia Timoteo, aita â te tia-faahou-raa o te mau Kerisetiano faatavaihia i haamata ˈtura. Aita â te mau aposetolo e te tahi atu feia faatavaihia i riro atura ei varua, e ere ïa o ratou “te mau melahi maitihia.”—Kor. 1, 15:50-54; Tes. 1, 4:13-17; Ioa. 1, 3:2.

E ere atoa “te mau melahi maitihia” i te mau melahi tei orure hau i te tau o te diluvi. Ua turu hoi ratou ia Satani e ua riro ei demoni. Ua patoi ratou ia Iesu. (Gen. 6:2; Luka 8:30, 31; Pet. 2, 2:4) A muri aˈe, e huri Iesu ia ratou e ia Satani i roto i te abuso 1 000 matahiti. I muri iho, e haamouhia ratou pauroa.—Iuda 6; Apo. 20:1-3, 10.

No reira “te mau melahi maitihia” ta Paulo i faahiti i te Timoteo 1, 5:21 o te mau melahi ïa tei turu i ‘te Atua e te Mesia.’

E ahuru tausani melahi taiva ore ratou. (Heb. 12:22, 23) E ere hoê â hopoia ta Iehova e horoa i te mau melahi tataitahi. (Apo. 14:17, 18) Ei hiˈoraa, ua ani Iehova i te hoê noa melahi ia tairi 185 000 faehau no Asura. (Arii 2, 19:35) No te tahi râ mau melahi e ‘iriti ê mai ratou mai roto mai i te Faatereraa arii a te Mesia i te feia atoa e faaturori ia vetahi ê e te feia e ofati ra i te ture.’ (Mat. 13:39-41) E no te tahi atu mau melahi, ‘e haaputuputu ratou i te mau taata maitihia’ oia hoi te feia faatavaihia. (Mat. 24:31) Ua faauehia i te tahi mau melahi ia ‘tiai ia tatou i to tatou mau haerea atoa.’—Sal. 91:11; Mat. 18:10; a hiˈo atoa i te Mataio 4:11; Luka 22:43.

“Te mau melahi maitihia” o te Timoteo 1, 5:21, o te mau melahi paha e tuhaa ta ratou no te haapao maitai i te mau amuiraa. Ua horoa atoa Paulo i te mau aˈoraa no nia i te mau matahiapo e te faaturaraa te amuiraa ia ratou. E titauhia ia amo te mau matahiapo i ta ratou mau hopoia “ma te ore e faahapa ru noa e ma te ore e maitiiti i te taata.” Eiaha atoa ratou e rave ru noa i te faaotiraa. Te hoê tumu e pee ai te mau matahiapo i ta Paulo aˈoraa, e tavini hoi ratou i te mau taeae e tuahine “i te aro o te Atua e o te Mesia ra o Iesu e te mau melahi maitihia.” No reira, ua horoahia i te tahi mau melahi te hopoia e tauturu i te mau amuiraa. E paruru ratou i te mau tavini a Iehova, e aratai i te ohipa pororaa e e faatia ratou ia Iehova i ta ratou i rave.—Mat. 18:10; Apo. 14:6.