TUMU PARAU HAAPIIRAA 38
“A haere mai ia ˈu nei . . . na ˈu e tamahanahana ia outou”
“A haere mai ia ˈu nei outou atoa e rohirohi e e teimaha nei, na ˈu e tamahanahana ia outou.”—MAT. 11:28.
HIMENE 17 “E tia ia ˈu”
HAAPOTORAA *
1. Ia au i te Mataio 11:28-30, eaha ta Iesu i fafau mai?
UA PARAU Iesu: “A haere mai ia ˈu nei . . . na ˈu e tamahanahana ia outou.” (A taio i te Mataio 11:28-30.) E parau fafau faahiahia mau ta ˈna i faahiti i mua i te nahoa e faaroo ra ia ˈna. E auraa to teie parau fafau. E feruri anaˈe na i ta Iesu i rave no te hoê vahine maˈi tapahi.
2. Eaha ta Iesu i rave no te vahine maˈi tapahi?
2 Ua hepohepo roa tera vahine i te imi-noa-raa i te tauturu. Ua farerei oia e rave rahi taote no te rapaau ia ˈna. 12 matahiti te maoro aita â to ˈna maˈi i ora. Ia au i te ture a Mose, e mea viivii oia. (Lev. 15:25) Faaroo atura te vahine e tia ia Iesu ia faaora i te feia e mauiui ra, haere atura o ˈna e imi ia Iesu. I to ˈna iho â tapearaa i te hiti ahu o Iesu, ora roa aˈera to ˈna maˈi. Aita Iesu i faaora noa ia ˈna, ua faaite atoa ˈtu râ i te faatura ma te parau atu: “Ta ˈu tamahine.” Auê ïa parau tamahanahana e faaitoito no teie vahine!—Luka 8:43-48.
3. Eaha te mau uiraa ta tatou e pahono mai?
3 A feruri na ua tutava teie vahine i te haere ia Iesu ra. I teie atoa mahana, e titauhia ia tutava tatou i te “haere” ia Iesu ra. Noa ˈtu eita Iesu e faaora i te maˈi o te feia e “haere mai,” te tamau noa râ oia i te parau: “A haere mai ia ˈu nei . . . na ˈu e tamahanahana ia outou.” I roto i teie tumu parau haapiiraa, e pahono tatou i teie na uiraa e pae: E nafea tatou e “haere” ai ia Iesu ra? Eaha te auraa a parau ai Iesu: “A rave mai i ta ˈu zugo i nia ia outou”? E nafea tatou e faufaahia ˈi? No te aha mea tamahanahana te ohipa ta ˈna i faaue mai? E nafea tatou e tamauhia ˈi i te tamahanahana i raro aˈe i te zugo a Iesu?
“A HAERE MAI IA ˈU NEI”
4-5. E nafea tatou e nehenehe ai e “haere” ia Iesu ra?
4 No te “haere” ia Iesu ra, e titauhia ia tatou ia ite i ta ˈna i parau e i rave. (Luka 1:1-4) E tia ïa ia tatou ia haapii i ta te Bibilia e parau ra no nia ia Iesu. E “haere” atoa tatou ia Iesu ra ia bapetizohia e ia riro tatou ei pǐpǐ na ˈna.
5 No te “haere” atoa ia Iesu ra e titauhia ia faafatata ˈtu i te mau matahiapo no te ani i te tauturu. Te faaohipa nei Iesu i teie mau “taata ei ô” no te haapao i ta ˈna mau mamoe. (Eph. 4:7, 8, 11; Ioa. 21:16; Pet. 1, 5:1-3) E imi ïa tatou i ta ratou tauturu. Eita ratou e ite eaha to tatou mau manaˈo e te mea ta tatou e hinaaro ra. Te na ô ra te hoê taeae o Julian te iˈoa: “No to ˈu maˈi, ua titauhia ia ˈu ia vaiiho i ta ˈu taviniraa i te Betela. Ua parau mai te tahi hoa ia ani i te tauturu a te mau matahiapo. Na mua roa, ua manaˈo vau aita e faufaa. I muri aˈe râ, riro atura taua farereiraa ei mea faufaa roa no ˈu.” E tauturu mai te mau matahiapo taiva ore, mai na taeae e piti tei farerei ia Julian, ia ite i “te manaˈo o te Mesia,” oia hoi ia taa i to ˈna manaˈo e ia pee i to ˈna hiˈoraa. (Kor. 1, 2:16; Pet. 1, 2:21) Hoê tera o te mau ô faufaa roa ˈˈe ta te mau matahiapo e nehenehe e horoa mai.
“A RAVE MAI I TA ˈU ZUGO I NIA IA OUTOU”
6. Eaha te auraa a parau ai Iesu: “A rave mai i ta ˈu zugo i nia ia outou”?
6 A parau ai Iesu: “A rave mai i ta ˈu zugo i nia ia outou,” te parau ra oia “A farii ia aratai au ia oe.” Aore ra “A haere mai i raro aˈe i ta ˈu zugo e o vau, e e ohipa taua no Iehova.” Te auraa, e tia ïa ia tatou ia ohipa.
7. Ia au i te Mataio 28:18-20, eaha te ohipa i faauehia mai e eaha ta tatou i papu?
7 Ua farii tatou i ta Iesu titau-manihini-raa a pûpû ai tatou i to tatou ora ia Iehova e a bapetizohia ˈtu ai. Te titau manihini nei Iesu i te taata atoa, e eita oia e tiahi i tei hinaaro mau e tavini i te Atua. (Ioane 6:37, 38) Ua nehenehe te mau pǐpǐ atoa a te Mesia e apiti i te ohipa ta Iehova i faaue ia Iesu ia rave. Mea papu ïa, te pihai iho noa Iesu ia tatou no te tauturu mai.—A taio i te Mataio 28:18-20.
“IA HAAPIIHIA OUTOU E AU”
A faaitoito ia vetahi ê mai ta Iesu i rave (A hiˈo i te paratarafa 8-11) *
8-9. No te aha te feia haehaa e faafatata ˈtu ai ia Iesu e eaha ta tatou e uiui ia tatou iho?
8 E faafatata ˈtu te feia haehaa ia Iesu. (Mat. 19:13, 14; Luka 7:37, 38) No te aha? Mea taa ê Iesu i te mau Pharisea. E feia aroha ore ratou e te teoteo. (Mat. 12:9, 14) Area Iesu, mea î ïa i te here e te haehaa. Mea au roa na te mau Pharisea ia itehia ratou e mea faateitei atoa i mua i te taata. Aita Iesu i faaitoito i tera huru haerea, ua haapii râ i ta ˈna mau pǐpǐ ia riro ei tavini haehaa. (Mat. 23:2, 6-11) Te faatere ra te mau Pharisea ma te haamǎtaˈu e te haavî. (Ioa. 9:13, 22) Area Iesu, te tamǎrû ra ïa maoti te parau maitai e ta ˈna mau ohipa î i te here.
9 Ua faufaahia anei outou i teie mau haapiiraa a Iesu? A uiui ia outou iho: “E taata maitai anei au? E taata mǎrû anei e te haehaa? Mea au anei na ˈu e tavini ia vetahi ê ma te rave i te mau ohipa riirii?”
10. Eaha te tupuraa ta Iesu i haafanaˈo i te feia e ohipa ra e o ˈna?
10 E tupuraa hau e te mahanahana ta Iesu i haafanaˈo i te feia e ohipa ra e o ˈna. Ua oaoa oia i te haapiiraa ia ratou. (Luka 10:1, 19-21) Ua faaitoito oia i ta ˈna mau pǐpǐ ia ui haere e ua hinaaro atoa e ite i to ratou manaˈo. (Mat. 16:13-16) Mai te mau tiare ra i roto i te fare vairaa tiare, ua ruperupe atoa mai te mau pǐpǐ. Ua haapao maite ratou i ta Iesu mau haapiiraa e ua hotu atoa na roto i ta ratou mau ohipa maitatai.
Ei taata auhoa e te ohie i te faafatata ˈtu
Ei taata ohipa e te taiva ore
Ei taata haehaa e te itoito rahi *
11. Eaha ta tatou e nehenehe e uiui ia tatou iho?
11 E hopoia anei ta outou? Mai te peu e e, a uiui ia outou iho: “Eaha to ˈu huru i nia ia vetahi ê i te fare aore ra i te ohipa? E taata faatupu hau anei au? Te faaitoito ra anei au ia vetahi ê ia uiui haere? Te faaroo ra anei au i to te tahi manaˈo?” Eiaha roa tatou ia riro mai te mau Pharisea tei hae i te feia i uiui ia ratou e o tei hamani ino i te taata mea taa ê to ratou manaˈo.—Mar. 3:1-6; Ioa. 9:29-34.
“E ITE ÏA OUTOU I TE TAMAHANAHANARAA”
12-14. No te aha mea tamahanahana ia rave i te ohipa ta Iesu i faaue mai?
12 No te aha mea tamahanahana ia rave i te ohipa ta Iesu i faaue mai? Mea rahi te tumu, e hiˈopoa noa mai râ tatou i te tahi.
13 Tei ia tatou ra te mau tiaau maitai roa ˈˈe. Noa ˈtu o Iehova te Teitei roa, e ere oia i te fatu haavî e te mauruuru ore. Te haafaufaa nei oia i te ohipa a ta ˈna mau tavini. (Heb. 6:10) Te horoa mai ra oia i te puai titauhia no te amo i ta tatou hopoia. (Kor. 2, 4:7; Gal. 6:5) Mai ia Iehova, te faatere ra Iesu, to tatou Arii, ma te hiˈoraa maitai roa. (Ioa. 13:15) E te tutava ra te mau matahiapo i te pee ia Iesu, “te tiai mamoe rahi” a aupuru ai ratou ia tatou. (Heb. 13:20; Pet. 1, 5:2) Te tutava ra ratou i te faaitoito e i te faaite i te maitai, e mea itoito atoa no te aupuru ia tatou.
14 E hoa rahi mau â to tatou. Aita ˈtu e hoa here e ohipa faufaa aˈe i teie. A feruri na, te ohipa ra tatou e te mau taeae e tuahine haerea maitai roa ˈˈe. Aita ratou e manaˈo ra e mea maitai aˈe ratou ia vetahi ê. Mea aravihi ratou e te faateitei ore. E ere tatou i te hoa ohipa noa no ratou, e hoa rahi atoa râ. Mea puai mau â to ratou here e ua ineine roa i te haapae i to ratou ora no tatou.
15. Eaha to tatou manaˈo no nia i ta tatou ohipa?
15 Te rave nei tatou i te ohipa maitai roa ˈˈe. Te haapii nei tatou i te taata i te parau mau no nia ia Iehova e te faaite atoa ra i te mau parau haavare a te Diabolo. (Ioa. 8:44) Te faateimaha nei Satani i te taata i te mau hopoia e ore e maraa ia ratou. Te hinaaro ra oia ia tiaturi tatou eita Iehova e faaore i ta tatou mau hara e eita e tia ia ˈna ia here ia tatou. Auê ïa parau teimaha e te haavare rahi! I te haereraa mai tatou ia Iesu ra, ua faaorehia ta tatou mau hara. E te here mau atoa ra Iehova ia tatou paatoa. (Roma 8:32, 38, 39) Mea oaoa mau â ia haapii i te taata ia turui i nia ia Iehova e ia ite atoa te maitai ra to ratou oraraa!
E ITOITOHIA TATOU I RARO AˈE I TE ZUGO A IESU
16. E nafea te ohipa ta Iesu i faaue mai e taa ê ai i te mau ohipa atoa ta tatou e rave?
16 Mea taa ê roa te ohipa ta Iesu i faaue mai i te mau ohipa atoa ta tatou e rave. A feruri na, ia hope te hoê mahana ohipa, e rohirohi roa e e mauruuru ore te taata e rave rahi. Area râ, ia tavini tatou ia Iehova e i te Mesia, e oaoa tatou. E rohirohi paha tatou ia hoˈi mai na te ohipa e e faaitoito tatou i te haere i te putuputuraa. Te rahiraa râ o te taime, ia hoˈi mai tatou i te fare ua itoitohia tatou. Hoê â atoa ia haere tatou i roto i te pororaa e ia rave i ta tatou iho haapiiraa Bibilia. Ia tutava tatou i te na reira, e rahi aˈe to tatou oaoa e e itoito atu â tatou.
17. Eaha te titauhia ia tatou ia farii?
17 E titauhia ia farii e ere hoê â puai to te taata atoa. E faaite ïa tatou i te paari a ohipa ˈi. E nehenehe to tatou taime e mâuˈa i te haaputuraa i te taoˈa materia. A tapao na i ta Iesu i parau i te taata taoˈa rahi tei ani atu: “Eaha ta ˈu e rave e noaa ˈi ia ˈu te ora mure ore?” Ua haapao hoi teie taata i te ture a Mose. E taata maitai atoa oia, i faahiti ai te evanelia a Mareko ua “hiˈo ihora Iesu ia ˈna ma te here.” Ua titau manihini Iesu ia ˈna ma te na ô atu: “A haere a hoo i ta oe mau taoˈa, . . . e a pee mai ia ˈu.” Oto ihora taua taata ra, aita hoi i tia ia ˈna ia hoo i “ta ˈna faufaa” no te pee ia Iesu. (Mar. 10:17-22) Aita o ˈna i farii i te zugo ta Iesu i pǔpǔ atu e ua tamau oia i te tavini i “te moni.” (Mat. 6:24) E outou, eaha ta outou e maiti?
18. Eaha te titauhia ia rave i te tahi taime, e no te aha?
18 I te tahi taime mea titauhia ia hiˈopoa eaha te mea faufaa roa ˈˈe o to tatou oraraa. No te aha? No te ite te faaohipa ra iho â tatou i to tatou puai ma te paari. A tapao na i ta Mark i parau: “I manaˈo noa na vau e oraraa haihai to ˈu. E pionie hoi au, mea puai râ to ˈu manaˈo i te moni e e nafea to ˈu oraraa ia maitai atu â. Taa ihora ia ˈu e te haapao noa ra vau ia ˈu iho, aita râ i horoa i te taime e te puai no Iehova.” Ua taui Mark i to ˈna huru oraraa no te tavini atu â ia Iehova. Te na ô ra oia: “I te tahi taime e hepohepo â vau, maoti râ te tauturu a Iehova e Iesu ua tia ia ˈu ia faaruru.”
19. No te aha e mea faufaa ia tiatonu i te tavini ia Iehova?
19 E itoito-noa-hia tatou i raro aˈe i te zugo a Iesu a rave ai i na ohipa e toru. A tahi, e tiatonu tatou i te tavini ia Iehova. Te rave ra hoi tatou i te ohipa a Iehova, e tia iho â ïa ia rave ia au i ta ˈna faaueraa. E rave ohipa tatou e o Iehova te fatu ohipa. (Luka 17:10) Ia rave tatou mai ta tatou i manaˈo, e haafifi tatou i te ohipa. E au tatou i te hoê puaatoro puai e haamauiui e e faarohirohi ra ia ˈna iho i te tamauraa i te haere i to ˈna haereraa ma te patoi i te aratairaa a to ˈna fatu. Ia pee tatou i ta Iehova aratairaa, e nehenehe tatou e rave e e faaruru i te mau mea manaˈo-ore-hia. A haamanaˈo eita e mau i te taata ia tapea ia tupu ta Iehova opuaraa!—Roma 8:31; Ioa. 1, 4:4.
20. Eaha te turai ia tatou ia ohipa ma te manaˈo tano?
20 A piti, e ohipa tatou ma te manaˈo tano. Ta tatou fa, te faahanahanaraa ïa i to tatou Metua î i te here ra o Iehova. I to Iesu tau, ua mauruuru ore e ua faarue te feia i imi i to ratou iho maitai i te zugo a Iesu. (Ioa. 6:25-27, 51, 60, 66; Phil. 3:18, 19) Area vetahi feia, no to ratou here taiva ore i te Atua e i to ratou taata tupu, ua tamau ïa i te amo i ta ratou hopoia ma te tiaturi e tavini atu â i te raˈi i pihai iho ia Iesu. Mai ia ratou, e oaoa atoa tatou ia ohipa ma te manaˈo tano.
21. Ia au i te Mataio 6:31-33, eaha ta tatou e tiaturi papu?
21 A toru, e tiaturi tatou to pihai iho Iehova ia tatou. Ua maiti tatou i te hoê oraraa haapae e te ohie ore. Ua faaara mai hoi Iesu e hamani-ino-hia tatou. E tiaturi anaˈe râ e horoa mai Iehova i te puai no te faaruru i te fifi. Rahi atu â tatou i te faaoromai, rahi atu â tatou i te puai. (Iak. 1:2-4) E tiaturi atoa anaˈe e turu mai iho â Iehova, e aupuru mai Iesu e e faaitoito atoa mai to tatou mau taeae e tuahine. (A taio i te Mataio 6:31-33; Ioa. 10:14; Tes. 1, 5:11) Eaha atu â ta tatou e hinaaro?
22. Eaha ta tatou e mauruuru?
22 Ua itoitohia te vahine maˈi tapahi i te taime a faaora ˈi Iesu ia ˈna. E noaa râ ia ˈna te itoito e a muri noa ˈtu ahiri oia i riro mai ei pǐpǐ taiva ore na Iesu. Ia maiti noa ˈtu o ˈna i te haere i raro aˈe i ta Iesu zugo, e tavini ïa oia i te raˈi i pihai iho ia Iesu! E faufaahia ïa oia i te mau haapaeraa atoa ta ˈna i rave. Te tiaturi ra anei tatou e ora i te raˈi aore ra i te fenua nei, e mauruuru mau tatou i te fariiraa i ta Iesu titau-manihini-raa: “A haere mai ia ˈu nei”!
HIMENE 13 Te Mesia to tatou hiˈoraa
^ Te titau manihini nei Iesu ia tatou ia haere mai ia ˈna ra. No te aha e titauhia ia farii i ta ˈna titau-manihini-raa? E pahono teie tumu parau haapiiraa i taua uiraa ra e e haamanaˈo atoa mai no te aha mea tamahanahana ia rohi tatou e o Iesu Mesia.