1. Eaha te tia ia tatou ia rave no te ora mai i te mahana o Iehova?

 I ROTO i te Bibilia, ia faahitihia te “mahana o Iehova,” o te taime ïa e haava ˈi Iehova i to ˈna mau enemi e e faaora ˈi i ta ˈna mau tavini. I tahito ra, ua faautua Iehova i te tahi mau nunaa. (Isa. 13:1, 6; Ezk. 13:5; Zeph. 1:8) I to tatou nei tau, e haamata te “mahana o Iehova” i te taime e aro ai te mau tia mana ia Babulonia rahi e tae roa ˈtu i te tamaˈi o Aramagedo. E tia ia faaineine ia tatou no te ora mai i taua “mahana” ra. Ua parau Iesu e tia ia tatou eiaha noa ia faaineine ia tatou no te “ati rahi,” ia “ineine” atoa râ tatou no te reira.—Mat. 24:21; Luka 12:40.

2. No te aha mea faufaa te Tesalonia 1 no tatou?

² I roto i ta ˈna rata matamua i to Tesalonia, ua faaohipa te aposetolo Paulo i te tahi mau faahohoˈaraa no te tauturu i te mau Kerisetiano ia vai ineine no te mahana haavaraa rahi o Iehova. Ua ite Paulo e eita te mahana o Iehova e tae mai i tera iho â taime. (Tes. 2, 2:1-3) Noa ˈtu râ, ua faaara o ˈna i te mau taeae ia vai ineine noa mai te huru ra e e tae mai tera mahana ananahi. E nehenehe atoa tatou e haapao i teie faaararaa. E hiˈopoa anaˈe i ta Paulo i faataa no nia i te mahana o Iehova: (1) E nafea te reira e tae mai ai? (2) O vai te ora mai? (3) E nafea tatou e faaineine ai ia tatou no te ora mai i taua mahana ra?

3. No te aha ua faaauhia te taeraa mai o te mahana o Iehova i te eiâ ra i te po? (A hiˈo atoa i te hohoˈa.)

³ “Mai te eiâ ra i te po.” (Tes. 1, 5:2) Teie te mau parau matamua faaohipahia no te faahiti i te huru e tae mai ai  te mahana o Iehova. Pinepine te eiâ i te haere mai i te po, i te taime e aita te taata e ite ra ia ratou. E haa oioi atoa ratou. Hoê â huru no te mahana o Iehova. E tupu taue noa mai te reira. E hitimahuta te rahiraa o te taata e te mau Kerisetiano mau atoa paha no te vitiviti o te mau tupuraa e itehia i tera taime. Tera râ, taa ê atu i te feia ino, eita tatou e haamouhia.

4. No te aha ua faaauhia te mahana o Iehova mai te mauiui fanau?

⁴ “Mai te vahine hapû ia roohia e te mauiui fanau.” (Tes. 1, 5:3) Aita te vahine hapû i ite afea o ˈna e fanau ai, ua papu râ ia ˈna e e fanau iho â o ˈna. E ia tae te taime no te fanau, e tupu noa mai te reira e e mauiui atoa o ˈna, eita atoa e nehenehe e tapea i te reira. Hoê â huru no te mahana o Iehova. Aita tatou i ite i te mahana e te hora e haamata ˈi te reira. Ua papu râ ia tatou e e tupu taue noa mai te reira, aita e hororaa no te feia ino.

5. No te aha e au te ati rahi i te aahiata?

⁵ Mai te aahiata. Ua faahiti faahou Paulo i te eiâ ra i te po i roto i te toru o ta ˈna faahohoˈaraa. I teie râ taime, ua faahohoˈa o ˈna i te mahana o Iehova i te aahiata. (Tes. 1, 5:4) Ei hiˈoraa, e haapeapea te mau eiâ ia itehia mai ratou, a moˈe atu ai ia ratou ia hiˈo i te hora. E hitimahuta ratou a hiti mai ai te mahana i te aahiata. Hoê â huru no te feia o te vai ra i roto i te poiri i te pae varua. E au ratou i te eiâ ra te huru e te rave noa ra ratou i te mau mea ta Iehova e au ore ra. Area tatou, e vai ineine noa tatou ma te tapi i “te mau mea maitatai huru rau . . . e te parau-tia e te parau mau” e ma te ore roa ˈtu e pee i to ratou huru. (Eph. 5:8-12) I muri iho, ua faaohipa Paulo e piti faahohoˈaraa no te faataa o vai te ora mai i te mahana o Iehova.

6. No te aha e nehenehe e parau e ua taoto te rahiraa o te taata? (Tesalonia 1, 5:6, 7)

⁶ “Te feia . . . e taoto.” (A taio i te Tesalonia 1, 5:6, 7.) Ua faaau Paulo i te feia o te ore e ora mai i te mahana o Iehova i te feia e taoto nei. Aita teie mau feia e ite ra eaha te tupu ati aˈe ia ratou aore ra e taa ra e e taime ru mau â teie. Eita ïa ratou e ite noa ˈˈe i te mau tupuraa e to ratou faufaaraa. I teie mahana, te taoto nei te rahiraa o te taata i te pae varua. (Roma 11:8) Aita ratou e tiaturi ra e te ora nei tatou i “te mau mahana hopea” e te fatata mai ra te ati rahi. Ia itehia râ te mau tauiraa rahi na te ao nei, e nehenehe ratou e faaite i te anaanatae no te poroi o te Faatereraa arii a te Atua. Eita râ te rahiraa o ratou e vai ara i te pae varua. E no te tahi atu o te tiaturi nei i te hoê mahana haavaraa, e manaˈo ïa ratou eita te reira e tae oioi mai. (Pet. 2, 3:3, 4) No reira, te taa ra ia tatou te faufaaraa ia vai ara i te mau mahana atoa.

7. No te aha ua faaauhia te feia e faaruru i te riri o te Atua i te feia taero?

⁷ “Te feia e taero ra i te ava.” Ua faaau Paulo i te feia e faaruru i te riri o te Atua i te feia e taero ra i te ava. Aita te mau taero ava i ite faahou i te haapaoraa e te rave nei ratou i te mau faaotiraa tano ore. Hoê â huru no te feia ino. Aita ratou e haapao ra i te mau faaararaa a te Atua. E rave ratou i te mau faaotiraa o te aratai ra i te haamouraa. Tera râ, te faaitoitohia ra te mau Kerisetiano ia vai ara e ia feruri maite. (Tes. 1, 5:6) Te faataa ra te hoê aivanaa Bibilia i te huru o te hoê taata aita i taero i te ava. Te na ô ra oia: “E faaea hau noa oia, e faito e e hiˈo oia i te mau mea ma te tano a nehenehe atu ai e rave i te faaotiraa maitai.” No te aha mea faufaa ia mau papu e ia vai hau noa tatou? Ma te na reira, eita ïa tatou e faaô i roto i te mau ohipa poritita no te faatitiaifaro i te mau fifi e itehia ra. A piri noa mai ai te mahana o Iehova, e rahi atu â te mau faaheporaa no roto mai i teie mau faanahoraa. Noa ˈtu râ, eita tatou e haapeapea no to tatou huru i mua i te reira. E tauturu mai te varua moˈa o te Atua ia vai hau noa, ia mau papu e ia rave i te faaotiraa maitai.—Luka 12:11, 12.

8. Ia au i te Tesalonia 1, 5:8, eaha te mau faahohoˈaraa faaohipahia no te mau huru maitatai titauhia no te vai ara e no te feruri maite? (A hiˈo atoa i te hohoˈa.)

⁸ ‘A ahu i te tapoˈi ouma . . . e te taupoo.’ Ua faaau Paulo ia tatou i te mau faehau o te vai ara e o te ineine noa i te haere i te aroraa. (A taio i te Tesalonia 1, 5:8.) I te tau aroraa, e titauhia i te hoê faehau ia ineine noa i te mau taime atoa. Hoê â huru no tatou. E ineine noa tatou no te mahana o Iehova ma te ahu mai i te tapoˈi ouma o te faaroo e te here oia atoa te taupoo o te tiaturiraa. E tauturu rahi mai teie mau huru maitatai.

9. E nafea to tatou faaroo e paruru ai ia tatou?

⁹ Mai te tapoˈi ouma e paruru ra i te mafatu o te hoê faehau, e paruru atoa te faaroo e te here i to tatou nei aau. E nehenehe ïa tatou e tamau i te tavini i te Atua e i te pee ia Iesu. Maoti to tatou faaroo, e papu ia tatou e e haamaitai mai Iehova ia imi tatou ia ˈna ma te aau tae. (Heb. 11:6) E turai atoa te reira ia tatou ia vai taiva ore ia Iesu, to tatou Aratai noa ˈtu te mau fifi. E puai atu â to tatou faaroo no te faaruru i te mau haafifiraa ma te hiˈopoa mea nafea vetahi mau taeae e tuahine i vai taiva  ore ai noa ˈtu te hamani-ino-raa e te fifi i te pae moni. Eita atoa tatou e haafaufaa rahi roa i te moni e te taoˈa materia ma te pee i te hiˈoraa o vetahi mau Kerisetiano tei rave i te mau haapaeraa rahi no te tuu na mua roa i te Faatereraa arii o te Atua. b

10. E nafea to tatou here i te Atua e i te taata tupu e tauturu mai ai ia tamau i te poro?

¹⁰ Mea faufaa atoa te here no te vai ara noa e no te feruri maite. (Mat. 22:37-39) Maoti to tatou here i te Atua e noaa ˈi ia tatou ia tamau i te poro noa ˈtu te mau haafifiraa. (Tim. 2, 1:7, 8) No to tatou here i te taata tupu, e tamau tatou i te poro a rave faahope roa ˈi i te hoê tuhaa fenua no te pororaa. E poro atoa tatou na roto i te niuniu e te rata. Te na reira ra tatou ma te tiaturi e nehenehe ratou e taui a rave atu ai i te mea maitai.—Ezk. 18:27, 28.

11. E nafea te here i to tatou mau taeae e tuahine e tauturu mai ai? (Tesalonia 1, 5:11)

¹¹ Mea here atoa na tatou i te mau taeae e tuahine. E faaite tatou i to tatou here ia ratou ma te ‘faaitoito e ma te tauturu te tahi i te tahi.’ (A taio i te Tesalonia 1, 5:11.) Mai te mau faehau e turu ra te tahi i te tahi i roto i te aroraa, te faaitoito nei tatou te tahi i te tahi. I te tahi taime, e nehenehe te hoê faehau e haamauiui i te tahi faehau o to ˈna iho nuu, e ere râ no te mea ua hinaaro mau o ˈna e na reira. Hoê â huru no tatou, aita tatou e hinaaro ra e haamauiui i to tatou mau taeae e tuahine, e nehenehe râ te reira e tupu. (Tes. 1, 5:13, 15) E faaite atoa tatou i to tatou here ma te faatura i te mau matahiapo. (Tes. 1, 5:12) I to Paulo papairaa i teie rata i to Tesalonia, mea apî roa teie amuiraa. Inaha, hoê noa matahiti teie amuiraa i te haamauraahia. Aita te mau taeae faatoroahia i paari maitai atura i te pae varua e peneiaˈe ua hape atoa ratou. Noa ˈtu râ, ua titauhia i te amuiraa ia faatura i teie mau taeae. A piri noa mai ai te ati rahi, aita ˈtu paha e aratairaa maori râ ta te mau matahiapo o te amuiraa. Ei hiˈoraa, e nehenehe tatou e ere i te aratairaa no ǒ mai i te Tino aratai aore ra i te amaa. No reira, mea  faufaa roa ia haapii tatou i te here e i te faatura i te mau matahiapo i teie nei â. Noa ˈtu eaha te tupu, e feruri maite anaˈe, eiaha tatou e tiatonu i nia i ta ratou mau hapa, e haamanaˈo anaˈe râ e te aratai nei Iehova i teie mau taeae haapao maitai.

12. E nafea to tatou tiaturiraa e paruru ai i to tatou feruriraa?

¹² Mai te hoê taupoo e paruru ra i te upoo o te faehau, e paruru atoa to tatou tiaturiraa i to tatou feruriraa. Maoti to tatou tiaturiraa, e taa ia tatou e mea faufaa ore te mau mea atoa e vai ra i roto i teie nei ao. (Phil. 3:8) E tauturu atoa to tatou tiaturiraa ia vai hau noa e ia mau papu. O ta Wallace raua Laurinda ïa i ite. Ua tavini raua i te Betela no Afirika. I roto noa e toru hebedoma, ua pohe te metua vahine o Laurinda e te metua tane o Wallace. No te maˈi pee COVID-19, aita raua i nehenehe e hoˈi i to raua fenua no te tamahanahana i to ratou mau fetii. Ua na ô Wallace: “Ua tauturu te tiaturiraa o te tia-faahou-raa ia ˈu ia haamanaˈo ia raua, eiaha i to raua huru hou a pohe ai, ua feruri râ vau i to raua huru ia faatiahia mai raua i roto i te ao apî. Ua tauturu rahi mai teie tiaturiraa ia tamǎrû i to ˈu oto.”

13. Eaha te rave no te fanaˈo i te varua moˈa?

¹³ “Eiaha e tupohe i te auahi o te varua moˈa.” (Tes. 1, 5:19) Ua faaau Paulo i te varua moˈa i te auahi e ura ra i roto ia tatou. Ia fanaˈo tatou i te varua moˈa o te Atua, e itoitohia tatou no te rave i te mea maitai e no te rohi no Iehova. (Roma 12:11) Eaha ïa te rave no te fanaˈo i te varua moˈa? E fanaˈo tatou i te reira ma te pure ia Iehova, ma te haapii i te Bibilia e ma te apiti i te mau ohipa pae varua mai te mau putuputuraa e te vai atu ra. Ma te na reira, e noaa ia tatou ia faatupu i “te mau huru maitatai ta te varua moˈa e faatupu.”—Gal. 5:22, 23.

14. Eaha te tia ia tatou ia rave no te fanaˈo noa i te varua moˈa o te Atua? (A hiˈo atoa i te hohoˈa.)

¹⁴ Ia horoa mai te Atua i to ˈna varua moˈa, eiaha tatou e “tupohe i te auahi o te varua moˈa.” E horoa te Atua i to ˈna varua  i te feia noa o te faaite i te hoê feruriraa e te hoê haerea viivii ore. Eita o ˈna e horoa faahou mai i to ˈna varua moˈa mai te peu e faatupu tatou i te mau manaˈo tano ore a rave atu ai i te mea ino. (Tes. 1, 4:7, 8) Ia fanaˈo noa tatou i te varua moˈa, eiaha atoa tatou e “vahavaha i te mau parau tohu.” (Tes. 1, 5:20) “Te mau parau tohu” i ǒ nei, o te mau poroi ta te Atua e horoa mai maoti te varua moˈa, mai te mau faaararaa no nia i te mahana o Iehova e te mau mahana hopea ta tatou e ora nei. Eiaha roa ˈtu tatou e manaˈo e eita te mahana o Iehova aore ra Aramagedo e tae mai a ora noa ˈi tatou. E faaite râ tatou i to tatou tiaturi papu e e tae mai iho â tera mahana ma te tamau i te “rave i te mau ohipa tei au i te haamoriraa i te Atua anaˈe.”—Pet. 2, 3:11, 12.

15. E nafea ia paruru ia tatou i te mau parau haavare e te mau poroi no ǒ mai i te mau demoni? (Tesalonia 1, 5:21)

¹⁵ Fatata roa te mau enemi o te Atua i te parau: “Te hau e te ati ore!” (Tes. 1, 5:3) E haaparare te mau demoni i te mau parau haavare e e vare te rahiraa o te taata. (Apo. 16:13, 14) Eaha to tatou huru i mua i te reira? Eita tatou e vare hanoa mai te peu ua ‘papu ia tatou te mau mea atoa.’ (A taio i te Tesalonia 1, 5:21.) E faaohipahia te parau Heleni “ia papu” no te hiˈopoa e mea mau anei te auro, te ario e te tahi atu taoˈa. Hoê â huru no tatou. E titauhia ia tatou ia hiˈopoa mea mau anei tei parauhia mai aore ra te mau mea ta tatou e faaroo ra. Ua na reira hoi to Tesalonia, e mea faufaa ia na reira atoa tatou inaha, te piri mai ra te ati rahi. Eita ïa tatou e tiaturi hanoa i tei parauhia mai, e hiˈopoa maite râ tatou i ta te Bibilia e ta Iehova faanahonahoraa e faaite mai. Maoti noa te reira e ore ai tatou e vare hanoa i te mau parau haavare e te mau poroi no ǒ mai i te mau demoni.—Mas. 14:15; Tim. 1, 4:1.

16. Eaha te tiaturiraa papu ta tatou e fanaˈo nei e eaha ta tatou e faaoti papu i te rave?

¹⁶ Ua ite tatou e ora mai te mau tavini a Iehova i te ati rahi. Eita râ tatou tataitahi e ite eaha te tupu ananahi. (Iak. 4:14) Ia ora noa ˈtu tatou i te ati rahi aore ra ia pohe noa ˈtu tatou hou a haamata ˈi te reira, e nehenehe tatou e papu e e fanaˈo tatou i te ora mure ore mai te peu noa e vai taiva ore tatou. E haere te feia faatavaihia i te raˈi e o Iesu. E ora te mau mamoe ê atu i roto i te paradaiso i nia i te fenua. E tiatonu anaˈe ïa i nia i to tatou tiaturiraa faahiahia mau e e vai ineine anaˈe no te mahana o Iehova!