Mea faufaa te faaroo no te faaoaoa ia Iehova. Tera râ, te parau ra te Bibilia: “Aita hoi te faaroo i noaa i te taata atoa.” (Tes. 2, 3:2) I ǒ nei, te faahiti ra te aposetolo Paulo i “te feia totoa e te ino” tei hamani ino ia ˈna. E tano atoa râ teie parau no nia i te faaroo no te tahi atu mau taata. Aita vetahi e hinaaro ra e farii i te mau haapapuraa no nia i te hoê Atua poiete. (Roma 1:20) E parau paha vetahi e te tiaturi nei ratou i te Atua, eita râ teie huru faaroo e navai no te faaoaoa ia Iehova.

Mea faufaa ia tiaturi papu tatou e te ora ra Iehova e e nehenehe ta ˈna e “haamaitai” i te feia e faaroo mau to ratou. (Heb. 11:6) E tuhaa te faaroo o te hotu ta te varua moˈa o te Atua e faatupu. Ia fariu te hoê taata ia Iehova na roto i te pure, e fanaˈo ïa o ˈna i te varua moˈa. (Luka 11:9, 10, 13) Te tahi ravea no te fanaˈo i te reira, o te taioraa ïa i te Parau a te Atua. I muri iho, e feruriruri tatou i ta tatou taioraa a faaohipa ˈtu ai i te reira. I reira te varua moˈa o Iehova e ohipa ˈi i roto i to tatou oraraa, a tauturu mai ai ia faatupu i te faaroo mau.