Uiraa a te feia taio
Te na ô ra te Salamo 12:7: “E tiai oe ia ratou.” Eaha te faahitihia ra i ǒ nei? O “te feia e ahoaho ra” (irava 5) aore ra “te mau parau a Iehova” (irava 6)?
Ia hiˈohia te mau irava tapiri, e taa ia tatou e taata te faahitihia ra.
I roto i te Salamo 12:1-4, ua parau Davida e “aita faahou e feia haapao maitai i rotopu i te huitaata.” E hiˈo anaˈe ïa i te Salamo 12:5-7 no te pahono i ta tatou uiraa.
“ ‘No te mea te haavîhia ra te feia e ahoaho ra,
No te mea te autâ ra te feia veve,
E tia vau a ohipa ˈtu ai,’ te parau mai ra Iehova.
‘E faaora vau ia ratou i te rima o te feia e vahavaha ra ia ratou.’
Mea viivii ore te mau parau a Iehova.
E au te reira i te ario i haamaitaihia i roto i te hoê umu araea, e hitu taime i te tamâraahia.
E tiai oe ia ratou, e Iehova.
E paruru oe ia ratou tataitahi i teie uˈi e a muri noa ˈtu.”
Te faaite ra te irava 5 e faaora te Atua i “te feia e ahoaho ra.”
Te na ô ra te irava 6: “Mea viivii ore te mau parau a Iehova. E au te reira i te ario i haamaitaihia.” Tera atoa ta te mau Kerisetiano e manaˈo ra.—Sal. 18:30; 119:140.
Te na ô ra te irava 7: “E tiai oe ia ratou, e Iehova. E paruru oe ia ratou tataitahi i teie uˈi e a muri noa ˈtu.” No vai ma ïa teie parau?
I te mea e ua faahitihia “te mau parau a Iehova” i te irava 6, ua manaˈo vetahi e e “paruru” te Atua i ta ˈna mau parau. Ua paruru iho â te Atua i te Bibilia noa ˈtu ua tamata e rave rahi taata patoi i te opani e i te faaore i teie buka.—Isa. 40:8; Pet. 1, 1:25.
Mea papu atoa râ tei parauhia i roto i te irava 5. Ua tauturu e ua faaora Iehova i “te feia e ahoaho ra” e tei “haavîhia.” E tamau oia i te na reira.—Ioba 36:15; Sal. 6:4; 31:1, 2; 54:7; 145:20.
O vai ma ïa te faahitihia ra i roto i te irava 7?
Ia hiˈopoa-maitai-hia te mau irava tapiri o teie Salamo, e taa ia tatou e taata te faahitihia ra.
I te omuaraa o te Salamo 12:1, ua faahiti Davida e ua hamani-ino-hia te “feia haapao maitai” na te feia ino. I muri iho, te parauhia ra “e faaore Iehova i te mau vaha faatietie atoa.” Te haapapu ra teie Salamo e nehenehe tatou e tiaturi e faaora te Atua i ta ˈna mau tavini no te mea e mea viivii ore ta ˈna mau parau.
No reira i parauhia ˈi i roto i te irava 7 e faaora e e paruru Iehova “ia ratou,” oia hoi te feia e ahoaho ra.
Tera atoa te manaˈo e itehia i roto i te mau papai Massorètes o te mau buka Bibilia Hebera. Te faaohipa ra te huriraa Heleni Septante i te taˈo “tatou” e piti taime i roto i te irava 7 no te faahiti i te feia haapao maitai o te ahoaho ra e te haavîhia ra. I te pae hopea, te na ôhia ra i te irava 7: “E paruru oe ia ratou tataitahi i teie uˈi,” oia hoi te taata e turai ra ia rave i te mea faufau. (Sal. 12:7, 8) I roto i te hoê huriraa Arama o te mau buka Bibilia Hebera, ua faaohipahia te taˈo “ratou” i te irava 7. Te na ôhia ra: “E paruru oe, e te Fatu, i te feia parau-tia e e faaora oe ia ratou i te rima o teie uˈi ino e a muri noa ˈtu.” E haapapuraa teie e aita te Salamo 12:7 e faahiti ra i te mau parau a te Atua.
Ei faahopearaa, te horoa ra teie irava i te tiaturiraa i te “feia haapao maitai” e haa iho â te Atua no ratou.
