1-2. Mai ia Lota, eaha te mau fifi ta tatou e faaruru nei i teie mahana?

 IA ITE tatou i te haerea tia ore o te taata i teie nei mahana, e taa ia tatou te manaˈo o Lota. Te na ô ra te Bibilia e ua “mauiui roa [oia] no te mau peu faufau a te feia ofati ture” no te mea ua ite o ˈna e mea au ore na te Atua i tera mau peu. (Pet. 2, 2:7, 8) No to Lota faatura e here i te Atua, ua patoi o ˈna i te haerea tia ore o te feia e haaati ra ia ˈna. Hoê â huru no tatou i teie mahana. Te haaatihia ra tatou e te feia o te ore e faatura ra i te mau ture aveia a Iehova. Noa ˈtu râ, e nehenehe tatou e vai viivii ore ia puai noa to tatou here ia Iehova e ia faatupu tatou i te mǎtaˈu ia ˈna.—Mas. 14:2.

² Te tauturu ra Iehova ia tatou na roto i te mau faaitoitoraa e itehia i roto i te buka Maseli. O tatou pauroa te faufaahia i te aˈoraa paari e vai ra i roto.

3. Ia au i te Maseli 17:3, no te aha mea faufaa ia paruru i to tatou aau? (A hiˈo atoa i te hohoˈa.)

³ Mea faufaa ia paruru tatou i to tatou aau no te mea e hiˈopoa Iehova i te mea e vai ra i roto. E ite o ˈna hau atu i ta te taata e ite nei, inaha e ite o ˈna eaha mau na to roto i to tatou aau. (A taio i te Maseli 17:3.) E here o ˈna ia tatou ia haapao maitai tatou i ta ˈna mau aˈoraa î i te paari. (Ioa. 4:14) Ma te na reira, eita ïa tatou e peehia i te huru haerea tia ore o te feia ino aore ra te mau parau haavare a Satani. (Ioa. 1, 5:18, 19) Rahi atu â tatou i te faafatata ˈtu ia Iehova, puai atu â ïa to tatou here e faatura ia ˈna. E patoi tatou i te manaˈo e rave i te mea tano ore no te mea aita tatou e hinaaro e haamauiui ia ˈna. I mua i te faahemaraa, e ui anaˈe ia tatou iho: ‘E nahea vau e nehenehe ai e haamauiui i Tei faaite i te here rahi ia ˈu nei?’—Ioa. 1, 4:9, 10.

4. Mea nafea te mǎtaˈu i te Atua i te parururaa i te hoê tuahine i mua i te faahemaraa?

 ⁴ Teie te hiˈoraa o Marta, hoê tuahine no Croatie. b Ua faahemahia oia ia rave i te peu taotoraa tia ore. Ua papai oia: “Mea fifi roa no ˈu ia feruri maite e ia mau papu i mua i te hinaaro e tamata i te navenave poto o te hara. Ua paruru râ te mǎtaˈu i te Atua ia ˈu.” Mea nafea râ te reira i te tautururaa ia ˈna? Te na ô ra Marta e ua feruriruri o ˈna i te faahopearaa ia hema oia. E nehenehe atoa tatou e na reira. Te mea ino roa ˈtu, e haamauiui tatou ia Iehova e eita tatou e nehenehe faahou e haamori ia ˈna e a muri noa ˈtu.—Gen. 6:5, 6.

5. Eaha ta tatou e haapii mai i te hiˈoraa o Leo?

⁵ Ia mǎtaˈu tatou ia Iehova, e ara maitai tatou eiaha e tapiri i te feia haerea ino. Ua haapii Leo, hoê taeae no Congo, i te faufaaraa ia na reira. E maha matahiti i muri aˈe i to ˈna bapetizoraa, ua amuimui oia i te feia haerea ino. Ua manaˈo o ˈna e, inaha aita o ˈna e rave ra i ta ratou mau peu ino, aita ïa o ˈna e hara ra ia Iehova. Aita râ i maoro, ua pee o ˈna i te haerea o to ˈna mau hoa e ua haamata i te inu rahi i te ava e i te rave i te peu taotoraa tia ore. Feruri ihora o ˈna i te mau haapiiraa a to ˈna na metua e te oaoa ta ˈna i ere. Rave faahou atura oia i te mea maitai. Maoti te tauturu a te mau matahiapo, ua hoˈi mai oia ia Iehova ra. I teie nei, te oaoa ra o ˈna i te tavini ei matahiapo e ei pionie taa ê.

6. Ua faaauhia na vahine e piti o te Maseli pene 9 i te aha?

⁶ E hiˈopoa anaˈe i te Maseli pene 9, i reira i faaauhia ˈi te feruriraa paari e te maamaa i e piti vahine. (A hiˈo atoa i te Roma 5:14; Galatia 4:24.) Ma te na reira, e haamanaˈo tatou e ua maamaa roa to te ao  a Satani i te peu taotoraa tia ore e te hohoˈa faufau. (Eph. 4:19) No reira, mea faufaa ia faatupu noa i te mǎtaˈu i te Atua e ia maue ê i te ino. (Mas. 16:6) Pauroa ïa tatou, te tane e te vahine, te faufaahia i teie pene. Na vahine toopiti atoa teie e titau nei i te taata maˈua ra, oia hoi “te feia o te ere ra i te haroˈaroˈa.” Mai te huru ra e te na ô mai ra raua: ‘A haere mai i te fare nei, e tamaa anaˈe.’ (Mas. 9:1, 5, 6, 13, 16, 17) Tera râ, mea taa ê roa te tupu no te feia e farii i te hoê aore ra te tahi atu titauraa.

7. Ia au i te Maseli 9:13-18, eaha te faahopearaa o te feia tei farii i te titauraa a te vahine maamaa? (A hiˈo atoa i te hohoˈa.)

⁷ E hiˈopoa anaˈe i te titauraa a te “vahine maamaa.” (A taio i te Maseli 9:13-18.) Mea tuô ta ˈna no te titau i te feia maˈua, “A haere mai i ǒ nei” no te tamaa. Eaha te faahopearaa? “Tei te hohonuraa o te Apoo ta ˈna mau manihini.” Te haamanaˈo ra paha outou i te tahi atu faahohoˈaraa faahitihia i roto i te Maseli. Te faaarahia ra tatou no nia i “te vahine taivaiva” e “te vahine e peu taotoraa tia ore ta ˈna.” Te parauhia ra e: “Te mure ra hoi to ˈna fare i raro i te pohe.” (Mas. 2:11-19) I te Maseli 5:3-10, te faaara-atoa-hia ra tatou no nia i te tahi atu “vahine taivaiva,” “e pou to ˈna na avae i te pohe ra.”

8. Eaha te faaotiraa te tia ia tatou ia rave?

⁸ E tia i te feia e faaroo ra i te reo o te “vahine maamaa” ia rave i te faaotiraa, e farii anei aore ra e patoi i ta ˈna titauraa. Ia tamata vetahi i te turai ia tatou ia rave i te peu taotoraa tia ore aore ra ia pura mai te hohoˈa faufau i nia i te natirara aore ra i nia i te tahi atu ravea, eaha ta tatou e rave?

9-10. Eaha te tahi mau tumu e tia ˈi ia tatou ia patoi i te peu taotoraa tia ore?

⁹ E tumu papu to tatou no te patoi i te peu taotoraa tia ore. Te parauhia ra no te “vahine maamaa”: “Mea maaro te pape tei eiâhia.” Eaha “te pape tei eiâhia”? I roto i te Bibilia, e faaauhia te taotoraa te tane i ta ˈna vahine faaipoipo i te pape haumǎrû. (Mas. 5:15-18) I roto noa i te faaipoiporaa e fariihia ˈi te reira. Mea taa ê roa ïa i “te pape tei eiâhia” o te nehenehe e faaauhia i te mau peu taotoraa tia ore. Mai te hoê taata eiâ, e tamata te taata tei rave i te peu taotoraa tia ore i te huna i te ohipa ino ta ˈna i rave. E manaˈohia paha e mea maaro “te pape tei eiâhia,” mea maamaa roa râ ia manaˈo e aita hoê aˈe te ite i ta ratou i rave,  inaha hoi te ite ra Iehova i te mau mea atoa. Aita hoê aˈe maitai te noaa mai. Te mea ino roa ˈtu te nehenehe e tupu no tatou, o te ereraa ïa i te farii maitai a Iehova.—Kor. 1, 6:9, 10.

¹⁰ E nehenehe te peu taotoraa tia ore e faatupu i te haama, te haafaufaa-ore-raa ia tatou iho e te amahamaharaa i roto i te utuafare. E nehenehe atoa te vahine e hapû ma te opua ore. Papu, e haerea paari ia ore roa ˈtu e farii i te titau-manihini-raa a te vahine maamaa. Hau atu i te ereraa i to ratou auhoaraa e o Iehova, mea rahi tei rave i te peu taotoraa tia ore tei roohia i te maˈi e tei pohe i muri mai. (Mas. 7:23, 26) Te na ô ra te irava 18 o te Maseli pene 9: “Tei te hohonuraa o te Apoo ta ˈna mau manihini.” No te aha ïa e rave rahi te farii nei i te titau-manihini-raa a te vahine maamaa, inaha e tâpû ati te tiai mai ra ia ratou?—Mas. 9:13-18.

11. No te aha mea ino roa ia hiˈo i te hohoˈa faufau?

¹¹ E tia ia tatou ia patoi i te mataitai i te hohoˈa faufau. Te manaˈo ra vetahi e ere te reira i te mea ino. Tera râ, mea atâta e mea haama roa ia mataitai i te hohoˈa faufau. Inaha, e tuino te reira i te feruriraa o te taata e mea fifi ia faaea i tera peu. Hau atu, e vai noa mai teie mau hohoˈa i roto i te feruriraa, eita e noaa ia tumâhia. E turai atoa te reira i te taata ia rave roa i to ratou mau hinaaro tia ore. (Kol. 3:5; Iak. 1:14, 15) Te mea papu, mea rahi tei rave i te peu taotoraa tia ore no to ratou mataitairaa i te hohoˈa faufau.

12. Eaha te rave no te ore e hiˈo i te mau hohoˈa faufau?

¹² Eaha te tia ia rave mai te peu e pura mai te hoê hohoˈa faufau i nia i ta tatou matini afaifai? Eiaha e hiˈo i te reira. Oioi tatou i te na reira, ia haamanaˈo tatou e o to tatou auhoaraa e o Iehova te mea faufaa roa ˈˈe. I teie nei râ, te vai ra te tahi mau hohoˈa e ere paha i te mea faufau roa, tera râ, e nehenehe te reira e faaô mai i te tahi mau manaˈo tia ore i roto i to tatou feruriraa e aau. No te aha ïa e mea tia ia patoi i te reira? No te mea eita tatou e hinaaro e faaturi i roto i to tatou aau. (Mat. 5:28, 29) Te na ô ra David, hoê matahiapo no Thaïlande: “E na ô vau i roto ia ˈu: ‘Noa ˈtu e ere teie hohoˈa i te mea faufau, e mauruuru anei Iehova ia mataitai au i te reira?’ Ua tauturu teie huru feruriraa ia ˈu ia haa ma te paari.”

13. Eaha te tauturu ia tatou ia haa ma te paari?

¹³ E haa tatou ma te paari mai te peu e mǎtaˈu tatou ia Iehova. Inaha, maoti te mǎtaˈu ia Iehova, eita tatou e rave i te tahi noa ˈˈe mea o te nehenehe e haamauiui ia ˈna. Te mǎtaˈu ia Iehova, o “te haamataraa ïa o te paari.” (Mas. 9:10) Teie te manaˈo tei faahitihia i roto i te mau irava matamua o te Maseli pene 9. I roto, ua faaauhia te “paari mau” i te tahi atu vahine.

14. Eaha te tahi atu titau-manihini-raa tei itehia i roto i te Maseli 9:1-6?

¹⁴ A taio i te Maseli 9:1-6. I roto e itehia te hoê titau-manihini-raa no ǒ mai ia Iehova ra, to tatou Atua poiete î i te paari. (Mas. 2:6; Roma 16:27) I roto e ite-atoa-hia te faahohoˈaraa o te hoê tiapai fare e e hitu pou to te reira. Te faahohoˈahia ra te reira i te aau horoa noa o Iehova, inaha te farii nei o ˈna i te mau taata atoa te hinaaro ra e fanaˈo i to ˈna paari.

15. Eaha ta te Atua e titau ra ia tatou?

¹⁵ I roto i te Maseli pene 9, ua faahohoˈahia te “paari mau” i te hoê vahine. Maoti teie faahohoˈaraa e haapii tatou e, e Atua  horoa noa Iehova e mea rahi te mau ô maitatai ta ˈna e horoa ra na tatou. I roto i teie mau irava, te taiohia ra e ua titau manihini teie vahine i te taata ia haere mai i to ˈna fare e amu i te maa. Ua faaineine maite oia i ta ˈna inaˈi e ua anoi o ˈna i ta ˈna uaina no ta ˈna mau manihini. (Mas. 9:2, nota) I muri aˈe, te na ôhia ra i roto i te irava 4 e te 5: “Te parau ra [te paari mau] i tei ere ra i te haroˈaroˈa: ‘A haere mai a amu i ta ˈu maa.’” No te aha mea faufaa ia farii i teie titau-manihini-raa? Te hinaaro ra Iehova ia maitai noa tatou e ia haa tatou ma te paari. Aita o ˈna e hinaaro ra ia rave tatou i te faaotiraa ino a faaruru atu ai i te faahopearaa ino i muri mai. No reira o ˈna e “faaherehere [ai] i te paari mau no te feia afaro.” (Mas. 2:7) Ia mǎtaˈu tatou ia Iehova e hinaaro tatou e faaoaoa i to ˈna aau. E faaroo tatou i ta ˈna aˈoraa e e haapao tatou i te reira.—Iak. 1:25.

16. Mea nafea te mǎtaˈu i te Atua i te tautururaa ia Alain ia rave i te faaotiraa paari e eaha te mau maitai ta ˈna i ite?

¹⁶ Teie te hiˈoraa o Alain. No to ˈna mǎtaˈu i te Atua i rave ai oia i te faaotiraa paari. E matahiapo o ˈna i roto i ta ˈna amuiraa e e orometua haapii i te fare haapiiraa. Te na ô ra oia: “Mea rahi o to ˈu mau hoa ohipa te manaˈo ra e ravea maitai te mataitairaa i te mau hohoˈa faufau no te haapii atu â no nia i te taotoraa e te hoê apiti.” Ua ite maitai râ Alain e mea hape tera manaˈo. Te faatia ra o ˈna: “No to ˈu here e faatura ia Iehova, aita roa ˈtu vau i mataitai i teie mau hohoˈa faufau. Ua faataa atoa vau i to ˈu mau hoa ohipa no te aha vau i rave ai i tera faaotiraa.” Ua haapao Alain i te aˈoraa a te “paari mau” oia hoi, ia “haere i mua na nia i te eˈa o te maramarama.” (Mas. 9:6) Ua faahiahia roa vetahi mau hoa ohipa o Alain i to ˈna hiˈoraa. I teie nei, te haapii ra ratou i te Bibilia e te apiti atoa ra i te mau putuputuraa.

17-18. Eaha te mau maitai ta te feia e farii ra i te titau-manihini-raa a te “paari mau” e fanaˈo e eaha ta ratou e nehenehe e tiaturi no a muri aˈe? (A hiˈo atoa i te hohoˈa.)

¹⁷ Ua faaohipa Iehova i te hiˈoraa o na piti vahine no te faaite mai e nafea ia fanaˈo i te hoê a muri aˈe oaoa. Te imi nei te feia e farii ra i te titau-manihini-raa a te “vahine maamaa” i te oaoa i roto i te mau peu taotoraa tia ore. Aita râ ratou e ite ra i te mau faahopearaa ino ta ratou e faaruru a muri aˈe. Inaha hoi, a na reira ˈi “tei te hohonuraa o te Apoo” to ratou vairaa.—Mas. 9:13, 17, 18.

 ¹⁸ Auê ïa taa-ê-raa e te feia e farii ra i te titau-manihini-raa a te “paari mau”! Te oaoa nei ratou no te mea te fanaˈo ra ratou i tei hinaarohia i te pae varua no te vai piri noa ia Iehova. (Isa. 65:13) Na roto ia Isaia, ua parau Iehova: “A faaroo maitai mai ia ˈu, e a amu i te mea maitai, e au roa ïa outou i te mea maitai roa.” (Isa. 55:1, 2) Ua haapiihia tatou ia au i te mau mea ta Iehova e au ra e ia hae i te mau mea ta ˈna e hae ra. (Sal. 97:10) E oaoa atoa tatou i te titau manihini ia vetahi ê ia nehenehe atoa ratou e fanaˈo i te “paari mau.” Mai te huru ra ïa te tuô ra tatou “na te mau vahi teitei i nia ˈˈe i te oire, a na ô ai: ‘Pauroa te maˈua, a haere mai i ǒ nei.’” Papu, e fanaˈo tatou e te feia e faaroo ra i te mau maitai i teie nei â. Tera râ, e fanaˈo ratou e o tatou atoa i te ora mure ore a haere noa ˈi i mua “na nia i te eˈa o te maramarama.”—Mas. 9:3, 4, 6.

19. Ia au i te Koheleta 12:13, 14, eaha ta tatou e faaoti papu i te rave? (A hiˈo atoa i te tumu parau “ E faufaahia tatou i te mǎtaˈu i te Atua.”)

¹⁹ A taio i te Koheleta 12:13, 14. Ia paruru-noa-hia to outou aau maoti te mǎtaˈu i te Atua e ia tauturu noa te reira ia outou ia vai viivii ore e ia vai piri noa ia Iehova i te roaraa o teie mau mahana hopea. No reira, maoti te mǎtaˈu i te Atua, e tamau tatou i te titau manihini i te mau taata atoa ia imi i te “paari mau” a fanaˈo atu ai i te mau haamaitairaa.