Aita te Bibilia e parau ra. Tera râ, te vai ra te tahi mau parau faufaa i roto o te faataa ra no te aha raua i ore ai i hoˈi i Nazareta.

Ua parau te hoê melahi ia Maria e hapû e e fanau o ˈna. I taua taime, te ora ra Maria raua Iosepha i te oire o Nazareta, te oire ïa i fanauhia ˈi Iosepha i Galilea. (Luka 1:26-31; 2:4) I to raua hoˈiraa mai na Aiphiti, ua hoˈi raua i Nazareta e i reira Iesu i te paariraa. No reira i parauhia ˈi e taata o ˈna no Nazareta. (Mat. 2:19-23) Ia faahitihia te parau o Nazareta, oioi noa tatou i te manaˈo ia Iesu, Iosepha e Maria.

Te vai ra to Maria hoê fetii i Iuda, o Elisabeta te iˈoa. E vahine o ˈna na te tahuˈa ra o Zekaria e o ˈna te metua vahine o Ioane Bapetizo. (Luka 1:5, 9, 13, 36) Ua haere Maria e farerei ia Elisabeta i Iuda, ua faaea i ǒ e toru avaˈe e hoˈi atura oia i Nazareta. (Luka 1:39, 40, 56) No reira ïa Maria i matau ai i te fenua o Iuda.

Ua auraro Iosepha i te faaueraa mana e tapao i to ˈna iˈoa i te oire i fanauhia ˈi o ˈna. Mai Nazareta, haere atura Iosepha i Betelehema, te oire o Davida, oia hoi te vahi e fanauhia ˈi te Mesia mai tei tohuhia. (Luka 2:3, 4; Sam. 1, 17:15; 20:6; Mika 5:2) I muri aˈe i te fanauraahia o Iesu, aita Iosepha i manaˈo e e haere ia Maria ia tapea i te roaraa o te tere e ta raua aiû iti. Ua faaea ratou i Betelehema, e iva ïa kilometera te atea ia Ierusalema. E nehenehe atoa raua e haere i te hiero e ta raua aiû no te pûpû atu i te tusia taauahi.—Lev. 12:2, 6-8; Luka 2:22-24.

Ua faaite aˈena te melahi ia Maria e e horoahia “te terono o Davida” i ta ˈna tamaiti ra e “e faatere oia ei Arii.” Ua manaˈo paha Iosepha raua Maria e no reira iho â ïa Iesu i fanauhia ˈi i te oire o Davida. (Luka 1:32, 33; 2:11, 17) Ua manaˈo atoa paha raua mea au aˈe ia faaea i reira e ia tiai i te tahi atu aratairaa no ǒ mai i te Atua ra.

Aita tatou i ite ehia roaraa to ratou faaearaa i Betelehema a haere mai ai te tahi mau taata hiˈo fetia. Tei roto ratou i te hoê fare e e ere faahou Iesu i te aiû. (Mat. 2:11) Tera râ, e au ra e aita ratou i haere i Nazareta, ua faaea maoro râ i Betelehema.

Ua faaue Heroda ia haapohehia “pauroa te tamaroa mai te piti matahiti e raro mai” i Betelehema. (Mat. 2:16) Faaara mai nei te hoê melahi ia Iosepha, horo ê atura ïa o ˈna, o Maria e o Iesu i Aiphiti e faaea ihora i reira e pohe noa ˈtu o Heroda. Haere atura ïa Iosepha e to ˈna utuafare i Nazareta. No te aha râ aita ratou i hoˈi i Betelehema? No te mea o Arehelau te faatere ra i Iudea ei mono i to ˈna metua tane ia Heroda. E taata ino mau atoa. I Nazareta, ua nehenehe Iosepha raua Maria e haapii ia Iesu ia riro ei tavini na te Atua.—Mat. 2:19-22; 13:55; Luka 2:39, 52.

E au ra e, ua pohe aˈena Iosepha hou Iesu a iriti ai i te eˈa no te ora i te raˈi. Te auraa ïa, e faatiahia mai Iosepha i nia i te fenua. E rave rahi te nehenehe e farerei ia ˈna e e haapii atu â no nia ia ˈna. Ei hiˈoraa, e nehenehe ïa e ite atu â no nia i te tumu i faaea ˈi raua Maria i Betelehema, i muri aˈe i te fanauraahia o Iesu.