1. Ia au i te Petero 1, 5:2, eaha te hopoia a te mau matahiapo?

 UA FAATOROAHIA te mau matahiapo no te aupuru i te mau mamoe a Iehova. Mea faufaa no te matahiapo te hopoia e tavini i to ratou mau taeae e tuahine e e rohi ratou no “te tiai mau â ia ratou.” (Ier. 23:4; a taio i te Petero 1, 5:2.) Auê tatou i te mauruuru i teie mau taeae i roto i ta tatou mau amuiraa!

2. Eaha te fifi ta te mau matahiapo e faaruru ra?

² A haapao ai te mau matahiapo i ta ratou hopoia, e rave rahi fifi ta ratou e faaruru. A tahi roa, mea rahi ta ratou ohipa no te haapao i te amuiraa. Ei hiˈoraa, ua haapii Tony, hoê matahiapo no Marite, ia farii e eita e maraa ia ˈna pauroa ta ˈna mau hopoia. Te faataa ra oia: “A haamata ˈi te maˈi COVID-19 i te parare, ua tamata vau i te farii e rave rahi hopoia no te faanaho i te mau putuputuraa e te taviniraa. Tera râ, a farii noa ˈi au i tera rahiraa hopoia, e au ra e aita e hopearaa. Varavara ˈtura vau i te taio i te Bibilia, i te rave i ta ˈu iho haapiiraa e i te pure.” E fifi ê ta Ilir, hoê matahiapo no Kosovo, i faaruru. A tupu ai te tamaˈi i to ˈna vahi, mea fifi no ˈna ia pee i te aratairaa horoahia mai e te faanahonahoraa. Te na ô ra oia: “Ua tamatahia to ˈu itoito i to te amaa tonoraa ia ˈu no te tauturu i te mau taeae e tuahine i te hoê vahi atâta. Ua mǎtaˈu vau e e au ra e aita e tano roa ra te mau aratairaa.” No Tim, hoê mitionare no Asia, mea fifi no ˈna ia haapao i ta ˈna mau hopoia atoa, i tera e tera mahana. Te parau ra oia: “I te tahi taime, e rohirohi to ˈu feruriraa e e horuhoru to ˈu aau.” Eaha te tauturu i te mau matahiapo i mua i tera mau fifi?

3. E nafea tatou paatoa e faufaahia ˈi i te hiˈoraa o te tavana ra o Gideona?

³ Mea rahi ta te mau matahiapo e haapii mai i te hiˈoraa  o te tavana ra o Gideona. (Heb. 6:12; 11:32) Ua riro oia ei paruru e ei tiai no te nunaa o te Atua. (Tav. 2:16; Par. 1, 17:6) Mai ia Gideona, ua faatoroahia te mau matahiapo no te aupuru i te nunaa o te Atua i te hoê tau arepurepu mau. (Ohi. 20:28; Tim. 2, 3:1) E nehenehe tatou e pee i to Gideona aau faahaihai, to ˈna haehaa e to ˈna auraro. Ua tamatahia to ˈna faaoromai tamau a haapao ai oia i ta ˈna mau hopoia. Noa ˈtu e ere tatou i te matahiapo, e nehenehe tatou pauroa e faatupu i te mauruuru no to tatou mau taeae matahiapo. E nehenehe ïa tatou e turu i teie mau taeae pae varua itoito mau.—Heb. 13:17.

4. Mea nafea Gideona i te faaiteraa i te aau faahaihai e te haehaa?

⁴ E taata aau faahaihai e te haehaa o Gideona. b I te parauraa te melahi a Iehova ia ˈna e o ˈna tei maitihia no te faaora ia Iseraela i te rima puai o to Midiana, ua pahono teie taata haehaa: “To ˈu te opu haihai roa ˈˈe i rotopu ia Manase, e o vau te taata haihai roa ˈˈe i roto i te utuafare o to ˈu metua tane.” (Tav. 6:15) Ua manaˈo o ˈna eita e maraa ia ˈna tera hopoia, ua papu râ ia Iehova e haere ia ˈna. Maoti ïa te tauturu a Iehova, ua noaa ia Gideona ia haapao maitai i ta ˈna hopoia e tae roa ˈtu i te hopea.

5. E nafea te aau faahaihai e te haehaa o te hoê matahiapo e tamatahia ˈi?

⁵ E faaitoito te mau matahiapo i te faatupu i te aau faahaihai e te haehaa i te mau taime atoa. (Mika 6:8; Ohi. 20:18, 19) Eita ratou e faatietie ia ratou no to ratou aravihi e ta ratou ohipa i rave. Eita atoa râ ratou e haafaufaa ore ia ratou no ta ratou mau hapa. I te tahi taime, e ere i te mea ohie no te mau matahiapo. Ei hiˈoraa, e nehenehe te hoê matahiapo e farii e rave rahi hopoia a ore atu ai e maraa pauroa ia ˈna. E nehenehe atoa te taata e haapopou aore ra e faaino ia ˈna no ta ˈna huru raveraa. Eaha ta te mau matahiapo e haapii i te hiˈoraa o Gideona i roto i tera na tupuraa?

6. E nafea te mau matahiapo e pee ai i te aau faahaihai o Gideona? (A hiˈo atoa i te hohoˈa.)

⁶ A ani i te tauturu. Ua ite te hoê taata  aau faahaihai e otia to ˈna. O te huru ïa o Gideona i to ˈna aniraa i te tauturu. (Tav. 6:27, 35; 7:24) E na reira atoa te mau matahiapo feruriraa paari. Te faataa faahou ra Tony: “Ia ˈu i paari mai, ua matau vau i te farii i te mau huru ohipa atoa noa ˈtu eita e maraa ia ˈu. Faaoti ihora vau e hiˈopoa i te parau o te aau faahaihai i roto i te haamoriraa utuafare. Ani atura vau i ta ˈu vahine ia faaite mai i to ˈna manaˈo. Hau atu, ua mataitai faahou vau i te video Mai ia Iesu, a faaineine, a tiaturi e a faaitoito ia vetahi ê i nia i te jw.org.” Ani atura Tony i te tauturu no te haapao i ta ˈna mau hopoia. Te parau ra o ˈna: “I te mea e te haapaohia ra te mau ohipa a te amuiraa, e taime ïa to ˈu no te faafatata ˈtu â ia Iehova.”

7. Ia faainohia te mau matahiapo, e nafea ratou e pee ai i te hiˈoraa o Gideona? (Iakobo 3:13)

⁷ Eiaha e iria ia faainohia outou. E nehenehe atoa te mau matahiapo e pee i te hiˈoraa o Gideona ia faainohia ratou. I te hoê mahana, ua faaino to Epheraima ia ˈna, aita o ˈna i iria ˈtu, ua faaea hau noa râ. (Tav. 8:1-3) Ma te haehaa, ua faaroo oia i ta ratou mau haapeapearaa e ua paraparau oia ia ratou ma te mǎrû. I te hopearaa, mǎrû roa mai nei ratou. E pee te mau matahiapo feruriraa paari i te hiˈoraa o Gideona ma te faaroo maite i te feia e faaino ra e ma te paraparau atu ma te mǎrû. (A taio i te Iakobo 3:13.) Ma te na reira, e tupu te hau i roto i te amuiraa.

8. E nafea te mau matahiapo ia haapopouhia ratou? A horoa i te hiˈoraa.

⁸ A faahoˈi i te hanahana ia Iehova ra. A faahanahanahia ˈi Gideona no to ˈna upootiaraa i nia i te ati Midiana, ua faahoˈi oia i te hanahana ia Iehova ra. (Tav. 8:22, 23) E nafea te mau matahiapo e pee ai i te hiˈoraa o Gideona? Ma te faahoˈi i te hanahana ia Iehova ua manuïa anaˈe ta ratou ohipa. (Kor. 1, 4:6, 7) Ei hiˈoraa, ia haapopouhia te hoê matahiapo no to ˈna aravihi e horoa i te haapiiraa, e nehenehe o ˈna e haamanaˈo atu e no roto mai ta ˈna mau haapiiraa i te Parau a te Atua e na te faanahonahoraa a Iehova e faaineine ia tatou ia riro ei taata haapii. Mea au ia feruri pinepine te mau matahiapo e aita anei ratou e faahanahana ra ia ratou iho. Teie te hiˈoraa o Timothy, hoê taeae mea maoro te taviniraa ei matahiapo. Ia ˈna i faatoroa-apî-hia, mea au na Timothy e horoa i te oreroraa parau. Te parau ra oia: “I te haamataraa, e faaineine maitai au i ta ˈu omuaraa parau e ta ˈu mau faahohoˈaraa. Mea au roa na te amuiraa. Te vahi ino râ, e ere faahou te Bibilia aore ra o Iehova te faahanahanahia, o vau râ.” I muri iho, ua taa ia Timothy e tano ia faatitiaifaro i ta ˈna huru haapiiraa ia ore te taata ia faatietie noa ia ˈna. (Mas. 27:21) Eaha tei tupu? Te faataa ra oia: “I teie nei, e rave rahi tei faaite ia ˈu mea nafea ta ˈu oreroraa parau i te tautururaa ia ratou ia faaafaro i te hoê fifi, ia faaruru i te hoê ati e ia faafatata ˈtu â ia Iehova. Mea au aˈe na ˈu ia faaroo i teie mau parau, i te mau parau faatietie a tau matahiti i teie nei.”

9. Mea nafea te auraro e te itoito o Gideona i te tamataraahia? (A hiˈo i te hohoˈa i te api matamua.)

⁹ Ua tamatahia te auraro e te itoito o Gideona i to ˈna riroraa mai ei tavana. E hopoia atâta ta ˈna, ua faauehia oia e vavahi i te fata ta to ˈna metua tane i hamani no Baala. (Tav. 6:25, 26) I muri aˈe, ia ˈna i haaputuputu i te mau faehau no te hoê tamaˈi, ua faauehia oia e piti taime e  faaiti i te rahiraa faehau i roto i ta ˈna nuu. (Tav. 7:2-7) I te pae hopea, ua parauhia oia e aro i te puhapa a te enemi i te maororaa po.—Tav. 7:9-11.

10. E nafea te auraro o te hoê matahiapo e tamatahia ˈi?

¹⁰ E titauhia i te mau matahiapo ia “ineine i te auraro.” (Iak. 3:17) E horoa ratou tataitahi i te hiˈoraa maitai ma te auraro oioi i te aratairaa a te mau Papai e ta te faanahonahoraa a te Atua. I te tahi râ taime, e tamatahia to ratou auraro. Ei hiˈoraa, e ere i te mea ohie no te hoê matahiapo ia tae mai e rave rahi aratairaa i te hoê â taime aore ra ia tauiui noa te reira. I mua i te hoê faaotiraa, e feruri paha o ˈna e te tano ra anei te aratairaa. Aore ra e horoahia paha o ˈna te hoê hopoia e mau ai oia i te fare auri. E nafea te mau matahiapo e pee ai i te hiˈoraa o Gideona i roto i tera mau tupuraa?

11. Eaha te tauturu i te mau matahiapo ia auraro noa?

¹¹ A faaroo maite i te aratairaa e a haapao i te reira. Ua faataa te Atua ia Gideona e nafea ia vavahi i te fata a to ˈna metua tane, ihea e faatia ˈi i te fata apî no te haamori ia Iehova e eaha te mau animara te pûpûhia ei tusia. Aita Gideona i feruri aˈe e te tano ra anei te aratairaa, ua rave noa o ˈna i tei faauehia ia ˈna. I teie mahana, e faataehia mai i te mau matahiapo ra te mau aratairaa a te faanahonahoraa a Iehova na roto i te rata e te parau faaara, e te tahi atu mau aˈoraa no te maitai o te amuiraa i te pae varua e te pae tino. Mea here na tatou i to tatou mau taeae matahiapo, te pee maite nei hoi ratou i te aratairaa a te Atua. Ia na reira ratou, o te amuiraa taatoa ïa te haamaitaihia.—Sal. 119:112.

12. E nafea te mau matahiapo e faaohipa ˈi i te Hebera 13:17 ia taui te faanahonahoraa a Iehova i te hoê huru raveraa?

¹² Ia ineine outou i te faatano i te hoê huru raveraa. A haamanaˈo e ua faaue Iehova ia Gideona ia faaiti roa i te rahiraa faehau, tae roa i te faito e 99 i nia i te hanere. (Tav. 7:8) Ua manaˈo paha o ˈna: ‘Mea tano anei ia na reira? E manuïa anei?’ Noa ˈtu râ, ua auraro Gideona. I teie mahana, e pee te mau matahiapo i te hiˈoraa o Gideona ia taui te faanahonahoraa a te Atua i te hoê huru raveraa. (A taio i te Hebera 13:17.) Ei hiˈoraa, i 2014, ua taui te Tino aratai i te faanahoraa no te aufau i te haamâuˈaraa no te paturaa i te mau Piha a te Basileia e te mau Piha tairururaa. (Kor. 2, 8:12-14) Eita faahou te mau amuiraa e aufau i te moni tarahu. E amui râ te mau amuiraa na te ao atoa nei i ta ratou mau faufaa no te turu i te mau paturaa i tera e tera fenua, noa ˈtu e mea iti ta te hoê amuiraa e nehenehe e pûpû. I te faarooraa José i  teie tauiraa, ua manaˈo o ˈna eita paha te reira e manuïa. Ua na ô oia i roto ia ˈna: ‘I teie nei, aita hoê aˈe Piha a te Basileia e oti i te hamanihia. Aita teie huru faanahoraa e ravehia ra na ǒ nei.’ Eaha râ tei tauturu ia José ia turu noa i teie aratairaa? Te faaite ra oia: “Ua haamanaˈo mai te Maseli 3:5, 6 ia ˈu ia tiaturi ia Iehova. Auê ïa haamaitairaa ia na reira iho â! Mea rahi aˈe te Piha a te Basileia tei patuhia e ua haapii tatou ia horoa i tei maraa ia tatou, ia tupu te hoê aifaitoraa.”

13. (1) Eaha ta Gideona i papu? (2) E nafea te mau matahiapo e pee ai i to ˈna hiˈoraa? (A hiˈo atoa i te hohoˈa.)

¹³ A rave i te hinaaro o Iehova ma te itoito. Mea atâta te hopoia a Gideona e ua mǎtaˈu atoa o ˈna. Noa ˈtu râ, ua auraro noa oia ia Iehova. (Tav. 9:17) Ua haapapu Iehova ia ˈna e e turu o ˈna ia ˈna no te paruru i te nunaa. Te peehia nei te hiˈoraa o Gideona e te mau matahiapo e ora ra i te mau fenua ua opanihia ta tatou mau ohipa. O ratou na mua te itehia ra i te mau putuputuraa e i roto i te taviniraa noa ˈtu e nehenehe ratou e tapeahia, e uiuihia, e erehia i ta ratou ohipa e e hamani-ino-hia. c Ia tupu te ati rahi, e hinaaro te mau matahiapo i te itoito no te auraro i te mau aratairaa e tae mai ia ratou ra, noa ˈtu mea atâta. E faataa mai paha teie mau aratairaa e nafea ia faaite i te poroi e au i te ûa paari e e nafea ia ora ˈtu i te aroraa a Goga no Magoga.—Ezk. 38:18; Apo. 16:21.

14. Mea nafea te faaoromai tamau o Gideona i te tamataraahia?

¹⁴ E titauhia te tino pautuutu no te haapao i te hopoia a Gideona ei tavana. I te horo-ê-raa te ati Midiana i te tahua tamaˈi i te po, ua tapapa Gideona ia ratou mai te peho no Iezereela e tae roa i te anavai Ioridana, tei î paha i te raau tupu. (Tav. 7:22) Ua faaea anei Gideona i Ioridana? Aita! Noa ˈtu te rohirohi, ua haere oia e ta ˈna e 300 faehau i te tahi atu pae o te anavai  no te aˈuaˈu i te enemi. I te hopearaa, noaa mai nei ia ratou te ati Midiana e upootia ˈtura ratou.—Tav. 8:4-12.

15. Afea e tamatahia ˈi te faaoromai tamau o te hoê matahiapo?

¹⁵ I te tahi taime, e rohirohi roa paha te hoê matahiapo i te pae tino, feruriraa e aau i te aupururaa oia i te amuiraa e to ˈna utuafare. I roto i tera tupuraa, e nafea te mau matahiapo e pee ai i te hiˈoraa o Gideona?

16-17. Eaha tei tauturu ia Gideona ia faaoromai tamau e eaha ta te mau matahiapo e nehenehe e tiaturi? (Isaia 40:28-31) (A hiˈo atoa i te hohoˈa.)

¹⁶ A tiaturi ia Iehova no te faaitoito ia outou. Ua tiaturi Gideona e faaitoito Iehova ia ˈna e aita o ˈna i tatarahapa. (Tav. 6:14, 34) I te hoê taime, ua tapapa Gideona e ta ˈna mau faehau e piti arii no Midiana. Mea na raro noa ratou, area na arii e piti ra, e au ra e mea na nia i te kamela. (Tav. 8:12, 21) Maoti râ te tauturu a te Atua, ua noaa ia ratou to ratou mau enemi e ua upootia ratou. Hoê â huru no te mau matahiapo. E nehenehe ratou e turui i nia ia Iehova o te ore roa “e rohirohi aore ra e paruparu.” E faaitoito oia ia ratou i te mau taime atoa e hinaaro ai ratou.—A taio i te Isaia 40:28-31.

¹⁷ Teie te hiˈoraa o Matthew, e mero no te hoê Tomite tuatiraa e te fare maˈi. Eaha tei tauturu ia ˈna ia faaoromai tamau? Te na ô ra Matthew: “Ua ite roa vau i te Philipi 4:13 i te tupuraa i roto i to ˈu oraraa. E rave rahi taime, ua rohirohi roa vau, mai te huru ra e eita e haere faahou. Ua pure uˈana vau i te Atua ma te taparu ia ˈna ia faaitoito ia ˈu, to ˈu tino e to ˈu feruriraa, no te turu i to ˈu mau taeae. I tera mau taime, ua itoito-roa-hia vau i te varua moˈa o Iehova, i noaa ˈi ia ˈu te puai no te faaoromai tamau.” Mai ia Gideona, e faaruru to tatou mau taeae matahiapo i te fifi a haapao noa ˈi ratou i te amuiraa. Mea faufaa râ ia ite ratou e e otia to ratou i te pae tino e i te pae aau e ia ore ratou e rave hau atu i tei maraa ia ratou. E nehenehe ratou e tiaturi e e faaroo mai Iehova ia ani ratou i te tauturu e e horoa mai oia i te itoito.—Sal. 116:1; Phil. 2:13.

18. Ei puohuraa, e nafea te mau matahiapo e pee ai i te hiˈoraa o Gideona?

¹⁸ Mea rahi ta te mau matahiapo e nehenehe e haapii mai i te hiˈoraa o Gideona. E tia i te mau matahiapo ia faaite i te aau faahaihai e te haehaa ia farii ratou i te hopoia, ia haapopouhia aore ra ia faainohia ratou. E tia atoa ia ratou ia faaite i te auraro e te itoito, inaha te piri mai ra te hopea o teie nei ao. Mea faufaa ia tiaturi ratou e noa ˈtu te mau fifi ta ratou e faaruru ra, e nehenehe te Atua e faaitoito ia ratou. Papu maitai, mea here na tatou teie mau tiai itoito e e poihere noa tatou ia ratou.—Phil. 2:29.