Ei orometua o te Ekalesia no Kanada, e afai na to ˈu papa ia mâua to ˈu tuahine i te haapiiraa Tapati. I te hora 11, e haere mâua ia papa ra i te pureraa. I te ahiahi, e haere mâua na muri i to ˈu mama i te Piha a te Basileia. A na reira ˈi, ua ite oioi mâua i te taa-ê-raa i roto i na haapaoraa e piti.

Ua faaite to ˈu mama i to ˈna mau hoa o Bob raua Marion Hutcheson eaha ta ˈna i haapii i roto i te Bibilia. Farii atoa ˈtura raua i te parau mau e riro mai nei ei Ite no Iehova. I 1958, ua haere au na muri ia raua e ta raua na toru tamaroa i te tairururaa nunaa rau “Te hinaaro o te Atua” i New York. E tairururaa teie e vaˈu mahana te maoro. Ia feruri au ia Bob raua Marion, e mauruuru iti rahi to ˈu. E ere paha i te mea ohie no raua, ua rave noa râ raua ia ˈu. Ua faahiahia roa vau i tera tairururaa.

I to ˈu apîraa, i ora na matou i roto i te hoê fare faaamuraa animara. Mea au roa na ˈu te mau animara. Hinaaro atura vau e haere i te haapiiraa teitei no te riro ei taote animara. Ua paraparau to ˈu mama i te hoê matahiapo no nia i te reira. Ma te mǎrû, ua haamanaˈo mai o ˈna e te ora nei tatou “i te mau mahana hopea.” Ani mai nei o ˈna eaha te nehenehe e tupu i te pae varua ia haere au i te haapiiraa teitei e rave rahi matahiti. (Tim. 2, 3:1) Faaoti atura vau eiaha e haere i te haapiiraa teitei.

Ua tamau noa râ vau i te feruri eaha ta ˈu e rave ia oti ta ˈu tau haapiiraa. Noa ˈtu e poro vau i te mau hopea hebedoma atoa, aita vau i au i te poro. Ua manaˈo atoa vau mea maitai te taviniraa pionie, eiaha râ no ˈu. I taua taime ra, ua turai to ˈu papa e to ˈna taeae ia ˈu ia ohipa taime taatoa i roto  i te hoê taiete parururaa, i Toronto. E tiaraa teitei to te taeae o to ˈu papa, farii atura ïa vau.

No ta ˈu ohipa, aita vau i tae pinepine faahou i te pororaa e i te putuputuraa. E amuimui atoa vau i to ˈu mau hoa ohipa e ere i te Ite no Iehova. E faaea na vau i to ˈu papa ruau ra, i to ˈna râ poheraa, ua imi au i te tahi atu faaearaa.

Ua titau Bob raua Marion Hutcheson ia faaea ia raua ra. Mai te huru ra e e metua raua no ˈu, inaha ua tauturu rahi mai raua ia ˈu i te pae varua. I 1960, ua bapetizohia vau e o John, hoê o na tamaroa Hutcheson. Riro mai nei John ei pionie. Ua faaitoito te reira ia ˈu ia apiti atu â i roto i te taviniraa. Ua tapao te mau taeae o te amuiraa i ta ˈu mau tutavaraa, e riro mai nei au ei tiaau no te Haapiiraa no te taviniraa Kerisetiano. a

I 1966, ua faaipoipo vau ia Randi Berge, hoê pionie itoito mau tei ineine i te tavini i te vahi e hinaaro-rahi-hia te feia poro. Ua faaite te tiaau ratere ia mâua e e hinaarohia te tauturu i te amuiraa no Orillia, i Ontario. Haere atura mâua e faaea i Ontario.

Taeraa ˈtu mâua i ǒ, rave atoa ˈtura vau i te taviniraa pionie. Ua peehia vau i te itoito e te oaoa o Randi. I to ˈu tutavaraa i te haamaitai i ta ˈu taviniraa, ite atura vau i te oaoa ia faaohipa i te Bibilia e ia ite i te taata ia farii i te parau mau. Auê ïa haamaitairaa rahi ta ˈu i fanaˈo, ua tauturu vau i te hoê na hoa faaipoipo ia rave i te mau tauiraa titauhia e ia riro mai ei Ite no Iehova!

I to mâua haereraa i Toronto, ua farerei au ia Arnold MacNamara, te hoê taeae e tavini ra i te Betela. Ua ani mai o ˈna e hinaaro anei mâua e tavini ei pionie taa ê. Oioi vau i te parau: “E! Ineine mâua i te haere i te mau vahi atoa, eiaha râ i Québec.” Ua pee vau i te huru o vetahi e paraparau ra i te reo Beretane i Kanada. Hoê â manaˈo to ˈu e to ratou no nia i te feia e paraparau ra i  te reo Farani i Québec. I tera ra tau, ua tupu te tahi umeumeraa, ua hinaaro hoi to Québec i to ratou tiamâraa.

Pahono mai nei taeae Arnold: “E tonohia te mau pionie taa ê i Québec, inaha, tera anaˈe te vahi e hinaaro-rahi-hia te feia poro.” Ua farii ïa vau i teie haamaitairaa. Ua hinaaro iho â Randi e haere e tavini i Québec. Ia feruri au, tera te faaotiraa maitai roa ˈˈe ta mâua i rave.

Ua haapiihia matou i te reo Farani e pae hebedoma te maoro. I te otiraa, ua haere mâua e hoê na hoa faaipoipo i Rimouski, e 540 kilometera i te atea ia Montréal. Ua titauhia ia mâua ia haapii atu â i te reo Farani. I te hoê putuputuraa, na ˈu i taio i te mau parau faaara. Ua papaihia e i to muri nei tairururaa e farii matou e rave rahi “taeae e tuahine no Auteteria.” Tera râ, ua parau vau e e farii matou e rave rahi “ione.”

I Rimouski, ua tae atoa mai e maha tuahine faaea taa noa, e te utuafare Huberdeau e ta raua e piti tamahine. Ua tarahu te utuafare Huberdeau i te hoê fare rahi, e hitu piha to roto. O matou pauroa te ora ra i roto e te aufau ra i te fare tarahu. I piihia na tera fare “te fare uouo” no te mea e 12 pou e mea uouo te muaraa o te fare. I te tahi taime, e 12 aore ra e 14 matou e ora ra i roto. Ei pionie taa ê, e poro mâua Randi i te mau poipoi, te mau avatea e te mau po atoa. Ua oaoa roa mâua ia haere mai hoê o ratou na muri ia mâua, oia atoa i te tau toˈetoˈe.

Ua riro roa ratou ei utuafare no mâua Randi. I te tahi taime, e parahi matou pauroa ati aˈe i te hoê auahi aore ra e faataa matou i te hoê mahana no te tunu amui i te maa. E hauti upaupa hoê o te mau taeae, i te po Mahana maa atoa pinepine matou i te himene e i te ori.

Mea rahi tei farii i te parau mau i Rimouski. I te roaraa e pae matahiti, e rave rahi piahi Bibilia tei riro mai ei Ite no Iehova. Ia taiohia, ua naeahia e 35 feia poro i roto i te amuiraa.

Mea rahi ta mâua i haapii i Québec ei taata poro. Ua ite mâua mea nafea Iehova i te tautururaa mai i roto i te taviniraa e i te pae tino atoa. Hau atu, ua haapii mâua i te here i te feia e paraparau ra i te reo Farani. Ua au atoa mâua i to ratou reo e taˈere. Ua tauturu te reira ia mâua ia here atu â i te taata, noa ˈtu eaha to ratou taˈere.—Kor. 2, 6:13.

Ua maere mâua i to te amaa tonoraa ia mâua i te oire no Tracadie, i te pae hitia o te râ o Nouveau Brunswick. No hoo noa mai hoi mâua i te hoê fare e ua noaa ta ˈu ohipa afa taime ei orometua haapii i te fare haapiiraa. Tau piahi Bibilia atoa ta mâua tei riro mai ei taata poro e te patuhia ra te hoê Piha a te Basileia i tera taime.

I tera hopea hebedoma, ua pure noa mâua no nia i teie tauiraa. Ua tere atoa mâua e hiˈo haere i te oire no Tracadie, mea taa ê roa ia Rimouski. Ua faaoti râ mâua e ora i reira, inaha na Iehova i tono ia mâua. Ua tamata mâua ia Iehova e ua ite mâua i to ˈna rima i te tatararaa i te mau fifi atoa. (Mal. 3:10) No te itoito i te pae varua o Randi, to ˈna feruriraa haapae e to ˈna huru ataata noa, mea ohie aˈe ïa no mâua i te farii i teie tauiraa.

Hoê noa matahiapo i roto i ta matou amuiraa apî, o Robert Ross. Ua tavini raua ta ˈna vahine o Linda ei pionie i reira, e ua faaoti raua e faaea noa mai i te fanauraahia mai ta raua matahiapo. Ua itoito-roa-hia mâua i to raua farii maitai. A haapao  noa ˈi i ta raua tamarii tamaroa, e tutava noa raua i te tavini ma te itoito rahi.

A piti atura matahiti to mâua taviniraa ei pionie i Tracadie, ua hitimahuta faahou mâua no te mea ua titauhia vau no te tavini ei tiaau ratere. E hitu ïa matahiti to mâua taviniraa i roto i te tuhaa haaati reo Beretane, e tonohia ˈtura mâua i Québec i roto i te tuhaa haaati reo Farani. O taeae Léonce Crépeault ta matou tiaau mataeinaa i Québec. E haapopou noa mai o ˈna ia horoa vau i te oreroraa parau. Ia oti, e ui mai o ˈna: “E nafea ˈtu â o taeae ma e nehenehe ai e faufaahia i te reira?” b Ua tauturu o ˈna ia ˈu ia haamaitai noa i ta ˈu huru haapiiraa, ia ohie no taeae ma ia taa.

Eita roa e moˈe ia ˈu te hopoia ta ˈu i fanaˈo i 1978, i te tairururaa nunaa rau “Te faaroo o te upootia” i Montréal. Na matou i haapao i te tunuraa maa. Mea tae mai e 80 000 taata e ua taui te faanahoraa no te tunuraa maa. Mea apî te mau mauhaa, te maa e faaineinehia e te huru faaineineraa. E 20 faatoˈetoˈeraa afaifai ta matou, e faaarearea atoa te reira i te tahi taime. Hou te mahana matamua a haamata ˈi, aita matou i nehenehe e faanaho oioi i ta matou ohipa, e hautiraa tuaro hoi to te po na mua ˈtu, e vata noa ïa te tahua tuaro i te tuiraa po. Te aahiata noa ra, ua ama ta matou mau umu no te faaineine i te taofe no te poipoi. Noa ˈtu te rohirohi, ua au roa vau i te hiˈoraa o te mau rima tauturu paari i te pae varua, to ratou itoito e to ratou huru ataata noa. Ua riro matou ei hoa e tae roa mai i teie mahana. Auê te oaoa i te apitiraa i teie tairururaa i Québec, te vahi mau i hamani-ino-hia ˈi te nunaa o Iehova i te area matahiti 1940 e 1960!

Mea rahi ta ˈu i haapii i te hiˈoraa o te mau taeae tiaau i taua tairururaa rahi ra i Montréal. I te hoê matahiti, na David Splane, mero o te Tino aratai i teie mahana, i tiaau i te tairururaa. Tau matahiti i muri mai, ua anihia vau ia haapao i tera hopoia. Ua farii David i teie tauiraa.

I 2011, a 36 ïa matahiti mâua i roto i te tuhaa haaati. Titauhia ˈtura vau e riro ei taata haapii no te Haapiiraa no te mau matahiapo. Ua taui pinepine mâua Randi i te vahi, e 75 roˈi ta mâua i taoto i roto noa e piti matahiti. Noa ˈtu râ, aita mâua i tatarahapa noa ˈˈe i te mau haapaeraa ta mâua i rave. Ia hope te hebedoma haapiiraa, e oaoa noa  te mau matahiapo no to ratou iteraa e nafea te Tino aratai e aupuru ai ia ratou i te pae varua.

I muri aˈe, ua riro atoa vau ei taata haapii no te Haapiiraa no te feia poro i te parau apî oaoa o te Basileia. Pinepine te mau piahi i te rohirohi no te rahi o te ohipa: e parahi ratou e hitu hora i te mahana, e faaineine i te haapiiraa no ananahi aˈe e toru hora i te mau po atoa e e rave ratou e maha aore ra e pae tumu parau i te hebedoma. Ua parau mâua te tahi atu taata haapii i te mau piahi e, eita e haere ia ratou aita anaˈe te tauturu a Iehova. E haamanaˈo noa vau i te hitimahuta o te mau piahi a ite ai ratou e, ia turui ratou i nia ia Iehova, e rave ratou hau atu â i ta ratou i manaˈo.

No te mea ua haapao to ˈu mama i to vetahi ê maitai, ua tauturu te reira i ta ˈna mau piahi Bibilia, oia atoa i to ˈu papa, ia farii mǎrû i te parau mau. E toru mahana i muri aˈe i te poheraa o to ˈu mama, ua maere roa matou i te iteraa i to ˈu papa ia haere mai i te Piha a te Basileia no te faaroo i te oreroraa parau. I muri iho, ua haere noa mai o ˈna i te putuputuraa e 26 matahiti te maoro. Noa ˈtu aita papa i riro mai ei Ite no Iehova, ua parau mai te mau matahiapo e o ˈna te taata matamua te tae mai i te mau putuputuraa atoa.

Ua riro mama ei hiˈoraa maitai roa no ˈu e to ˈu mau tuahine. Pauroa matou te tavini ra ia Iehova, oia atoa to ˈu na taoete tane e toru. E piti tuahine to ˈu e tavini ra i te Betela, hoê i Potiti e te tahi i Haïti.

Te tavini nei mâua Randi ei pionie taa ê i Hamilton, i Ontario. I roto i te tuhaa haaati, ua oaoa roa mâua i te apitiraa ia taeae ma i roto i ta ratou mau farerei-faahou-raa e ta ratou mau haapiiraa Bibilia. I teie nei, te ite nei mâua i ta mâua mau piahi ia nuu i mua i te pae varua. A piri noa ˈi mâua i te mau taeae e tuahine o ta mâua amuiraa apî, e itoitohia mâua ia ite e nafea Iehova e tauturu ai ia ratou i roto i te mau taime oaoa e te mau taime fifi.

A feruri ai mâua i ta mâua i ora mai, e mauruuru rahi to mâua i te hamani maitai rahi o vetahi ê ia mâua. Ua turai atoa te reira ia mâua ia “haapeapea rahi” no vetahi ê, ma te faaitoito ia ratou ia horoa i te mea maitai roa ˈˈe na Iehova. (Kor. 2, 7:6, 7) Ei hiˈoraa, i roto i te hoê utuafare, tei roto te vahine, te tamaiti e te tamahine i te taviniraa taime taatoa. Ani atura vau i te tane e aita anei o ˈna i manaˈo aˈenei e tavini ei pionie. Na ô mai nei o ˈna e e toru pionie ta ˈna e aupuru ra i te fare. Ui atura vau ia ˈna: “E haere anei ia oe ia aupuru maitai aˈe ia ratou ia Iehova?” Faaitoito atura vau ia ˈna ia fanaˈo i te hoê â haamaitairaa e ta ratou. E ono avaˈe i muri aˈe, riro mai nei o ˈna ei pionie.

E tamau mâua Randi i te faaite i “to muri atu uˈi” i ta Iehova “mau ohipa faahiahia,” e te tiaturi nei mâua e e oaoa ratou i te tavini ia Iehova mai ia mâua.—Sal. 71:17, 18.