1-2. Ia au i te Salamo 25:14, eaha te tia ia tatou ia rave no te riro ei hoa piri no Iehova?

 I TO oe manaˈo, eaha te mau huru maitatai titauhia no te riro ei hoa piri no te hoê taata? E parau paha oe mea faufaa ia here e ia turu e piti hoa te tahi i te tahi. Aita paha te mǎtaˈu i puta i roto i to outou feruriraa. Tera râ, mai ta te irava tumu o teie haapiiraa e haapapu ra, e tia i te mau hoa piri o Iehova ia ‘mǎtaˈu ia ˈna.’—A taio i te Salamo 25:14.

² Mea maoro anei tatou i te taviniraa ia Iehova aore ra aita, mea faufaa no tatou paatoa ia mǎtaˈu ia ˈna. Eaha râ te auraa ia mǎtaˈu i te Atua? E nafea tatou e haapii ai i te mǎtaˈu ia Iehova? E eaha te haapii mai no nia i te mǎtaˈu i te Atua maoti te hiˈoraa o te tiaau ra o Obadia, te tahuˈa rahi ra o Iehoiada e te arii Iehoasa?

3. A faataa e nafea te mǎtaˈu e paruru ai ia tatou.

³ E nehenehe tatou e mǎtaˈu ia ite atea tatou i te hoê fifi. Mea au teie huru mǎtaˈu, e tauturu mai te reira ia rave i te faaotiraa maitai. Ei hiˈoraa, ia haere tatou na nia i te mouˈa, na te mǎtaˈu e tapea ia tatou ia tapiri roa ˈtu i te vahi e topa ˈi tatou. Ia ite tatou i te hoê ati, na te mǎtaˈu e turai ia tatou ia horo ê. No te mǎtaˈu e nehenehe te hoê hoa piri e pêpê ia tatou, e haapao maitai ïa tatou i ta tatou e parau aore ra e rave i nia ia ˈna.

4. Eaha te huru mǎtaˈu ta Satani e hinaaro ra ia faatupu tatou?

⁴ Te hinaaro nei Satani ia mehameha tatou ia Iehova. No Satani te manaˈo ta Eliphaza i faahiti, oia hoi e Atua tahoo Iehova e te iria, o te ore roa ˈtu e mauruuru aˈe. (Ioba 4:18, 19) Te hinaaro nei Satani ia mehameha roa tatou ia Iehova a faaea roa ˈtu ai i te tavini ia ˈna. Ia ore tatou ia noaahia  i teie herepata ta ˈna, e tia ia tatou ia faatupu i te mǎtaˈu e au i te Atua.

5. Eaha te auraa ia mǎtaˈu i te Atua?

⁵ Te taata o te mǎtaˈu mau i te Atua, mea here ïa na ˈna ia Iehova e aita roa ˈtu o ˈna i hinaaro e tuino i to ˈna auhoaraa e te Atua. Tei roto atoa ia Iesu teie huru “mǎtaˈu i te Atua.” (Heb. 5:7) Aita o ˈna i mehameha ia Iehova. (Isa. 11:2, 3) Mea here râ na ˈna i to ˈna Metua e ua hinaaro o ˈna e auraro ia ˈna. (Ioa. 14:21, 31) Mai ia Iesu, e tia ia tatou ia faatura maite e ia faahiahia ia Iehova no to ˈna here, to ˈna paari, ta ˈna parau-tia e to ˈna puai. Ua ite atoa tatou e mea here roa na Iehova ia tatou. Ia ore tatou e farii i ta ˈna aratairaa, e mauiui o ˈna. Area ia farii tatou, e oaoa ïa o ˈna.—Sal. 78:41; Mas. 27:11.

6. Eaha te hoê ravea e haapii ai tatou i te mǎtaˈu i te Atua? (Salamo 34:11)

⁶ Eita te mǎtaˈu i te Atua e tupu noa mai, e tia râ ia faatupu i te reira. (A taio i te Salamo 34:11.) Hoê ravea e na reira ˈi tatou, o te hiˈopoaraa ïa i te mau mea i hamanihia e ana. Rahi atu â tatou i te ite i te paari o te Atua, to ˈna puai e to ˈna here rahi ia tatou na roto i “te mau mea i hamanihia,” rahi atu â ïa tatou i te faatura e i te here ia ˈna. (Roma 1:20) Ua parau te hoê tuahine o Adrienne te iˈoa: “E faahiahia noa na vau ia ite au i te paari o Iehova i roto i te natura, e haamanaˈo vau e ua ite o ˈna eaha te mea maitai aˈe no ˈu.” Ia ˈna i feruri maite, teie ta ˈna i faaoti: “Eita roa vau e vaiiho i te hoê noa ˈˈe mea ia haafifi i to ˈu auhoaraa e o Iehova, te Tumu o to ˈu ora!” I roto i teie hebedoma, e nehenehe anei outou e feruriruri i nia i te hoê mea ta Iehova i hamani? Papu maitai, e rahi atu â to outou faatura e to outou here ia Iehova.—Sal. 111:2, 3.

7. E nafea te pure e tauturu ai ia tatou ia faatupu i te mǎtaˈu e au ia Iehova?

⁷ E faatupu tatou i te mǎtaˈu e au i te Atua maoti te pure-tamau-raa ia ˈna. Rahi atu â tatou i te pure, rahi atu â tatou i te matau ia Iehova. I te mau taime atoa e ani ai tatou i te puai no te faaoromai tamau i te hoê fifi, e haamanaˈo tatou i te rahi o to ˈna puai. Ia haamauruuru tatou ia ˈna no te ô o ta ˈna Tamaiti, e haamanaˈo tatou e mea here na Iehova ia tatou. E ia taparu tatou ia Iehova ia tauturu mai no te hoê fifi, e ite papu tatou i te rahi o to ˈna paari. A na reira ˈi, e rahi atu â to tatou faatura no Iehova e e faaoti papu tatou e ape i te mau ohipa atoa o te faaatea ê ia tatou ia ˈna.

8. Eaha ta tatou e rave ia mǎtaˈu noa tatou i te Atua?

⁸ E mǎtaˈu noa tatou i te Atua ia haapii tatou i te Bibilia no te pee i te mau hiˈoraa maitai, eiaha râ te mau hiˈoraa ino e faatiahia ra i roto. E aparau anaˈe no nia e piti tavini haapao maitai na Iehova, o Obadia te tiaau utuafare o te arii Ahaba e te tahuˈa rahi ra o Iehoiada. I muri iho, e hiˈopoa tatou i te hiˈoraa o te arii Iehoasa no Iuda, tei haamata i te tavini ia Iehova, o tei taiva râ ia ˈna i muri aˈe.

9. Mea nafea te mǎtaˈu i te Atua i te ohiparaa i nia ia Obadia? (Te mau arii 1, 18:3, 12)

⁹ I roto i te Bibilia, teie te mau parau e itehia no te faataa i to Obadia b huru: “E mǎtaˈu rahi to Obadia ia Iehova.” (A taio i Te mau arii 1, 18:3, 12.) Mea nafea teie  mǎtaˈu i te ohiparaa i nia ia Obadia? A tahi, ua riro o ˈna ei taata afaro e te tiaturihia, i faatoroa ˈi te arii ia ˈna ei tiaau no to ˈna utuafare. (A hiˈo atoa i te Nehemia 7:2.) A piti, ua itoito-roa-hia Obadia maoti to ˈna mǎtaˈu i te Atua. Ua hinaaro iho â o ˈna i te itoito, e tau fifi hoi ta ˈna i ora a faatere ai te arii ino ra o Ahaba. Te na ô ra hoi te Bibilia no Ahaba e mea “rahi aˈe te ino [ta ˈna] i rave i mua ia Iehova i ta te feia na mua ˈtu ia ˈna i rave.” (Arii 1, 16:30) Mea hae atoa na ta ˈna vahine haamori idolo ra o Iezebela ia Iehova, e ua tamata roa oia i te faaore roa i te haamoriraa mau i te fenua Iseraela. (Arii 1, 18:4) Papu maitai, ua tavini Obadia ia Iehova i te hoê tau fifi mau.

10. Mea nafea Obadia i te faaiteraa i te itoito rahi?

¹⁰ Mea nafea Obadia i te faaiteraa i te itoito rahi? I te aˈuaˈuraa Iezebela i te mau peropheta a te Atua no te haapohe ia ratou, ua faatapuni Obadia e 100 peropheta “e 50 i te pǔpǔ hoê i roto i te tahi ana a afai noa ˈtu ai i te faraoa e te pape na ratou.” (Arii 1, 18:13, 14) Ahani o ˈna i noaahia mai, e haapohehia o ˈna. Parau mau, aita Obadia i hinaaro e pohe. Mea here aˈe râ na ˈna ia Iehova e ta ˈna mau tavini i to ˈna iho ora.

11. E nafea te mau tavini a Iehova no teie tau e pee ai i te hiˈoraa o Obadia? (A hiˈo atoa i te hohoˈa.)

¹¹ I teie mahana, e rave rahi tavini a Iehova e ora ra i te fenua i opanihia ˈi ta tatou taviniraa. Ia nehenehe, e auraro ratou i te feia mana. Mai ia Obadia râ, e faahoˈi ratou i ta te Atua ra ma te tamau i te haamori ia Iehova noa ˈtu te opanipaniraa. (Mat. 22:21) Te faaite nei ratou i te mǎtaˈu i te Atua ma te auraro ia ˈna, eiaha râ i te taata. (Ohi. 5:29) E na reira ratou ma te tamau i te poro e i te putuputu amui. E haapao râ ratou ia ore ratou ia noaahia mai. (Mat. 10:16, 28) E haapeapea ratou ia fanaˈo te mau taeae e tuahine i tei hinaarohia i te pae varua. Teie te hiˈoraa o Henri o te ora ra i te hoê fenua i Afirika. Ua opanihia ta tatou mau ohipa i tera vahi no te hoê area taime. I te roaraa o te opaniraa, ua tavini Henri i to ˈna mau taeae ma te hapono atu i te maa pae varua  na ratou. Te na ô ra o ˈna: “Mea mamahu roa vau. No reira, ua papu ia ˈu e maoti to ˈu faatura rahi ia Iehova i noaa ˈi ia ˈu te itoito no te rave i tera ohipa.” A ui ia oe iho: ‘E haere anei ia ˈu ia faaite i te hoê â itoito e to Henri?’ E, e nehenehe ta oe e na reira, mai te peu e faatupu oe i te mǎtaˈu e au i te Atua.

12. Mea nafea te tahuˈa rahi ra o Iehoiada e ta ˈna vahine i faaite ai i to raua taiva ore ia Iehova?

¹² Mea faatura roa te tahuˈa rahi ra o Iehoiada ia Iehova. Na to ˈna mǎtaˈu i te Atua i tauturu ia ˈna ia vai taiva ore e ia turu i te haamoriraa mau. Ua itehia te reira, i to Atalia, te tamahine a Iezebela haruraa i te terono o Iuda. Ua riaria te taata ia Atalia, inaha hoi, e mea ino roa teie vahine. No to ˈna nounou i te terono, ua tamata oia i te faaore roa i te opu fetii huiarii taatoa, oia hoi te taatoaraa o ta ˈna mau mootua. (Par. 2, 22:10, 11) Ua ora mai râ hoê o ratou, o Iehoasa ïa. Ua faatapuni Iehosabeata ia Iehoasa e ua haapao maitai raua ta ˈna tane o Iehoiada ia ˈna. A na reira ˈi, ua haapao raua ia ora mai hoê o te utuafare o te arii Davida a riro mai ai o ˈna ei arii. I taua taime ra, ua hau paha Iehoiada i te 100 matahiti, noa ˈtu râ, ua vai taiva ore o ˈna ia Iehova e aita o ˈna i mǎtaˈu ia Atalia.—Mas. 29:25.

13. I te hituraa o te matahiti o Iehoasa, eaha ta Iehoiada i rave no te faaite i to ˈna taiva ore?

¹³ I te hituraa o te matahiti o Iehoasa, ua faaite faahou Iehoiada i to ˈna taiva ore ia Iehova ma te rave i te tahi faanahoraa taa ê. Ia manuïa te reira e riro mai Iehoasa ei arii, o ˈna iho â te tano ia parahi i nia i te terono o Davida. Ia ore râ, e nehenehe Iehoiada e haapohehia. Maoti râ te haamaitairaa a Iehova, ua manuïa te reira. Ua tauturu te mau raatira e te ati Levi ia Iehoiada no te faariro ia Iehoasa ei arii e haapohehia ˈtura ia Atalia. (Par. 2, 23:1-5, 11, 12, 15; 24:1) Faaau ihora Iehoiada i “te hoê faufaa i rotopu ia Iehova, te arii e te nunaa, oia hoi ei nunaa noa ratou no Iehova.” (Arii 2, 11:17) “Ua tuu atoa oia i te mau tiai uputa i te mau uputa o te hiero o Iehova, ia ore te hoê taata viivii ia tomo mai.”—Par. 2, 23:19.

14. Mea nafea Iehoiada i te haamaitairaahia i to ˈna faaiteraa i te mǎtaˈu ia Iehova?

¹⁴ Ua parau Iehova: “Te feia e faatura ia ˈu, e faatura vau.” Inaha, ua haamaitai iho â o ˈna ia Iehoiada. (Sam. 1, 2:30) Ei hiˈoraa, ua papaihia te aamu o Iehoiada i roto i te Bibilia ei haapiiraa na tatou. (Roma 15:4) Hau atu, i to ˈna poheraa, ua fanaˈo Iehoiada i te hoê faanahoraa faahiahia mau, oia hoi ua hunahia oia “i te Oire o Davida i pihai iho i te mau arii no te mau mea maitai atoa ta ˈna i rave no Iseraela, no te Atua mau e no to ˈna hiero.”—Par. 2, 24:15, 16.

15. Eaha te haapii mai i te hiˈoraa o Iehoiada? (A hiˈo atoa i te hohoˈa.)

¹⁵ E nehenehe te hiˈoraa o Iehoiada e tauturu ia tatou ia faatupu i te mǎtaˈu i te Atua. E nehenehe te mau matahiapo e pee i te hiˈoraa o Iehoiada ma te paruru noa i te amuiraa. (Ohi. 20:28) E haapiiraa atoa ta te mau ruhiruhia e apo mai i te hiˈoraa o Iehoiada. Inaha mea faufaa atoa ratou no Iehova. E faaohipa hoi o ˈna ia ratou no te rave i to ˈna hinaaro, mai te peu e mǎtaˈu e e vai taiva ore ratou ia ˈna. E nehenehe te feia apî e haapii mai i te huru o Iehova i nia ia Iehoiada. E pee ratou i te hiˈoraa o Iehova ma te faatura  i te mau taeae e tuahine paari aˈe o te amuiraa, te mau Kerisetiano iho â râ mea maoro i roto i te parau mau. (Mas. 16:31) I te pae hopea, e nehenehe tatou pauroa e pee i te hiˈoraa o te mau raatira e te ati Levi tei turu ia Iehoiada ma te turu papu i “te mau aratai i rotopu ia [tatou]” e ma te faaroo ia ratou.—Heb. 13:17.

16. Na te aha e faaite ra e mea ino te arii Iehoasa?

¹⁶ Ua faufaahia te arii Iehoasa i te hiˈoraa maitai o Iehoiada. (Arii 2, 12:2) I to ˈna apîraa, ua hinaaro iho â Iehoasa e rave i te mea maitai i mua ia Iehova. I muri aˈe râ i te poheraa o Iehoiada, ua faaroo Iehoasa i te mau huiarii apotata. Eaha ïa te faahopearaa? “Haamata aˈera [ratou] i te haamori i te mau raau haamoriraa e te mau idolo.” (Par. 2, 24:4, 17, 18) Noa ˈtu ua mauiui roa Iehova, ua faatae “oia i te peropheta ia ratou ra no te faahoˈi mai ia ratou . . . aita râ ratou i hinaaro e faaroo.” Aita atoa ratou i faaroo ia Zekaria, te tamaiti a Iehoiada. E peropheta e e tahuˈa o ˈna no Iehova e e fetii atoa oia no te arii Iehoasa. Aita roa ˈtu te arii Iehoasa i faaite i te mauruuru no te utuafare o Zekaria tei tauturu rahi ia ˈna, inaha ua tae roa o ˈna i te haapohe ia Zekaria. c—Par. 2, 22:11; 24:19-22.

17. Eaha te mau faahopearaa ta Iehoasa i ite?

 ¹⁷ Aita Iehoasa i mǎtaˈu ia Iehova, e ua amo o ˈna i te utua no ta ˈna i rave. Ua faaara hoi Iehova: “Te feia . . . e vahavaha ia ˈu, e vahavahahia ratou.” (Sam. 1, 2:30) I te hoê mahana, haere maira te nuu Suria e aro ia Iehoasa. Noa ˈtu aita i rahi te faehau a te nuu Suria, ua upootia ratou i nia i te “nuu rahi” o Iehoasa e ua vaiiho ratou ia ˈna e “te pepe rahi.” I muri aˈe, ua haapohe ta ˈna iho na tavini ia ˈna no te mea ua haapohe oia ia Zekaria. Ei faahopearaa, aita teie arii i hunahia “i te vahi hunaraa o te mau arii.”—Par. 2, 24:23-25.

18. Ia au i te Ieremia 17:7, 8, eaha te rave no te ore e riro mai ia Iehoasa?

¹⁸ Eaha te haapii mai i te hiˈoraa o Iehoasa? E au o ˈna i te hoê tumu raau e ere te aˈa i te mea papu o te titauhia te hoê turu no te mau maite. Ua ere Iehoasa i tera turu, oia hoi i to Iehoiada poheraa. Haamata ihora o ˈna i te faaroo i te mau apotata e taiva ˈtura oia ia Iehova. Eaha te haapiiraa? Eita tatou e mǎtaˈu aore ra e faaroo ia Iehova no te mea noa te hinaaro ra tatou e pee i te hiˈoraa o te mau taeae e tuahine aore ra o te mau mero o to tatou utuafare. Ia puai noa tatou i te pae varua, e tia ia tatou ia haapuai i to tatou auhoaraa e here ia Iehova ma te rave i ta tatou iho haapiiraa Bibilia, ma te feruriruri i nia i te reira e ma te pure tamau ia Iehova.—A taio i te Ieremia 17:7, 8; Kol. 2:6, 7.

19. Eaha ta Iehova e titau ra ia tatou?

¹⁹ Aita i rahi roa ta Iehova e titau mai ra ia tatou. Ua faahiti oia eaha ta ˈna e ani ra ia tatou i roto i te Koheleta 12:13. Te na ôhia ra: “A mǎtaˈu i te Atua mau e a haapao i ta ˈna mau faaueraa, tera noa hoi te hopoia a te taata.” Ia mǎtaˈu tatou i te Atua, e noaa ia tatou ia vai taiva ore ia Iehova noa ˈtu eaha te tupu a muri aˈe e ia mau papu mai ia Obadia raua Iehoiada. Aita ïa hoê aˈe mea te nehenehe e haafifi i to tatou auhoaraa e o Iehova.