1-2. O vai Zadoka? (Paraleipomeno 1, 12:22, 26-28)

 A FERURI na i te hoê nahoa rahi hau i te 340 000 tane tei ruru mai no te faaarii ia Davida i nia ia Iseraela taatoa. E toru mahana to ratou faaearaa i nia i te mau aivi i pihai iho ia Heberona, a ata haere ai, a paraparau ai e a himene ai i te mau arueraa ia Iehova. (Par. 1, 12:39) E tane apî atoa to rotopu ia ratou, o Zadoka te iˈoa. E rave rahi tei ore i ite to reira o Zadoka. O Iehova râ oia ïa. Te hinaaro ra oia ia ite tatou i te reira. (A taio i te Paraleipomeno 1, 12:22, 26-28.) O vai Zadoka?

² E tahuˈa Zadoka tei ohipa amui e o Abiatara te tahuˈa rahi. E taata tatara orama atoa o ˈna, a nehenehe atu ai oia e taa i te hinaaro o te Atua. (Sam. 2, 15:27) Ia hinaaro te nunaa i te aˈoraa î i te paari, e ani ratou ia Zadoka. Ua faatupu atoa oia i te itoito, o ta tatou ïa e hiˈopoa i roto i teie tumu parau.

3. (1) No te aha mea faufaa roa ia itoito te mau tavini a Iehova? (2) Eaha ta tatou e hiˈopoa i roto i teie haapiiraa?

³ I teie mau mahana hopea, mea taehae Satani i nia i te mau tavini a te Atua. (Pet. 1, 5:8) Mea faufaa roa ïa ia itoito tatou a tiai ai i te taime e haamou ai Iehova ia Satani e ta ˈna ao ino. (Sal. 31:24) E hiˈopoa tatou e toru ravea e pee ai tatou i te itoito o Zadoka.

 A TURU I TE FAATERERAA ARII A TE ATUA

4. No te aha e titauhia ˈi te itoito no te turu i te Faatereraa arii a te Atua? (A hiˈo atoa i te hohoˈa.)

⁴ Te turu roa nei tatou, te mau tavini a Iehova, i ta ˈna Faatereraa arii. Pinepine râ, e titauhia te itoito. (Mat. 6:33) Te itoito no te pee i te mau ture aveia a Iehova i roto i teie nei ao ino, e no te poro i te parau apî oaoa o te Faatereraa arii. (Tes. 1, 2:2) Te itoito atoa no te ore e faaô i roto i te mau ohipa poritita o te faaamahamaha. (Ioa. 18:36) Mea rahi te tavini a Iehova o te faaruru nei i te fifi i te pae moni, tei hamani-ino-hia aore ra tei hurihia i roto i te fare tapearaa, no te oreraa e apiti i te mau ohipa poritita aore ra e rave i ta ratou tau faehau.

5. No te aha i titauhia ˈi ia itoito Zadoka i te turu ia Davida?

⁵ E ere noa no te faaarii ia Davida i haere ai Zadoka i Heberona. Ua rave atoa oia i ta ˈna mau mauhaa tamaˈi no te aroraa. (Par. 1, 12:38) Ua ineine oia i te apee ia Davida i roto i te aroraa no te paruru ia Iseraela i te enemi. Aita paha Zadoka i tehu i te tamaˈi, e tane itoito roa râ oia.

6. No te aha e hiˈoraa itoito Davida no Zadoka? (Salamo 138:3)

⁶ Nohea mai te itoito o te tahuˈa ra o Zadoka? Ua matau o ˈna e rave rahi taata puai e te itoito. Papu e ua haafaufaa oia i to ratou hiˈoraa. Mai ia Davida o tei “aratai ia Iseraela i te tamaˈi” ma te itoito, a hinaaro atu ai te nunaa taatoa e faaarii ia ˈna. (Par. 1, 11:1, 2) Ua ani noa iho â Davida i ta Iehova tauturu i mua i te enemi. (Sal. 28:7; a taio i te Salamo 138:3.) Ua haafaufaa atoa Zadoka i te hiˈoraa itoito o Iehoiada e ta ˈna tamaiti o Benaia, e o na 22 raatira opu fetii o tei  apiti ia Davida. (Par. 1, 11:22-25; 12:​26-28) Ua faaoti papu ratou pauroa e faariro ia Davida ei arii no ratou e e paruru atoa ia ˈna.

7. (1) Eaha te haapii mai i te hiˈoraa o te feia apî i teie mahana? (2) Eaha ta oe i haapii mai ia taeae Nsilu i roto i te video?

⁷ E puai e e itoito tatou i te hiˈoraa o te mau tavini tei turu ma te itoito i ta Iehova faatereraa. Aita roa ˈtu to tatou Arii o Iesu i apiti i te mau ohipa poritita a te ao a Satani. (Mat. 4:8-11; Ioa. 6:14, 15) Ua ani noa oia i ta Iehova tauturu. Mea rahi atoa te hiˈoraa maitai i teie mahana o te feia apî tei tapea i to ratou tiaraa amui ore, aore ra tei ore i rave i ta ratou tau faehau. No te aha e ore ai e taio i ta ratou mau faatiaraa i nia i te jw.org? a

A TAUTURU I TO OE MAU TAEAE

8. I teihea taime e titauhia ˈi ia itoito te mau matahiapo no te tauturu i to ratou mau taeae e tuahine?

⁸ Mea tauturu roa te mau tavini a Iehova te tahi i te tahi. (Kor. 2, 8:4) E titauhia râ te itoito i te tahi taime. Ia tupu anaˈe te tamaˈi, ua ite te mau matahiapo e hinaaro roa to ratou mau taeae e tuahine i te faaitoitoraa, te tamahanahanaraa, e te tauturu i te pae varua aore ra no te oraraa. Noa ˈtu te atâta, e tauturu iho â te mau matahiapo no to ratou here rahi ia ratou. (Ioa. 15:12, 13) Te pee ra ratou i te itoito o Zadoka.

9. Ia au i te Samuela 2, 15:27-29, eaha ta Davida i parau ia Zadoka? (A hiˈo atoa i te hohoˈa.)

⁹ Ua hinaaro vetahi e haapohe ia Davida. Ua faaoti hoi ta ˈna tamaiti o Abasaloma e haru i te faatereraa. (Sam. 2, 15:​12, 13) Ua titauhia ïa ia faarue ru Davida i Ierusalema. Faaue atura oia i ta ˈna mau tia mana: “Mai e horo anaˈe, eita tatou  e ora ia Abasaloma!” (Sam. 2, 15:14) A horo ê ai râ ratou, taa ihora ia Davida e mea tano ia faaea mai te tahi taata i Ierusalema no te ite atu â i ta Abasaloma opuaraa. Faahoˈi maira ïa oia ia Zadoka e te tahi atu mau tahuˈa i Ierusalema ei mata huna. (A taio i te Samuela 2, 15:27-29.) Ia haapao maitai râ hoi ratou. E taata aroha ore e te taiva hoi Abasaloma o te haapao noa ia ˈna. E nehenehe ratou e haapohehia ia ite noa ˈtu Abasaloma e mata huna ratou o te paruru ia Davida!

10. Mea nafea Zadoka e te tahi atu i te parururaa ia Davida?

¹⁰ Faataa ˈtura Davida i ta ˈna opuaraa ia Zadoka e ia Husai te tahi atu hoa papu to ˈna. (Sam. 2, 15:32-37) Oia hoi ia haavare turu Husai ia Abasaloma e ia faataa ˈtu i te tahi ravea e noaahia ˈi Davida. Maoti teie ravea, e taime ïa to Davida no te faaineine ia ˈna. Ua faaroo Abasaloma i ta Husai aˈoraa. Faaara ˈtura ïa Husai ia Zadoka raua Abiatara. (Sam. 2, 17:8-16) E na raua i faaara ia Davida i muri iho. (Sam. 2, 17:17) Maoti Iehova i haere ai ia Zadoka e te tahi atu mau tahuˈa ia paruru ia Davida.—Sam. 2, 17:21, 22.

11. E nafea ia pee i te itoito o Zadoka a tauturu ai i to tatou mau taeae e tuahine?

¹¹ Ia anihia tatou ia tauturu i te mau taeae e tuahine i roto i te tahi mau tupuraa atâta, e nehenehe tatou e itoito mai ia Zadoka. E nafea? (1) A pee i te mau aratairaa. Mea faufaa ia vai hoê noa tatou. A auraro ïa i te mau aratairaa a te amaa. (Heb. 13:17) E hiˈopoa tamau te mau matahiapo i te mau faaueraa e nafea ia faaineine e eaha te rave ia tupu anaˈe te ati. (Kor. 1, 14:33, 40) (2) Ia itoito e ia haapao maitai. (Mas. 22:3) A  feruri na mua eaha te rave ia ore ia fifihia. (3) A tiaturi ia Iehova. A haamanaˈo e eita Iehova e hinaaro ia fifihia oe e to oe mau taeae. E nehenehe o ˈna e tauturu ia oe ia aupuru i to oe mau taeae.

12-13. Eaha ta oe e haapii mai i ta Viktor raua Vitalii i faaruru? (A hiˈo atoa i te hohoˈa.)

¹² A hiˈo na ia Viktor raua Vitalii. I Ukraine, ua anihia i teie na taeae ia faahoro i te maa e te pape na to raua mau taeae e tuahine. Te na ô ra Viktor: “Ua paimi mâua i te maa. Pinepine mâua i te faaroo i te taata ia tutuô. Ua horoa mai te hoê taeae i te maa, a fanaˈo atu ai e rave rahi taata poro i te maa no tau mahana. A faanaho ai mâua i te taihaa i roto i te pereoo, ua topa te hoê paura i pihai iho mai, aita râ i paaina. I te roaraa o taua mahana ra, ua horoa mai Iehova i te itoito no te tamau i te tauturu i te feia poro.”

¹³ Te na ô ra Vitalii: “Ua titauhia te itoito rahi. To ˈu tere matamua, 12 ïa hora. Ua pure au ia Iehova i tera mahana taatoa.” Ua haapao maitai atoa râ Vitalii. Te na ô ra oia: “Ua ani noa vau ia Iehova i te paari e te aau faahaihai. Ua na nia noa vau i te mau purumu faatiahia e te hau faatere. Ua puaihia to ˈu faaroo i to ˈu iteraa i te mau taeae e tuahine i te haa-amui-raa. Ua faaateatea ratou i te purumu, ua haaputu i te taihaa tauturu a faanaho atu ai i roto i te pereoo, e ua horoa mai na mâua i te maa e te vahi faafaaearaa.”

A VAI TAIVA ORE IA IEHOVA

14. Eaha to tatou huru ia faarue te hoê taata mea here na tatou ia Iehova?

¹⁴ Mea mauiui roa ia faarue te hoê mero utuafare aore ra hoa piri ia Iehova. (Sal. 78:40; Mas. 24:10) Mea fifi roa ˈtu â ia faaoromai i teie mauiui mai te peu mea here roa na tatou ia ˈna. Ua û anei oe i teie tupuraa? E nehenehe te taiva ore o Zadoka e faaitoito ia oe.

15. No te aha i titauhia ˈi ia Zadoka te itoito no te vai taiva ore ia Iehova? (Te mau arii 1, 1:5-8)

¹⁵ Ua vai taiva ore Zadoka ia Iehova i te taivaraa to ˈna hoa rahi o Abiatara, i te pae hopea o ta Davida faatereraa. Aita â Davida i pohe atura i te tamataraa ta ˈna tamaiti o Adonia i te haru i te terono ta Iehova i fafau e horoa ia Solomona. (Par. 1, 22:9, 10) Ua turu Abiatara ia Adonia. (A taio i Te mau arii 1, 1:5-8.) Ua taiva ïa Abiatara ia Davida e ia Iehova atoa. Eita e ore ua mauiui e ua peapea roa Zadoka! Hau atu hoi i te 40 matahiti to raua tavini-amui-raa ei tahuˈa. (Sam. 2, 8:17) Na raua i haapao i “te Afata a te Atua mau.” (Sam. 2, 15:​29) I turu na raua ia Davida to raua arii, e mea rahi atu â ta raua i rave a tavini ai ia Iehova.—Sam. 2, 19:11-14.

16. Eaha tei tauturu ia Zadoka ia vai taiva ore?

¹⁶ Ua vai taiva ore Zadoka noa ˈtu te taivaraa o Abiatara. Ua ite Davida e hoa papu Zadoka. I te iteraahia ta Adonia opuaraa, ua ani Davida ia Zadoka, Natana e Benaia ia faatavai ia Solomona ei arii. (Arii 1, 1:32-34) Eita e ore e ua itoitohia o Zadoka i te hiˈoraa o te tahi atu mau tavini taiva ore a Iehova, mai ia Natana tei turu ia Iehova e ia Davida. (Arii 1, 1:38, 39) I te riroraa Solomona ei arii, ua faatoroa oia ia “Zadoka te tahuˈa no te mono ia Abiatara.”—Arii 1, 2:35.

17. E nafea ia pee ia Zadoka ia taiva te hoê taata mea here na tatou ia Iehova?

 ¹⁷ E nafea ia pee i te hiˈoraa o Zadoka? Ia faarue te hoê taata herehia ia Iehova, a faaite maitai i ta oe faaotiraa. (Ios. 24:15) E horoa mai Iehova i te puai e te itoito. A turui i nia ia ˈna na roto i te pure e a amuimui noa i to oe mau taeae e tuahine. Mea faufaa roa no Iehova to oe taiva ore, e na ˈna oe e haamaitai.—Sam. 2, 22:26.

18. Eaha ta oe e haapii mai i to Marco raua Sidse hiˈoraa?

¹⁸ A hiˈo na ia Marco e ta ˈna vahine o Sidse. Ua faarue ta raua na tamahine i te parau mau. Te na ô ra Marco: “Mea here roa na oe ta oe mau tamarii mai to ratou fanauraahia mai. E paruru iho â oe ia ratou. No reira ia faarue ratou ia Iehova, mea mauiui roa.” Te na ô atoa ra oia: “Ua tauturu noa râ Iehova ia mâua. Inaha, ia paruparu anaˈe au, na ta ˈu vahine ïa e faaitoito mai. E ia paruparu anaˈe o ˈna, na ˈu ïa e faaitoito atu.” Te na ô ra tuahine: “Ahani aita Iehova i horoa mai i te puai, eita e haere ia mâua ia faaoromai. Ua faahapa noa hoi au ia ˈu. Faaite ihora ïa vau ia Iehova i to ˈu huru aau. Aita i maoro, haere maira te hoê tuahine a tahi ra mâua e farerei faahou ai. Tapea maira oia i to ˈu tapono e parau maira: ‘Haamanaˈo Sidse, e ere no oe te hape!’ Maoti ta Iehova tauturu, ua tavini noa vau ia ˈna ma te oaoa.”

19. Ia faaoti papu oe i te aha?

¹⁹ Te hinaaro ra Iehova ia itoito ta ˈna mau tavini mai ia Zadoka. (Tim. 2, 1:7) Te hinaaro atoa ra oia ia turui tatou i nia ia ˈna, eiaha râ i nia i to tatou iho puai. No reira, i mua i te tahi tupuraa e titauhia te itoito, a fariu ia Iehova ra. E horoa mai iho â o ˈna i te hoê â itoito e to Zadoka!—Pet. 1, 5:10.